1. Sose valjani te služina samo e Jehovase?

AMEN valjani te služina samo e Jehovase odoljese so ov čerdža amen hem sose oljestar avela o dživdipe (Otkr. 4:11). Ama, valjani te ova oprezna. Iako amen mangaja hem poštujinaja e Jehova, avera buča ko amaro dživdipe šaj te oven amendže odobor važna so šaj te čhinaven amen te manga e Jehova hem te služina samo oljese. Odoljese, važno tano te haljova sar odova desini pe. Najangljeder ka dikha so značini te služina samo e Jehovase.

2. Premalo Izlazak 34:14, sar dičhola kobor mangaja e Jehova?

² Sar so i Biblija mothovi, kobor amen mangaja e Jehova dičhola ko odova da li služinaja samo oljese. Odoljese, amen na ka mukha niko hem ništa te ovel amendže ko prvo than. (Čitinen Izlazak 34:14.)

3. Kola razlogija isi amen te manga e Jehova?

³ Sose amen služinaja samo e Jehovase? Sebepi sa o buča kola sikljiljam oljestar, amen isi amen šukar razlogija te manga samo e Jehova. Amen but mangaja o šukar osobine kola o Jehova isi lje. Džanaja so ov mangela hem so na mangela hem trudinaja amen te dikha ko buča sar so ov dikhela. Haljovaja koja tani e Devljesi namera amencar hem daja sa amendar te čera oljesi volja. Amendže tani but bari čast te ova oljese amala (Ps. 25:14). Sa so sikljovaja oljestar, čerela amen te ova paše oljeja (Jak. 4:8).

4. (a) So koristini o Beng te na manga e Jehova celone viljeja? (b) So ka dikha ko akava članko?

 ⁴ Akava sveto tano ko e Bengese vasta. O buča kola tane ko sveto o Beng koristini adžahar te ovel amendže pharo te cida amendar o lošna želja hem te borina amen amare manencar (Ef. 2:1-3; 1. Jov. 5:19). Oljeso cilj tano te na manga e Jehova celone viljeja, nego te manga o buča ko sveto. Ko akava članko ka dikha duj načinja ko kola o Beng šaj te čerel odova. Sar prvo, ov čhivela amen te manga o materijalna buča. Sar dujto, ov mangela amen te birina i zabava koja tani lošno.

5. Sose valjani te ova oprezna te na počmina te manga o materijalna buča?

⁵ Sare amen mangaja te ovel amen so te ha, so te urava hem kaj te živina. Ama, valjani te ova oprezna te na počmina te manga o materijalna buča. But manuša avdije „[mangena] samo o pare“ hem o buča kola šaj oljencar te činen (2. Tim. 3:2). O Isus džandža so oljese učenikonendže šaj te desini pe te počminen te mangen o materijalna buča. Odoljese, ov phendža: „Nijekh našti te služini duje gospodarendže, sose ja jekhe ka mrzini, a avere ka mangel, ja jekheja ka ovel paše, a avere ka mrzini. Našti te služinen e Devljese hem e barvaljipase“ (Mat. 6:24). Da li šaj neko te služini e Jehovase hem ko isto vreme te del sa pestar te ovel barvalo? Okova kova isi lje duj gospodarija, našti te služini samo e Jehovase.

6. So šaj te sikljova ando lafija kola o Isus phendža e hrišćanendže ki Laodikija?

⁶ Ko krajo ando prvo veko, disave hrišćanja ki Laodikija hvalindže pe odoljeja soj tane barvalje, so čedindže pese baro  barvaljipe hem so ništa više na valjani ljendže. Ama, anglo Jehova hem o Isus on hine jadna, čorore, korore hem nange. O Isus savetujindža ljen na sebepi so hine barvalje, već odoljese so oljengo mangipe premalo materijalna buča durjačerdža ljen ando Jehova (Otkr. 3:14-17). Ako dikhaja so počmindžam te manga o materijalna buča, tegani sig posig valjani te promenina o način sar razmislinaja (1. Tim. 6:7, 8). Ako na promeninaja diso amen ka počmina te manga avera buča hem o Jehova na ka ovel zadovoljno odoljeja sar služinaja oljese. Ov „rodela te služine samo oljese“ (Pon. zak. 4:24). Sar šaj te desini pe o materijalna buča te oven amendže ko prvo than?

7-9. So sikljiljan ando amaro phral, o David?

⁷ Te dikha jekh primer. Amaro phral o David, tano jekh šukar starešina kova živini ki Amerika. Ov pestar phenela so ki buti trudindža pe te ovel šukar hem bučarno. Odoljese, i firma dindža lje pana pošukar buti hem pana pobari plata. Odija buti niko na čerdža pošukar oljestar. O David phenela: „Mislindžum so mo uspeh mothovi so o Jehova blagoslovini man.“ Ama, da li hine čače adžahar?

