1. So šaj o Jehova te čerel te šaj te ispunini piklji namera?

O JEHOVA šaj te ovel so god valjani te šaj te ispunini piklji namera. Na primer, o Jehova tano okova kova sikavi, tešini hem vačeri o šukar haberi. Akala tane samo disave ando but buča kola ov šaj te čerel (Is. 48:17; 2. Kor. 7:6; Gal. 3:8). Ama, ov često koristini e manušen te šaj te ispunini piklji namera (Mat. 24:14; 28:19, 20; 2. Kor. 1:3, 4). Isto adžahar, o Jehova svakonese amendar šaj te del mudrost hem snaga te šaj te čera so god valjani te šaj te ispunini pe oljesi volja. Sa akava mothovi so značini e Jehovaso nav, sar so phendže hem o manuša ko sveto kola istražinena i Biblija.

2. (a) Sose disave nane sigurna so o Jehova koristini ljen? (b) So ka dikha ko akava članko?

² Sare amen mangaja te ova korisna e Jehovase, ama disave nane sigurna da li o Jehova koristini ljen. Sose? Odoljese so osetinena pe so našti te čeren odobor kobor mangena sebepi oljenge berša, okolnostija ja sposobnostija. Avera šaj mislinena so on čerena dovoljno hem so na valjani te čeren diso pobuter. Ko akava članko ka dikha, sar o Jehova svakonese amendar šaj te del odova so valjani te šaj te ispunini pe oljesi namera. Isto adžahar, ka dikha disave primerija andi Biblija odoljestar sar o Jehova pe slugendže, bilo muršendže ja džuvljendže, dindža želja hem snaga te čeren oljesi volja. Ko kraj, ka dikha sar šaj amen te dozvolina e Jehovase te koristini amen.

3. Premalo Filipljanima 2:13, sar šaj o Jehova te del amen želja te čera oljesi volja?

³ Čitinen Filipljanima 2:13. * O Jehova šaj te del amen želja te čera oljesi volja. Sar šaj te čerel odova? Na primer, šaj dikhaja so nekase ki skupština valjani pomoć ja diso aver valjani te čerel pe. Ja o starešine čitinena o ljil andi podružnica kuri pisini so ko aver than isi potreba te propovedini pe. Tegani šaj te puča amen: „Sar šaj te pomožinav?“ Ja šaj dobindžam dijekh pharo zadatak hem na džanaja da li šaj te čera lje šukar. Ja palo so čitindžam disave stihija ki Biblija šaj pučaja amen: „Sar šaj odova te koristinav te pomožinav averendže?“ O Jehova na ka čhivel amen zorjeja te čera diso. Ama, ked dikhela so amen razmislinaja odoljestar so šaj te čera, ov šaj te pomožini amen te ovel amen želja te čera odova.

4. Sar o Jehova šaj te del amen snaga te čera oljesi volja?

⁴ O Jehova šaj te del amen hem snaga te čera oljesi volja (Is. 40:29). Ov šaj te del amen po sveti duh te šaj ko najšukar način te koristina amare sposobnostija (Izl. 35:30-35). Prekali piklji organizacija, o Jehova šaj te sikavi amen sar te čera disavo zadatak. Ako disavo puti na hijan sigurno sar šaj te čere disavo zadatko, rode pomoć. Isto adžahar, uvek šaj te moline amare velikodušno nebesko Dade te del tut „but bari snaga“ (2. Kor. 4:7; Luka 11:13). Ki Biblija isi but primerija sar o Jehova pomožindža e muršendže hem e džuvljendže adžahar so dindža ljen želja hem snaga te čeren oljesi volja. Dži dikhaja disave ando odola primerija, razmislin sar o Jehova šaj te koristini hem tut te čere o buča kola hem on čerdže.

