1. Premalo Matej 28:18-20, koja zapovest o Isus dinđa?

PALO odova so uskrsninđa, o Isus pojavinđa pe pekle učenikonenđe kola ćedinđe pe ki Galileja. Ov hine le diso važno te phenel lenđe. So hine odova? Olese lafija tane pisime ko Matej 28:18-20. (Čitin.)

2. Kola pućiba ka razmotrina?

² E Isusesi zapovest, ando odova te ćeren pe učenikija, odnosini pe ko sa e Devlese sluge avdije. Odolese, hajde te razmotrina trin pućiba kola tane povezime odoleja so o Isus zapovedinđa amenđe te ćera. Sar prvo, đi sikavaja averen ando e Devlese zapovestija, so pana valjani te ćera? Sar dujto, sar i skupština šaj te pomožini e studentenđe te napredujinen? Hem sar trito, sar šaj te pomožina okolenđe kola tane neaktivna palem te počminen te propovedinen?

3. Kova važno detalji nalazini pe ki e Isusesi zapovest?

³ E Isusese zapovestija tane jasna. Amen mora te sikava e manušen ando odova so o Isus zapovedinđa. Ama, na valjani te bistra jekh važno detalji. O Isus na phenđa: „Sikaven len ando sa so zapovedinđum tumenđe.“ Umesto odova, ov phenđa: „Sikaven len te ićeren pe ko sa so zapovedinđum tumenđe.“ Te bi primeninaja akija jasno zapovest ked sikavaja e studenten, amen na valjani te sikava len samo so te ćeren nego hem sar te ćeren odova (Dela 8:31). Sose valjani te ćera odova?

4. So značini te ićere jekh zapovest? Vaćer jekh primer.

 ⁴ Te „ićere“ jekh zapovest značini te šune la hem te primenine la. Te šaj te haljova so značini te sikava nekas te ićeri pe ko e Hristese zapovestija, ja te ćerel sa o buća kola o ov zapovedinđa, ka razmotrina jekh primer. Sar o instruktori ki auto-škola sikavi e kandidaten te ićeren pe ko saobraćajna propisija? Sar prvo, o instruktori ki učionica sikavi len ando sa o propisija. Ama, te bi sikavi len sar te ićeren pe ko odola propisija, ov mora te ćerel pana jekh buti. Ov mora te vozini pe svakoneja olendar ko vorda hem đi on vozinena, ov ka pomožini lenđe te primeninen o propisija kola sikljilje ki učionica. So sikljovaja ando akava primer?

5. (a) Premalo Jovan 14:15 hem premali 1. Jovanova 2:3, so valjani te sikava amare studenten te ćeren? (b) Vaćer jekh primer sar šaj te sikava e studenten te primeninen e biblijake načelija.

⁵ Ked proučinaja i Biblija averencar, amen sikavaja len ando odova so o Devel rodela olendar. Ama, odova nane dovoljno. Amen mora te sikava e studenten te primeninen odova so sikljona ko po životi. (Čitin Jovan 14:15; 1. Jovanova 2:13.) Na primer, šaj te sikava len sar te primeninen e biblijake načelija ki škola, ki buti ja ki rekreacija. Šaj te vaćera jekh situacija ando amaro životi hem te mothova lenđe sar e biblijake načelija tegani zaštitinđe amen hem pomožinđe amenđe te ana mudro odluka. Ði molinaja amen olencar, šaj te molina e Jehova te vodini len pe sveto duhoja (Jov. 16:13).

6. Soj tano uključimo ko odova te sikava averen te ićeren pe ko e Isusese zapovestija?

⁶ Soj tano uključimo ko odova te sikava averen te ićeren pe ko e Isusese zapovestija? Amen valjani te pomožina amare studentenđe te barjaćeren i želja te ćeren učenikonen. Disave studentija darana te propovedinen. Odolese, valjani te ova strpljiva đi pomožinaja len pana pošukar te haljon e biblijake ćaćipa, te bi olengi vera ovela pana pozorali. Ađahar odola ćaćipa ka khuven ko olengo vilo hem on ka oven podstaknime te propovedinen. So valjani te ćera te bi pomožinaja amare studentenđe te ovel len želja te propovedinen i šukar vest?

