1-2. (a) Sose o Armagedon tano šukar haberi e manušendže? (b) Ko kola pučiba ka dobina odgovor ko akava članko?

DISAVE manuša verujinena so o nuklearno maribe ja i prirodno katastrofa ka uništini o sveto. Ama, i Biblija na sikavi odova. Koro late pisini so pana hari ka ovel jekh maribe kova ka anel šukar buča. Akava maribe vičini pe Armagedon. Odova so i Biblija vačeri ando akava maribe valjani te anel amendže bahtaljipe (Otkr. 1:3). Ko Armagedon o čovečanstvo na ka ovel uništimo, nego ka ovel spasimo. Sar ka ovel odova?

² I Biblija mothovi so ko Armagedon o manuša ka oven spasime adžahar so o manušikane vladavine ka oven uništime. Odova maribe ka spasini e manušen adžahar so ka uništini e lošnonen hem ka arakhi e pravednonen. Isto adžahar, o manuša ka oven spasime, adžahar so amari planeta na ka ovel uništimi (Otkr. 11:18). Te šaj pošukar te haljova akala buča te dikha o odgovorija ko akala štar pučiba: Soj tano o Armagedon? Kola događaja ka desinen pe hari angljeder o Armagedon? Sar šaj te ova maškaro okola so ka oven spasime ko Armagedon? Sar šaj te ačhova verna dži o Armagedon tano sa popaše?

3. (a) So značini o lafi „Armagedon“? (b) Premalo Otkrivenje 16:14, 16, sose šaj te phena so o Armagedon nane doslovno than ki phuv?

³ Čitinen Otkrivenje 16:14, 16. O lafi „Armagedon“ pojavini pe samo jekh puti ki Biblija. Odova lafi avela kotar hebrejsko čhib so značini „megidsko brego“ (Otkr. 16:16, fusn.). O Megido hine diz ko purano Izrael (Is. Nav. 17:11). Ama, o Armagedon nane nav kotar disavo doslovno  than ki phuv. Odova odnosini pe ki situacija ked sa o kraljija ki phuv ka čeden pe te borinen pe protiv o Jehova (Otkr. 16:14). Ko akava članko, o lafi „Armagedon“ ka odnosini pe hem ko maribe kova ka ovel odmah palo odova so ka čeden pe o kraljija ki phuv. Sar džanaja so o Armagedon odnosini pe ko simbolično than? Sar prvo, o megidsko brego nane doslovno. Sar dujto, o than okolo Megido nane odobor baro te šaj te resen o „kraljija ando celo sveto“ hem oljengi vojska hem oljengo oružje. Sar trito, sar so ka dikha ko akava članko, o Armagedon ka počmini ked akalje svetose „kraljija“ ka napadinen e Devljese narodo, kova tano prekali celo phuv.

4. Savi veza isi maškaro e Devljeso maribe hem o Megido?

⁴ Savi veza isi maškaro e Devljeso maribe hem o Megido? O Megido hem i dolina Jezrael hine thana kuri hine bare bitke. Disavo puti, o Jehova pomožindža pe narodose te pobedini ko odola bitke. Na primer, o Devel koristindža o „panja ko Megido“, te pomožini e izraelsko sudijase e Varakese, te pobedini i hanansko vojska kolako vođa hine o Sisara. O Varak hem i proročica Devora zahvalindže e Jehovase sose čerdža o čudo te šaj te pobedinen. On džilabdže: „Kotar nebo o zvezde borindže pe, [...] protiv o Sisara. O panja ando Kison sa ljegardže ljen“ (Sud. 5:19-21).

