1-2. Sar šaj te primenina o savet ando Poslovice 4:25? Vaćer jekh primer.

ZAMISLIN akala primerija. I phen koja tani ko berša setini pe ko šukar vreme andi olaki prošlost. Iako olako životi tano akana popharo, oj trudini pe te ćerel sa so šaj aso Jehova (1. Kor. 15:58). Svako dive oj zamislini sar ka živini pe porodicaja hem pe amalencar ko raj ano nevo sveto. A jekh aver phen kas neko andi skupština povredinđa, na mangela te ićeri i holi ano peste (Kol. 3:13). Jekh phral tano svesno so ćerđa greške ki prošlost, ama odlučno tano akana te aćhol verno e Jehovase (Ps. 51:10).

² Soj tano zajedničko ko akala trin primerija? Svako olendar pamtini so hine angleder, ama niko olendar na živini ki prošlost. Umesto odova, on „dikhena pravo anglal“ ki budućnost. (Čitin Poslovice 4:25.)

3. Sose valjani te dikha „pravo anglal“ ki budućnost?

³ Sose tano važno te dikha „pravo anglal“ ki budućnost? Sar so našti te phira pravo anglal ako stalno irinaja amen te dikha palal, isto ađahar našti te da sa amendar ki služba e Jehovase ako stalno irinaja amen ki prošlost (Luka 9:62).

4. Sostar ka vaćera ko akava članko?

⁴ Ko akava članko ka vaćera ando trin zamke kola šaj te ćhiven amen te živina ki prošlost. * I prvo tani stalno te razmislina ando odova sar živinđam angleder. I dujto tani te ićera i holi ano amende. Hem i trito tani te ovel amen but baro  osećaj andi krivica. Isto ađahar, ka dikha sar e biblijake načelija šaj te pomožinen amen te na dikha „okova soj tano palo amende“, već „okova soj tano anglo amende“ (Fil. 3:13).

5. Ki koja zamka upozorini amen Propovednik 7:10?

⁵ Čitin Propovednik 7:10. Zapazin so ko akava stiho na phenela pe soj tano pogrešno te puće tut: „Sose o dive kola nakhlje hine šukar?“ Sose o šuže uspomene tane dar ando Jehova. Umesto odova, o stiho phenela: „Ma vaćer: ’Sose o dive kola nakhlje hine pošukar ando akala?‘“ Avere lafencar, i zamka garavi pe ko odova te uporedina o okolnostija kola isi amen akana odoleja so hine angleder hem te mislina so tegani živinđam pošukar.

6. Sose nane mudro te mislina so angleder živinđam pošukar nego li akana? Vaćer jekh primer.

⁶ Sose nane mudro te mislina so angleder živinđam pošukar nego li akana? Ked razmislinaja ando odova sar živinđam angleder, šaj setinaja amen samo ko šukar buća andi amari prošlost, a ki aver strana tiknjaćeraja o problemija kola hine amen. Hajde te dikha e Izraelcengo primer. Palo odova so ikljilje ando Egipat, but sigate bisterđe kobor olengo životi hine pharo uduri. Umesto odova, on razmislinđe samo andi hrana koja hine len uduri. On vaćerđe: „Šukar setinaja amen sar ko Egipat bizo pare haljam maćhe hem krastavcija, bostanija, prazo, purum hem sir!“ (Br. 11:5). Ama, da li ćaće halje sa odija hrana „bizo pare“? Na. On but skupo platinđe odija hrana, sose tegani hine mučime đi ćerđe sar robija phari buti ko Egipat (Izl. 1:13, 14; 3:6-9). Ipak, on bisterđe ko odola pharipa hem žalinđe asi prošlost. Umesto te razmislinen ando šukar buća kola o Jehova ćerđa lenđe, on stalno razmislinđe ando „šukar životi kova hine len angleder.“ E Jehovase na sviđinđa pe olengo stav (Br. 11:10).

7. So pomožinđa amare phenjaće te na razmislini stalno ando odova sar živinđa angleder?

⁷ So ka pomožini amen te na pera ki zamka stalno te razmislina ando odova sar živinđam  angleder? Hajde te dikha o primer andi amari phen koja ko 1945. berš, počminđa te služini ko Betel, ko Bruklin. Nekobor berš palo odova, oj ženinđa pe jekhe phraleja ando Betel hem odothe služinđe beršencar. Ama, ko 1976. berš, olako rom naborsalo. Ked haljilo so pana hari ka merel, ov dinđa laće savetija sar te borini pe ked ov više na ka ovel. Ov phenđa laće: „Amen hine amen bahtalo brako. But manuša na hine len odova.“ Ov pana phenđa laće: „Ma živin ki prošlost, iako uvek ka ovel tut uspomene. O vreme ka saćari te rane. Ma ov ogorčeno hem ma žalin kokri tut. Ov bahtali aso vreme kova hine amen đi zajedno služinđam e Jehovase. O uspomene tane dar ando Devel.“ Da li slažineja tut so odola hine šukar savetija?

