1. So ka del amen uteha ked osetinaja amen so hijam kokri ja ked ućharena amen o problemija? (Psalam 118:5-7)

DA LI iked osetinđan tut so hijan kokri, so nane niko ko te pomožini tuće te borine tut te problemencar? But manuša, ama hem disave verna e Jehovase sluge, osetinđe pe baš ađahar (1. Kralj. 19:14). Ako iked ka osetine tut ađahar, ma te bistre so o Jehova obećinđa tuće: „Niked na ka aćhavav tut hem niked na ka irinav tuće mo dumo.“ Odolese šaj hrabro te phena: „O Jehova tano mo pomoćniko, na ka darav“ (Jevr. 13:5, 6). Akala lafija o apostol Pavle pisinđa e phralenđe hem e phenjenđe ki Judeja oko 61. berš ki nevi era. Olese lafija podsetinena amen ko odova so pisini ko Psalam 118:5-7. (Čitin.)

2. So ka razmotrina ko akava članko hem sose?

² Sar o psalmista, o Pavle kotar po iskustvo đanđa so o Jehova hine oleso pomoćniko. Na primer, oko duj berš angleder so ka pisini o lil e Jevrejenđe, đi putujinđa brodoja, o Pavle doživinđa jekh strašno oluja (Dela 27:4, 15, 20). Ði putujinđa, ama hem beršencar angleder odova, o Jehova ko razna načinija pomožinđa e Pavlese. Akana ka razmotrina trin olendar. Sar prvo, ov ćerđa odova prekalo Isus hem prekalo anđelija. Sar dujto, prekalo manuša ki vlast. Hem sar trito, prekalo phralja hem phenja. Odova so ka razmotrina akala događaja ando e Pavleso životi, ka pomožini amen pana pobuter te ova uverime so o Devel hem amenđe ka pomožini ked rodaja pomoć olestar.

3. So o Pavle šaj pućlja pe hem sose?

³ E Pavlese valjanđa pomoć. Oko 56. berš ki nevi era, ko Jerusalim astarđa le i rulja, legarđa le ando hram hem pokušinđa te mudari le. Tajsato dive, ked o Pavle hine anglo Sinedrion, olese neprijateljija manglje te ćeren le ko kotora (Dela 21:30-32; 22:30; 23:6-10). Tegani, o Pavle šaj pućlja pe: „Kobor pana šaj te izdržinav akava?“

4. Sar o Jehova pomožinđa e Pavlese prekalo Isus?

⁴ Savi pomoć o Pavle dobinđa? I rat palo odova so o Pavle hine phanlo, „o Gospod“, o Isus, pojavinđa pe lese hem phenđa: „Ov hrabro! Sose sar so ko Jerusalim temeljno svedočinđan mandar, ađahar valjani te svedočine hem ko Rim“ (Dela 23:11). Odova ohrabrenje alo ko pravo vreme! O Isus pohvalinđa e Pavle aso svedočanstvo kova dinđa ko Jerusalim. Isto ađahar, obećinđa lese so bezbedno ka resel ko Rim, kuri ka del svedočanstvo. Palo odova so dobinđa odova obećanje, o Pavle sigurno osetinđa pe bezbedno sar o ćhavoro kole o dad ićeri ki angalja.

5. Sar o Jehova pomožinđa e Pavlese prekalo jekh anđeo? (Dikh i slika ko početko ando akava časopis.)

⁵ Kola avera pharipa o Pavle hine le? Oko duj berš palo odova so ulo ko Jerusalim, o Pavle putujinđa brodoja premali Italija ked doživinđa jekh strašno oluja. I posada hem o putnikija mislinđe so ka meren. Ama, o Pavle na darandilo. Sose? Sarinenđe ko brodo phenđa: „O Devel kase pripadinava hem služinava, akija rat bićhalđa maje e anđele. Ov phenđa maje: ’Ma dara Pavle. Valjani te ikljove anglo cari, a o Devel ka arakhi hem tut hem okolen kola putujineja tuvaja.‘“ O Jehova koristinđa jekhe anđele te ponovini e Pavlese o obećanja kola angleder dinđa lese prekalo Isus. Hem ćaće, o Pavle reslja ko Rim (Dela 27:20-25; 28:16).

