1. Sose valjani te ova podložna e Jehovase?

AMEN valjani te ova podložna * e Jehovase sose ov tano amaro Stvoritelj. Odoljese, ov isi lje pravo te phenel amendže so te čera (Otkr. 4:11). Ama, pana jekh razlog sose te šuna e Jehova tano odova so jedino ov vladini ko najšukar način. But manuša vladindže upro avera manuša. Ked uporedina oljen hem e Jehova, ov tano jedino Vladari kova tano mudro, pherdo mangipaja, milosrdno hem saosećajno (Izl. 34:6; Rimlj. 16:27; 1. Jov. 4:8).

2. Premalo Jevrejima 12:9-11, sose valjani te ova podložna e Jehovase?

² O Jehova mangela te šuna lje odoljese so ov tano amaro Dad kova mangela amen, a na sose daraja oljestar. Ko oljeso ljil e Jevrejendže, o apostol Pavle objasnindža so valjani te „podložina amen spremno e Dadese“, sose ov sikavi amen „amare šukaripase“. (Čitinen Jevrejima 12:9-11.)

3. (a) Sar šaj te mothova so hijam podložna e Jehovase? (b) Ko kola pučiba ka odgovorina?

³ Amen hijam podložna e Jehovase ked daja sa amendar te šuna lje ko sa hem ked kokri amen na odlučinaja amendže soj tano šukar, a soj tano lošno (Posl. 3:5). So pobuter sikljovaja ando e Jehovase šukar osobine, polokho tano amendže te ova ljese podložna. Sose? Odoljese so oljese osobine dičhona ko sa so čerela (Ps. 145:9). So pobuter sikljovaja e Jehovastar, pobuter mangaja lje. Ked amen mangaja lje, nane amendže potrebno but pravilija te  šaj te džana so te čera, a so te na čera. Amen trudinaja amen te dikha ko buča sar so ov dikhela, te manga odova so ov mangela hem te mrzina odova so ov mrzini (Ps. 97:10). Ama, sose disavo puti nane lokho te šuna e Jehova? So šaj o starešine, o dada hem o daja te sikljon ando namesnik Nemija, ando kralj David hem andi e Isusesi daj, i Marija? Ko akava članko ka dikha odgovorija ko akala pučiba.

4-5. Premalo Rimljanima 7:21-23, sose šaj te ovel pharo te ova podložna e Jehovase?

⁴ Jekh razlog sose šaj te ovel pharo te ova podložna e Jehovase tano sose sare hijam nesavršena hem grešna. Odoljese, na mangaja svako puti te šuna e Jehova. Ked o Adam hem i Eva halje o plod hem odoljeja na šundže e Jehova, on kokri pese odlučindže soj tano šukar, a soj tano lošno (Post. 3:22). Isto sar o Adam hem i Eva, hem avdije but manuša na šunena e Jehova hem kokri pese odlučinena soj tano šukar, a soj tano lošno.

⁵ Čak hem okoljendže so pendžarena hem mangena e Jehova tano pharo uvek te čeren o buča sar so ov mangela. Kokri o apostol Pavle borindža pe odoljeja. (Čitinen Rimljanima 7:21-23.) Sar o Pavle, amen mangaja te čera odova soj tano ispravno anglo e Jehovase jačha. Ama, uvek valjani te borina amen protiv i želja te čera o neispravna buča.

6-7. Kova tano pana jekh razlog sose šaj te ovel pharo te ova podložna e Jehovase? Vačer jekh primer.

⁶ Pana jekh razlog sose šaj te ovel pharo te ova podložna e Jehovase tano, sose upro amende utičindže o običaja ja o manuša kuri bariljam. But manuša sikavena amen o buča kola tane averčhane odoljestar so sikavi amen o Jehova. Odoljese, valjani but te trudina amen te na razmislina sar on. Akana ka dikha jekh primer.