8. Sar amare phenjaće pomožinđe o savetija kola dinđa laće olako rom?

⁸ Amari phen primeninđa o savetija kola dinđa laće olako rom. Oj verno služinđa e Jehovase sa đi na mulji ked hine la 92 berš. Nekobor berš angleder te merel, oj phenđa: „Ked razmislinava ando 63 berš, kobor služinđum e Jehovase ki punovremeno služba, šaj te phenav so ćaće hine man but bahtalo životi.“ Sose? Oj objasnini: „Odova so jekh životi ćerela bahtalo tane amare phralja hem phenja, kola tane ko jekhipe hem i nada so zajedno olencar ka živina ko raj hem so večno ka služina amare Veličanstveno Stvoriteljese, e jedino ćaćutne Devlese.“ * Amen but šaj te sikljova andi akija phen koja razmislinđa ando e Jehovase obećanja!

9. Premali Levitska 19:18, ked šaj te ovel amenđe but pharo te na ićera holi ano amende?

⁹ Čitin Levitska 19:18. But tano pharo te na ićere holi ano tute ked povredini tut neko andi skupština, to paše amal ja neko andi ti  porodica. Na primer, jekh phen optužinđa avere phenja so ćorđa latar pare. Ked i phen haljilji so grešinđa, oj izvininđa pe laće. Ama, i phen koja hine nepravedno optužimi hine odobor holjami so na manglja te oprostini laće. Da li iked osetinđan tut ađahar? Šaj na desinđa pe amenđe isto odova, ama but amendar ićerđam holi ano amende hem mislinđam so niked na ka oprostina okolese kova povredinđa amen.

10. So šaj te pomožini amen te na ićera i holi ano amende?

¹⁰ So šaj te pomožini amen te na ićera i holi ano amende? Sar prvo, na valjani te bistre so o Jehova sa dikhela. Ov dikhela sa so desini pe amenđe hem o nepravedna buća kola doživinaja (Jevr. 4:13). Olese tano pharo ked amen patinaja (Is. 63:9). Ama, ov obećini amenđe so ki budućnost ka cidel svako dukh koja osetinaja sebepi o nepravedna buća kola doživinđam (Otkr. 21:3, 4).

11. Sose tano šukar te na ićera i holi ano amende?

¹¹ Isto ađahar, valjani te đana so ka osetina amen pošukar ked ka oprostina averenđe. Odova haljilji i phen koja hine nepravedno optužimi. Sar đelo o vreme, oj više na ićerđa i holi ano peste. Haljilji so o Jehova ka oprostini amenđe ako amen oprostinaja averenđe (Mat. 6:14). Ki aver strana, oj na tiknjaćerđa odova so ćerđa laće i phen, niti opravdinđa odova, ama birinđa te na ićeri i holi ano peste. Sebepi odova, amari phen hine pobahtali hem šajinđa te usredsredini pe ki pi služba e Jehovase.

12. So sikljovaja andi 1. Jovanova 3:19, 20?

¹² Čitin 1. Jovanova 3:19, 20. Sare amen podijekh puti mučini o osećaj andi krivica. Na primer, disave manuša osetinena pe ađahar sebepi o buća kola ćerđe angleder so penđarđe o ćaćipe. A avera osetinena pe ađahar sebepi o greške kola ćerđe palo krštenje. Odova tano normalno (Rimlj. 3:23). Naravno, amen mangaja te ćera odova soj tano ispravno. Ama „sare često grešinaja“ (Jak. 3:2; Rimlj. 7:21-23). Iako na uživinaja ked mučini amen o osećaj andi krivica, podijekh puti odova tano šukar. Sose? Sose asavko osećaj šaj te podstaknini amen te menjina amen hem te na ponovina amare greške (Jevr. 12:12, 13).

13. Sose valjani te arakha amen ando but baro osećaj andi krivica?

¹³ Ki aver strana, šaj te ovel amen but baro osećaj andi krivica ili te osetina so hijam kriva, iako pokajinđam amen hem iako o Jehova mothovđa so oprostinđa amenđe. Asavko osećaj nane šukar (Ps. 31:10; 38:3, 4). Sar odova? Hajde te dikha o primer andi jekh phen koja hine la o osećaj andi krivica sebepi o grehija kola ćerđa angleder. Oj phenđa: „Mislinđum so na valjani te trudinav man ki služba e Jehovase sose hem ađahar maje tano kasno.“ But amendar šaj osetinaja amen sar akija phen. Ama, but tano važno te arakha amen andi odija zamka te ovel amen but baro osećaj andi krivica. Zamislin kobor bi o Beng ovela bahtalo ked bi amen vazdaja amare vasta amendar, iako o Jehova na vazdinđa pe vasta amendar! (Uporedin e stihonencar andi 2. Korinćanima 2:5-7, 11).