5. Savi razlika isi maškaro Armagedon hem i bitka ki koja borindža pe o Varak?

⁵ O Varak hem i Devora završindže piklji džili e lafencar: „Neka adžahar meren sa teklje dušmanija, Jehova, a okola so mangena tut nek oven sar o kham ked najviše tačari“ (Sud. 5:31). Isto adžahar, ko Armagedon e Devljese dušmanja ka oven uništime, a okola so mangena e Devlje ka oven spasime. Ama, isi jekh bari razlika maškaro akala duj bitke. Ko Armagedon e Devljeso narodo na ka borini pe. Čak ni oružje na ka ovel ljen. Oljengo „mir hem o pouzdanje“ ko Jehova hem ki oljesi nebesko vojska, „ka ovel [oljengi] snaga“ (Is. 30:15; Otkr. 19:11-15).

6. So šaj o Jehova te koristini te uništini pe dušmanen ko Armagedon?

⁶ Sar o Devel ka pobedini peklje dušmanen ko Armagedon? Ov šaj te koristini but buča, sar soj tane zemljotresija, kukudi hem grmljavina (Jov 38:22, 23; Jezek. 38:19-22). Šaj te čerel o dušmanja te maren pe maškaro peste (2. Let. 20:17, 22, 23). Ov šaj te koristini peklje anđelen te mudari e lošno manušen (Is. 37:36). So god o Devel ka koristini, ov ka pobedini ki odija bitka. Sa oljese dušmanja ka oven uništime, a sa o pravedna manuša ka oven spasime (Posl. 3:25, 26).

7-8. (a) Premalo 1. Solunjanima 5:1-6, koja neobično objava o vođe ko sveto ka phenen? (b) Sose odova ka ovel jekh baro hovajbe?

⁷ I objava ando „mir hem sigurnost“ ka ovel angljeder „e Jehovaso dive“. (Čitinen 1. Solunjanima 5:1-6.) Ki 1. Solunjanima 5:2, „e Jehovaso dive“ odnosini pe ki „bari nevolja“ (Otkr. 7:14). Sar ka džana ked odija nevolja ka počmini? Ki Biblija pisini so ka ovel jekh neobično objava. Odija objava ka ovel znak so i bari nevolja ka počmini.

⁸ Odova ka ovel proreknimi objava ando „mir hem sigurnost“. Sose o vođe ko sveto ka phenen odova? Da li o religiozna vođe ka učestvujinen ko odova? Šaj ka učestvujinen. Sar god ka ovel, odija  objava ka ovel samo pana jekh hovajbe ando demonja. Ama, akava hovajbe ka ovel but opasno, sose ka čhivel e manušen te mislinen soj tane bezbedna, a u stvari ka počmini i najbari nevolja koja ikad hine. Tegani „iznenada ka resel ljen o uništenje, sar o dukha e romnja koja valjani te bijani, hem na ka našen.“ So ka ovel e Jehovase verno slugencar? Odoljese so on na džanena ked tačno i bari nevolja ka počmini, on šaj ka oven iznenadime, ama ka oven spremna.

9. Sar o Devel ka uništini e Bengeso sveto?

⁹ O Jehova na ka uništini e Bengeso sveto kotar jekhvar, sar so čerdža ko e Nojese dive. Ov ka uništini e Bengeso sveto ko duj faze. Najangljeder, ov ka uništini o Baro Vavilon, kova predstavini i hovavni religija. Palo odova, ko Armagedon, ka uništini odova so ačhilo kotar e Bengeso sveto, i politika, i vojska hem o trgovačko sveto. Akana ka vačera ando detaljija kotar akala duj važna događaja.

10. Premalo Otkrivenje 17:1, 6 hem 18:24, sose o Jehova ka uništini o Baro Vavilon?

¹⁰ „O sud upri bari bludnica“. (Čitinen Otkrivenje 17:1, 6; 18:24.) O Baro Vavilon but ladžačerdža e Devljeso nav. Ov sikavdža e manušen hovajbe ando Devel. Sar jekh nemoralno džuvlji, i hovavni religija na hine verno e Jehovase, sebepi so podržindža o manušikane vladavine. I hovavni religija koristindža pi moć hem po uticaj te iskoristini e manušen. Isto adžahar, oj mudardža bute manušen hem e Devljese slugen (Otkr. 19:2). Sar o Jehova ka uništini o Baro Vavilon?