⁸ Sar nakhlja o vreme, o David haljilo so sebepi i buti oljeso amaljipe e Jehovaja više na hine odobor šukar. Ov phenela: „Ko sastankija hem čak ki služba razmislindžum ando problemija kola isi man ki buti. Zaradindžum but pare, ama but hijum lje nervozno. Mi romni hem me počmindžam te ovel amen problemija ko brako.“

⁹ O David haljilo so valjani te odlučini soj tano oljese ko prvo than. „Odlučindžum so mora diso te menjinav“, ov  phendža. O David manglja te promenini po radno vreme. Ama, so ulo ked odova phendža pe šefese? Ačhilo bizi buti! So čerdža palo odova? O David phenela: „Tajsato dive pherdžum i molba te služinav sar stalno pomoćno pioniri.“ Te šaj te ovel ljen odova so valjani ljendže, o David hem oljesi romni počmindže te čeren buti sar čistačija. Hari palo odova, ov počmindža te služini sar stalno pioniri hem kasnije oljesi romni ulji pionirka. Akava bračno par čerdža buti koja but manuša na bi čerena, ama oljendže nane ko prvo than i buti koja čerena. Iako oljengi plata tani deš putija potikni nego angljeder, svako masek isi ljen sa so valjani te šaj te učharen pe troškija. Odoljese so mangena te čhiven e Jehova ko prvo than, on dikhena sar ov brinini pe oljendar (Mat. 6:31-33).

10. Sar šaj te arakha amaro vilo?

¹⁰ Bilo te ovel amen but materijalna buča ja hari, sare amen valjani te arakha amaro vilo. Sar? Adžahar so na ka mukha koro amende te bajrol o mangipe premalo o materijalna buča. Isto adžahar, na mangaja te dozvolina amari buti te ovel amendže považno nego o Jehova. Sar šaj te džana da li peljam ki odija zamka? Šaj te puča amen: „Ked hijum ko sastankija ja ki služba da li but putija mislinava ki mi buti? Da li stalno brininava man da li ka ovel man dovoljno pare? Da li sebepi o materijalna buča mo bračni drug hem me isi amen problemija? Da li hijum spremno te čerav buti, koja avera manuša ladžana te čeren, te šaj pobuter te služinav e Jehovase?“ (1. Tim. 6:9-12). Ked razmislinaja ando akala pučiba, šukar tano te ičera ki godi so o Jehova mangela amen. Isto adžahar, na valjani te bistra oljeso obećanje: „Niked na ka mukhav tut hem niked na ka irinav tuče mo dumo.“ Odoljese, o apostol Pavle phendža: „Ko tumaro dživdipe ma te ovel o mangipe premalo pare“ (Jevr. 13:5, 6).

11. So šaj i zabava te čerel e manušendže?

¹¹ O Jehova mangela te ova bahtalje, a i zabava koja tani šukar šaj te čerel te ova bahtalje. Ko e Devljeso Lafi pisini: „Nane ništa pošukar kotar odova o manuš te hal hem te pijel hem te uživini ko šukar buča ando oljeso trud“ (Prop. 2:24). Ama, nane svako zabava, koja isi ko sveto,  amendže šukar. Oj šaj te čerel o manuša te prihvatinen ja te mangen o buča koljendže i Biblija phenela soj tane but lošna.

12. Premalo 1. Korinćanima 10:21, 22, sose valjani te ova oprezna ked birinaja amari zabava?

¹² Odoljese so mangaja te služina samo e Jehovase, amen našti te ha hem andi „e Jehovasi sofra“ hem andi „e demonengi sofra“. (Čitinen 1. Korinćanima 10:21, 22.) Ked nekasa bešeja hem hasa maro, odova mothovi so hijen amala. Ako ki zabava koja birindžam isi nasilje, spiritizam, nemoral ja avera telesna želje hem stavija, tegani odova tano sar te beša e Devljese dušmanencar hem zajedno oljencar haja o habe kova on pripremindže. Asavki zabava na utičini lošno samo upro amende, nego hem upro amaro amaljipe e Jehovaja.

13-14. Premalo Jakov 1:14, 15, sose valjani te ova oprezna ked birinaja i zabava? Vačer jekh primer.

¹³ Sose šaj te phena so i zabava tani sar hrana? Keda hasa, amen šaj te birina so ka čhiva ko amaro muj. Ama, ked nakhavdžam odija hrana, amen našti te birina sar oj ka utičini ko amaro telo. I šukar hrana šaj te čerel te ova posaste, ama i nezdravo hrana ka čerel te ova naborme. O rezultatija na ka dičhon odmah, ama palo disavo vreme sigurno ka dičhon.

