ČLANKO PROUČIBASE 38
„Aven koro mande [...] hem me ka dav tumen nevi snaga“
Aven koro mande sare so hijen umorna hem so isi tumen pharipa, hem me ka dav tumen nevi snaga (MAT. 11:28)
DŽILI 17 „Hoću“
SOSTAR KA VAČERA *
1. Premalo Matej 11:28-30, kova obećanje o Isus dindža?
O ISUS dindža jekh but šukar obećanje e manušendže kola šundže lje. „Aven koro mande“ phendža ov, „hem me ka dav tumen nevi snaga“. (Čitinen Matej 11:28-30.) O Isus čače mislindža odova so phendža. Na primer, te dikha so o Isus čerdža jekha romnjače koja hine but nabormi.
2. So o Isus čerdža jekha naborme romnjače?
2 Jekha romnjače valjandža pomoć. Oj dželji ko but doktorija, sose mislindža so ka pomožinen la. Patindža 12 berš, ama niko naštindža te pomožini la. Premalo Zakon, oj na hine čisto (Lev. 15:25). Palo odova, šundža so o Isus sačari e nabormen hem dželji te rodel lje. Ked arakhlja lje, oj pipindža o krajo ando ljeso fistani hem odmah sačilji. Ama, o Isus na sačardža samo olako telo. Sebepi o način sar ponašindža pe premalo late, oj osetindža oljeso mangipe hem poštovanje. Na primer, ked vačerdža olaja, ov mothovdža so mangela la hem so poštujini la, adžahar so vičindža la „mi čhaj“. Akala lafija sigurno dindže la nevi snaga hem zorjačerdže la (Luka 8:43-48).
3. Ko kola pučiba ka dobina odgovor?
3 Dikhaja so i romni dželji ko Isus hem trudindža pe te arakhi lje. Isto hem avdije, hem amen valjani te trudina amen te ava koro Isus. Džandžola pe, o Isus na ka čerel čudo te sačari okoljen kola avena koro ljeste. Ama, odova poziv pana važini: „Aven koro mande [...] hem me ka dav tumen nevi snaga“. Ko akava članko, amen ka dobina odgovorija
ko pandž pučiba: Sar šaj te ava koro Isus? So o Isus mislindža ked phendža: „Ljen moklo jaram“? So šaj te sikljova ando Isus? Sose o zadatak kova ov dindža dela amen nevi snaga? Hem sar šaj pana ponodri te ovel amen nevi snaga dži akharaja e Isuseso jaram?„AVEN KORO MANDE“
4-5. Ko kola načinja amen šaj te ava koro Isus?
4 Jekh način sar šaj te ava koro Isus tano adžahar so trudina amen so pošukar te pendžara odova so sikavdža hem čerdža (Luka 1:1-4). Amari odgovornost tani te proučina odova so i Biblija vačeri ando Isus. Isto adžahar, amen avaja koro Isus, ked odlučinaja te krstina amen hem te ova e Hristese učenikija.
5 Aver način sar šaj te ava koro Isus tano ked pučaja e starešinen te pomožinen amen. O Isus dindža odolje „manušen sar poklon“ te šaj te brininen pe ando oljeso stado (Ef. 4:7, 8, 11; Jov. 21:16; 1. Petr. 5:1-3). Amen valjani te roda pomoć oljendar. Amen našti te očekujina o starešine te džanen sostar amen razmislinaja hem so valjani amendže. Amaro phral, o Džulijan phenela: „Sebepi mo sastipe morandiljum te ikljovav ando Betel. Jekh moklo amal phendža maje te vičinav e starešinen te aven koro mande te ohrabrinen man. Ko početko, mislindžum so na valjani maje odova. Ama palo odova, pučljum ljen te pomožinen man hem odija poseta hine najšužo poklon so dobindžum ko moklo dživdipe.“ O starešine kola verno služinena, sar akala duj so posetindže e Džulijane, šaj te pomožinen amen te haljova hem te oponašina o način ko kova o Isus razmislindža (1. Kor. 2:16; 1. Petr. 2:21). Ked on pomožinena amen ko asavko način odova šaj te ovel jekh ando najšuže poklonija kola šaj te den amen.
