1. So okola kola tane krstime valjani hem ponodri te ćeren?

DA LI hijan krstimo? Ako ja, tu javno mothovđan ti vera ko Jehova hem ti spremnost te služine olese organizacijaja. * Naravno, ti vera ko Jehova mora hem ponodri te barjol. Valjani hem ponodri te zorjaćere to uverenje so o Jehova hem avdije koristini pi organizacija.

2-3. Sar o Jehova avdije vodini pi organizacija? Vaćer jekh primer.

² Avdije, ando način sar o Jehova vodini pi organizacija šaj te dikha savo tano ov sar osoba, koja tani olesi namera hem kola tane olese merilija. Hajde te dikha trin olese osobine kola jasno dićhona ki olesi organizacija.

³ Sar prvo, „o Devel nane pristrasno“ (Dela 10:34). O mangipe podstakninđa e Jehova te del pe Ćhave sar „otkupnina sarinenđe“ (1. Tim. 2:6; Jov. 3:16). O Jehova koristini pe narodo te propovedini i šukar vest sarinenđe kola mangena te šunen hem odoleja pomožini so pobuter manušenđe te ovel len korist andi otkupnina. Sar dujto, o Jehova tano Devel ando redo hem ando mir (1. Kor. 14:33, 40). Odolese, okola kola obožavinena le ćerena odova ko organizovano hem mirno način. Sar trito, o Jehova tano „Veličanstveno Učitelj“ (Is. 30:20, 21). Odova jasno dićhola sose olesi organizacija sikavi averen andi Biblija, sar ki skupština ađahar hem ki služba. Sar akala trin e Jehovase osobine jasno dićhilje ki hrišćansko skupština ko prvo veko? Sar akala osobine dićhona avdije?  Sar o sveti duh avdije pomožini amen te služina e Jehovase organizacijaja?

4. Premalo Dela apostolska 1:8, so o Isus zapovedinđa pe sledbenikonenđe hem koja pomoć on dobinđe?

⁴ Ko prvo veko. I poruka koja o Isus propovedinđa, dinđa nada sa e manušenđe (Luka 4:43). Ov zapovedinđa pe sledbenikonenđe te nastavinen te ćeren buti koja ov počminđa, te propovedinen „đi o najdur thana ki phuv.“ (Čitin Dela apostolska 1:8.) Naravno, on naštinđe odova te ćeren pe snagaja. Umesto odova, valjanđa lenđe o sveti duh, „o pomoćniko“, kas o Isus obećinđa lenđe (Jov. 14:26; Zah. 4:6).

5-6. Sar o sveti duh pomožinđa e Isusese sledbenikonenđe?

⁵ E Isusese sledbenikija dobinđe sveti duh ki Pedesetnica ko 33. berš ki nevi era. Sebepi i pomoć ando sveti duh, on odmah počminđe te propovedinen hem aso kratko vreme hiljade manuša prihvatinđe i šukar vest (Dela 2:41; 4:4). Ked počminđa o progonstvo, o učenikija na dozvolinđe i dar te ćhinavi len te propovedinen. Umesto odova, on rodinđe pomoć ando Devel. On molinđe pe: „Pomožin te slugenđe hem ponodri hrabro te objavinen to lafi.“ Tegani, on pherdilje sveto duhoja hem nastavinđe „hrabro te objavinen e Devleso lafi“ (Dela 4:18-20, 29, 31).

⁶ E Isusese učenikija hine len hem avera izazovija. Na primer, na hine len but primerkija ando sveta spisija. Na hine len dodatna publikacije te bi proučinena sar amen avdije. Isto ađahar, o učenikija valjanđe te propovedinen e manušenđe kola vaćerđe različita ćhibja. Iako hine len sa odola izazovija, odola verna učenikija ćerđe odova so dićhilo sar nemoguće. Aso oko 30 berš on propovedinđe „ki celo phuv“ (Kol. 1:6, 23).