6. Kova e Isuseso obećanje dela amen snaga hem sose?

⁶ Savi pomoć amen dobinaja? O Isus ka pomožini amen, sar so pomožinđa e Pavlese. Na primer, sarinenđe kola sledinena le, o Isus obećinđa: „Me hijum tumencar ko sa o dive đi o svršetko ando akava poretko“ (Mat. 28:20). E Isusese lafija dena amen snaga. Sose? Sose ko amaro đivdipe isi dive ked amenđe tano posebno pharo. Na primer, ked merela neko kas mangaja, i dukh koja osetinaja na nakhela palo nekobor dive, već trajini beršencar. Avera borinena pe e problemencar kola anena o phure berša. A disave avera isi len pharipa sebepi i depresija. Ama, i snaga dela amen odova so đanaja so o Isus tano amencar „ko sa o  dive“, čak hem ko najphare dive ko amaro životi (Mat. 11:28-30).

7. Premalo Otkrivenje 14:6, sar o Jehova pomožini amen avdije?

⁷ E Devleso Lafi uverini amen so o Jehova ka pomožini amen prekalo pe anđelija (Jevr. 1:7, 14). Na primer, o anđelija podržinena amen hem vodinena amen đi propovedinaja „i šukar vest ando Kraljevstvo“ e manušenđe kola avena ando sa o nacije, plemenija hem ćhibja. (Mat. 24:13, 14; čitin Otkrivenje 14:6.)

8. Sar o Jehova pomožinđa e Pavlese prekalo jekh vojno zapovedniko?

⁸ Savi pomoć o Pavle dobinđa? Ko 56. berš ki nevi era, o Isus uverinđa e Pavle so ka resel ko Rim. Ama, disave Judejcija ko Jerusalim manglje te ađićeren e Pavle ko drumo, te astaren le hem te mudaren le. Ked o rimsko vojno zapovedniko, o Klaudije Lisija, šunđa odolese, ov pomožinđa e Pavlese. O Klaudije odmah bićhalđa bute vojnikonen te zaštitinen e Pavle hem te legaren le ki Cezareja, koja hine oko 105 kilometrija dur ando Jerusalim. Ki Cezareja, o namesnik Feliks zapovedinđa „te arakhen le ki e Irodesi palata.“ O Pavle hine dur ando okola kola manglje te mudaren le (Dela 23:12-35).

9. Sar o namesnik Fest pomožinđa e Pavlese?

⁹ Duj berš palo odova, o Pavle pana hine ko phanlipe ki Cezareja. O Fest ulo nevo namesnik. O Judejcija molinđe le te bićhali e Pavle ko Jerusalim te sudini pe lese uduri, ama o Fest odbinđa. Šaj hine svesno so o Judejcija „manglje te ađićeren e Pavle ko drumo, te astaren le hem te mudaren le“ (Dela 24:27–25:5).

10. Sar o guverner Fest odgovorinđa e Pavlese ked pućlja le te ikljol anglo cari?

¹⁰ Palo odova, e Pavlese sudinđa pe ki Cezareja. Sebepi so o Fest manglja „te ugodini e Judejcenđe“, ov pućlja e Pavle: „Mangeja li te đa ko Jerusalim hem uduri anglo mande te sudini pe tuće?“ O Pavle verovatno đanđa so ka ovel mudardo ko Jerusalim. Isto ađahar, đanđa so bi šaj te ćerel te bi spasini po životi, te bi resela ko Rim hem te bi nastavini te propovedini. Ov phenđa: „Mangava te ikljovav anglo cari!“ Palo odova so vaćerđa pe savetnikonencar, o Fest phenđa e Pavlese: „Mangljan te ikljove anglo cari, anglo cari ka ikljove.“ Sebepi i odluka koja o Fest anđa, o Pavle na pelo ko pe neprijateljenge vasta. Pana hari o Pavle ka ovel ko Rim, dur ando Judejcija kola manglje te mudaren le (Dela 25:6-12).