5. So sikljovaja odoljestar sar hem ked o Jehova koristindža e Mojsije te spasini peklje narodo?

⁵ O Jehova koristindža e Mojsije te spasini e Izraelconen. Ama, ked o Jehova koristindža lje? Sebepi so hine „sikavdo andi celo egipatsko mudrost“, o Mojsije mislindža soj tano spremno te spasini e Izraelconen (Dela 7:22-25). Ama, tek palo odova so pomožindža lje te ovel ponizno hem blago manuš, o Jehova šajindža te koristini lje (Dela 7:30, 34-36). Ov dindža e Mojsijese hrabrost te vačeri e najmoćno vladareja ko Egipat (Izl. 9:13-19). So sikljovaja odoljestar sar hem ked o Jehova koristindža e Mojsije? Sikljovaja so o Jehova koristini okoljen kola trudinena pe te oponašinen oljese osobine hem kola osloninena pe ki oljesi snaga (Fil. 4:13).

6. So sikljovaja odoljestar sar o Jehova koristindža e Varzelaje te pomožini e Davidese?

⁶ Beršencar palo odova, o Jehova koristindža e Varzelaje te pomožini e kraljese, e Davidese. O David hem o narodo „bokhaljilo, čhindilo hem trošaljilo“, dži našlje ando e Davideso čhavo, o Avesalom. Zajedno avere manušencar, o Varzelaj, kova tegani hine phuro, rizikujindža po dživdipe te šaj te pomožini e Davidese hem okoljendže kola hine oljeja. O Varzelaj na mislindža so o Jehova našti više te koristini lje odoljese soj tano phuro. U stvari, ov phravde vasteso koristindža odova so hine lje te šaj te pomožini e Devljese slugendže (2. Sam. 17:27-29). So amen sikljovaja akaljestar?  Bizi razlika kobor berš isi amen, o Jehova šaj te koristini amen te šaj te pomožini amare phraljendže hem phenjendže, kola nane ljen odova so valjani oljendže, bilo te živinen uzo amende ja ki aver phuv (Posl. 3:27, 28; 19:17). Iako šaj našti te pomožina ljen lično, amen šaj te da prilogija. Odola prilogija šaj te koristinen pe te šaj te pomožini pe amare phraljendže hem phenjendže, ked hem kuri valjani (2. Kor. 8:14, 15; 9:11).

7. Sar o Jehova koristindža e Simeone hem sose odova ohrabrini amen?

⁷ O Jehova obećindža e Simeonese, jekhe verno phure manušese ko Jerusalim, so na ka merel dži na ka dikhel e Mesija. Akava obećanje sigurno but ohrabrindža e Simeone, odoljese so ov beršencar adžičerdža e Mesija. O Jehova nagradindža lje sebepi so hine verno hem istrajno. Jekh dive, „ljegardo duhoja alo ko hram.“ Odothe o Simeon dikhlja e tikne Isuse, hem o Jehova koristindža lje te vačeri o proročanstvo ando akava čhavoro kova ka ovel o Hrist (Luka 2:25-35). Iako o Simeon šaj mulo angljeder so o Isus počmindža pe službaja, ov hine but zahvalno e Jehovase so koristindža lje ko akava način. Ama, pana pošukar buča tek ka doživini. Ko nevo sveto, akava verno manuš ka dikhel sar prekali e Isusesi vladavina, ka blagoslovinen pe sa o porodice ki phuv (Post. 22:18). Isto adžahar, hem amen šaj te ova zahvalna so isi amen čast o Jehova te koristini amen ko bilo kova način.

8. Sar o Jehova šaj te koristini amen sar so koristindža e Varnava?

⁸ Ko prvo veko ki amari era, o Josif dozvolindža o Jehova te koristini lje (Dela 4:36, 37). O apostolija vičindže lje Varnava, so značini „o čhavo andi uteha“, verovatno odoljese so but šukar utešindža averen. Na primer, ked o Savle ulo hrišćanin, but phralja darandilje te oven paše oljeja odoljese so progonindža okoljen so verujindže ko Isus. Ama, o Varnava utešindža hem pomožindža e Savle hem ov sigurno hine ljese but zahvalno (Dela 9:21, 26-28). Palo odova, o starešine ko Jerusalim dikhlje so valjani te ohrabrinen e phraljen kola živindže but dur, ki Sirijsko Antiohija. Kas on bičhaldže? E Varnava. On andže šukar odluka. Ki Biblija pisini so o Varnava „sarinen ohrabrindža celone viljeja te ačhon verna e Gospodese“ (Dela 11:22-24). Hem avdije, o Jehova šaj te pomožini amendže te utešina amare phraljen hem phenjen. Na primer, ov šaj te koristini amen te utešina nekas kastar neko mulo. Ja šaj te podstaknini amen te posetina ja te vičina ko telefoni nekas kova tano nabormo ja depresivno te vačera ljendže nekobor šukar lafija. Da li ka dozvoline e Jehovase te koristini tut sar so koristindža e Varnava? (1. Sol. 5:14).