7. Sar e Jehovase sluge, pana 100 berš angleder, đanđe so o Devel ađićeri olendar hem sar on reagujinđe?

⁷ Avdije. O Jehova hem avdije vodini pe narodo hem dela le snaga. But putija ov vodini pe narodo prekalo po Lafi, kaso pisiba hine vodimo sveto duhoja. Ki Biblija šaj te čitina andi e Isusesi služba hem andi olesi zapovest koja dinđa pe sledbenikonenđe, te nastavinen te ćeren i buti koja ov počminđa (Mat. 28:19, 20). Pana ko jul 1881. berš, ko akava časopis pisinđa: „O Jehova na vićinđa amen, ni na pomazinđa amen te bi dobinaja čast ando manuša hem te bi ovaja barvale, nego te koristina odova so isi amen te bi propovedinaja i šukar vest.“ Ki brošura, Kase tano o delo ando propovedibe dindo, koja hine objavimi ko 1919. berš, pisinđa: „Akija tani but bari buti, ama e Gospodesi buti, hem ov ka del amen snaga te ćera la.“ Sar o prva hrišćanija, odola hrabra phralja počminđe te ćeren i buti, uverime so o sveti duh ka pomožini len te propovedinen sa e manušenđe. Hem amen verujinaja so o sveti duh ka pomožini amen.

8-9. Kola metode e Jehovasi organizacija koristinđa te bi propovedini pe i šukar vest?

⁸ E Jehovasi organizacija koristinđa najšukar alatija te bi propovedini pe i šukar vest. Disave olendar hine štampime publikacije, „Foto-drama stvaranje, fonografija, vorda ko kola hine ćhivde zvučnikija, radio emisije, a akana hem elektronska uređaja hem internet. Isto ađahar, e Devlesi organizacija prevodini o publikacije ko pobuter ćhibja nego iked angleder! Sose ćerela pe sa odova? Te šaj sa o manuša te šunen i šukar vest ki pi ćhib. O Jehova nane pristrasno, so jasno dićhola ando odova ked phenđa so i šukar vest ka propovedini pe „asi svako nacija, aso svako pleme, asi svako ćhib hem aso svako narodo“ (Otkr. 14:6, 7). Ov mangela i poruka ando Kraljevstvo te resel đi sa o manuša.

 ⁹ Soj tano okolencar kola živinena ko objektija kuri isi obezbeđenje? Te šaj te resel pe đi odola manuša, e Jehovasi organizacija počminđa te koristini različita metode ando propovedibe ko javna thana. Na primer, ko 2001. berš, o Vodeće telo odobrinđa te koristinen pe o kolice hem o astalija kuri hine ćhivdi amari literatura. Najangleder, odova hine ki Francuska, a palo odova hem ko avera phuvja. O rezultati hine šukar. Palo odova, ko 2011. berš ki Amerika počminđa te koristini pe nevo program, i služba ko bare dizja, ki diz Njujork, ko than kuri nakhena but manuša. Ði trajinđa odova prvo berš, hine podelime 102 129 knjige hem 68 911 časopisija. Hem 4 701 manuša rodinđe e biblijako kurs! Sa odova jasno mothovđa so o Jehova pe sveto duhoja podupirini akava delo. Odolese, o Vodeće telo odobrinđa te koristinen pe o kolice hem o astalija kuri tani ćhivdi amari literatura hem ko avera phuvja.

10. Sar šaj te ova pana pošukar ki služba?

¹⁰ So tu šaj te ćere? Ko sastankija, o Jehova sikavi amen sar te propovedina. Koristin odova ked propovedineja. Redovno đa ki služba te phraljencar hem te phenjencar kotar ti grupa. On šaj te pomožinen tut te ove pana pošukar ki služba hem te ohrabrinen tut pe primereja. Istrajin ki služba iako isi tut disave izazovija. Sar so podsetini amen o stih ko kova temeljini pe akava članko, sa so ćeraja ki amari služba, uspinaja sebepi i pomoć ando sveti duh, a na amare snagaja (Zah. 4:6). Ko krajo, na valjani te bistra so akija tani e Devlesi buti.