⁷ Ko but thana ando terne očekujini pe te den sa pestar te ovel ljen but pare. Amari phen koja vičini pe Meri * odova doživindža. Angljeder so upoznajindža e Jehova, oj dželji ki jekh ando najšukar škole ki olaki phuv. Olaki porodica olatar očekujindža te arakhi buti koja ka anel lače but pare hem sebepi odova avera ka poštujinen la. Odova hem oj manglja. Palo odova, upoznajindža e Jehova hem ked počmindža te mangel lje, menindža peklje ciljija. Ama, na hine lače lokho. Oj phenela: „Disavo puti dikhava so isi man prilika te zaradinav but pare, ama džanava so sebepi odova na ka šaj te služinav e Jehovase adžahar sar so služinava ljese akana. Odoljese so hijum adžahar sikavdi, maje tano pharo hem akana. Valjani te molinav e Jehova te pomožini man te na perav ki zamka te prihvatinav i buti koja na ka mukhel man te čerav sa so šaj ki služba oljese“ (Mat. 6:24).

8. So ka dikha akana?

⁸ Amare šukaripase tano te ova podložna e Jehovase. Ama, okola so isi ljen autoritet, sar soj tane o starešine, o dada hem o daja, isi ljen pana jekh razlog sose te oven podložna. Ko asavko način on šaj te pomožinen averendže. Akana ka dikha disave primerija andi Biblija kola sikavena amen sar te koristina amaro autoritet ko način kova ka anel e Jehovase bahtaljipe.

9. Kola pharipa o Nemija doživindža?

⁹ O zadatko kova o Jehova dindža e starešinendže, te brininen pe ando oljeso  narodo tano but važno (1. Petr. 5:2). O starešine šaj but te sikljon ando način sar o Nemija ponašindža pe e Jehovase narodoja. Sar namesnik ki Juda, o Nemija hine lje but baro autoritet (Nem. 1:11; 2:7, 8; 5:14). Zamislin samo kola pharipa o Nemija doživindža. Ov dikhlja so o Jevreja koristindže o hram e bučendže koljencar na mothovdže so poštujinena e Jehova. Čak, na dindže o dobrovoljna prilogija aso Levitija so premalo Zakon valjandže te čeren. On na poštujindže e Jehovaso zakon ando sabat, a disave ljelje pese romnjen ando avera narodija. So čerdža o namesnik Nemija ki akija situacija? (Nem. 13:4-30).

10. So čerdža o Nemija ked hine lje pharipa?

¹⁰ O Nemija na koristindža po autoritet te čhivel e manušen zorjeja te šunen lje. Ov iskreno molindža e Jehova te pomožini lje hem sikavdža e manušen ando e Jehovaso zakon (Nem. 1:4-10; 13:1-3). Isto adžahar, ov hine ponizno, čak pomožindža ljendže te čeren o zidija ko Jerusalim adžahar so hem ov čerdža oljencar buti (Nem. 4:15).

11. Premali 1. Solunjanima 2:7, 8, sar o starešine ponašinena pe premalo phralja hem phenja?

¹¹ O starešine šaj nane ljen pharipa kola o Nemija hine lje, ama on šaj te oponašinen lje ko but buča. Na primer, on but trudinena pe te pomožinen pe phraljendže hem pe phenjendže. Na mislinena soj tane on pošukar oljendar samo odoljese so isi ljen autoritet. Premalo oljende trudinena pe te ponašinen pe saosećajno. (Čitinen 1. Solunjanima 2:7, 8.) Odoljese soj tane ponizna hem so mangena ljen, on ljubazno vačerena oljencar. Amaro phral o Andrej, kova tano but berša starešina, phenela: „Haljiljum so ked o starešina tano ljubazno hem averencar ponašini pe sar amal, odova hor utičini ko e phraljengo hem e phenjengo vilo. Sebepi odova, o phralja hem o phenja mangena te sarađujinen e starešinencar.“ Isto adžahar, o  Toni kova tano but berša starešina, phenela: „Trudinava man te primeninav o savet ando Filipljanima 2:3 hem dava sa mandar te dikhav averen sar pobare mandar. Odova pomožini man te na čhivav zorjeja averen te šunen man“.

