1. So ćerena amare phenja ki amari organizacija hem kole problemencar borinena pe? (Dikh i slika ko početko ando akava časopis.)

BUT hijam bahtale so isi amen odobor bućarne phenja ko amare skupštine. Na primer, on učestvujinena ko sastankija hem ki služba propovedanja. Disave olendar ćerena ko održavanje ko amare dvorane hem iskreno brininena pe ando phralja hem phenja. Naravno, hem on isi len pe problemija. Disave phenja brininena pe ando pe roditeljija kola tane ko berša. Avera phenja doživinena protivljenje andi pi porodica. A disave phenja tane daja kola kokri barjaćerena pe ćhaven hem naporno ćerena te bi obezbedinena sa so valjani lenđe.

2. Sose valjani te da sa amendar te podržina e phenjen?

² Sose valjani te podržina e phenjen? Sose o sveto na mothovi poštovanje premalo đuvlja kova on zaslužinena. Ki aver strana, i Biblija podstaknini amen te podržina len. Na primer, o apostol Pavle phenđa e skupštinaće ko Rim vilestar te priminen e Fiva hem te pomožinen laće „ko sa so ka valjani laće“ (Rimlj. 16:1, 2). Sar farisej, upro Pavle but utičinđa i kultura ki koja o manuša ko đuvlja dikhlje so samći na vredinena but. Ama ked ulo hrišćanin, ov oponašinđa e Isuse hem mothovđa poštovanje hem ljubaznost premalo đuvlja (1. Kor. 11:1).

3. Sar o Isus ponašinđa pe premalo đuvlja hem sar dikhlja upro okola kola živinđe premali e Devlesi volja?

³ O Isus uvek mothovđa poštovanje premalo đuvlja (Jov. 4:27). Ov na dikhlja upro đuvlja sar o jevrejska verska vođe. Jekh e biblijaki enciklopedija čak phenela: „O Isus niked na phenđa diso so mothovđa so na poštujini e đuvljen.“ Umesto odova, ov posebno ceninđa e đuvljen kola živinđe premali e Devlesi volja. Ked vaćerđa ando odova ko sa pripadini ki  olesi duhovno porodica, ov uključinđa hem e muršen hem e đuvljen (Mat. 12:50).

4. So ka dikha ko akava članko?

⁴ O Isus uvek hine spremno te pomožini pe duhovno phenjenđe. Ov ceninđa len hem braninđa len. Akana ka dikha sar šaj te oponašina e Isuse ađahar so brininaja amen kotar amare phenja.

5. Sose disave phenjenđe tano pharo te družinen pe averencar?

⁵ Sarinenđe amenđe, hem e phraljenđe hem e phenjenđe, valjani šukar društvo. Ama, kova izazov podijekh puti isi len disave phenja? Hajde te dikha so phenđe disave phenja. I Džordan * phenela: „Sebepi so hijum kokri, često osetinava so nane man than ki skupština hem so na hijum deo andi skupština.“ I Kristin koja sar pionir selinđa pe te bi propovedini odothe kaj isi pobari potreba, phenela: „Ked hijan nevo ki skupština, podijekh puti osetineja tut usamljeno.“ Disave phralja osetinena pe isto ađahar. Okola kola živinena ko ćher kuri nane sare e Jehovase svedokija, podijekh puti šaj te osetinen pe so na pripadinena pe porodicaće, a ko isto vreme so na pripadinena pe duhovno porodicaće. Okola kola sebepi o nabormipe bešena ćhere hem okola kola brininena pe ando članija kotar pi porodica kola tane naborme, podijekh puti osetinena pe usamljena. I Anet phenela: „Sebepi so me kokri brininđum man andi mi daj, često morandiljum te odbinav e phraljen hem e phenjen ked vićinđe man te družinav man olencar.“

6. Premalo Luka 10:38-42, sar o Isus pomožinđa e Martaće hem e Marijaće?

⁶ O Isus odvojinđa vreme pe duhovno phenjenđe hem hine lenđe pravo amal. Odova najšukar dićhola ando e Isuseso amalipe e Marijaja hem e Martaja, kola solduj hine kokri. (Čitin Luka 10:38-42.) Sebepi olese lafija hem delija, on duj osetinđe pe šukar ked hine e Isuseja. I Marija osetinđa pe slobodno te bešel uzalo e Isusese pre, sar so bi ćerela jekh učeniko. * Ki aver strana, ked i Marta holjanđa so i Marija na pomožini laće te pripremini habe, i Marta osetinđa pe slobodno te vaćeri e Isusese po mišljenje odolestar. Ki odija situacija, o Isus sikavđa hem e Marija hem e Marta jekh važno buti. Isto ađahar, o Isus mothovđa so brinini pe olendar hem ando olengo phral, o Lazar, ađahar so posetinđa len pana nekobor putija (Jov. 12:1-3). Sebepi odova, ked o Lazar ozbiljno naborsajlo, i Marija hem i Marta osetinđe pe slobodno te vićinen e Isuse te bi pomožini len (Jov. 11:3, 5).

