1. So o Jehova mislini ando ponizna manuša? Objasnin.

O JEHOVA mangela e ponizno manušen. Samo okola soj tane čače ponizna, šaj te ovel ljen jekh paše odnos oljeja. Ama, e „oholo manuše pendžari samo dural“ (Ps. 138:6). Sare amen mangaja te ugodina e Jehovase hem te ova paše oljeja. Odoljese, valjani te sikljova te ova ponizna.

2. So ka dikha ko akava članko?

² Ko akava članko, ka dikha o odgovorija ko trin pučiba: (1) Soj tani i poniznost? (2) Sose valjani te sikljova te ova ponizna? (3) Ked šaj te ovel pharo te ova ponizna? Sar so ka dikha, ked sikljovaja te ova ponizna, odova radujini e Jehova hem uvek tano amare šukaripase (Posl. 27:11; Is. 48:17).

3. Soj tani i poniznost?

³ O ponizno manuš na mislini so ov tano považno nego avera. Ov nane ponosno. I Biblija mothovi so o ponizno manuš haljola so o Jehova tano but pobaro oljestar hem haljola kova tano avere manušengo than. Isto adžahar, ov džanela so avera tane pošukar oljestar ko disave buča (Fil. 2:3, 4).

4-5. Sose šaj neko te dičhol sar ponizno manuš, ama u stvari nane?

⁴ Disave manuša samo dičhona soj tane ponizna, ama u stvari nane. On šaj ladžana. Ja šaj poštujinena averen hem ljubazna tane samo odoljese so oljenge roditeljija sikavdže ljen adžahar. Ama, ano po vilo šaj tane but ponosna. Ko krajo, ka mothovi pe save tane čače (Luka 6:45).

 ⁵ Avera manuša dičhona soj tane sigurna ano peste hem phravdo phenena so mislinena, ama odova na mothovi so on tane ponosna (Jov. 1:46, 47). Ama, okola soj tane phravde hem dičhona sar sigurna ano peste, valjani te pazinen te na osloninen pe ko peklje sposobnostija. Bilo te ova phravde ja ladžutne, sare amen valjani te trudina amen te ova čače ponizna.

6. Premali 1. Korinćanima 15:10, so šaj te sikljova ando apostol Pavle?

⁶ Razmislin ando primer kova dindža amen o apostol Pavle. O Jehova but koristindža lje te čerel neve skupštine ko but dizja. Ov ki služba verovatno čerdža pobuter ando bilo kova aver e Isuseso apostol. Ama, ov na mislindža soj tano pošukar kotar pe phralja, već ponizno phendža: „Sose me hijum najtikno maškaro apostolija hem na hijum dostojno te ovav vičimo sar apostol, sose progonindžum e Devljese skupština“ (1. Kor. 15:9). Palo odova, o Pavle phendža so ov hine lje šukar odnos e Jehovaja samo sebepi so o Jehova mothovdža ljese o šukaripe kova na zaslužindža, a na sebepi so ov hine diso posebno ja so čerdža but buča. (Čitinen 1. Korinćanima 15:10.) O Pavle hine čače ponizno manuš hem dindža amen šukar primer. Ked pisindža e hrišćanendže ko Korint, iako avera ki odija skupština kritikujindže lje, ov na vazdindža kokri pes (2. Kor. 10:10).

7. Sar jekh pendžardo phral ko amaro vreme mothovdža bari poniznost?

⁷ Buten amare phraljen hem phenjen, ohrabrindža o iskustvo ando phral Karl Klajn, kova hine član ando Vodeće telo. Ko oljeso iskustvo, o phral Klajn ponizno hem iskreno vačeri ando peklje mane hem problemija kola hine lje. Na primer,  1922. berš prvo puti pokušindža te propovedini kotar čher ko čher. Odobor pharo hine ljese so duj berš na manglja te propovedini kotar čher ko čher. Palo odova, ked služindža ko Betel, jekh phral dindža lje savet hem disavo vreme o phral Klajn hine but holjamo. Isto adžahar, ov doživindža nervni slom koljestar kasnije oporavindža pe. Ama, ov hine lje hem but bare odgovornostija. Iako hine but pendžardo maškaro phralja, ov na ladžandilo te vačeri ando peklje mane. Odova mothovi so o phral Klajn čače hine ponizno manuš. But phralja hem phenja pamtinena olje hem oljeso iskreno iskustvo. *

