JEKH prognostičar ispitini i slika ko radar. Ov dikhela so sig avela bari hem opasno oluja. Odothe živinena but manuša. Ov brinini pe e manušendže hem odoljese dela sa pestar te upozorini ljen.

Isto adžahar, akana o Jehova upozorini sa e manušen so ka avel jekh „oluja“. Odija oluja ka ovel poopasno nego bilo koja kolatar šundže dži akana ki vremensko prognoza. Sar čerela odova? Sose šaj te ova sigurna so o Jehova dela e manušendže dovoljno vreme te šunen o upozorenje kova dela? O odgovor ka dobina ako osmotrinaja sar o Devel angljeder upozorindža e manušen.

Ko purano vreme, o Jehova upozorindža so avena o „oluje“, ja so ov ka sudini okolendže so namerno na šunena oljese zapovestija (Posl. 10:25; Jer. 30:23). Svako puti, ov upozorindža e neposlušno manušen dovoljno anglal, hem phendža ljendže so valjani te čeren ako mangena te oven ljese poslušna (2. Kralj. 17:12-15; Nem. 9:29, 30). Te šaj te pomožini e manušendže te menjinen pe, but putija koristindža pe verno slugen ki phuv te objavinen oljesi osuda hem te pomožinen ljen te haljon so sig valjani diso te čeren (Am. 3:7).

Jekh oljendar hine o Noje. Beršencar, bizi dar ov upozorindža e nemoralno hem e nasilno manušen so avela o baro Potop (Post. 6:9-13, 17). Ama, na samo odova, ov phendža hem so valjani te čeren te šaj te ačhon dživde. O Noje odobor propovedindža so hine vičimo „o propovednik andi pravednost“ (2. Petr. 2:5).

Iako o Noje but trudindža pe, o manuša tegani na šundže e Devljese lafija. On mothovdže so nane ljen vera. Odoljese, „alo o potop hem sa uništindža ljen“ (Mat. 24:39; Jevr. 11:7). Ked alo o kraj, on naštindže te phenen so o Devel na upozorindža ljen dovoljno anglal.

Disavo puti, o Jehova upozorindža disaven hari angljeder te počmini i „oluja“, ja oljesi presuda. Ama, hem tegani ov dindža dovoljno vreme sarinendže, upro kola ka avel i nevolja te menjinen pe. Na primer, ked mukhlja o deš nevolje ko Egipat, o Jehova dovoljno anglal upozorindža e manušen. Jekh puti, o Jehova bičhaldža e Mojsije hem e Arone te upozorinen e faraone hem oljese slugen so i eftato nevolja, i bari kukudi, ka čerel bari šteta. I nevolja počmindža jekh dive palo odova upozorenje. Da li o Devel dindža ljen dovoljno vreme te arakhen pese than kaj ka garaven pe hem kaj ka našen? Ki Biblija šaj te arakha o odgovor: „Sa e faraonese sluge kola darandilje ando e Jehovase lafija cidindže pe slugen hem pe stoka andre ko čhera, a okola so na čhivdže e Jehovase lafija ko po vilo hem na pazindže ko haberi kova šundže ačhavdže pe slugen hem pe stoka avri ko polje“ (Izl. 9:18-21). Haljovaja so, o Jehova upozorindža ljen, ama samo okola so šundže lje na doživindže odola pharipa kola ulje averendže.

O Jehova upozorindža e faraone hem oljese slugen hem ki dešto nevolja. Ama, on paljem na šundže odova upozorenje (Izl. 4:22, 23). Odoljese, on dikhlje sar oljenge prvobijande čhave mulje. Odova sigurno andža ljendže bari dukh (Izl. 11:4-10; 12:29). Da li on šajindže te reagujinen ko akava upozorenje angljeder so sa odova ulo? Ja, sose o Mojsije odmah upozorindža hem e Izraelcen so odija nevolja ka avel. Ov sikavdža ljen so te čeren te šaj te ačhon dživde oljenge porodice (Izl. 12:21-28). Da li hine but manuša kola  šundže akava upozorenje? O podatkija mothovena so trin milionja manuša, maškaro kola hine o Izraelcija hem „but avera manuša“ kola na hine Izraelcija hem o Egipćanija, ačhilje dživde hem ikljilje ando Egipat (Izl. 12:38, fusn.).

Sar so akala primerija mothovena, o Jehova uvek dindža e manušendže dovoljno vreme te reagujinen ko oljese upozorenja (Pon. zak. 32:4). Sose o Jehova čerela odova? O apostol Petar objasnindža so o Jehova „na mangela nijekh te merel, nego sare te kajinen pe“ (2. Petr. 3:9). O Devel brinini pe e manušendže. Ov mangela on te pokajinen pe hem te menjinen pe angljeder te avel oljesi osuda (Is. 48:17, 18; Rimlj. 2:4).

Avdije, sa o manuša valjani te reagujinen ko akava važno upozorenje kova vačeri pe ki celo phuv. Dži hine ki phuv, o Isus upozorindža so avdisutno lošno sveto ka ovel uništimo ki „bari nevolja“ (Mat. 24:21). Ked vačerdža kotar i osuda koja ka avel, o Isus dindža jekh proročanstvo ko kova tano opisimo so ka dikhen hem so ka doživinen oljese učenikija sar o vreme avela popaše. O Isus vačerdža kola važna događaja ka oven anglo amare jačha (Mat. 24:3-12; Luka 21:10-13).

Sebepi odova proročanstvo, o Jehova avdije podstaknini sarinen te birinen te služinen ljese hem olje te šunen. Ov mangela sa o poslušna manuša već akana te ovel ljen pošukar dživdipe, a ki budućnost te doživinen sa o šukar buča kola obećindža (2. Petr. 3:13). Te šaj o manuša te ovel ljen zoralji vera ko oljese obećanja, ov dindža te vačeri pe jekh haberi kova šaj te spasini e manušengo dživdipe. Odova tano o „šukar haberi ando kraljevstvo“. O Isus phendža so odova haberi „ka propovedini pe ko celo sveto sar svedočanstvo sa e narodondže, hem tegani ka avel o kraj“ (Mat. 24:14). O Jehova organizujindža pe slugen te den „svedočanstvo“ ja te vačeren odova haberi kova oljestar avela, ko prekalo 240 phuvja. Ov mangela sa pobuter manuša te šunen hem te reagujinen ko akava upozorenje hem te našen andi „oluja“ (Sof. 1:14, 15; 2:2, 3).

Sa o dokazija mothovena so ked o Jehova upozorini e manušen, ov dela ljen dovoljno vreme te reagujinen. Odoljese, o pučibe tano da li o manuša ka reagujinen ko e Devljese upozorenja angljeder so ka ovel kasno? O Jehova phendža amendže te vačera oljeso haberi sa e manušendže. Odoljese, te da sa amendar te pomožina so pobuter manušen te preživinen o krajo akalje svetoso.