7. Sar šaj te ohrabrina amare phenjen?

⁷ Aso disave phenja, o sastankija tane glavna prilika te oven e phraljencar hem e phenjencar. Odolese, mangaja te koristina odola prilike vilestar te pozdravina len, te vaćera olencar hem te mothova lenđe kobor značinena amenđe. I Džordan, i phen kolatar vaćerđam ko akava članko, phenela: „But značini maje ked avera primetinena me komentarija, vićinena man ki služba ja ko disavo aver način mothovena so brininena pe mandar.“ Amen mora te mothova amare phenjenđe so but značinena amenđe. „Ako na avava ko sastanak“, phenela i Kija, „đanava so neko ka pisini maje poruka te dikhel da li hijum šukar. Odova mothovi maje so o phralja hem o phenja brininena pe mandar.“

8. Ko kola načinija šaj te oponašina e Isuse?

 ⁸ Sar o Isus, hem amen šaj te da sa amendar te odvojina vreme te družina amen amare phenjencar. Šaj te vićina len ko jekh jednostavno habe ja ki disavi rekreacija. Ked ćeraja odova, valjani te da sa amendar te vaćera odova so ka ohrabrini len (Rimlj. 1:11, 12). O starešine valjani te ovel len isto stav sar so hine le o Isus. Ov đanđa soj tano pharo ked tano neko kokri, ama ki aver strana, jasno mothovđa so o brako hem o ćhave nane garancija te bi neko ovela potpuno bahtalo (Luka 11:27, 28). Umesto odova, potpuno bahtalipe zavisini ando odova da li ka ćhiva e Jehova ko prvo than ko amaro životi (Mat. 19:12).

9. Sar o starešine šaj te pomožinen pe duhovno phenjenđe?

⁹ Posebno o starešine valjani te ponašinen pe premalo đuvlja sar premalo pe phenja hem daja (1. Tim. 5:1, 2). O starešine valjani te odvojinen vreme te vaćeren e phenjencar angleder hem palo sastanko. I phen Kristin, kolatar vaćerđam hari angleder, phenela: „Jekh starešina primetinđa so hijum but zauzeto hem manglja te đanel sar izgledini jekh mo dive. But značinđa maje olesi briga.“ Ked o starešine redovno odvojinena vreme te vaćeren  pe duhovno phenjencar, odoleja mothovena so brininena pe olendar. * I Anet, kolatar vaćerđam hari angleder, objasnini sose tano šukar redovno te vaćera e starešinencar. Oj phenela: „Pošukar penđarava len hem on pošukar penđarena man. Odolese, ked isi man dijekh problemi, osetinava man slobodno te rodav pomoć olendar.“

10. So šaj te pomožini amare phenjenđe te oven bahtale?

¹⁰ Sarinenđe amenđe, hem e muršenđe hem e đuvljenđe, but značini ked avera dikhena o buća ko kola hijam šukar hem ked tane zahvalna aso odova so ćeraja. Ki aver strana, ked niko na primetini amare talentija hem amaro trud, odova obeshrabrini amen. I phen Abigejl, koja služini sar pionir, podijekh puti osetini pe so samći niko na primetini la. Oj phenela: „Avera obično dikhena man sar nekasi phen ja nekasi ćhaj. Podijekh puti osetinava man so na hijum odobor bitno.“ Ki aver strana, zapazinen so phenela i phen koja vićini pe Pam. Iako tani kokri, oj beršencar služinđa sar misionari. Palo odova, oj irinđa pe ćhere te bi brinini pe ando pe roditeljija. Akana isi la pobuter ando 70 berš hem pana služini sar pioniri. Oj phenela: „But značinđa maje so avera phenđe maje soj tane zahvalna aso odova so ćerava.“

11. Sar o Isus mothovđa soj tano zahvalno e đuvljenđe kola đelje palo leste?

¹¹ O Isus hine zahvalno e pobožno đuvljenđe kola koristinđe „pi imovina“ te bi pomožinena lese (Luka 8:1-3). Odova so on služinđe oleja na hine jedino čast koja ov mothovđa lenđe. Ov sikavđa len hem ando avera hor duhovna ćaćipa. Na primer, ov phenđa lenđe so ka merel hem so ka uskrsnini (Luka 24:5-8). Ov pripreminđa odole đuvljen, sar so pripreminđa hem e apostolen, aso kušnje kola ađićerena len (Mar. 9:30-32; 10:32-34). Iako disave učenikija našlje ked astarđe e Isuse, zanimljivo tano so disave đuvlja kola đelje palo leste, hine uzalo Isus đi na mulo ko mučeničko stubo (Mat. 26:56; Mar. 15:40, 41).