„LJEN MOKLO JARAM UPRO TUMENDE“
6. So o Isus mislindža ked phendža: „Ljen moklo jaram upro tumende“?
6 Ked o Isus phendža: „Ljen moklo jaram upro tumende“, šaj odoljeja mislindža so valjani te prihvatina oljeso autoritet. Ama, šaj odoljeja manglja te phenel hem „aven mancar talo jaram hem zajedno ka služina e Jehovase“. Sa akava mothovi so amendar rodela pe diso te čera.
7. Premalo Matej 28:18-20, kova zadatko tano amendže dindo hem ko so šaj te ova sigurna?
7 Amen prihvatindžam e Isuseso poziv ked dindžam amaro dživdipe e Jehovase hem krstindžam amen. O Isus vičindža sarinen te aven koro ljeste hem ov niked na ka odbacini nikas ko iskreno mangela te služini e Devljese (Jov. 6:37, 38). Sa e Hristese učenikija isi ljen čast zajedno e Isuseja te čeren o zadatko kova o Jehova dindža lje. Amen šaj te ova sigurna so o Isus uvek ka ovel amencar te pomožini amen te čera odova zadatko. (Čitinen Matej 28:18-20.)
„SIKLJOVEN MANDAR“
De nevi snaga averendže sar so o Isus čerdža (Dikh kotar 8-11. odlomko) *
8-9. (a) Sose o ponizna manuša manglje te oven paše e Isuseja? (b) So valjani te puča amen?
8 O ponizna manuša manglje te oven paše e Isuseja (Mat. 19:13, 14; Luka 7:37, 38). Sose odova hine adžahar? Te dikha kobor o Isus razlikujindža pe ando fariseja. Odola e religijake vođe na manglje e manušen hem hine ponosna (Mat. 12:9-14). O Isus manglja e manušen hem hine ponizno. O fariseja manglje te oven but pendžarde hem manglje te čeren pe važna anglo avera. O Isus phendža so odova nane šukar, hem sikavdža peklje učenikonen te oven ponizna hem te služinen averendže (Mat. 23:2, 6-11). O fariseja hine ljen moć upro manuša hem odoljese o manuša darandilje so ka ovel oljencar ako na šunena ljen (Jov. 9:13, 22). O Isus ohrabrindža e manušen adžahar so hine ljubazno hem šukar premalo ljende.
9 Da li sikljiljan diso ando Isus? Puč kokri tut: Da li hijum pendžardo sar jekh ponizno hem blago manuš? Da li spremno čerava i buti koja nane odobor važno te šaj te služinav averendže? Da li hijum ljubazno premalo avera?
10. Sar hine e učenikonendže dži hine e Isuseja?
10 Dži hine pe učenikonencar, o Isus dindža sa pestar on te osetinen pe šukar oljeja hem uživindža te sikavi ljen (Luka 10:1, 19-21). Ov podstaknindža pe učenikonen slobodno te pučen hem manglja te šunel so on mislinena (Mat. 16:13-16). Sar so jekh luludi napredujini ked tani zaštitimi ando šudro, isto hem e Isusese učenikija šukar napredujindže. On šundže odova so o Isus sikavdža ljen hem andže šukar plod kova dičhilo ko odova so čerdže.
Ov manuš kasa šaj lokho te vačeri pe hem ov amal
Ov aktivno hem revno
Ov ponizno hem bučarno *
11. Kola pučiba valjani te puča amen?
11 Da li isi tut disavo autoritet upro avera? Ako isi tut, tegani puč kokri tut: „Sar ponašinava man premalo avera ki buti, ja čhere? Da li dava sa mandar te ovel mir? Da li avera šaj slobodno te pučen man so interesini ljen? Da li spremno šunava so avera mislinena? Niked na mangaja te ova sar o fariseja. On holjandže ked o manuša na složindže pe odoljeja so on sikavdže, hem hine gruba premalo manuša kola na mislindže sar on (Mar. 3:1-6; Jov. 9:29-34).
„KA OVEL TUMEN NEVI SNAGA“
12-14. Sose o zadatko kova o Isus dindža dela amen nevi snaga?