7. Sar šaj te pomožina e studentese te barjaćeri i želja te propovedini i šukar vest?

⁷ Amen šaj te puća amare studente akala pućiba: „Sar odova so prihvatinđan i šukar vest pomožinđa tuće te ovel tut pana pošukar životi? So mislineja, da li hem avera valjani te šunen la? Sar šaj te pomožine lenđe? (Posl. 3:27; Mat. 9:37, 38). Mothov te studentese o traktatija kola tane deo ando amare glavna publikacije e službaće. Dozvolin lese te birini o traktatija aso kola ov mislini so ka oven šukar aso olese rođakija, amala hem kolege. De lese nekobor primerkija ando traktatija kola ov birinđa. Sikav le sar te del o traktati ko taktično način. Naravno, ked to studenti ovela nekršteno objavitelji, tu valjani te đa oleja ki služba te bi sikaveja le sar te propovedini (Prop. 4:9, 10; Luka 6:40).

8. Sose tano važno amare studentija te barjaćeren o mangipe premalo Devel hem pe pašutne? (Dikh o okvir „ Sar šaj te pomožina amare studentenđe pana pobuter te zamangen e Jehova?“)

⁸ Ićer ki godi so o Isus phenđa amenđe te sikava averen „te ićeren pe ko sa“ so ov zapovedinđa. Odova uključini o duj najbare zapovestija – te manga e Devle hem amare pašutne. Odola duj zapovestija tane povezime odoleja te propovedina hem te ćera učenikonen (Mat. 22:37-39). Sar? O glavno razlog sose propovedinaja tano o mangipe – amaro mangipe premalo Devel hem premalo manuša. Naravno,  disave studentija ked šunena so valjani te propovedinen šaj te daran. Ama, amen šaj te uverina asavke studenten so uzi e Jehovasi pomoć hari pohari on šaj te pobedinen i dar ando manuš (Ps. 18:1-3; Posl. 29:25). Ko okvir kova nalazini pe ko akava članko tane objasnime o buća kola valjani te ćera te bi pomožinaja amare studentenđe pana pobuter te zamangen e Devle. Ama, sar i skupština šaj te pomožini e neve učenikonenđe pana pobuter te mothoven so mangena e Devle hem pe pašutne?

9. Ko kola načinija o kandidati andi auto-škola sikljola važna buća?

⁹ Hajde palem te razmislina ando primer kotar o kandidati ki auto-škola. Ði vozini pe e instruktoreja kova bešela uzalo leste, ko kola načinija sikljola o kandidati? Ov sikljola ađahar so šunela pe instruktore hem ađahar so dikhela sar pažljivo vozinena avera iskusna vozačija. Na primer, o instruktor šaj te mothovi lese sar jekh vozači ljubazno mukhela avere te uključini pe ki lesi traka ja ko saobraćaj. Ili mothovi lese avere vozače kova mudari o duga svetlija te na bi smetinena okolenđe kola vozinena ki aver traka. Sa akala primerija pomožinena e kandidatese te sikljol o buća kola ka koristinen lese ked ov ka vozini.

10. So ka pomožini e studentese te napredujini ko duhovno pogledi?

¹⁰ Isto ađahar, o studenti kova pođini te putujini ko drumo ando životi na sikljola samo ando po učitelji, nego hem ando šukar primerija ando phralja hem phenja. Onda, so šaj te pomožini e studentenđe te napredujinen ko duhovno pogledi? Odova so avena ko sastankija. Sose? I pouka koja dobinaja ko amare sastankija ka pomožini lenđe te sikljon pana pobuter buća, ka zorjaćeri olengi vera hem ka pomožini lenđe pana pobuter te zamangen e Devle (Dela 15:30-32). Isto ađahar, ked ka avel ko sastanko o učitelji šaj te pomožini lese te penđari hem averen phralen hem phenjen kola isi hine len ista problemija sar ov. Kola šukar primerija o studenti šaj te dikhel ki skupština? Hajde te dikha nekobor primerija.