12. Kova zadatko o Isus dinđa e đuvljenđe?

¹² O Isus dinđa e đuvljenđe jekh važno zadatko. Na primer, o pobožna đuvlja hine prva svedokija ando oleso uskrsenje. Ov phenđa odole đuvljenđe te javinen e apostolenđe so ov uskrsninđa (Mat. 28:5, 9, 10). Izgleda so ki Pedesetnica, ko 33. berš ki amari era hem o đuvlja hine odothe ked sare hine pomazime sveto duhoja. Ako tano odova tačno, odola phenja kola tegani hine pomazime dobinđe dar te vaćeren avere ćhibjencar hem te propovedinen averenđe ando „e Devlese moćna delija“ (Dela 1:14; 2:2-4, 11).

13. So amare phenja ćerena avdije hem sar šaj te mothova zahvalnost aso odova so ćerena?

¹³ Amare phenja zaslužinena i pohvala aso sa so ćerena aso Jehova. Na primer, on gradinena hem održinena o objektija, podupirinena o grupe ko strana ćhibja hem služinena ko Betel. On tane odothe hem ked organizujini pe humanitarna pomoć, ćerena sar prevodiocija hem služinena sar pionirija hem sar misionarija. Sar o phralja, hem o phenja đana ki Škola e pionirenđe, ki Škola e objaviteljenđe ando Kraljevstvo hem ki škola Galad. Isto ađahar, o phenja kola tane ko brako pomožinena pe romenđe te bi on šaj te ćeren pe zadatkija ko skupštine, odnosno ki e Jehovasi organizacija. Ked odola phralja na bi ovel len i podrška ando pe romnja, on na bi uspinena te ispuninen pi uloga koja isi len sar „manuša ko dar“ (Ef. 4:8). Sar šaj te pomožina amare phenjenđe ki buti koja on ćerena?

14. Premalo Psalam 68:11, so ćerena o mudra starešine?

 ¹⁴ O mudra starešine haljona so amare bućarne phenja tane „bari vojska“ hem so često tane but šukar propovednikija andi šukar vest. (Čitin Psalam 68:11.) O starešine trudinena pe te sikljon ando odola iskusna phenja. I Abigejl, kolatar vaćerđam hari angleder, phenela so but značini laće ked o phralja pućena la so oj mislini kola tane šukar uvodija asi služba. Oj phenela: „Odova mothovi maje so o Jehova isi le than maje ki olesi organizacija.“ Isto ađahar, o starešine haljona so odola verna hem zrela phenja šaj te pomožinen e terne phenjenđe te borinen pe pekle problemencar (Titu 2:3-5). Ćaće, amare phenja zaslužinena te mothova lenđe zahvalnost aso sa so ćerena!

15. Ked e phenjenđe ka ovel potrebno neko te branini len?

¹⁵ Ko disave posebna situacije, e phenjenđe valjani neko ko ka branini len (Is. 1:17). Na primer, jekha phenjaće koja tani udovica ja razvedimi, valjani neko ko ka vaćeri ko olako anav hem neko ko ka ćerel disave buća kola ćerđa olako rom. Ili jekha phenjaće valjani pomoć te bi vaćeri e doktorencar. Isto ađahar, jekha phenjaće koja ćerela buti ko avera teokratska projektija šaj valjani pomoć sose avera napadinena la sebepi so na đala ki služba odobor kobor đana avera pionirija. Sar pana šaj te pomožina amare phenjenđe? Hajde palem te dikha e Isuseso primer.