12 Sose o zadatko kova o Isus dindža dela amen nevi snaga? Isi but razlogija, ama akana ka vačera ando nekobor.
13 Isi amen najšukar nadglednikija. O Jehova, amaro Najbaro Nadgledniko, nane grubo gospodari kova na mothovi zahvalnost pe slugendže. Ov cenini odova so amen čeraja (Jevr. 6:10). Isto adžahar, ov dela amen snaga koja valjani amendže te šaj te čera o zadatko kova dindža amen (2. Kor. 4:7; Gal. 6:5). O Isus, amaro Kralj, dindža amen savršeno primer sar te ponašina amen premalo avera (Jov. 13:15). A o starešine kola brininena pe amendar, trudinena pe te oponašinen e Isuse, „e bare pastire“ (Jevr. 13:20; 1. Petr. 5:2). On trudinena pe te ohrabrinen amen, te oven ljubazna hem hrabra dži brinena pe amendar hem štitinena amen.
14 Isi amen najšukar amala. Niko nane lje asavke šukar amala hem odobor šukar buti sar so amen isi amen. Razmislin akaljestar: Amen čeraja buti e phraljencar hem e phenjencar kola šukar ponašinena pe hem na mislinena soj tane pošukar ando avera. Iako tane but sposobna, on na hvalinena pe odoljeja hem na mislinena soj tane on pobare amendar. Na dikhena amen samo sar saradnikija, nego hem sar amala. Oljengo mangipe premalo amende tano odobor baro soj tane spremna te den po dživdipe amendže.
15. Sar valjani te dikha ko zadatko kova čeraja?
15 Isi amen najšukar zadatko. Amen sikavaja e manušen o čačipe ando Jehova hem mothovaja e Bengese hovajba (Jov. 8:44). O Beng čhivela e manušendže pharipa kola našti te akharen. Na primer, ov mangela te verujina so o Jehova na ka oprostini amare grehija hem so na mangela amen. Akava tano baro hovajbe kova but obeshrabrini e manušen. Ked amen avaja koro Isus, amare grehija tane oprostime. Isto adžahar, o Jehova sarinen but mangela (Rimlj. 8:32, 38, 39). Kobor samo hijam bahtalje dži pomožinaja e manušendže te osloninen pe upro Jehova hem ked dikhaja sar oljengo dživdipe ovela sa pošukar.
SAR HEM PONODRI TE DOBINA NEVI SNAGA DŽI AKHARAJA E ISUSESO JARAM?
16. Sar o pharipe kova o Isus dindža amen tano averčhane ando avera pharipa kola valjani te akhara?
16 O pharipe kova o Isus dindža amen tano averčhane ando avera pharipa kola valjani te akhara. Na primer, but amendar ked avaja andi buti hijam but umorna hem na hijam bahtalje. Ama, ked amaro vreme daja ki služba e Jehovase hem e Hristese, amen osetinaja amen but bahtalje. Šaj palji buti hijam but umorna hem valjani te terina kokri amen te dža ko sastanak. Ama, but putija ked irinaja amen čhere, amen isi amen nevi snaga hem zoraljipe. Isto odova desini pe ked valjani te dža ki služba ja te ovel amen lično proučibe. Ked amen daja sa amendar te čera odova, amen osetinaja so isi amen nevi snaga hem zoraljipe.
17. So valjani te haljova hem ko so valjani te pazina?
17 Amen valjani te haljova so svako amendar isi lje ograničeno snaga. Odoljese, valjani te pazina sar trošinaja la. Na primer, amen šaj te trošina amari snaga te ovel amen but materijalna buča. Dikh so o Isus phendža jekhe terne hem barvalje manušese kova pučlja lje: „So valjani te čerav te šaj te nasledinav o večno dživdipe?“ Akava terno manuš već čerdža odova so phenela o Zakon. Sigurno hine šukar manuš sebepi so ko e Markoso jevanđelje pisini so o Isus e „mangipaja“ vačerdža oljeja. O Isus akalje terne vladarese phendža: „Dža hem bikin sa o buča so isi tut [...] palo odova ava hem ov moklo učenik.“ Akava terno manuš manglja te ovel e Isuseso učenik, ama naštindža te ačhavi po barvaljipe (Mar. 10:17-22). Odoljese, na manglja te akhari e Isuseso jaram hem nastavindža te ovel robo e barvaljipase (Mat. 6:24). So bi tu čereja ko oljeso than?
