1. Sar o lafija andi 2. Korinćanima 3:1-3, pomožinena amen te cenina odova so isi amen čast te pomožina e manušenđe te napredujinen đi o krštenje? (Dikh i slika ko početko ando akava časopis.)

SAR osetineja tut ked dikheja so jekh student kotar ti skupština krstini pe? Sigurno but radujineja tut! (Mat. 28:19). Hem ako tu hijan okova kova proučinđa oleja, sigurno hijan but bahtalo so ov krstini pe! (1. Sol. 2:19, 20). Okola so krstinena pe tane šuže „lila andi preporuka“, na samo aso okola kola proučinđe olencar već hem asi celo skupština. (Čitin 2. Korinćanima 3:1-3.)

2. (a) Kova važno pućibe ka razmotrina hem sose? (b) Soj tano e biblijako kurs? (Dikh i fusnota.)

² Šukar tano te zapazina so ko poslednja štar berš, ko celo sveto svako masek hine izvestime, oko deš milionija e biblijake kursija. * Ko ista odola berša, oko 280 000 manuša krstinđe pe svako berš sar e Jehovase svedokija hem ulje učenikija ando Isus Hrist. Sar šaj te pomožina okolenđe kola pana proučinena te krstinen pe? Sa đi o Jehova strpljivo dela e manušenđe vreme hem prilika te oven e Hristese učenikija, hem amen mangaja te da sa amendar te pomožina len so posig te napredujinen đi o krštenje. Na aćhilo amenđe pana but vreme! (1. Kor. 7:29a; 1. Petr. 4:7).

3. So ka dikha ko akava članko ando e biblijake kursija?

 ³ Kobor tano važno te ćeren pe o učenikija, mothovi odova so o Vodeće telo zamolinđa e podružnicen aso predlogija sar šaj te pomožini pe so pobuter manušenđe te napredujinen đi o krštenje. Ko akava hem ko aver članko, ka dikha so šaj te sikljova ando iskusna pionirija, misionarija hem pokrajinska nadglednikija (Posl. 11:14; 15:22). * Ko akala člankija ka dikha so šaj te ćeren o učiteljija hem o studentija te šaj o kurs te napredujini. Ko akava članko ka dikha panđ buća kola svako student valjani te ćerel te šaj te napredujini đi o krštenje.

4. So valjani te đana ando kursija kola vodinena pe ko udara?

⁴ But amare phralja hem phenja proučinena e manušencar i Biblija ko udara. Iako odova tano šukar način te podstaknina e manuše te mangel te đanel pobuter andi Biblija, odola razgovorija tane obično kratka hem možda nane redovna. Te šaj te podstakninen e stanare te mangel te đanel pobuter, disave phralja hem phenja pućena le aso oleso broj ando telefoni. Palo odova, đi na avena aver puti, vićinena ja bićhalena poruka e stanarese hem podelinena oleja disavi kratko misao ando e Devleso Lafi. Asavke povremena razgovorija šaj čak masekoncar te trajinen. Ama, da li o student ćaće ka napredujini đi o predanje hem o krštenje, ako samo odova vreme hem snaga trošini te bi proučini e Devleso Lafi? Verovatno so na.

5. Sar šaj te koristina o lafija kola o Isus phenđa ko Luka 14:27-33, te pomožina amare studentenđe?

⁵ Jekhvar, o Isus koristinđa jekh primer te bi objasnini so valjani jekh osoba te ćerel te bi ovela oleso učenik. Ov vaćerđa ando jekh manuš kova mangela te ćerel i kula hem ando jekh kralj kova mangela te đal ko maribe. O Isus phenđa so okova kova gradini i kula najangleder mora te „bešel te računini kobor ka koštini odova“, te bi šaj te završini i kula đi o krajo. Ov phenđa hem so o kralj najangleder mora te „bešel te pućel aso savet averen“, te dikhel da li olesi vojska šaj te pobedini. (Čitin Luka 14:27-33.) Isto ađahar, o Isus đanđa so o manuš kova mangela te ovel oleso učenik valjani šukar te razmislini odolestar so značini odova te sledini le. Odolese, valjani te podstaknina amare studenten te proučinen amencar svako kurko. Sar šaj te ćera odova?

6. So valjani te ćera te šaj te ovel amen kursija kola šukar napredujinena?

 ⁶ Probin hari te produžine o razgovor kova isi tut te studenteja anglo udara. Svako puti ked posetineja le možda šaj te vaćere oleja ando pana jekh stih. Ked sikljola ko hari poduže posete, šaj te puće le da li šaj negde te bešen hem te vaćeren. Oleso odgovor ka mothovi tuće kobor ov ozbiljno dikhela ko proučavanje. Te šaj te pomožine lese posig te sikljol, šaj te puće le da li mangela te proučini duvar ko kurko. Ama, odova nane sa. Potrebno tano diso pobuter nego samo te proučini pe jekhvar ja duvar ko kurko.

