1. Ked šaj te ovel popharo te služina e Jehovase?

SO MISLINEJA, ked tano popharo te služina e Jehovase? Ked isi amen bare problemija ja ked tano sa šukar? Ked isi amen problemija, spremno osloninaja amen ko Jehova. Ama, so ćeraja ked ko amaro đivdipe tano sa šukar? Da li tegani bistraja ko Devel? O Jehova upozorinđa e Izraelcen so odova šaj te desini pe (Pon. zak. 6:10-12).

2. Savo primer o kralj Asa aćhavđa amenđe?

² O kralj Asa tano but šukar primer sose hine mudro manuš kova potpuno osloninđa pe upro Jehova. Ov služinđa e Jehovase na samo ko pharo vreme nego hem ko vreme ando mir. Kotar početko, „e Asaso vilo hine potpuno verno e Jehovase celo oleso đivdipe“ (1. Kralj. 15:14). O Asa mothovđa so služinđa e Jehovase celone vileja, ađahar so ćhinavđa o hovavno obožavanje ki Juda. I Biblija mothovi so ov „uništinđa o oltarija ando avera devela hem o sveta thana, phaglja o stubija aso obožavanje hem ćhinđa o sveta kašta“ (2. Let. 14:3, 5). Ov hem pe baba, e Maha, koja hine kraljica, cidinđa kotar olako položaj. Sose? Odolese so oj podstakninđa e manušen te obožavinen e idolen (1. Kralj. 15:11-13).

3. So ka razmotrina ko akava članko?

³ O Asa na samo so uništinđa e idolen, već pomožinđa e manušenđe ki Juda palem te obožavinen e Jehova. O Jehova  blagoslovinđa e Asa hem e manušen ki Juda ađahar so jekh period hine len mir. * Ði vladinđa o kralj Asa, deš berš „hine mir ki phuv“ (2. Let. 14:1, 4, 6). Ko akava članko, ka dikha sar o Asa koristinđa o period ando mir. Palo odova, ka dikha sar o hrišćanija ando prvo veko mudro koristinđe o period ando mir. Ko krajo, ka dikha sar šaj amen kola živinaja ko phuvja kuri pana šaj slobodno te služina e Jehovase, mudro te koristina o period ando mir.

4. Premali 2. Letopisa 14:2, 6, 7, sar o Asa mudro koristinđa o period ando mir?

⁴ Čitin 2. Letopisa 14:2, 6, 7. O Asa phenđa e manušenđe so o Jehova tano okova so „dinđa [len] mir ko sa olenge granice.“ O Asa na mislinđa so odova period ando mir tano vreme te opustini pe. Umesto odova, ov koristinđa odova vreme te ćerel o dizja, o zidija, o kule upre ko zidija hem e dizjake udara. E manušenđe ki Juda, ov phenđa: „I phuv tani pana amari.“ Ko so o Asa mislinđa? Ov mislinđa ko odova so o manuša na hine len neprijateljija kola bi sprečinena len te đan kaj mangena hem te gradinen. Odolese podstakninđa len mudro te koristinen odova period ando mir.

5. Sose o Asa opreminđa pekle vojska?

⁵ Isto ađahar, o period ando mir o Asa koristinđa te opremini pekle vojska (2. Let. 14:8). Da li odova značinđa so ov na hine le poverenje upro Jehova? Na. Sar kralj, o Asa đanđa so olesi dužnost hine te pripremini e manušen ko pharipa kola šaj ka ovel len. O Asa đanđa so o period ando mir kova hine ki Juda, verovatno na ka trajini zauvek. Ađahar hem hine.

6. Sar o hrišćanija ko prvo veko koristinđe o period ando mir?

⁶ Iako o hrišćanija ko prvo veko često hine progonime, isto ađahar on hine len hem periodija ked hine mir. Sar on koristinđe odova vreme? Odola verna murša hem đuvlja niked na ćhinavđe te propovedinen i šukar vest. Ko Dela apostolska pisini so on „služinđe e Jehovase ki dar.“ Sebepi so propovedinđe i šukar vest, „o broj ando učenikija stalno barjola hine.“ Akava mothovđa so o Jehova but blagoslovinđa odova so on revno propovedinđe đi trajinđa o period ando mir (Dela 9:26-31).

7-8. So o Pavle hem avera hrišćanija ćerđe ked hine len prilika? Objasnin.