8. Sar o lafija andi 1. Petrova 5:6 pomožinena amen te haljova so o Jehova mangela i poniznost?

⁸ Najbaro razlog sose valjani te sikljova te ova ponizna, tano sose adžahar ugodinaja e Jehovase. O apostol Petar odova jasno mothovi. (Čitinen 1. Petrova 5:6.) Ki knjiga Pođi za mnom objasnini pe so značinena e Petrese lafija: „I oholost tani sar otrov. O posledice andi oholost šaj te oven but bare hem opasna. O oholo manuš, iako šaj tano but sposobno, nane korisno e Devljese. Ama, o ponizno manuš iako šaj nane but sposobno, šaj te ovel but korisno e Jehovase. [...] O Jehova ka ovel but bahtalo te nagradini tut ako hijan ponizno manuš“. * Nane ništa pošukar nego te čera e Jehova bahtalo (Posl. 23:15).

9. Sose o manuša mangena te oven paše okoljencar soj tane ponizna?

⁹ Uzo odova so ugodinaja e Jehovase, amare šukaripase tano te sikljova te ova ponizna. Ako hijam ponizna, avera manuša ka mangen te oven paše amencar. Sose tano adžahar? Razmislin, save manušencar tu mangeja te ove (Mat. 7:12). Niko amendar na mangela te ovel nekasa ko uvek mangela avera te čeren odova so ov mangela hem na prihvatini nikase ideje. Ama, uživinaja te ova amare phraljencar hem phenjencar, ked on tane „saosećajna, pherde phraljikane mangipaja, milostiva, ponizna“ (1. Petr. 3:8). Ako amen uživinaja asavke manušencar, hem on ka uživinen amencar sa dži hijam ponizna.

10. Sose tano polokho e ponizno manušendže te istrajinen ko problemija?

¹⁰ E ponizno manušendže tano polokho te istrajinen ko problemija. Sare amen,  disavo puti ka dikha ja ka doživina o buča kola ka dičhon amendže nepravedna. O kralj Solomon, kova hine but mudro, phendža: „Dikhljum e slugen ko grasta, hem e princen sar džana phirindoj sar sluge“ (Prop. 10:7). Disavo puti, o manuša kola tane but sposobna, na dobinena uvek disavo priznanje. A disavo puti, avera but hvalinena okoljen kola nane odobor sposobna. Odoljese, o Solomon haljilo so valjani te prihvatina o dživdipe asavko savo tano hem te na brinina amen but odoljestar so ovela (Prop. 6:9). Ako hijam ponizna, ka ovel polokho te prihvatina o buča ko dživdipe kola na sviđinena pe amendže.

11. Sar valjani te reagujina ked dobinaja savet?

¹¹ Svako dive šaj te mothova da li hijam ponizna. Te dikha nekobor primerija. Ked dobinaja savet. Na valjani te bistra so ako neko alo te del amen savet, tegani verovatno grešindžam pobuter nego so mislinaja. Ki asavki situacija, šaj amari prvo reakcija tani te na šuna o savet. Čak, šaj te kritikujina e osoba ja o način sar dindža amen odova savet. Ama, ako hijam ponizna, amen ka trudina amen te mothova ispravno stav.

12. Premalo Poslovice 27:5, 6, sose valjani te ova zahvalna ked neko dela amen savet? Vačer jekh primer.

¹² O ponizno manuš tano zahvalno ked dobini savet. Te dikha jekh primer. Zamislin so aljan ko sastanak. Vačerdžan nekobor phraljencar hem jekh oljendar igari tut ki strana hem phenela tuče so isi tut diso ko danda. Sigurno ka ovel tuče ladžavo. Ama, ka ove ljese zahvalno sose phendža tuče odova. Šaj ka puče tut sose neko na phendža tuče odova poangljeder. Isto adžahar, valjani te ova ponizna hem zahvalna ked jekh phral ja phen dela amen savet ked odova tano potrebno. Odolje manuše valjani te dikha sar amare amalje, a na sar amare dušmane. (Čitinen Poslovice 27:5, 6; Gal. 4:16.)