11. Sar o phralja ko vodeće telo ko prvo veko sarađujinđe jekh jekheja te bi maškaro e Devleso narodo ovela redo hem mir?

¹¹ Ko prvo veko. O phralja kola služinđe ko vodeće telo ko Jerusalim, sarađujinđe jekh jekheja te bi maškaro e Devleso narodo ovela redo hem mir (Dela 2:42). Na primer, ked oko 49. berš ki nevi era, pojavinđa pe o pućibe ando obrezanje, o vodeće telo uzi i pomoć ando sveto duh počminđa te razmotrini odija tema. Ked odova pućibe na bi ovela  rešimo, ki skupština bi ovela i podela hem šaj sebepi odova bi aćhola o propovedibe. Iako hine Jevreja, o apostolija hem o starešine, na dozvolinđe i jevrejsko tradicija te utičini upro lende, ni okola kola zorale ićerđe pe ki odija tradicija. Umesto odova, on proučinđe e Devleso Lafi hem rodinđe ando Devel oleso sveti duh te bi pomožini len te anen ispravno odluka (Dela 15:1, 2, 5-20, 28). Savo hine o rezultati? O Jehova blagoslovinđa olengi odluka, ki skupština hine mir hem jekhipe hem o propovedibe nastavinđa pe (Dela 15:30, 31; 16:4, 5).

12. So mothovi so ki e Jehovasi organizacija isi redo hem mir?

¹² Avdije. E Jehovasi organizacija dela sa pestar maškaro e Jehovaso narodo te ovel redo hem mir. Pana ko 1895. berš, ki Sionska stražarska kula i glasnik Hristove prisutnosti ando 15. novembar, ikljilo o članko e temaja „Nek ovel sa pristojno hem sar soj tano redo“, kova temeljinđa pe ki 1. Korinćanima 14:40. Ko odova članko pisinđa: „O apostolija e hrišćanenđe ko prvo veko pisinđe but buća ando redo... Najvažno tano te ićere tut ko odova so ’hine pisimo angleder, [sose] pisimo tano te sikavi amen‘“ (Rimlj. 15:4). Sar so ki prvo hrišćansko skupština hine važno o red hem o mir, isto ađahar tano hem avdije ki e Jehovasi organizacija. Na primer, ako bi valjani te prisustvujine ko sastanko Proučibe andi Stražarsko kula ki aver skupština ja ki aver phuv, tu bi đaneja sar o proučibe izgledini hem kova članko ka ćerel pe. Ko odova trenutko, ka osetine tut so samći ćhere hijan! Samo e Devleso duho šaj te ćerel asavko jekhipe (Zah. 3:9, fusn.).

13. Premali Jakovljeva 3:17, kola pućiba šaj te puće tut?

¹³ So tu šaj te ćere? O Jehova mangela oleso narodo „te ićeri o jekhipe, kova isi le sebepi o sveti duh, ađahar so arakhi o mir kova povezini le“ (Ef. 4:1-3). Odolese puć tut: „Da li me dava sa mandar ki skupština te ovel jekhipe hem mir? Da li šunava okolen kola predvodinena? Da li avera šaj te osloninen pe upro mande, posebno ako isi man disave odgovornostija ki skupština? Da li hijum tačno, spremno te pomožinav hem te služinav  averenđe?“ (Čitin Jakovljeva 3:17.) Ako dikheja so ko diso šaj te ove pana pošukar, molin tut aso sveti duh. Ako mukheja o sveti duh te utičini upro tute hem upro odova so ćereja, te phralja hem te phenja ki skupština pobuter ka mangen tut hem ka ceninen tut.