⁷ O hrišćanija ko prvo veko koristinđe svako prilika te propovedinen i šukar vest. Na primer, o apostol Pavle dikhlja so isi le šukar prilika te svedočini bute manušenđe ko Efes. Ov iskoristinđa odija prilika te propovedini hem te ćerel e učenikonen ki odija diz (1. Kor. 16:8, 9).

⁸ O apostol Pavle hem avera hrišćanija hine len pana jekh šukar prilika te propovedinen ko 49. berš, ked valjanđe te anen i odluka ando obrezanje (Dela 15:23-29). Palo odova so prenosinđe e skupštinenđe odova so odlučinđe, o učenikija dinđe sa pestar te propovedinen „i šukar vest ando e Jehovaso lafi“ (Dela 15:30-35). So ulo sebepi odova? Ki Biblija pisini so „o skupštine zorjaćerđe pe ki vera hem barilje ando dive ko dive“ (Dela 16:4, 5).

9. Savi tani i situacija ko but phuvja hem so šaj te puća amen?

⁹ Ko but phuvja avdije, amen šaj slobodno te propovedina. Da li živineja ki asavki phuv? Ako ja, puć tut: „Sar koristinava odija sloboda?“ Ko akala poslednja dive, e Jehovasi organizacija sar niked đi akana dela sa pestar te propovedini hem te sikavi e manušen (Mar. 13:10). Akava važno zadatko amen ćeraja ko razna načinija.

10. So o lafija andi 2. Timoteju 4:2, podstakninena amen te ćera?

¹⁰ Sar šaj mudro te koristine o period ando mir? (Čitin 2. Timoteju 4:2.) Sose na bi razmislineja ando te okolnostija? Možda ka dikhe so tu ja neko kotar ti porodica šaj pana pobuter te učestvujini ki služba, čak hem te služini sar pionir. Akana nane vreme te ćeda o barvalipe hem o materijalna buća, sose ki bari nevolja odola buća na ka spasinen amen (Posl. 11:4; Mat. 6:31-33; 1. Jov. 2:15-17).

11. So disave objaviteljija ćerđe te šaj te pomožinen averenđe te penđaren e Jehova?

¹¹ But objaviteljija sikljilje aver ćhib te šaj te pomožinen e manušenđe te penđaren e Jehova. Olesi organizacija obezbedinđa amenđe but buća te šaj pana pobuter te propovedina ko but ćhibja. Na primer, ko 2010. berš amari literatura hine dostupno ko oko 500 ćhibja, a avdije ko prekalo 1 000 ćhibja.

12. Sar upro manuša utičini ked o ćaćipe kotar e Devleso Lafi šunena ki pi ćhib? Vaćer jekh primer.

¹² Sar upro manuša utičini ked o ćaćipe kotar e Devleso Lafi šunena ki pi ćhib? Jekhe amare phenjaće but značinđa o regionalno kongres kova hine ićerdo ki diz Memfis, ki država Tenesi, ki Amerika. O kongres hine ićerdo ki Kinjaruanda ćhib. Odija ćhib vaćeri pe ki Ruanda, ko Kongo (Kinšasa) hem ki Uganda. Palo kongres, odija phen koja vaćeri odija ćhib, phenđa: „Ki Amerika aljum angleder 17 berš. Akava tano prvo puti so celo program potpuno haljiljum.“ Odova so šunđa o program ki pi ćhib,  but hor utičinđa ki late. Odolese, razmislin ando te okolnostija hem dikh da li šaj te sikljove aver ćhib te bi pomožineja e manušenđe ko to područje. Možda odova tano potrebno ako ko područje andi ti skupština isi manuša kola vaćerena aver ćhib. To trud ka anel tuće baro bahtalipe.

13. Sar amare phralja ki Rusija koristinđe o period ando mir?

¹³ Ko disave phuvja, amare phralja hem phenja našti slobodno te propovedinen sebepi so o vlastija zabraninđe amaro delo. Na primer, dikh so ulo amare phraljenđe ki Rusija. Beršencar hine progonime. Ko mart 1991. berš, on hine zakonski priznajime. Tegani, ki Rusija hine oko 16 000 objaviteljija. Ama, palo 20 berš, ki Rusija hine prekalo 160 000 objaviteljija. Akava mothovi so amare phralja mudro koristinđe o vreme ked šajinđe slobodno te propovedinen. O period ando mir kova on hine len na trajinđa dugo. Ama, on na ulje manje revna aso pravo obožavanje sebepi so olenge okolnostija menjinđe pe. On hem ponodri ćerđe sa so šaj te služinen e Jehovase.