11. Kas predstavini i „skerletno zver“ hem sar o Devel ka koristini la protiv o Baro Vavilon?

¹¹ O Jehova ka koristini „deš šinga“ andi „skerletno zver“ te uništini e „[bare] bludnica“. Odija zver predstavini o Ujedinjena nacije. O deš šinga predstavinena sa o politička sile kola podržinena o Ujedinjena nacije. Ko vreme kova o Devel odredindža odola politička sile  ka napadinen o Baro Vavilon. On „ka uništinen la hem ka huljaven la nangi“, adžahar so ka ljen olako barvaljipe hem so ka mothoven averendže so nane zoralji (Otkr. 17:3, 16). Odova uništenje ka ovel odobor sigate so ka dičhol so desindža pe „jekhe divese“. Odoljese, okola so podržinena i hovavni religija ka oven šokirime sebepi so oj but puti phendža: „Bešava sar kraljica hem na hijum udovica hem o pharipa na ka dikhav“ (Otkr. 18:7, 8).

12. So o Jehova na ka dozvolini o politička sile te čeren hem sose?

¹² O Devel na ka dozvolini o politička sile te uništinen oljese narodo. On akharena oljeso nav hem šundže i zapovest te ikljon ando Baro Vavilon (Dela 15:16, 17; Otkr. 18:4). Isto adžahar, on dena sa pestar te pomožinen averendže te ikljon odothar. Iako e Jehovase sluge ka oven zaštitime ked o Baro Vavilon ka ovel uništimo, oljengi vera pana valjani te ovel zoralji te šaj te istrajinen ko odova so pana adžičeri ljen.

13. (a) Kas predstavini o Gog? (b) Premalo Jezekilj 38:2, 8, 9, so ka čhivel e Goge te napadini e Devljese narodo?

¹³ O napad ando Gog. (Čitinen Jezekilj 38:2, 8, 9.) Palo odova so o Jehova ka uništini sa o hovavne religije, ka ovel samo jekh religija ki phuv. Samo e Jehovase sluge ka ačhon. Sebepi odova o Beng ka ovel but holjamo. Ov ka mothovi odija holji adžahar so ka koristini „lafija so avena ando demonija“, te čhivel i koalicija ando narodija te napadini e Devljese slugen (Otkr. 16:13, 14). Odija koalicija vičini pe „Gog andi phuv Magog“. Ked i koalicija ando narodija ka napadini e Devljese narodo, tegani o Armagedon ka počmini (Otkr. 16:16).

14. So ka haljol o Gog?

¹⁴ O Gog ka verujini ko „e manušeso zoraljipe“, ki oljesi vojno sila (2. Let. 32:8). Amen ka verujina ko Jehova, ko amaro  Devel hem sebepi odova ka dičhova sar diljine anglo narodija. O Baro Vavilon hine but moćno, ama oljese devela na zaštitindže lje andi „skerletno zver“ hem ando olake „deš šinga“ (Otkr. 17:16). O Gog ka mislini so šaj lokheste te uništini amen. Sar „ked o oblakija učharena i phuv“, adžahar hem ov ka napadini e Jehovase narodo (Jezek. 38:16). Ama, o Gog ka haljol so pelo ki zamka. Sar o faraon ko Crveno more, hem ov ka haljol so borini pe protiv o Jehova (Izl. 14:1-4; Jezek. 38:3, 4, 18, 21-23).