9. So sikljiljam odoljestar sar o Jehova pomožindža e phraljese, e Vasilijase, te ovel zrelo hem šukar starešina?

⁹ O Jehova pomožindža e phraljese kova vičini pe Vasilij te ovel jekh zrelo hem šukar starešina. Ked o Vasilij hine lje 26 berš, ulo starešina. Ov mislindža so nane lje dovoljno iskustvo te šaj te pomožini e phraljendže hem e phenjendže, posebno okoljendže so isi ljen pharipa. Ama, ov but sikljilo ando iskusna starešine hem ko seminari e naimenovano phraljendže. O Vasilij but trudindža pe te napredujini. Na primer, ov pisindža peklje tikne ciljija. Svako puti ked ispunindža jekh ando odola ciljija, hari pohari cidindža pe oljesi dar. Ov akana phenela:  „Odova sostar angljeder darandiljum, akana anela maje bahtaljipe. Ked o Jehova pomožini man te arakhav jekh šukar stih te utešinav e phralje ja e phenja ki skupština, odova anela mandže baro zadovoljstvo. Phraljaljen, ako sar o Vasilij dozvolinena e Jehovase te koristini tumen, ov šaj te pomožini tumen te čeren pobuter ki skupština.

10. So čerdža i Avigeja hem so sikljoveja olatar?

¹⁰ E Davide hem oljese manušen progonindža o kralj Saul hem odoljese valjandža ljendže pomoć. E Davidese manuša pučlje e barvalje Izraelco kova vičindža pe Naval te del ljen diso te han. On osetindže pe slobodno te pučen lje, odoljese so arakhlje oljese stoka ki pustinja. Ama, o sebično Naval na manglja te del ljen ništa. Odoljese, o David hine but holjamo hem manglja te mudari e Navale hem svakone murše ko oljeso čher (1. Sam. 25:3-13, 22). Ama, e Navalesi šuži romni, i Avigeja, hine but razborito. Oj mothovdža bari hrabrost, pelji anglo e Davidese pre hem molindža lje te na mudari e Navale hem oljese manušen, te na ovel krivo e ratese. Oj šukaripnjaja savetujindža lje te mukhel odova problemi ko e Jehovase vasta. E Avigejake ponizna lafija hem o razborita postupkija khuvdže e Davidese hor ko vilo. Ov haljilo so o Jehova bičhaldža la (1. Sam. 25:23-28, 32-34). I Avigeja barjačerdža o osobine kola čerdže la te ovel korisno e Jehovase. Isto adžahar, o Jehova šaj te koristini e phenjen, kola trudinena pe te oven taktična hem razborita, te zorjačeren peklje porodicen hem averen ki skupština (Posl. 24:3; Titu 2:3-5).

11. So čerdže e Salumese čhaja hem ko avdije oponašini oljengo primer?

¹¹ Beršencar palo odova, e Salumese čhaja hine maškaro manuša koljen o Jehova koristindža te šaj te čeren pe o zidija ko Jerusalim (Nem. 2:20; 3:12). Iako oljengo dad hine knez, on manglje te čeren odija phari hem rizično buti (Nem. 4:15-18). On na hine sar o ugledna manuša andi Tekoja, kola „na ponizindže pe“ te čeren buti (Nem. 3:5). Zamislin samo kobor hine bahtalje e Salumese čhaja ked o zidija hine završime aso samo 52 dive! (Nem. 6:15). Avdije, hem amen isi amen phenja kola tane bahtalje dži spremno služinena ko razna načinja. Šaj gradinena hem održinena o thana kola tane posvetime e Jehovase. Amendže valjanena asavke sposobna, revna hem verna phenja te šaj odija buti te čerel pe pošukar.