16. Premalo Marko 14:3-9, sar o Isus braninđa e Marija?

¹⁶ O Isus odlučno braninđa pe duhovno phenjen ked neko pogrešno haljilja len. Na primer, o Isus braninđa e Marija ked i Marta kritikujinđa la (Luka 10:38-42). O Isus palem braninđa e Marija ked o učenikija kritikujinđe la sebepi so anđa pogrešno odluka. (Čitin Marko 14:3-9.) O Isus haljilo e Marijake motivija hem pohvalinđa la ađahar so phenđa: „Ćerđa maje šukaripe.“ ... „Ćerđa odova so šajinđa.“ Ov čak phenđa so ando odova šukaripe ka vaćeri pe „kuri god te propovedini pe i šukar vest ko celo sveto“, sar so ćerela hem akava članko. Šukar tano te zapazina so ked o Isus vaćerđa so ka propovedini pe ko celo sveto, ov odova povezinđa odoleja so i Marija ćerđa. Šaj samo te zamislina kobor e Marijaće značinđe e Isusese lafija ked avera haljilje la pogrešno.

17. Vaćer jekh situacija ki koja bi valjani te branina amare phenjen?

¹⁷ Da li hem tu branineja te phenjen ked valjani? Na primer, zamislin jekh situacija. Disave objaviteljija dikhena jekha phenja, kaso rom nane e Jehovaso svedoko, sar često harini ko sastankija hem uvek đala ćhere čim on završinena pe. On primetinena hem so oj na anela pe ćhaven redovno ko sastankija. Odolese on kritikujinena la sose mislinena so valjani te ovel odlučno hem te rodel ando po rom te mukhel e ćhaven te đan olaja. Ama, odova so on na đanena tano so oj dela sa pestar te ćerel odova so šaj. Isto ađahar, oj nane la potpuno kontrola sar ka koristini po vreme hem na pućela pe samo oj so ka ćerel pe ćhavencar. So tu šaj te ćere ked šuneja so avera kritikujinena e phenja? Pohvalin la anglo avera hem vaćer ando šukar buća kola oj ćerela. Odoleja ka ćhinave averen te kritikujinen la.

18. Ko kola pana načinija šaj te pomožina amare phenjenđe?

¹⁸ E phenjenđe šaj te pomožina ađahar so ka pomožina lenđe ko disave praktična načinija (1. Jov. 3:18). I Anet, koja brininđa pe andi pi nabormi daj, phenela: „Disave phralja hem phenja bi avena koro mande, te bi arakhena me daja, te bi me ćerava avera buća kola valjanđe hem pomožinđe maje ađahar so  anđe disavo habe. Odova so on ćerđe, uverinđa man so on mangena man hem so isi man than ki e Jehovasi organizacija.“ I phen Džordan, kolatar već vaćerđam, isto dobinđa pomoć ando phralja. Jekh phral pomožinđa laće te sikljol sar te popravini pe vorda. Oj phenela: „But šukar osetinava man ked dikhava sar me phralja hem me phenja brininena pe andi mi bezbednost.“

19. Ko kola pana načinija o starešine šaj te pomožinen e phenjenđe?

¹⁹ Hem o starešine trudinena pe te pomožinen e phenjenđe. On đanena so e Jehovase tano važno sar on ponašinena pe premalo phenja (Jak. 1:27). On trudinena pe te oven razumna sar o Isus hem na ćerena pravilija ando odova ked bi ovela šukar te mothoven razumevanje (Mat. 15:22-28). Ked o starešine trudinena pe te pomožinen e phenjenđe, o phenja osetinena pe so o Jehova hem olesi organizacija mangena len. Ked o nadgledniko andi grupa kuri služini amari phen i Kija šunđa so oj valjani te selini pe, ov odmah ponudinđa laće pomoć. „Sebepi odova na osetinđum odobor baro stres“, phenela i Kija. „Pe lafencar hem pe delijencar, o starešine jasno mothovđe maje so hijum važno deo andi skupština hem so na hijum kokri ked borinava man dijekhe problemeja.“

20-21. Sar šaj te mothova so mangaja sa amare phenjen?

²⁰ Ko amare skupštine avdije, isi but bućarne phenja kola zaslužinena amari podrška. Sar so sikljiljam ando e Isuseso primer, amen šaj te pomožina lenđe ađahar so ka odvojina vreme te ova olencar hem pana pošukar te penđara len. Isto ađahar, šaj te mothova so hijam zahvalna olenđe aso sa so ćerena aso Jehova. Hem valjani te branina len ked odova tano potrebno.

²¹ Ko krajo andi pi poslanica e Rimljanenđe, o Pavle posebno pominđa enja phenja (Rimlj. 16:1, 3, 6, 12, 13, 15). Odole phenjen sigurno ohrabrinđa ked šunđe olese pozdravija hem pohvale. Sar so o Pavle ćerđa, hem amen valjani te podržina amare phenjen ki skupština. Ked ćeraja odova, amen mothovaja lenđe so mangaja len hem soj tane važno deo andi amari duhovno porodica.