14. Sar šaj te ova sigurna so o Jehova na vazdinđa pe vasta amendar?

¹⁴ Ama, šaj pućaja amen: „Sar šaj te ovav sigurno so o Jehova na vazdinđa pe vasta mandar?“ Šaj te phena so ko akava pućibe bešela hem o odgovor. Beršencar angleder, ki jekh Stražarsko kula pisinđa: „Šaj but putija ćeraja jekh isto greška hem šaj mislinaja so našti te pobedina ki odija borba... Ama, na  valjani te našale ti nada. Ma mislin so ćerđan odobor baro greh so o Jehova našti te oprostini tuće. O Satana bi mangela baš ađahar te misline. Ked ćereja dijekh greh tu hijan tužno hem holjamo upro tute, ama sa odova mothovi so na hijan lošno osoba hem so o Jehova ka oprostini tuće. Aćhov ponizno hem ponodri molin tut o Devel te oprostini tuće hem te pomožini tuće palem te ovel tut čisto savest hem te na ponovine palem isto greška. Bizo obzir kobor putija vaćereja oleja sebepi isto greška, ov sar ćhavo kova vaćeri pe dadeja ked isi le dijekh problemi. Ov odlučno te rode ando Jehova pomoć hem ov ka pomožini tuće.“

15-16. Sar disave osetinđe pe ked haljilje so o Jehova na vazdinđa pe vasta olendar?

¹⁵ But e Jehovase sluge hine utešime ked haljilje so o Jehova na vazdinđa pe vasta olendar. Na primer, angleder nekobor berš, jekhe phrale ohrabrinđa o iskustvo andi rubrika „Biblija menja živote.“ Ko članko vaćeri pe andi jekh phen, kolaće sebepi o lošna buća kola ćerđa angleder, hine pharo te verujini so o Jehova volini la. Asavke osećanja mučinđe la beršencar palo krštenje. Ama, ked počminđa hor te razmislini andi otkupnina, oj počminđa averćhane te dikhel ko buća. *

¹⁶ Sar olako iskustvo pomožinđa e phralese? Ov pisinđa: „Sar terno, hijum le zavisnik andi pornografija. Akana sigende, palem hine man odova problemi. Odolese, rodinđum pomoć ando starešine hem hari po hari borinava man odole problemeja. O starešine uverinđe man ko e Devleso mangipe hem milosrđe. Ama, podijekh puti, pana osetinava man so na vredinava ništa hem so o Jehova našti te volini man. O primer [andi akija phen] ćaće pomožinđa maje. Akana haljovava so ked mislinava so o Devel našti te oprostini maje, odova tano samći phenava so i žrtva ando oleso Ćhavo nane dovoljno te ućhari me grehija. Ćhivđum akava članko uzalo mande te šaj uvek te čitinav le hem hor te razmislinav olestar, uvek ked mislinava so na vredinava ništa.“

17. So pomožinđa e Pavlese te na perel ki zamka te ovel le but baro osećaj andi krivica?

 ¹⁷ Asavke iskustvija podsetinena amen upro apostol Pavle. Angleder so ulo hrišćanin, ov ćerđa but ozbiljna grehija. Ov na bisterđa so ćerđa, ama na razmislinđa stalno odolestar (1. Tim. 1:12-15). Umesto odova, ov upri otkupnina dikhlja sar upro dar kova tano lese lično dindo (Gal. 2:20). Ov na pelo ki zamka te ovel le but baro osećaj andi krivica. Umesto odova, o Pavle dinđa sa pestar te služini e Jehovase najšukar so šaj.

18. Kola trin buća sikljiljam ko akava članko?

¹⁸ Kola trin buća sikljiljam ko akava članko? Sar prvo, o šuže uspomene tane dar ando Jehova. Ama, bizo obzir kobor šukar živinđam angleder, amari budućnost ko nevo sveto ka ovel pana pošukar. Sar dujto, avera šaj te povredinen amen, ama ako odlučinaja te oprostina lenđe, ka uspina te usredsredina amen ko avera buća. Hem sar trito, but baro osećaj andi krivica šaj te sprečini amen radosno te služina e Jehovase. Odolese, sar o Pavle, hem amen valjani te verujina so o Jehova oprostinđa amenđe.

19. Sar đanaja so ko nevo sveto na ka setina amen nisostar so bi ćerela amen tužna?

¹⁹ Amen isi amen mogućnost te živina večno. Tegani, na ka setina amen nisostar so bi ćerela amen tužna. I Biblija ando akava vreme phenela: „Okova so hine anglal na ka avel ki godi“ (Is. 65:17). Zamislin samo: Iako disave amendar phurilje đi služinđe e Jehovase, ko nevo sveto, palem ka ova terne (Jov 33:25). Odolese, hajde te ova odlučna te na živina ki prošlost. Umesto odova, hajde te usmerina amaro pogled ki budućnost ko nevo sveto hem akana te da sa amendar te ova uduri.