12. Sose tano važno o starešine te oven ponizna?

¹² Sar so o Jehova tano ponizno hem o starešine valjani te oven ponizna. Iako o Jehova tano Najbaro Vladari ko celo svemir, ov „teljari pe“ te vazdel „ando prao e jadno manuše“ (Ps. 18:35; 113:6, 7). Ama, ov mrzini okoljen soj tane ponosna (Posl. 16:5).

13. Sose o starešine valjani te pazinen so phenena hem sar phenena?

¹³ Ked jekh starešina pazini so phenela hem sar phenela, ov odoljeja mothovi soj tano podložno e Jehovase. Ako jekh starešina na pazini ko pe lafija, ov šaj na ka ovel ljubazno ked neko na mothovi oljese poštovanje (Jak. 1:26; Gal. 5:14, 15). O Andrej, koljestar vačerdžam angljeder, phenela: „Disavo puti hine maje pharo te ovav ljubazno e phraljeja ja e phenjaja kola na mothovdže so poštujinena man sar starešina. Ama, razmislindžum ando verna manuša ki Biblija hem odova pomožindža man te sikljovav sose tano važno te ovav ponizno hem blago“. O starešine mothovena soj tane podložna e Jehovase ked ljubazno hem e mangipaja vačerena pe phraljencar hem pe phenjencar, ama hem avere starešinencar (Kol. 4:6).

14. Koja uloga o Jehova dindža e dadese hem so ov rodela oljestar?

¹⁴ O Jehova dindža e dadese te ovel poglavari ki porodica hem oljestar rodela te sikavi hem te vaspitini peklje čhaven (1. Kor. 11:3; Ef. 6:4). Ama, odova na značini so o dad šaj te koristini po autoritet sar ov mangela. O Jehova čerdža e porodica, odoljese o dad tano odgovorno oljese sar ponašini pe peklje porodicaja (Ef. 3:14, 15). Ked jekh dad koristini po autoritet adžahar sar so o Devel mangela, ov mothovi soj tano podložno e Jehovase. O dad šaj but te sikljol ando kralj David.

15. Sose tano o kralj David šukar primer e dadendže?

¹⁵ O Jehova dindža e Davidese te ovel poglavari na samo ki oljesi porodica, nego sa e manušendže ko Izrael. Sar kralj, o David hine lje baro autoritet. Disavo puti ov koristindža lje ko lošno način hem čerdža bare greške (2. Sam. 11:14, 15). Ama, ov mothovdža soj tano podložno e Jehovase adžahar so prihvatindža i disciplina ando Jehova. Dži molindža pe e Jehovase  phendža sa so isi lje ko vilo hem trudindža pe te šunel e Jehovaso savet (Ps. 51:1-4). Isto adžahar, ov hine ponizno hem prihvatindža o savetija kola alje na samo ando murša, nego hem ando džuvlja (1. Sam. 19:11, 12; 25:32, 33). O David sikljilo ando peklje greške hem ko prvo than hine ljese te služini e Jehovase.

16. So šaj jekh dad te sikljol ando David?

¹⁶ So šaj jekh dad te sikljol ando kralj David? O autoritet kova o Jehova dindža tut ma koristin ko lošno način. Priznajin teklje greške hem prihvatin o savet andi Biblija kova avera dena tut. Ako adžahar čereja, ti porodica ka poštujini tut sose hijan ponizno. Ked molineja tut teklje porodicaja, vačer e Jehovase sa so isi tut ko vilo te šaj ti porodica te šunel so oljestar rodeja te pomožini tut hem te vodini tut. Soj tano najvažno, ko prvo than nek ovel tuče te služine e Jehovase (Pon. zak. 6:6-9). Najšukar poklon kova šaj te de teklje porodicače tano toklo šukar primer.