11. Ando kola ohrabrujuća lafija o Pavle šaj razmislinđa?

¹¹ Ði o Pavle ađićerđa te pođinen ko drumo ki Italija, šaj razmislinđa ando upozorenje kova o prorok Isaija dinđa e manušenđe kola protivinena pe e Jehovase. Prekalo Isaija o Jehova phenđa: „Ćeren planija, ama tumare planija na ka uspinen! Vaćeren bilo so, ama odova na ka ovel, sose o Devel tano amencar!“ (Is. 8:10). O Pavle đanđa so o Devel ka pomožini le hem odova sigurno dinđa le snaga te istrajini ko sa o pharipa.

12. Sar o Julije ponašinđa pe premalo Pavle hem so o Pavle haljilo kotar odova?

¹² Ko 58. berš ki nevi era, o Pavle pođinđa ko drumo ki Italija. O rimsko vojno zapovedniko, kova vićinđa pe Julije, hine zadužimo te arakhi e Pavle sose ov hine zatvoreniko. Kotar tegani, o Julije hine le moć te ćerel e Pavleso životi te ovel popharo  ja polokho. Sar ka koristini pi moć? Tajsato dive, ked reslje đi o Sidon, „o Julije mothovđa šukaripe e Pavlese hem mukhlja le te posetini pe amalen.“ Kasnije, o Julije čak spasinđa e Pavle. Sar? O vojnikija manglje te mudaren sa e zatvorenikonen ko odova brodo, ama o Julije na mukhlja len te mudaren len. Sose? Ov „rešinđa te spasini e Pavle.“ O Pavle verovatno haljilo so o Jehova prekalo Julije pomožinđa lese hem zaštitinđa le (Dela 27:1-3, 42-44).

13. Sar šaj o Jehova te koristini e manušen kola tane ki vlast?

¹³ Savi pomoć amen dobinaja? Ked tano premali olesi volja, o Jehova prekalo po moćno sveti duh šaj te podstaknini e manušen kola tane ki vlast te ćeren odova so ov mangela. Dikh so o kralj Solomon pisinđa: „E kraljeso vilo tano sar potok ko e Jehovaso vas, usmerini le kaj ov mangela“ (Posl. 21:1). So značinena akala lafija? O manuša šaj te hanen o kanali hem o pani ka đal ko smer ko kova on mangena. Slično hem o Jehova prekalo po duh šaj te utičini upro manuša kola tane ki vlast te bi ćerena o buća kola tane premali olesi volja. Ked odova desini pe, o manuša kola tane ki vlast anena odluke kola šukar utičinena upro e Devleso narodo (Uporedin e stihonencar ando Jezdra 7:21, 25, 26).

14. Premalo Dela apostolska 12:5, aso kola manuša šaj te molina amen?

¹⁴ So šaj amen te ćera? Šaj te molina amen „aso kraljija hem aso sare kola tane ki vlast“ ked on valjani te anen odluke kola ka utičinen ki amari služba hem ko amare sastankija (1. Tim. 2:1, 2; Nem. 1:11). Sar so ćerđe o hrišćanija ko prvo veko hem amen valjani celone vileja te molina amen e Devlese aso amare phralja hem phenja kola tane ko phanlipe. (Čitin Dela apostolska 12:5; Jevr. 13:3). Isto ađahar, valjani te molina amen aso čuvarija kola arakhena amare phralen hem phenjen. Amen šaj te molina e Jehova te utičini upro lende te šaj hem on sar o Julije te mothoven šukaripe premalo amare phralja hem phenja.

15-16. Sar o Jehova pomožinđa e Pavlese prekalo Aristarh hem o Luka?

¹⁵ Savi pomoć o Pavle dobinđa? Ði putujinđa ko Rim, o Pavle palem hem ko pravo vreme dobinđa pomoć ando Jehova prekalo phralja hem phenja. Akana ka dikha disave primerija.