¹⁴ Isto adžahar, ked birinaja amari zabava, amen šaj te kontrolišina so ka mukha te khuvel ki amari godi. Palo odova, i zabava koja birindžam ka utičini ko amaro način sar razmislinaja hem sar osetinaja amen. I šukar zabava šaj te čerel te osetina amen pošukar, ama i zabava koja nane šukar, lošno ka utičini upro amende. (Čitinen Jakovljeva 1:14, 15.) Iako o posledice šaj na ka dikhen pe odmah, on sigurno ka oven. Odoljese, i Biblija upozorini amen: „Ma hovaven kokri tumen: E Devljese našti te mara muj. So o manuš ka sejini, odova hem ka čedel. Ko sejini ko poklo telo, ando telo ka čedel i propast“ (Gal. 6:7, 8). Odoljese, važno tano te cida amen andi zabava ki koja isi buča kola o Jehova mrzini (Ps. 97:10).

15. Kova poklon o Jehova dindža amen?

¹⁵ But e Jehovase svedokija uživinena te dikhen amari internet televizija JW Broadcasting^®. Amari phen, i Merilin phenela: „O JW Broadcasting pomožindža man te ovav pobahtalji hem sa soj tano odothe šaj te dikhav sose sa tano šukar. Ked osetinava so hijum kokri ja obeshrabrimi, tegani arakhava maje dijekh ohrabrujućo govor ja o govor kova dela pe sar e biblijako jutarnjo program. Sebepi odova popaše hijum e Jehovaja hem oljese organizacijaja. O JW Broadcasting menindža mo dživdipe.“ Da li hem tuče koristini akava poklon kova dobindžam ando Jehova? Svako masek ki amari internet televizija ikljola nevi masekosi emisija, ama hem but buča kola šaj te dikhe ja te šune. Isto adžahar, odothe šaj te šune hem o džilja kola šaj te ohrabrinen tut.

16-17. Sose valjani te kontrolišina kobor vreme džala amendže ki zabava, hem sar šaj te čera odova?

¹⁶ Valjani te ova oprezna na samo savi zabava ka birina, već hem kobor vreme ka džal amendže ki zabava. Ako na hijam oprezna, šaj više vreme te trošina ki zabava nego te služina e Jehovase. Butendže nane lokho te kontrolišinen kobor vreme ka džal ljendže ki zabava. Amari phen i Abigajl, koja isi la 18 berš, phenela:  „Ko krajo ando dive, ked završinava sa me buča, but mangava te opustinav man adžahar so dikhava televizija. Ama, ako na hijum oprezno, but vreme šaj te bešav hem te dikhav televizija.“ Jekh terno phral kova vičini pe Samjuel, phenela: „Kokri man astardžum so but mangava te dikhav kratka video filmija ko internet. Najangljeder, mislinava so ka dikhav samo jekh, ama ko krajo trin ja štar satija džana maje odothe.“

¹⁷ Sar šaj te kontrolišine toklo vreme? Najangljeder, dikh kobor vreme džala tuče ki zabava. Ko to kalendari šaj te pisine kobor vreme dikheja televizija ja o buča ko internet, ja kobor vreme nakhela tuče dži čheleja video-igrice. Ako mislineja so but vreme džala tuče ki zabava, tegani šaj te čere tuče jekh raspored. Prvo, odredin kobor vreme ka džal tuče ko buča kola tane najvažna, a palo odova kobor vreme ka trošine ki zabava. Ked čerdžan odova, molin e Jehova te pomožini tut te ičere tut ko toklo raspored. Adžahar, ka ovel tut vreme hem snaga te proučine i Biblija, te ovel tut porodično proučibe, te dža ko sastankija hem ki služba. Ako čhiveja e Jehova ko prvo than, pobuter ka uživine ki tiklji zabava.

18-19. Sar šaj te mothova so služinaja samo e Jehovase?

¹⁸ Palo odova so pisindža ando akalje svetoso krajo hem ando nevo sveto kova ka avel, o apostol Petar phendža: „Me manglje, odoljese so sa akava adžičerena, den sa tumendar ov te arakhi tumen čista, bizi mana hem ko mir“ (2. Petr. 3:14). Ked ičeraja amen ko akava savet hem ked daja sa amendar te ačhova moralno hem duhovno čista, amen mothovaja so mangaja te služina samo e Jehovase.

¹⁹ O Beng hem oljeso sveto hem ponodri ka mangen te čhiven amen avera buča te čhiva ko prvo than, a na e Jehova (Luka 4:13). Ama, kola god pharipa te ovel amen, amen na ka mukha niko hem ništa te ljel e Jehovaso than. Amen hijam odlučna te služina samo e Jehovase, sose jedino ov odova zaslužini.