12. Sar šaj o Jehova te koristini amen sar so koristindža e Tabita?

¹² O Jehova podstaknindža e Tabita te čerel „šukar delija hem [te pomožini] e čororendže“, a posebno e udovicendže (Dela 9:36). Sebepi so oj hine phravde vastesi hem šukar, but džene rundže ked mulji. Ama, on hine but bahtalje ked o apostol Petar vazdindža la (Dela 9:39-41). So sikljovaja andi Tabita? Bilo te ova terne ja phure, murša ja džuvlja, sare amen šaj te čera diso korisno te šaj te pomožina amare phraljendže hem phenjendže (Jevr. 13:16).

13. Sar o Jehova koristindža jekha ladžutne phenja koja vičini pe Ruta hem so oj phendža?

¹³ Jekh ladžutni phen koja vičini pe Ruta, manglja te ovel misionarka. Ked hine terni, oj dželji kotar čher ko čher, ama samo ki sig dindža traktatija e manušendže. Oj phendža: „Čače uživindžum dži čerdžum odova.“ Ama, olače hine but  pharo te vačeri nekasa ko udara ando e Devljeso Kraljevstvo. Iako hine ladžutni, i Ruta ulji stalno pioniri ked hine la 18 berš. Ko 1946. berš, oj hine ki škola Galad hem palo odova služindža ko Havaji hem ko Japan. O Jehova koristindža la te čerel but ki služba ko akala phuvja. Iako i Ruta skoro 80 berš propovedindža o šukar haberi, oj phenela: „O Jehova uvek zorjačerdža man. Ov pomožindža man te pobedinav mi ladž. Uverimi hijum so o Jehova šaj te koristini svakone kova uzdajini pe upro ljeste.“

14. Premalo Kološanima 1:29, so valjani te čere ako mangeja o Jehova te koristini tut?

¹⁴ O Jehova uvek koristindža pe slugen ko but načinja. Sar ka koristini tut? But zavisini odoljestar kobor trudineja tut. (Čitinen Kološanima 1:29.) Ako dozvolineja e Jehovase te koristini tut, ov šaj te pomožini tut revno te propovedine, šukar te sikave hem te tešine averen. Isto adžahar, šaj te sikavi tut sar te čere disavi buti, te ove šukar amal ja so god valjani te šaj te ispunini piklji namera.

15. Premalo 1. Timoteju 4:12, 15, so valjani avdije o terne phralja te molinen e Jehova?

¹⁵ Ko amare skupštine isi but terne phralja kola više nane tinejdžerija. Ako hijan jekh oljendar da li razmislindžan so šaj te čere te dživdipaja? Amendže valjanena terne phralja kola šaj te pomožinen ki skupština hem te služinen sar sluge pomoćnikija. Ko but skupštine isi pobuter starešine nego sluge pomoćnikija. Da li tano neko tumendar spremno te čerel diso pobuter ki skupština? Podijekh puti, disave phralja phenena: „Me hijum bahtalo te služinav samo sar objavitelj.“ Ako hem tu adžahar mislineja, tegani molin tut e Jehovase te pomožini tut te ovel tut želja te služine sar sluga pomoćnik hem te del tut snaga te čere sa so šaj te služine oljese (Prop. 12:1). Valjani amendže tiklji pomoć! (Čitinen 1. Timoteju 4:12, 15.)

16. Aso so šaj te moline e Jehova hem sose?

¹⁶ Te šaj te ispunini pi volja, o Jehova šaj te koristini tut ko bilo kova način. Odoljese, molin lje te del tut želja te čere odova so rodela tutar hem snaga koja valjani tuče. Bilo te ove terno ja phuro, koristin toklo vreme hem tiklji snaga hem sa so isi tut, te šaj akana te slavine e Jehova (Prop. 9:10). Ked isi tut prilika te čere diso pobuter ki služba e Jehovase, ma odustajin sigate odoljese so mislineja so našti te čere odova. Čače tani bari čast te čera sa so šaj, te šaj te slavina amare Dade.