17. Koja odgovornost o Jehova dindža e dajače?

¹⁷ O Jehova hem e dajače dindža jekh važno odgovornost ki porodica. Ov dindža hem oj te ovel la autoritet upro olake čhave (Posl. 6:20). Odova so i daj čerela hem phenela šaj te utičini upro olake čhave sa dži tane dživde (Posl. 22:6). Te dikha so šaj jekh daj te sikljol andi e Isusesi daj, i Marija.

18-19. So šaj o daja te sikljon andi Marija?

¹⁸ I Marija but šukar džandža e Devljeso Lafi. Hor poštujindža e Jehova hem hine la paše odnos oljeja. Oj hine spremno te čerel odova so o Jehova mangela, iako sebepi odova celo olako dživdipe menindža pe (Luka 1:35-38, 46-55).

¹⁹ Dajaljen, tumen šaj te oponašinen e Marija ko but buča. Sar? Sar prvo, ked tumen proučinena i Biblija hem ked molinena tumen, šaj te oven paše e Jehovaja. Sar dujto, ked hijen spremna te čeren promene ko tumaro dživdipe te radujinen e Jehova. Na primer, šaj bariljan e roditeljencar kola but putija hine holjame hem kola grubo vačerdže peklje čhavencar. Odoljese, šaj mislineja so adžahar valjani te ponašine tut premalo teklje čhave. Iako sikljiljan sar o Jehova mangela te ponašine tut premalo teklje čhave, šaj tano tuče pharo te ove mirno hem strpljivo teklje čhavencar, posebno ked hijan umorno, a on na šunena tut (Ef. 4:31). Tegani, but tano važno te oslonine tut ko Jehova hem te moline tut oljese. Jekh daj koja vičini  pe Lidija, phenela: „Disavo puti, morandiljum but putija te molinav man te na vačerav holjame ked mo čhavo na šunela man. Čak morandiljum te čhinavav kokri man dži vačerdžum hem ko odova trenutko te molinav e Jehova te pomožini man. I molitva pomožini maje te ovav mirno“ (Ps. 37:5).

20. Soj tano pharo disave dajendže hem sar šaj te borinen pe odoljeja?

²⁰ Disave dajendže tano pharo te mothoven so mangena pe čhaven (Titu 2:3, 4). But kotar odola daja barilje ki porodica kuri o roditeljija na hine but paše pe čhavencar. Ako hem tu adžahar bariljan, na valjani te čere isto greška koja teklje roditeljija čerdže. I daj koja tani podložno e Jehovase ka mangel te sikljol sar te mothovi o mangipe pe čhavendže. Šaj ka ovel tuče pharo te menine o način sar razmislineja, sar osetineja tut hem sar postupineja. Ama, tu šaj te menine tut hem sebepi odova tu hem ti porodica ka oven bahtalje pana pobuter.

21-22. Premalo Isaija 65:13, 14, sose tano šukar te ova podložna e Jehovase?

²¹ O kralj David, džandža kobor tano šukar te ova podložna e Jehovase. Ov pisindža: „E Jehovase naredbe tane pravedna, čerena o vilo te ovel bahtalo, e Jehovasi zapovest tani čisto, phravela o jačha. On opominena teklje sluga. Ko ičeri ljen, bari nagrada isi lje“ (Ps. 19:8, 11). Avdije, šaj te dikha i razlika maškaro okola soj tane podložna e Jehovase hem okola so na mangena te šunen oljese savetija. Okola soj tane podložna e Jehovase „ko vilo ka oven but bahtalje“. (Čitinen Isaija 65:13, 14.)

²² Ked o starešine, o dada hem o daja tane podložna e Jehovase, oljengo dživdipe tano pošukar, oljenge porodice tane pobahtalje, a i skupština tani pana pobuter ko jekhipe. Soj tano najvažno on čerena e Jehova bahtalo (Posl. 27:11). Odova tano najbaro bahtaljipe so šaj te ovel amen.