1. Sar o kralj David, so šaj disave amendar te pućen pe?

SARE amen mangaja te ovel amen mirno đivdipe. Niko amendar na mangela te ovel le brige. Ama, disavo puti, isi amen brige. Sebepi odova, disave ando e Jehovase sluge šaj te pućen pe isto pućibe kova o kralj David pućlja e Jehova: „Ði ked ka mučinen man o brige, đi ked me dive ka oven pherde dukha?“ (Ps. 13:2).

2. Sostar ka vaćera ko akava članko?

² Iako našti te naša ando odova te ovel amen brige, ipak šaj te ćera diso te na brinina amen odobor but. Ko akava članko, najangleder ka vaćera ando disave buća sebepi kola brininaja amen. Palo odova, ka dikha šov buća kola ka pomožinen amen te ovel amen mir đi borinaja amen amare problemencar.

3. Kola problemija isi amen hem da li šaj te utičina upro lende?

³ Sebepi but buća šaj te brinina amen. Upro disave ando odola buća našti te utičina. Na primer, našti te utičina upro odova kobor svako berš ka koštini o habe hem o šeja ja kobor bari ka ovel i stanarina. Isto ađahar, našti te đana kobor putija amaro kolega ki buti ja amaro amal ki škola ka pokušini te ćhivel amen te ova nepoštena ja te ćera nemoral. Uzo odova, amen našti te ćhinava o kriminal odothe kaj bešaja. Akala problemija isi amen sebepi so živinaja  ko sveto kuri but manuša na anena odluke premalo e biblijake načelija. O Beng, o devel ando akava sveto, đanela so disave manuša ka dozvolinen „o brige ando akava sveto“ te ćhinaven len te služinen e Jehovase (Mat. 13:22; 1. Jov. 5:19). Odolese, na hijam iznenadime so ko sveto isi odobor bare problemija sebepi kola o manuša but brininena pe!

4. So šaj te ovel sebepi so but brininaja amen ando amare problemija?

⁴ Sebepi o problemija, šaj odobor te brinina amen so našti te mislina ando ništa aver. Na primer, šaj brininaja amen so na ka zaradina dovoljno pare te ćina odova so valjani amenđe, so ka ova naborme hem so na ka šaj te đa ki buti ja so čak ka aćhova bizi buti. Isto ađahar, šaj brininaja amen so na ka ićera amen ko e Devleso zakon ked ka ova ki disavi kušnja. Pana hari, o Beng ka ćhivel okolen upro kola ov isi le kontrola te napadinen e Devlese narodo. Odolese šaj brininaja amen so ka ćera ked ka ovel odova. Šaj pućaja amen: „Da li tano pogrešno te brininav man ando akala buća?“

5. Ko so o Isus mislinđa ked phenđa „ma brininen tumen“?

⁵ Amen đanaja so o Isus phenđa pe sledbenikonenđe: „Ma brininen tumen“ (Mat. 6:25). Ama, da li akava značini so ov očekujini amendar nisostar te na brinina amen? Naravno so na! Setin tut so disave ando e Jehovase verna sluge ko purano vreme hine len bare brige. * Ama, o Jehova hem ponodri hine zadovoljno olencar (1. Kralj. 19:4; Ps. 6:3). O Isus u stvari manglja te utešini amen. Ov na manglja sebepi so brininaja amen aso buća kola valjanena amenđe i služba e Devlese te na ovel amenđe više ko prvo than. So šaj te pomožini amen ked but brininaja amen? (Dikh o okvir „ Sar te ćera odova?“)

6. Premalo Filipljanima 4:6, 7, so šaj te del amen mir?

⁶ (1) Molin tut često. Ked brinineja tut sebepi o problemija, šaj te moline tut e Jehovase asi pomoć (1. Petr. 5:7). Sar odgovor ki ti molitva, ov šaj te del tut „e Devleso mir, kova tano upreder odova so o manuš šaj te haljol.“ (Čitin Filipljanima 4:6, 7.) O Jehova ka del tut odova mir prekalo po moćno sveti duh (Gal. 5:22).

7. So valjani te ićera ki godi ked molinaja amen e Devlese?

⁷ Ked molineja tut e Jehovase, vaćer lese sa so isi tut ko vilo. Ov konkretno. Vaćer lese soj tano o problemi hem phen lese sar osetineja tut sebepi odova. Ako šaj te rešini pe o problemi, molin le te del tut mudrost te đane sar te rešine le hem te del tut snaga te ćere odova. Ako našti nisar te rešine o problemi, tegani molin le te pomožini tut te na brinine tut odobor but hem o brige te na peraven tut. Ked hijan konkretno ko te molitve, sar đala o vreme, sa pojasno ka dikhe sar o Jehova odgovorini ko te molitve. Ako o odgovor na dobineja odmah, ma odustajin. O Jehova na mangela samo te ove konkretno, nego hem te istrajine ko te molitve (Luka 11:8-10).