7. Sar šaj tu sar učitelj te pripremine tut šukar aso svako kurs?

⁷ Sar učitelj, tu valjani šukar te pripremine tut aso svako kurs. Najangleder šaj te čitine o materijali kova ka proučinen hem e biblijake stihija. O glavna mislija kotar odova materijali valjani tuće te oven jasna. Razmislin ando naslov, ando podnaslovija, ando pućiba, ando stihija kola valjani zajedno te čitinen, ando slike hem ando odova kova film šaj te koristine te objasnine i tema. Ði razmislineja ando to student, hor razmislin sar šaj odola informacije te objasnine lese ko jekh jednostavno hem jasno način te šaj ov lokho te haljol len hem te primenini len (Nem. 8:8; Posl. 15:28a).

8. So e Pavlese lafija ando Kološanima 1:9, 10 sikavena amen andi molitva aso amare studentija?

⁸ Ði pripremineja tut, molin tut e Jehovase aso to studenti hem te haljove olese potrebe. Rode ando Jehova te pomožini tut te sikave andi Biblija ko način kova ka resel đi oleso vilo. (Čitin Kološanima 1:9, 10.) Puć tut da li ko odova materijali isi diso so te studentese ka ovel pharo te haljol ja te prihvatini. Ma te bistre so to cilj tano te pomožine lese te napredujini đi o krštenje.

9. Sar šaj o učitelj te pomožini pe studentese te pripremini pe aso po kurs? Objasnin.

⁹ Nadinaja amen so o redovno biblijako kurs ka pomožini e studentese te cenini odova so o Jehova hem o Isus ćerđe hem so ka mangel pobuter te sikljol (Mat. 5:3, 6). Ama, te šaj potpuno te koristini lese o kurs, o student valjani te obratini pažnja ko odova so sikljola. Te šaj te pomožine lese te ćerel odova, objasnin lese kobor tano važno te pripremini pe aso svako kurs ađahar so angleder ka čitini o materijal hem so ka razmislini sar  te primenini le. Sar šaj tu sar učitelj te pomožine le? Pripremin o materijal zajedno te studenteja te šaj te mothove lese sar te pripremini pe. * Objasnin lese sar te arakhel o direktna odgovorija ko pućiba hem mothov lese sar odova so ka podvucini samo o ključna lafija ja nekobor lafija, ka pomožini lese te setini pe soj tano o odgovor. Palo odova, puć le te del odgovor pe lafencar. Tegani, ka dikhe kobor šukar haljola o materijali kova proučinena. Ama, isi pana diso so šaj te podstaknine le te ćerel.

10. (a) Sose tano važno jekh student te čitini i Biblija svako dive? (b) So valjani te ćerel te šaj te koristini lese odova so čitini ki Biblija?

¹⁰ Uzo odova so ka ovel le e biblijako kurs svako kurko, ka ovel korisno ako disave buća o student kokri ćerela. Važno tano te šunel e Jehova hem te vaćeri oleja. Ov šaj te šunel e Devle, ađahar so svako dive ka čitini i Biblija (Is. Nav. 1:8; Ps. 1:1-3). Mothov lese sar te koristini o raspored aso čitibe andi Biblija kova tano ćhivdo ko amaro sajt jw.org. * Ama, te bi koristini lese odova so čitini ki Biblija, podstaknin le hor te razmislini ando odova so i Biblija sikavi le ando Jehova hem sar šaj te primenini odova so sikljola ko po đivdipe (Dela 17:11; Jak. 1:25).

11. Sar šaj o student te sikljol te molini pe ko ispravno način hem sose tano važno često te molini pe e Jehovase?

¹¹ Podstaknin te studente te vaćeri e Jehovaja ađahar so svako dive ka molini pe olese. Ko početko hem ko krajo ando svako kurs, molin tut ando vilo hem spomenin te studente ki molitva. Ði šunela sar molineja tut, ov ka sikljol sar kotar vilo te molini pe hem pe molitve e Jehovase te uputini ko anav ando Isus Hrist (Mat. 6:9; Jov. 15:16). Zamislin samo kobor ka pomožini lese odova so svako dive čitini i Biblija (šunela e Jehova) hem so molini pe (vaćeri e Jehovaja), te ovel popaše e Devleja (Jak. 4:8). Ako ćerela odova svako dive, odova ka pomožini lese te napredujini đi o predanje hem o krštenje. Ama, so šaj pana te pomožini lese?