15. So ka čerel o Isus ko Armagedon?

¹⁵ O Hrist hem oljesi nebesko vojska ka braninen e Devljese narodo hem ka uništinen e Goge hem oljese vojska (Otkr. 19:11, 14, 15). Ama, ko Armagedon so ka ovel e Devljese najbare dušmaneja, e Bengeja, kova hovavi e narodon hem čhivela ljen te napadinen e Devljese narodo? O Isus ka fordel olje hem oljese demonen ko bezdan hem odothe ka oven phanlje hiljada berš (Otkr. 20:1-3).

16. (a) Sar amen mothovaja so pendžaraja e Devlje? (b) So ko Armagedon ka ovel e manušencar kola pendžarena e Jehova?

¹⁶ Bilo te ova but berša ko čačipe ja na, te šaj te ova spasime ko Armagedon, valjani te mothova so „[pendžaraja] e Devlje“ hem so „šunaja o šukar haberi ando amaro Gospod Isus“ (2. Sol. 1:7-9). Amen pendžaraja e Devlje ked džanaja so ov mangela, a so na mangela hem kola tane oljese merilija. Isto adžahar, mothovaja so pendžaraja lje ked mangaja lje hem šunaja lje hem ked samo oljese služinaja (1. Jov. 2:3-5; 5:3). Ako čeraja akala buča o Devel ka pendžari amen hem ka ovel amen oljeso odobravanje (1. Kor. 8:3). Odoljese, amen šaj te ova spasime ko Armagedon.

17. So značini te šuna o „šukar haberi ando amaro Gospod Isus“?

¹⁷ O „šukar haberi ando amaro Gospod Isus“ uključini sa o čačipe kova ov sikavdža, kova tano ko e Devljeso Lafi. Amen  šunaja o šukar haberi ked ičera amen ko odova so sikavdža. Isto adžahar, amen čhivaja o Kraljevstvo ko prvo than, živinaja premalo e Devljese pravedna merilija hem vačeraja ando odova Kraljevstvo (Mat. 6:33; 24:14). Isto adžahar, valjani te pomožina e Hristese pomazano phraljendže dži on čerena piklji važno buti (Mat. 25:31-40).

18. Sar e Hristese pomazime phralja ka irinen o šukaripe kova hine oljendže mothovdo?

¹⁸ E Devljese pomazana sluge pana hari ka irinen o šukaripe kova o „avera bakre“ mothovdže oljendže (Jov. 10:16). Sar ka čeren odova? Angljeder so ka počmini o Armagedon, sare ando 144 000 ka dobinen piklji nebesko nagrada. Tegani, on ka oven deo andi nebesko vojska koja ka uništini e Goge hem ka zaštitini e Jehovase narodo (Otkr. 2:26, 27; 7:9, 10). O baro mnoštvo ka ovel but bahtalo so šajindža te pomožini e Jehovase pomazano slugendže dži hine ki phuv.

19-20. Sar šaj te ačhova verna dži o Armagedon tano sa popaše iako isi amen pharipa?

¹⁹ Dži trajinena akala poslednja dive, but ando e Jehovase svedokija isi ljen pharipa. Ama, amen šaj te istrajina hem te ačhova bahtalje (Jak. 1:2-4). Jekh buti koja šaj but te pomožini amen tani i molitva (Luka 21:36). Na valjani samo te molina amen, nego hem svako dive valjani te proučina hem te razmislina ando e Devljeso Lafi hem ando proročanstvija kola pana hari ka ispuninen pe (Ps. 77:12). Ako amen čeraja akala buča hem daja sa amendar ki služba, amari vera hem i nada ka ačhon zoralje.

²⁰ Razmislin kobor ka ova bahtalje ked ka ovel uništimo o Baro Vavilon hem ked ka završini pe o Armagedon! Soj tano pana považno, zamislin sar ka ovel ked sarine ka poštujinen e Devljeso nav hem oljeso pravo te vladini (Jezek. 38:23). Odoljese o Armagedon tano šukar haberi okoljendže kola pendžarena e Devlje, šunena oljese Čhave hem istrajinena dži ko krajo (Mat. 24:13).