1-2. Sar tane povezime o lafija ando Propovednik 11:6 hem o propovedibe?

KO DISAVE phuvja, but manuša mangena te sikljon pobuter andi šukar vest. Nesave jedva ađićerđe te šunen la. Ko avera phuvja, o manuša nane odobor zainteresovana te šunen ando Devel ja andi Biblija. Sar o manuša reagujinena odothe kuri tu živineja? Sar god te reagujinen o manuša, o Jehova ađićeri amendar hem ponodri te propovedina i šukar vest, sa đi ov na phenela so više na valjani te propovedina.

² O Jehova već odlučinđa ked o propovedibe ka završini pe. Palo odova „ka avel o kraj“ (Mat. 24:14, 36). Ði na ovela odova, sar šaj te šuna o lafija „to vas ma te odmorini?“ * (Čitin Propovednik 11:6.)

3. So ka razmotrina ko akava članko?

³ Ko okova članko, razmotrinđam štar buća kola valjani te ćera te šaj te ova uspešna „ribarija ando manuša“ (Mat. 4:19). Ko akava članko, ka razmotrina trin buća sar šaj te zorjaćera amari odlučnost hem ponodri te propovedina bizo obzir kola pharipa isi amen. Ka sikljova sose tano važno: (1) te ova usredsredime, (2) te ova strpljiva hem (3) te razvijina zorali vera.

4. Sose valjani te ova usredsredime ko zadatko kova o Jehova dinđa amen te čera?

⁴ O Isus phenđa pe učenikonenđe save ka oven o manuša hem so ka ovel ko poslednja dive. Ov đanđa so odova šaj ka sprečini len te usredsredinen pe ko propovedibe. Odolese, ov phenđa lenđe: „Oven đangavde“ (Mat. 24:42). Ko e Nojese  dive, hine but buća kola sprečinđe e manušen te obratinen pažnja ko olese upozorenja. Odola ista buća šaj te utičinen hem upro amende (Mat. 24:37-39; 2. Petr. 2:5). Odolese, amen mangaja te ova usredsredime ko zadatko kova o Jehova dinđa amen te ćera.

5. Premalo lafija ando Dela apostolska 1:6-8, kuri sa ka propovedini pe i šukar vest?

⁵ Avdije, valjani te da sa amendar te ova usredsredime ko odova te propovedina. O Isus phenđa so olese učenikija ka propovedinen hem palo oleso meribe hem so odova ka ćeren pobuter nego so ov ćerđa đi hine đivdo (Jov. 14:12). Palo e Isuseso meribe, disave ando olese učenikija palem irinđe pe ki pi buti, te astaren maćhen. Palo odova so uskrsninđa, o Isus disave pe učenikonenđe prekalo jekh čudo pomožinđa te astaren bute maćhen. Ov koristinđa odija prilika te phenel lenđe so olengo zadatko, te oven ribarija ando manuša, tano považno andi bilo koja aver buti (Jov. 21:15-17). Angleder te đal ko nebo, o Isus phenđa pe učenikonenđe so o propovedibe kova ov počminđa, na ka ćerel pe samo ko Izrael nego hem ko avera phuvja. (Čitin Dela apostolska 1:6-8.) Beršencar palo odova, o apostol Jovan, ki vizija koja o Isus mothovđa lese, dikhlja so ka ovel ko „e Gospodeso dive.“ * Jekh andi buti koja o Jovan dikhlja hine sar jekh anđeo propovedini „i večno šukar vest... aso svako pleme, asi svako ćhib hem aso svako narodo“ (Otkr. 1:10; 14:6). Kotar akava dikhaja so e Jehovasi volja avdije tani hem amen te učestvujina ko akava delo kova ćerela pe ko celo sveto, sa đi na završini pe.