14-15. Sar o Jehova koristinđa pi moć te pomožini e Asase?

¹⁴ Ko vreme ked o Asa živinđa, o mir na trajinđa zauvek. Jekh but bari vojska koja hine la pobuter ando milion vojnikija alji upro lende. O vojno zapovednik Zara hine sigurno so ov hem olesi vojska šaj te pobedinen e Juda. Ama, o kralj Asa hine le poverenje ko Jehova. O Asa ki molitva phenđa e Jehovase: „Pomožin amenđe, Jehova, Devla amaro, sose upro tute uzdajinaja amen hem ko to anav pođinđam protiv akija bari vojska“ (2. Let. 14:11).

 ¹⁵ Iako i etiopsko vojska hine duj putija pobari kotar e Asasi vojska, o Asa đanđa so o Jehova tano moćno hem so šaj te pomožini pe narodose. Hem o Jehova na razočarinđa le. I etiopsko vojska doživinđa but baro poraz (2. Let. 14:8-13).

16. Sar đanaja so o period ando mir na ka trajini zauvek?

¹⁶ Amen na đanaja tačno so ka ovel svakoneja amendar ki budućnost, ama đanaja so o mir kova e Devleso narodo akana isi le, na ka trajini zauvek. Setin tut so ked vaćerđa ando poslednja dive, o Isus phenđa so „o narodija ka mrzinen“ olese učenikonen (Mat. 24:9). Isto ađahar, o apostol Pavle vaćerđa so „sare kola mangena te živinen verno e Devlese ko jekhipe e Hristeja e Isuseja, ka oven progonime“ (2. Tim. 3:12). O Beng tano „but holjamo“ hem amen našti te očekujina so na ka doživina o posledice andi olesi holi (Otkr. 12:12).

17. Ko kola načinija amari vera šaj te ovel ispitimi?

¹⁷ Pana hari, amari vera ka ovel ispitimi. Uskoro ka ovel „bari nevolja savi na hine kotar početak ando sveto pa sa đi akana“ (Mat. 24:21). Ko odova vreme, neko kotar amari porodica šaj ka protivini pe amenđe ja amaro delo šaj ka ovel zabranimo (Mat. 10:35, 36). Tegani, da li svako amendar, sar o kralj Asa, ka verujini so o Jehova šaj te pomožini amen hem te zaštitini amen?

18. Premalo Jevrejima 10:38, 39, so šaj te pomožini amenđe te ova spremna aso period ked na ka ovel amen mir?

¹⁸ O Jehova akana pripremini amen te šaj te ovel amen zorali vera. Prekalo „verno hem razborito robo“ ov dela amen „hrana ko pravo vreme“ te šaj te ovel amen sa so valjani amenđe te aćhova duhovno zorale (Mat. 24:45). Ama, svako amendar valjani te del sa pestar te šaj te ovel amen zorali vera upro Jehova. (Čitin Jevrejima 10:38, 39.)

19-20. Premali 1. Letopisa 28:9, so valjani te puća amen hem sose?

¹⁹ Sar o kralj Asa, amen valjani te „roda e Jehova“ (2. Let. 14:4; 15:1, 2). Amen počminđam te roda e Jehova ked počminđam te sikljova olestar hem ked krstinđam amen. Hem koristinaja svako prilika te šaj te ovel  amen pana pobaro mangipe premalo leste. Odolese, šaj te puća amen: „Da li hijum redovno ko amare sastankija?“ Ko sastankija, amen dobinaja snaga te šaj hem ponodri te služina e Jehovase hem dobinaja ohrabrenje ando amare phralja hem phenja (Mat. 11:28). Isto ađahar, šaj te puća amen: „Da li redovno čitinava i Biblija? Da li svako kurko isi man porodično proučavanje? Ako živinava kokri, da li svako kurko isi man lično proučavanje? Isto ađahar, da li dava sa mandar te propovedinav averenđe hem te sikavav len?“

²⁰ Sose valjani odova te puća amen? I Biblija mothovi amenđe so o Jehova dikhela sostar razmislinaja hem soj tano ko amaro vilo. Odolese, amen valjani isto odova te ćera. (Čitin 1. Letopisa 28:9.) Ako dikhaja so valjani te menjina amare ciljija, stavija, ja o način sar razmislinaja, tegani valjani te molina e Jehova te pomožini amen te ćera potrebna promene. Akana tano vreme te pripremina amen aso iskušenja kola ka ovel amen ki budućnost. Ma dozvolin ništa te sprečini tut mudro te koristine o period ando mir!