12. Sar šaj tu sar učitelj te pomožine te studentese te ovel amal e Jehovaja?

¹² Odova so o student sikljola ko e biblijako kurs, na valjani te utičini samo ki olesi godi već hem ko oleso vilo. Sose? Odolese  so amaro vilo kova uključini amare želje, emocije hem osećanja, podstaknini amen ko delija. Ði sikavđa e manušen, o Isus koristinđa i logika te bi utičini ki olengi godi. Ama, o manuša sledinđe le odolese so ov takinđa hem olengo vilo (Luka 24:15, 27, 32). To student valjani te doživini e Jehova sar jekh stvarno Osoba, sar nekas kasa šaj te ovel paše hem te dikhel le sar pe Dade, sar pe Devle hem sar pe Amale (Ps. 25:4, 5). Ði proučinena, pomožin lese te dikhel e Devlese šuže osobine (Izl. 34:5, 6; 1. Petr. 5:6, 7). Kotar koja god tema te vaćeren, usmerin i pažnja ko odova savi Osoba tano o Jehova. Pomožin te studentese te cenini e Jehovase šuže osobine – oleso mangipe, šukaripe hem saosećanje. O Isus phenđa so i „najbari hem prvo zapovest“ tani: „Mang e Jehova, te Devle“ (Mat. 22:37, 38). De sa tutar te pomožine te studentese te mangel e Devle.

13. Sar šaj te pomožine te studentese te sikljol ando e Jehovase osobine? Vaćer jekh primer.

¹³ Ði vaćereja te studenteja, mothov so tu osetineja premalo Jehova. Šaj odova ka pomožini te studentese te haljol so hem ov valjani te ovel paše amal e Devleja (Ps. 73:28). Na primer, da li ki publikacija koja proučinena isi disavi rečenica ja stih kova mothovi diso ando Jehova – ando oleso mangipe, andi olesi mudrost, pravda hem moć – so takini to vilo? Mothov odova te studentese. Nek đanel so odova tano samo jekh ando but razlogija sebepi kola mangeja amare nebesko Dade. Ama, isi pana diso so svako student valjani te ćerel te šaj te napredujini đi o krštenje.

14. So o Jevrejima 10:24, 25 vaćerena amenđe ando sastankija hem sar šaj on te pomožinen e studentese te napredujini?

¹⁴ Sare amen mangaja amare studentija te napredujinen đi o krštenje. Jekh važno način sar šaj te pomožina len tano te podstaknina len te aven ko sastankija. O iskusna učiteljija phenena so o studentija kola odmah počminena te aven ko sastankija, najsigate napredujinena (Ps. 111:1). Disave učiteljija objasninena pe studentenđe so but buća kola ka sikljon ko sastankija, na ka sikljon ko kurs. Zajedno te studenteja čitin Jevrejima 10:24, 25 hem mothov lese sose ka ovel šukar ako avela ko sastankija. Mukh lese o kratko film Sar izgledinena o sastankija ki amari Dvorana? * Pomožin  te studentese te ovel odlučno te avel redovno ko sastankija.

15. So šaj te ćera te podstaknina amare studente te avel redovno ko sastankija?

¹⁵ So šaj te ćere ako to student pana na alo ko nijekh sastanak ja pana na avela redovno? Pherde vileja vaćer lese diso so sikljiljan ko sastanko kova hine akana sigende. Odova pobuter ka podstaknini le nego samo te vićine le te avel ko sastanak. De le i Stražarsko kula hem i Radno sveska kola akana ćerena pe ko sastankija. Mothov sostar ka ovel vaćerdo ko aver sastanak hem puć le kova deo najviše sviđini pe lese. Odova so to student ka doživini ked ka avel prvo puti ko sastanak, ka ovel but pošukar kotar sa so dikhlja ja šunđa ki bilo koja aver religija (1. Kor. 14:24, 25). Odothe ka upoznajini e phraljen hem e phenjen kaso šukar primer šaj te oponašini hem kola ka pomožinen lese te napredujini đi o krštenje.

16. So valjani te ćera te šaj o manuša kola proučinena te napredujinen đi o krštenje hem sostar ka vaćera ko aver članko?

¹⁶ Sar šaj te pomožina e studentenđe te napredujinen đi o krštenje? Amen šaj te pomožina svakone studentese te haljol so o proučavanje tano diso ozbiljno, ađahar so ka podstaknina le te proučini svako kurko hem te pripremini pe aso svako kurs. Isto ađahar, mangaja te podstaknina le te vaćeri e Jehovaja svako dive, te ovel amal Oleja hem te avel redovno ko sastankija. (Dikh o okvir „ Panđ buća kola o studenti valjani te ćerel“) Ama, sar so ka dikha ko aver članko, isi pana panđ buća kola amen sar učiteljija šaj te ćera te pomožina e studentenđe te napredujinen đi o krštenje.