6. Sar šaj te ova usredsredime ko amaro zadatko te propovedina?

⁶ Amen šaj te ova usredsredime ko amaro zadatko te propovedina, ako razmislinaja ando sa so o Jehova ćerela te pomožini amen te  ćera odova zadatko. Na primer, ov dela amen pherdo duhovno hrana prekalo štampime hem elektronska publikacije, audio hem video izdanja kola tane ćhivde ko amaro sajt jw.org. Razmislin akalestar: Sa so isi ko amaro sajt, tano dostupno ko prekalo 1 000 ćhibja (Mat. 24:45-47). O manuša ko sveto tane podelime sebepi i politika, i religija hem sebepi so disave tane barvale, a disave ćorore. Ama, pobuter ando ofto milionija e Devlese sluge tane ujedinime ko celo sveto. Na primer, ko petak 19. april, 2019. berš, o Svedokija ko celo sveto zajedno razmotrinđe e biblijako stih aso odova dive. Odija rat, 20 919 041 manuša ćedinđe pe te obeležinen o dive ked o Isus mulo. Amen hijam podstaknime te ova usredsredime ko propovedibe ked razmislinaja andi čast koja isi amen, so šaj te dikha sa so avdije ćerela amari organizacija hem te ova deo ando odova.

7. Sar e Isuseso primer pomožini amen te ova usredsredime ko propovedibe?

⁷ Aver način sar šaj te ova usredsredime ko propovedibe tano ađahar so ka oponašina e Isuseso primer. O Isus na dozvolinđa nikase hem nisose te sprečini le te propovedini i šukar vest (Jov. 18:37). Ked o Satana ponudinđa Iese „sa o kraljevstvija ando akava sveto hem olengi slava“, o Isus na dozvolinđa odova te utičini upro leste niti privucinđa le odova so avera manglje te ćhiven le te ovel kralj (Mat. 4:8, 9; Jov. 6:15). Isto ađahar, ov na dozvolinđa upro leste te utičini i želja aso materijalna buća niti i dar ando protivljenje (Luka 9:58; Jov. 8:59). Ked tani amari vera ispitimi, amen šaj te ova usredsredime ko propovedibe ako na bistraja o savet kova dinđa amen o apostol Pavle. Ov podstakninđa e hrišćanen: „Hor razmislinen ando“ Isus, „te na bi ćhinđovena hem te na bi predajinena tumen“ (Jevr. 12:3).

8. Soj tani i strpljivost hem sose tano posebno važno akana te ova strpljiva?

⁸ I strpljivost tani sposobnost smireno te ađićera đi i situacija na menjini pe. Bilo te ađićera te završini pe disavi phari situacija ko amaro đivdipe ja te ispunini pe diso so već but vreme ađićeraja, amenđe valjani strpljenje. O prorok Avakum jedva ađićerđa te avel o kraj ando nasilje ki Juda (Avak. 1:2). E Isusese učenikija nadinđe pe so o Kraljevstvo „odmah ka ovel uspostavimo“ hem so ka oslobodini len andi rimsko vlast (Luka 19:11). Amen jedva ađićeraja ked e Devleso Kraljevstvo ka cidel o lošnipa hem ked ka ćerel o nevo sveto kuri ka oven o pravedna manuša (2. Petr. 3:13). Ama, valjani te ova strpljiva hem te ađićera o vreme kova o Jehova odredinđa. Hajde te dikha nekobor načinija ko kola o Jehova sikavi amen te ova strpljiva.

9. Kola primerija mothovena amenđe so o Jehova tano strpljivo?

⁹ O Jehova tano savršeno primer andi strpljivost. Ov dozvolinđa dovoljno vreme e Nojese te ćerel i arka hem te služini sar „propovednik andi pravednost“ (2. Petr. 2:5; 1. Petr. 3:20). Ked o Avraham nekobor putija pućlja e Jehova isto pućibe, andi olesi odluka te uništini e lošno manušen ko dizja Sodom hem i Gomora, o Jehova strpljivo šunđa le (Post. 18:20-33). Vekonencar, o Jehova hine but strpljivo e Izraelcencar kola na hine verna (Nem. 9:30, 31). Avdije, amen dikhaja o dokaz andi e Jehovasi strpljivost sebepi so dela dovoljno vreme sa e manušenđe kolen ov privucinđa koro peste „te pokajinen pe“ (2. Petr. 3:9; Jov. 6:44; 1. Tim. 2:3, 4). E Jehovaso primer podstaknini amen te ova strpljiva đi propovedinaja i šukar vest hem sikavaja e manušen. Isto ađahar, ov sikavi  amen sar šaj te ova strpljiva prekalo jekh primer kova nalazini pe ko oleso Lafi.