8. So valjani te spomina ko amare molitve?

⁸ Ked ki molitva vaćereja e Jehovase te brige, vaćer lese hem kobor hijan lese zahvalno. Šukar tano te razmislina ando sa o  šukar buća kola isi amen, čak hem tegani ked isi amen bare problemija. Ako disavo puti na đaneja sar te phene lese sar osetineja tut, tegani ma bistri so o Jehova ka odgovorini ki ti molitva hem ako samo pheneja lese: „Molinava tut, pomožin maje!“ (2. Let. 18:31; Rimlj. 8:26).

9. So valjani te ćera ked daraja?

⁹ (2) Oslonin tut upri e Jehovasi mudrost, a na upri tikli. Ko oftoto veko angleder i nevi era, o manuša andi Juda darandilje so ka napadinen len o Asircija. Odolese rodinđe pomoć ando Egipat (Is. 30:1, 2). O Jehova upozorinđa len so na ka nakhen šukar ako ćerena odova (Is. 30:7, 12, 13). Prekalo prorok Isaija, o Jehova phenđa lenđe so šaj te zaštitini len. Ov phenđa: „Arakhen o mir hem o pouzdanje [upro Jehova], odova ka ovel tumari snaga“ (Is. 30:15b).

10. Kola tane disave situacije kuri šaj te mothova so uzdajinaja amen upro Jehova?

¹⁰ Ked šaj te mothova so uzdajinaja amen upro Jehova? Te dikha disave primerija. Zamislin so neko ponudinđa tuće buti kuri šaj pobuter te zaradine. Ama, valjani te ćere prekovremeno hem više na ka ovel tut vreme te služine e Jehovase sar so akana služineja lese. Ja neko ki buti udvarini pe tuće, ama na služini e Jehovase. Ja zamislin so neko andi ti porodica phenela tuće: „Birin, ja me, ja to Devel.“ Ki svako andi akija situacija nane lokho te odlučine so te ćere, ama o Jehova ka del tut vođstvo (Mat. 6:33; 10:37; 1. Kor. 7:39). O pućibe tano, da li tu ka ovel tut poverenje upro Jehova hem da li ka šune odova so ov ka phenel tuće te ćere.

11. Kola e biblijake izveštaija šaj te proučina ked avera protivinena pe amenđe?

¹¹ (3) Sikljov ando šukar hem ando lošna primerija. Ki Biblija isi but izveštaija kola mothovena kobor tano važno te arakha o mir hem te uzdajina amen upro Jehova. Ði ka proučine len, zapazin so pomožinđa e Devlese slugenđe te arakhen o mir iako hine len baro protivljenje. Na primer, ked o jevrejsko vrhovno sudo naredinđa e apostolenđe više te na propovedinen, on na darandilje. Umesto odova, on hrabro phenđe: „E Devle sar vladare mora te šuna, a na e manušen“ (Dela 5:29). Čak hem palo odova so šibinđe len, on na ćerđe panika. Sose? Odolese so đanđe so o Jehova tano ki olengi strana. Ov hine zadovoljno olencar. Sebepi odova, on nastavinđe te propovedinen i šukar vest (Dela 5:40-42). Isto ađahar, ked o učenik Stefan valjanđa te ovel mudardo, ov hine le odobor baro mir so oleso muj „hine sar e anđeleso muj“ (Dela 6:12-15). Sose? Odolese so hine uverimo so o Jehova tano zadovoljno oleja.

12. Premali 1. Petrova 3:14 hem 4:14, sose šaj te ova bahtale ked hijam progonime?

¹² O apostolija hine len jasno dokaz so o Jehova tano olencar. Ov dinđa len moć te ćeren čudija (Dela 5:12-16; 6:8). Ama, avdije, amenđe na dinđa odova. Umesto odova, prekalo po Lafi, ov mangipaja uverini amen so ked amen patinaja sebepi i pravednost, amen šaj te ova radosna sose tano ov zadovoljno amencar hem dela amen po sveti duh. (Čitin 1. Petrova 3:14; 4:14.) Sebepi odova, na valjani te brinina amen so ka ćera ako ki budućnost ka ova progonime. Umesto odova, valjani te da sa amendar te zorjaćera amaro pouzdanje upro Jehova kova šaj te podržini amen hem te spasini amen. Sar o hrišćanija ko prvo veko, hem amen mora te verujina ko e Isuseso obećanje: „Me ka dav tumen mudrost hem me ka pomožinav tumen te đanen so  te vaćeren hem tumare dušmanja na ka đanen so te odgovorinen tumenđe.“ Isto ađahar, o Isus obećinđa: „Ako ka istrajinen đi o krajo, tumen ka arakhen tumaro đivdipe“ (Luka 21:12-19). Hem niked ma bistri so o Jehova ićeri ki godi o najtikne detaljija ando pe sluge kola hine lese verna đi o meribe. Odoleja so đanela olendar, ov ka uskrsnini len.