18. Sostar disavo puti valjani te razmislina hem sose?
18 Disavo puti, šukar tano te razmislina odoljestar soj tano amendže ko prvo than ko dživdipe. Sose? Odoljese so, tegani šaj te dikha da li šukar koristinaja amari snaga. Te dikha so phendža jekh terno phral kova vičini pe Mark: „Beršencar, mislindžum so živinava skromno. Hijum lje pioniri, ama uvek razmislindžum ando pare hem odoljestar sar šaj te ovel man pošukar dživdipe. Pokušindžum te haljovav sose mo dživdipe ulo odobor pharo. Tegani haljiljum so ko prvo than hine maje odova soj tano maje važno, a e Jehovase dindžum o vreme hem i snaga so ačhilje maje.“ O Mark menindža poklo način sar razmislini hem poklo dživdipe te šaj pobuter te čerel ki služba. „Disavo puti brininava man kotar o pare“, phenela o Mark, „ama uzi e Jehovasi pomoć hem e Isusesi podrška šaj te dav sa mandar ki služba“.
19. Sose tano važno ispravno te dikha ko buča?
19 Amen hem ponodri ka ovel amen nevi snaga talo e Isuseso jaram, ako čeraja trin buča. Sar prvo, valjani ispravno te dikha ko buča. I buti koja čeraja tani e Jehovasi, odoljese valjani te čera la sar so ov mangela. Amen hijam radnikija, a o Jehova tano Gospodari (Luka 17:10). Ako amen mangaja oljesi buti te čera ko amaro način, tegani ka ovel amendže but pharo. Čak hem o zoralo guruv šaj te povredini pe hem te umorini pe ako džala kuri ov mangela, a na kuri oljeso gospodari mangela. Ama, ako e Jehovasi buti čeraja ko oljeso način, amen šaj te čera o buča kola mislindžam so niked našti te čera hem te pobedina o pharipa kola mislindžam so niked na ka pobedina. Ma bistri, so niko našti te čhinavi e Jehova te ispunini pi namera (Rimlj. 8:31; 1. Jov. 4:4).
20. Sose amen akharaja e Isuseso jaram?
20 Sar dujto, sa so čereja čer ando ispravna motivija. Amaro cilj tano te ana čast amare manglje Dadese, e Jehovase. O manuša ko e Isuseso vreme, kola hine pohlepna hem manglje samo te dobinen diso, but sigate ulje bibahtalje hem na manglje više te akharen e Isuseso jaram (Jov. 6:25-27, 51, 60, 66; Fil. 3:18, 19). Ama, okola so manglje e Devlje hem peklje pašutnen hine bahtalje celo poklo dživdipe dži akhardže o jaram hem nadindže pe so zajedno e Hristeja ka služinen ko nebo. Sar on, hem amen ka ova bahtalje ako akharaja e Isuseso jaram ando ispravna motivija.
21. Premalo Matej 6:31-33, so šaj te očekujina ando Jehova?
21 Sar trito, valjani te ovel amen ispravna očekivanja. Amen birindžam o dživdipe kova nane lokho hem kuri valjani but te trudina amen. O Isus phendža so ka ova progonime. Ama, amen šaj te očekujina so o Jehova ka del amen snaga te izdržina bilo kova pharipe. So pobuter izdržinaja, pobuter ka ova zoralje (Jak. 1:2-4). Isto adžahar, amen šaj te očekujina so o Jehova ka del amen sa so valjani amendže, so o Isus ka brinini pe amendar hem so amare phralja hem phenja ka ohrabrinen amen. (Čitinen Matej 6:31-33; Jov. 10:14; 1. Sol. 5:11.) So valjani amendže pobuter akaljestar?
22. Sose šaj te ova zahvalna?
22 I romni kola o Isus sačardža hine la nevi snaga odova isto dive ked sačilji. Ama, oj šajindža zauvek te dobini nevi snaga samo ako ulji e Isuseso verno učenik. So mislineja, so oj čerdža? Ako odlučindža te akhari e Isuseso jaram, zamislin savi nagrada dobindža – te služini e Isuseja ko nebo. Sa so žrtvujindža, te šaj te ovel e Isuseso učenik, nane ništa ked uporedini pe odoljeja so dobindža. Bilo te ovel amen nada te dža upre ja te živina ki phuv, amen šaj te ova zahvalna so prihvatindžam e Isuseso poziv: „Aven koro mande!“
DŽILI 13 Hrist, naš Uzor
^ odl. 5 O Isus vičini amen te ava koro ljeste. So značini te prihvatina akava poziv? Akava članko ka del amen odgovor ko akava pučibe hem ka setinčeri amen sar odova so sarađujinaja e Hristeja ka del amen nevi snaga.