10. Premali Jakovljeva 5:7, 8, so sikavi amen o primer ando zemljoradnik?

¹⁰ Čitin Jakovljeva 5:7, 8. O zemljoradniko kova brinini pe ando usevija sikavi amen sar šaj te ova strpljiva. Ðanaja so disave biljke sigate barjona. Ama, bute biljkenđe, posebno okolenđe kola dena plod, valjani but vreme te nakhel te šaj te oven zrela. Ko purano Izrael, valjanđa oko šov masek te šaj jekh plod te barjol. O zemljoradniko sejinđa o seme palo rano boršim ko jesen hem ćedinđa o plod palo kasno boršim ko proleće (Mar. 4:28). Amen ka ova mudra ako hijam strpljiva sar odova zemljoradnik. Ama, odova nane lokho.

11. Sar i strpljivost pomožini amen ki služba?

¹¹ O nesavršena manuša mangena odmah te dikhen o rezultatija ando po trud. Ama, ako mangaja o plodija ki amari bašta te barjon, amen valjani celo vreme te brinina amen olendar. Odova značini so valjani te hana, te sejina, te ikala o korov hem te ćhiva pani. Isto ađahar, valjani te da sa amendar te šaj te ćera učenikonen. Valjani te nakhel vreme te šaj te pomožina amare studentenđe te sikljon te oven nepristrasna hem te brininen pe ando manuša. Ako hijam strpljiva, odova ka pomožini amen te na ova obeshrabrime ked o manuša na šunena amen. Ama, ked o manuša šunena hem mangena te sikljon, amen palem mora te ova strpljiva. Amen našti zorjeja te ćhiva e studente te ovel le pobari vera. Disavo puti, čak hem e Isusese učenikija na haljilje odmah so značini odova sostar sikavđa len (Jov. 14:9). Amen na valjani te bistra so amen sadinaja hem ćhivaja pani, ama o Devel dela te barjol (1. Kor. 3:6).

12. Sar šaj te ova strpljiva đi svedočinaja amare rođakonenđe?

¹² Jekh područje kuri šaj te ovel amenđe pharo te ova strpljiva tano ked svedočinaja amare rođakonenđe. O načelo kova nalazini  pe ko Propovednik 3:1, 7 šaj te pomožini amen ko odova. Odothe pisini: „Sa isi le poklo vreme... vreme ked trajini pe hem vreme ked vaćeri pe.“ Odoleja sar ponašinaja amen, šaj te svedočina olenđe bizo lafi. Ki aver strana, amen valjani uvek te ova spremna te vaćera lenđe ando Jehova (1. Petr. 3:1, 2). Iako valjani revno te propovedina hem te sikava averen, ipak valjani te ova strpljiva hem e manušencar hem amare rođakonencar.

13-14. Kola tane disave primerija andi strpljivost kola šaj te oponašina?

¹³ Amen šaj te sikljova te ova strpljiva ando verna manuša kolendar vaćeri i Biblija, ama hem ando phralja hem phenja ko amaro vreme. Na primer, o Avakum jedva ađićerđa te avel o krajo ando lošnipe. Ama, ov mothovđa soj tano strpljivo ked phenđa: „Ko mo stražarsko than ka terđovav“ (Avak. 2:1). Iako o apostol Pavle hine le želja te završini pi služba, ov ipak strpljivo hem ponodri temeljno svedočinđa andi šukar vest (Dela 20:24).

¹⁴ Hajde te dikha o primer ando jekh bračno par kova završinđa i škola Galad. On hine bićhalde te služinen ki jekh phuv kuri hine samo nekobor Svedokija hem kuri but manuša na pripadinđe ki hrišćansko religija. Odolese, samo nekobor manuša manglje te proučinen i Biblija. Ama, ko avera phuvja kuri olenge amala kotar i škola hine bićhalde te služinen, but manuša manglje te proučinen hem šukar napredujinđe. Akava bračno par strpljivo propovedinđa, iako but manuša ko olengo tereni na manglje te šunen. Palo odova so ofto berš propovedinđe ko područje kuri na hine odobor baro porast, ko krajo on hine bahtale te dikhen sar jekh olengo studenti krstini pe. So šaj te sikljova kotar e biblijake primerija hem ando phralja hem phenja ko amaro vreme? Akala verna sluge na ulje mrzalje, odnosno olengo vas na odmorinđa hem odolese o Jehova blagoslovinđa olengi strpljivost. Ovela bi šukar „te oponašina okolen kola sebepi pi vera hem po strpljenje dobinena odova soj tano obećimo“ (Jevr. 6:10-12).