14. Premalo Kološanima 1:9, 10, sar o Jehova sikavđa pe narodo ko prvo veko?

¹⁴ Ko prvo veko. O Jehova uživini te sikavi pe narodo (Ps. 32:8). Ov mangela amen te penđara le, te manga le hem te živina večno sar olese mangle ćhave. Ked na bi sikavi amen, odova na bi ovela moguće (Jov. 17:3). Ko prvo veko, o Jehova sikavđa pe narodo prekali hrišćansko skupština. (Čitin Kološanima 1:9, 10.) Najvažno uloga ko odova hine le „o pomoćniko“, o sveti duh, kas o Isus obećinđa (Jov. 14:16). Odolese o učenikija šajinđe pošukar te haljon e Devleso Lafi hem te setinen pe ko but buća kola o Isus vaćerđa hem ćerđa, a kola kasnije hine pisime ko Jevanđelja. Odova so sikljilje pomožinđa e hrišćanenđe ko prvo veko te zorjaćeren pi vera hem pana pobuter te mangen e Devle, olese Ćhave hem jekh jekhe.

15. Sar dikhljan so e Jehovaso obećanje ando Isaija 2:2, 3 ispunini pe?

¹⁵ Avdije. O Jehova prorekninđa so „ko poslednja dive“ o manuša ando sa o narodija ka ćeden pe ki simbolično gora te bi o Jehova sikavi len. (Čitin Isaija 2:2, 3.) Odova proročanstvo ispunini pe ko amaro vreme. Amen šaj te dikha so o pravo obožavanje tano but pošukar ando bilo kova obožavanje kova tano hovavno. Ćaće, o Jehova dela amen but duhovno hrana! (Is. 25:6). Ov na samo so prekalo „verno hem razborito robo“ dela amen but duhovno hrana, već odija duhovno hrana dela amen ko različita načinija. Na primer, isi amen člankija, govorija, crtanija  hem kratka filmija (Mat. 24:45). Amen osetinaja amen sar e Joveso amal, o Elijuj, kova opravdano phenđa: „Isi li učitelj sar [soj tano o Devel]?“ (Jov 36:22).

16. Sar šaj duhovno te napredujine?

¹⁶ So tu šaj te ćere? E Devleso duho ka pomožini tuće te primenine sa odova so čitinđan hem proučinđan ko e Devleso Lafi. Molin tut sar o psalmista: „Jehova sikav man ando to drumo. Ka živinav premalo to ćaćipe. De man vilo kova nane podelimo, te šaj te darav ando to anav“ (Ps. 86:11). Nastavin te koristine i duhovno hrana koja o Devel dela prekalo po Lafi hem prekali pi organizacija. Naravno, to cilj nane samo te đane so pobuter. Tu mangeja te ove uverimo so odova ko so verujineja tano ćaćipe hem te primenine odova ko to životi. E Jehovaso duho ka pomožini tut te ćere odova. Uzo odova, tu mangeja te ohrabrine te phraljen hem te phenjen (Jevr. 10:24, 25). Sose? Odolese soj tane on ti duhovno porodica. Molin tut e Devleso duho te pomožini tuće te komentarišine te lafencar ko sastankija hem te de sa tutar ked isi tut disavo zadatko ko sastanko. Odoleja ka mothove e Jehovase hem olese Ćhavese so mangeja olenge mangle „bakren“ (Jov. 21:15-17).

17. Sar šaj te mothove so verno podupirineja e Jehovasi organizacija?

¹⁷ Pana hari, jedino organizacija koja ka aćhol ki phuv ka ovel odija organizacija koja vodini e Devleso duho. Odolese, de sa tutar te sarađujine e Jehovase organizacijaja. Ov sar o Devel, kova nane pristrasno, ađahar so ka propovedine i šukar vest sa e manušenđe. Mothov so sar o Jehova mangeja o redo hem o mir, ađahar so ka de sa tutar ki skupština te ovel jekhipe. Hem šun te Veličanstveno Učitelje ađahar so ka koristine sa i duhovno hrana koja ov dela tuće. Tegani, ked ka avel o kraj ando e Bengeso sveto, tu na ka dara. Umesto odova, tu hrabro ka terđove maškaro okola kola verno sarađujinena e Jehovase organizacijaja.