13. Sar šaj te mothova so hijam ponizna ked avera dobinena disave zaduženja?

¹³ Ked neko aver dobini disavo zaduženje. Jekh starešina kova vičini pe Džejson, phenela: „Ked dikhava kola zaduženja avera dobinena, disavo puti pučava man sose mandže na dindže“. Da li disavo puti hem tu osetineja tut adžahar? Nane pogrešno te manga te čera pobuter  ki služba e Jehovase (1. Tim. 3:1). Ama, valjani te pazina sar razmislinaja. Ako na hijam oprezna, šaj te mukha o ponos te barjol ko amaro vilo. Na primer, jekh hrišćanin šaj te počmini te razmislini so jedino ov šaj te čerel disavo zaduženje ki skupština. Ja jekh phen šaj te mislini so olako rom šaj te čerel nesavo zaduženje but pošukar nego aver phral. Ama, ako hijam čače ponizna, na ka ovel amen asavko ponosno stav.

14. So šaj te sikljova ando način sar o Mojsije reagujindža ked avera dobindže zaduženja?

¹⁴ But šaj te sikljova ando odova sar o Mojsije reagujindža ked avera dobindže disave zaduženja. Ov but cenindža i odgovornost koja hine lje, te igari e Izraelcen. Ama, sar reagujindža o Mojsije ked o Jehova averendže dindža te služinen zajedno oljeja? Ov na hine ljubomorno (Br. 11:24-29). Ov hine ponizno hem dozvolindža averendže te pomožinen lje te sudini e manušendže (Izl. 18:13-24). Sebepi odova, o Izraelcija hine ljen pobuter manuša kola služindže ko asavko način hem odoljese na adžičerdže but te oven rešime oljenge problemija. Adžahar, o Mojsije mothovdža so pobuter brinindža pe e manušendže nego te ovel lje but zaduženja. Ov tano but baro primer amendže. Ma te bistra so ako mangaja te ova korisna ki služba e Jehovase, považno tano te ova ponizna, nego te ova but sposobna. Iako „o Jehova tano ko but učo than [ov] dikhela e ponizno manuše“ (Ps. 138:6).

15. Kola promene disave phralja hem phenja doživindže?

¹⁵ Ked meninena pe amare okolnostija. But phralja hem phenja kola služindže e Jehovase beršencar, doživindže bare promene. Na primer, 2014. berš, i organizacija odlučindža so više na ka ovel oblasno nadglednik hem odoljese odola phralja  hem oljenge romnja hine zamolime te prihvatinen avera zaduženja. Isto odova berš, i organizacija odlučindža so o phralja kola isi ljen pobuter ando 70 berš, našti više te služinen sar pokrajinska nadglednikija. A o phralja kola isi ljen 80 ja prekalo 80 berš, našti više te služinen sar koordinatorija ko starešinstvo. Isto adžahar, disave kola služindže ko Betel, akana tane bičhalde te služinen sar pionirija. A avera naštindže te ačhon ki punovremeno služba sebepi po sastipe ja so valjani nekastar te brininen pe ki porodica ja ando avera razlogija.

16. Sar amare phralja hem phenja mothovena soj tane ponizna ked meninena pe oljenge okolnostija?

¹⁶ Bute phraljendže hem phenjendže tano pharo te prilagodinen pe ko neve okolnostija. Šaj oljendže tano but pharo sebepi so but manglje poklo zaduženje. Dži probindže te sikljon ko neve okolnostija, disavendže hine odobor pharo so odova doživindže sar ked neko merela. Ama, sar džala o vreme on uspinena te prilagodinen pe. Sose? Odoljese so, but mangena e Jehova. Džanena so predajindže po dživdipe e Devljese, a na e bučače koja čerena ja e titulače koja dobinena (Kol. 3:23). Bahtalje tane ked šaj ponizno te služinen e Jehovase ko bilo kova način. On sa pe brige fordena koro ljeste, sose džanena so ov brinini pe oljendže (1. Petr. 5:6, 7).

17. Sose hijam zahvalna?

¹⁷ Amen hijam zahvalna odoljese so i Biblija podstaknini amen te ova ponizna. Ked amen sikljovaja te ova ponizna, avera uživinena te oven amencar. Polokho istrajinaja ko amare problemija. Hem soj tano najvažno, amen hijam popaše amare Dadeja. Bahtalje hijam ked džanaja so, iako ov tano but Baro, but mangela peklje ponizno slugen (Is. 57:15).