15. Kova tano o prvo način sar i vera šaj te zorjaćeri amari odlučnost te propovedina?

¹⁵ Amen verujinaja ki poruka koja propovedinaja hem odolese mangaja te vaćera la so pobuter manušenđe. Verujinaja so o obećanja kotar e Devleso Lafi ka ispuninen pe (Ps. 119:42; Is. 40:8). Amen već dikhaja sar e biblijake proročanstvija ispuninena pe ko amaro vreme. Isto ađahar, dikhaja sar e manušengo đivdipe ovela pošukar ked primeninena e biblijake savetija. Sa akala buća pana pobuter uverinena amen so i šukar vest ando Kraljevstvo tani poruka koja svako manuš valjani te šunel.

16. Premalo Psalam 46:1-3, sar i vera ko Jehova hem ko Isus zorjaćeri amari odlučnost te propovedina?

¹⁶ Isto ađahar, amen verujinaja ko Jehova, kastar avela i poruka koja propovedinaja hem ko Isus, kas Ov ćhivđa te ovel Kralj ko oleso Kraljevstvo (Jov. 14:1). Save god okolnostija te ovel amen, o Jehova uvek ka ovel amaro utočište hem amari snaga. (Čitin Psalam 46:1-3.) Uzo odova, amen hijam uverime so o Isus predvodini o delo ando propovedibe, ađahar so koristini i moć hem o autoritet kova o Jehova dinđa le (Mat. 28:18-20).

17. Vaćer jekh primer kova mothovi sose valjani hem ponodri te propovedina?

¹⁷ I vera pana pobuter uverini amen so o Jehova ka blagoslovini amaro trud, disavo puti ko način ko kova na očekujinaja (Prop. 11:6). Na primer, svako dive but manuša dikhena o astali upro kova tani amari literatura  hem amari kolica. Da li tano odova šukar način te propovedini pe? Naravno. Ki Naša služba za Kraljevstvo kotar novembar 2014. berš, ki srpsko ćhib, vaćeri pe kotar jekh studentkinja koja manglja te pisini seminarski rad ando e Jehovase svedokija. Oj naštinđa te arakhi i dvorana, ama uzo lako fakulteti hine ćhivdo astali ko kova hine amari literatura hem odothe arakhlja o materijali aso po seminarski rad. Ko krajo, oj krstisalji hem akana služini sar stalno pionir. Asavke iskustvija podstakninena amen pana pobuter te propovedina, odolese so mothovena amenđe so pana isi manuša kola valjani te šunen i poruka ando Kraljevstvo.

18. Sose šaj te ova sigurna so o propovedibe ka završini pe ko pravo vreme?

¹⁸ Šaj te ova sigurna so o delo ando propovedibe ka završini pe ko pravo vreme. Akana ka dikha so hine ko e Nojese dive. O Jehova mothovđa so uvek ćerela o buća ko pravo vreme. Oko 120 berš angleder, o Jehova tačno odredinđa vreme ked ka počmini o Potop. Beršencar palo odova, o Jehova phenđa e Nojese te ćerel i arka. Verovatno oko 40 ja 50 berš angleder o Potop, o Noje gradinđa i arka hem propovedinđa. Iako o manuša na šunđe le, ov hem ponodri propovedinđa sa đi o Jehova na phenđa soj tano vreme te ćhivel e životinjen ki arka. Palo odova, ko pravo vreme o Jehova „phanlja o udara andi arka“ (Post. 6:3; 7:1, 2, 16).

19. So ađićeri amen ako hem ponodri revno propovedinaja?

¹⁹ Pana hari, o Jehova ka phenel so više na valjani te propovedina i šukar vest. Palo odova, ov ka uništini e Bengeso sveto hem ka anel o nevo sveto kuri ka oven o manuša kola šunena e Devle. Ði na ovela odova, amen šaj te oponašina e Noje, e Avakume hem averen kola revno propovedinđe. Hajde te ova usredsredime ko propovedibe, te ova strpljiva hem te zorjaćera amari vera ko Jehova hem ko olese obećanja.