11. Kola primerija o studenti šaj te dikhel ki skupština hem sar on šaj te utičinen upro leste?

¹¹ I daj koja proučini hem kokri barjaćeri pe ćhaven dikhela e phenja koja tani ki slično situacija. Oduševini la kobor i phen trudini pe te avel redovno ko sastankija pe tikne ćhavencar. O studenti kova pokušini te na koristini cigare penđari e phrale kova hine le isto problemi, ama uspinđa te rešini le. O phral vaćeri e studentese sar o mangipe premalo Jehova podstakninđa le te ićeri pe ko olese zapovestija (2. Kor. 7:1; Fil. 4:13). Palo odova so o phral vaćerđa lese po iskustvo, ov phenđa lese: „Hem tu šaj te uspine ko odova.“ Akana, o studenti tano ohrabrimo hem uverimo so šaj te uspini. Jekh ćhaj koja proučini dikhela jekha ternja phenja koja tani bahtali sose tani e Jehovaso svedoko. Ked dikhela kobor tani oj bahtali, oj mangela te đanel pobuter odolestar sose tani bahtali.

12. Sose šaj te phena so sare ki skupština šaj te pomožinen e studentenđe?

¹² Ked o studentija penđarena različito objaviteljen, on šaj te sikljon so značini te ićeren pe ki e Hristesi zapovest te manga e Devle hem pe pašutne (Jov. 13:35; 1. Tim. 4:12). Hem sar so hine vaćerdo, o studentija šaj te sikljon ando objaviteljija kola hine len ista problemija sar on. Ando asavke primerija o studenti šaj te haljol so hem ov šaj te menjini pe hem te ovel e Hristeso učeniko (Pon. zak. 30:11). Svako pojedinco ki skupština šaj ko razna načinija te pomožini e studentenđe te napredujinen ko duhovno pogledi (Mat.  5:16). So tu ćereja te bi ohrabrineja e studenten kola avena ko sastankija?

13-14. Sar o Isus ponašinđa pe premalo pe apostolija kola hine obeshrabrime?

¹³ Amen mangaja te pomožina amare phralenđe hem e phenjenđe kola tane neaktivna palem te propovedinen hem te ćeren učenikonen. Sar šaj te ćera odova? Hajde te dikha sar o Isus ponašinđa pe pekle apostolencar kola hine obeshrabrime.

¹⁴ Hari angleder te ovel mudardo, sa „o učenikija aćhavđe le hem našlje“ (Mar. 14:50; Jov. 16:32). So ćerđa o Isus ked dikhlja so o apostolija hine obeshrabrime? Hari palo odova so uskrsninđa, o Isus phenđa disavenđe ando pe učenikija: „Ma daran! Ðan, javinen me phralenđe [so uskrsninđum]“ (Mat. 28:10a). O Isus na vazdinđa pe vasta ando pe apostolija. Iako on aćhavđe le, ov palem vićinđa len me phralja. Sar o Jehova, o Isus hine milosrdno hem spremno te oprostini (1. Kralj. 13:23).

15. Sar osetinaja amen sebepi amare phralja hem phenja kola tane neaktivna?

¹⁵ Isto ađahar, hem amen brininaja amen but ando amare phralja hem phenja kola tane neaktivna. On tane amare phralja hem phenja hem amen but mangaja len! Amen pana pamtinaja sa o buća kola ćerđe akala phralja hem phenja aso Jehova. Disave olendar kola tane akana neaktivna, beršencar ćerđe bari buti (Jevr. 6:10). Ćaće but nedostajinena amenđe! (Luka 15:4-7). Sar šaj te mothova so brininaja amen olendar đi oponašinaja e Isuseso primer?