13. So šaj te sikljova ando okola kola na arakhlje o mir hem o pouzdanje upro Jehova?

¹³ Isto ađahar, amen šaj te sikljova hem ando okola kola na uspinđe te arakhen o mir hem o pouzdanje upro Jehova. Ked proučinaja odola lošna primerija odova ka pomožini amen te na ćera ista greške kola on ćerđe. Na primer, ked o Asa ulo kralj hem ked i bari vojska napadinđa le, ov uzdajinđa pe upro Jehova, hem ov pomožinđa lese te pobedini (2. Let. 14:9-12). Kasnije, o izraelsko kralj o Vasa napadinđa e Asa but potikne vojskaja. Akava puti, o Asa na uzdajinđa pe upro Jehova so ka spasini le, sar so ćerđa angleder. Umesto odova, ov platinđa e manušenđe andi Sirija te pomožinen lese (2. Let. 16:1-3). Isto ađahar, hari angleder te merel, ked hine but nabormo, ni tegani na osloninđa pe upri e Jehovasi pomoć (2. Let. 16:12).

14. So šaj te sikljova ando e Asase greške?

¹⁴ Ki početka, o Asa osloninđa pe upro Jehova ked hine le problemija. Ama kasnije, ov na osloninđa pe upro po Devel. Umesto odova, ov kokri pokušinđa te rešini pe problemija. Ko početko, e Asaso plan te pućel e manušen andi Sirija te pomožinen lese, šaj izgledinđa šukar. Ama, odova mir na trajinđa but. O Jehova prekalo jekh prorok phenđa lese: „Sose uzdajinđan tut upro sirijsko kralj, a na uzdajinđan tut upro Jehova, to Devel, i vojska ando sirijsko kralj našlji tutar ando vas“ (2. Let. 16:7). Amen mora te pazina ko odova te na mislina so amen kokri šaj te rešina amare problemija, bizo te roda pomoć ando Jehova prekalo oleso Lafi. Čak hem ked ki sig valjani te ana disavi odluka, amen valjani te oslonina amen upro Jehova hem ov ka pomožini amenđe te ana ispravno odluka.

15. So šaj te ćera đi čitinaja i Biblija?

¹⁵ (4) Sikljov o stihija andi Biblija napamet. Ked ki Biblija arakheja stihija kola mothovena kobor tano važno te arakha o mir hem o pouzdanje upro Jehova, trudin tut te sikljove len napamet. Šaj ka pomožini tuće ako čitineja len ko glaso ja pisineja len ko jekh lil hem palo odova pana nekobor putija čitineja len. E Isusese Navinese hine zapovedimo redovno hem pažljivo te čitini i knjiga ando Zakon, te šaj te postupini mudro. Odova so čitinđa i knjiga ando Zakon pomožinđa lese te na daral nego te ovel hrabro te šaj te legari e Devlese narodo (Is. Nav. 1:8, 9). But stihija ando e Devleso Lafi šaj te pomožinen tuće te ovel tut mir ko situacije ko kola bi obično brinineja tut ja bi daraja (Ps. 27:1-3; Posl. 3:25, 26).

16. Sar o Jehova prekali skupština pomožini amen te arakha o mir hem te uzdajina amen upro oleste?

¹⁶ (5) Ov e Devlese narodoja. O Jehova prekalo amare phralja hem phenja pomožini amen te arakha o mir hem te uzdajina amen upro leste. Ko amare sastankija, šaj but te pomožini amen odova so sikljovaja ando govorija, ando komentarija hem ando ohrabrujuća razgovorija amare phralencar hem phenjencar (Jevr. 10:24, 25). Isto ađahar, amen šaj te ova but ohrabrime ked  amare brige vaćeraja amare šukar amalenđe ki skupština. O „šužo lafi“ ando amaro amal šaj te pomožini amen te na brinina amen odobor but (Posl. 12:25).

17. Premalo Jevrejima 6:19, sar i nada ko Kraljevstvo dela amen stabilnost iako isi amen phare okolnostija?

¹⁷ (6) Nek ti nada hem ponodri ovela zorali. Amari nada ko Kraljevstvo tani sar „sidro andi duša“, dela amen stabilnost iako isi amen phare okolnostija ja brige. (Čitin Jevrejima 6:19.) Razmislin andi budućnost koja o Jehova obećini. Ko odova vreme, niko na ka ovel le sostar te brinini pe (Is. 65:17). Zamislin so hijan ko sveto kuri tano mir, kuri više na ka desinen pe o lošna buća (Mih. 4:4). Isto ađahar, ti nada šaj te zorjaćere ked averenđe vaćereja ando nevo sveto. De sa tutar te propovedine hem te ćere učenikonen. Ako ćereja odova, šaj te ove „potpuno sigurno so ti nada ka ispunini pe“ (Jevr. 6:11).

18. So ka ovel ki budućnost hem so valjani te ćera?

¹⁸ Sebepi so o krajo ando akava sveto tano sa popaše, ka ovel amen sa pobuter problemija sebepi kola ka brinina amen. E beršeso stiho aso 2021. berš šaj te pomožini amen te borina amen odole problemencar hem te arakha o mir, na amare snagaja nego ađahar so ka uzdajina amen upro Jehova. Ko akava berš, hajde odoleja so ćeraja te mothova so isi amen vera ko e Jehovaso obećanje: „Arakhen o mir hem o pouzdanje, odova ka ovel tumari snaga“ (Is. 30:15).