 ¹⁶ E Pavlese duj verna amala, o Aristarh hem o Luka, odlučinđe te putujinen oleja ko Rim. * On hine spremna te rizikujinen po životi te bi ovena e Pavleja, iako nigde na phenela pe so o Isus lično olenđe obećinđa so ka resen bezbedno ko Rim. Tek kasnije, đi hine ko drumo on haljilje so ka aćhon đivde. Odolese, ked ki Cezareja, o Luka hem o Aristarh ukljilje ko brodo, o Pavle sigurno ando vilo zahvalinđa pe e Jehovase ki molitva, sebepi so pomožinđa lese prekalo akala duj hrabra phralja (Dela 27:1, 2, 20-25).

17. Sar o Jehova pomožinđa e Pavlese prekalo phralja hem phenja?

¹⁷ Ði trajinđa e Pavleso putovanje, o phralja hem o phenja nekobor putija pomožinđe lese. Na primer, ked reslje ki luka Sidon, o Julije mukhlja e Pavle „te posetini pe amalen hem te obezbedinen sa so valjani lese.“ Kasnije ki diz Puteoli, o Pavle hem olese amala arakhlje „e phralen kola molinđe len te aćhon olencar efta dive.“ O phralja ko odola thana obezbedinđe sa so valjanđa e Pavlese hem olese amalenđe, hem sigurno but radujinđe pe đi šunđe o ohrabrujuća iskustvija kola o Pavle vaćerđa lenđe (Uporedin e stihonencar ando Dela 15:2, 3). Palo odova so hine zorjaćerde, o Pavle hem olese amala nastavinđe po drumo (Dela 27:3; 28:13, 14).

18. Sose o Pavle zahvalinđa pe e Devlese hem so ohrabrinđa le?

¹⁸ Ði đelo phirindoj premalo Rim, o Pavle sigurno razmislinđa odolestar so angleder trin berš pisinđa e skupštinaće ki odija diz: „Beršencar jedva dikhava te avav koro tumende“ (Rimlj. 15:23). Ama, ov na očekujinđa so ka avel odothe sar zatvoreniko. Sigurno but ohrabrinđa pe ked dikhlja so o phralja ando Rim ađićerđe le ko drumo. „Ked dikhlja len, o Pavle zahvalinđa pe e Devlese hem hine zorjaćerdo“ (Dela 28:15). Zapazin so ked dikhlja e phralen, o Pavle zahvalinđa pe e Devlese. Sose? Odolese  so o Pavle pana jekh puti dikhlja sar o Jehova pomožini lese prekalo phralja.

19. Premali 1. Petrova 4:10, sar šaj o Jehova te pomožini nekase prekalo amende?

¹⁹ So šaj amen te ćera? Da li đaneja e phralen hem e phenjen kola patinena sebepi soj tane naborme ja isi len razna problemija? Ja šaj mulo lendar neko kas manglje. Ako đanaja so nekase valjani pomoć, šaj te molina e Jehova te pomožini amen te phena ja te ćera diso šukar. Šaj baš odova so ka phena ja so ka ćera, ka ovel odova soj tano potrebno amare phralese ja amare phenjaće. (Čitin 1. Petrova 4:10.) * Sebepi odova, on šaj palem ka verujinen so e Jehovaso obećanje „niked na ka aćhavav tut hem niked na ka irinav tuće mo dumo“ odnosini pe upro lende. Odova sigurno ka anel tuće baro bahtalipe!

20. Sose šaj hrabro te phena: „O Jehova tano mo pomoćniko?“

²⁰ Sar o Pavle hem olese amala, hem amen ko amaro životi, nakhaja razna problemija. Ama, šaj te ova hrabra sebepi odova so đanaja so o Jehova tano amencar. Ov pomožini amen prekalo Isus hem prekalo anđelija. Isto ađahar, ako tano premali olesi volja, o Jehova šaj te pomožini amen prekalo manuša kola tane ki vlast. Sar so but amendar lično doživinđam, o Jehova prekalo po sveti duh šaj te podstaknini pe slugen te pomožinen jekh jekhese. Odolese, sar o Pavle, hem amen šaj hrabro te phena: „O Jehova tano mo pomoćniko, na ka darav. So šaj te ćerel maje o manuš?“ (Jevr. 13:6).