16. Sar šaj te mothova so brininaja amen ando amare phralja hem phenja kola tane neaktivna?

¹⁶ Vilestar vićin len te aven ko sastanko. Jekh način sar o Isus ohrabrinđa pe apostolen tano ađahar so vićinđa len te aven ko sastanko (Mat. 28:10b; 1. Kor. 15:6). Isto ađahar, hem amen šaj te vićina e neaktivno objaviteljen te aven ko sastanko. Svesna hijam so šaj ka valjani nekobor putija te vićina len te aven ko sastanko. O Isus hine but bahtalo ked olese apostolija prihvatinđe oleso poziv (Uporedin Matej 28:16 hem Luka 15:6).

17. So valjani te ćera ked neko ando neaktivna objaviteljija avela ki dvorana?

¹⁷ Vilestar dočekujin len. Ked reslja pe pekle učenikonencar, o Isus dinđa sa pestar on te na osetinen pe neprijatno. Ov na ađićerđa on te aven koro leste. Umesto odova, ov đelo koro lende hem vaćerđa olencar (Mat. 28:18). So valjani te ćera ked neko ando neaktivna objaviteljija avela ki dvorana? Amen valjani te đa koro leste hem vilestar te dočekujina le. Ama, šaj ka brinina amen so na ka đana so te phena. Jekh tano sigurno, na ka ovel lese neprijatno ako jednostavno phenaja lese so hijam but bahtale so dikhaja le.

18. Sar šaj te ohrabrina e neaktivno objaviteljen?

¹⁸ Ohrabrin len. E Isusese učenikija šaj mislinđe so nane dovoljno sposobna te propovedinen ko celo sveto. Ama, o Isus ohrabrinđa len ked phenđa: „Me hijum tumencar ko sa o dive“ (Mat. 28:20). Da li odova so phenđa pomožinđa olese učenikonenđe? Ja, sose hari palo odova, on „sikavđe hem vaćerđe i šukar vest“ (Dela 5:42). Hem okolenđe kola tane neaktivna valjani ohrabrenje. On šaj darana palem te počminen te propovedinen. Ama, šaj te uverina len so na ka mukha len kokri te ćeren odova. Ked ka oven spremna, šaj te đa olencar ki služba. Ked ka počminen palem te propovedinen, sigurno ka oven zahvalna so hijam le uzalo lende. Ked ka mothova lenđe so hem ponodri dikhaja len sar amare phralja hem phenja, šaj ka počminen palem te đan ko sastankija hem ki služba, a  odova sigurno ka radujini hem celo skupština.

19. Soj tani amari želja hem sose?

¹⁹ Kobor pana ka propovedina? Ði na avela o kraj ando akava poretko (Mat. 28:20; dikh o Rečnik pojmova, „Svršetak poretka“). Da li ka uspina te završina i buti koja o Isus dinđa amen? Amen hijam odlučna te ćera odova. Amen spremno koristinaja amaro vreme, amari snaga hem amare pare te bi arakhaja okolen kola isi len „ispravno stav premalo večno životi“ (Dela 13:48). Ked ćeraja odova, amen oponašinaja e Isuseso primer. Ov phenđa: „Mo habe tano te ćerav okova soj tano pali volja okolesi kova bićhalđa man hem te završinav i buti koja dinđa maje“ (Jov. 4:34; 17:4). Odija tani hem amari želja, te završina i buti koja tani amenđe dindi (Jov. 20:21). Isto ađahar, amen mangaja hem avera, hem okola kola tane neaktivna, te istrajinen amencar ki odija buti (Mat. 24:13).

20. Premalo Filipljanima 4:13, sose šaj te ćera i buti koja o Isus zapovedinđa amenđe?

²⁰ Nane uvek lokho te ćera odova so o Isus zapovedinđa amenđe. Ama, akija buti na ćeraja kokri. O Isus obećinđa so ka ovel amencar. Ked ćeraja učenikonen, amen hijam „e Devlese saradnikija“ hem ćeraja odova „ko jekhipe e Hristeja.“ Odova značini so o Jehova hem o Isus pomožinena amen ki odija buti (1. Kor. 3:9; 2. Kor. 2:17). Odolese, amen šaj te ćera odova. Ćaće tani bari čast hem baro zadovoljstvo so šaj te ćera odija buti hem te pomožina averenđe te ćeren odova! (Čitin Filipljanima 4:13.)