KO MUZEJ ando biblijake phuvja, ko Jerusalim, šaj te dikhel pe jekh bar, ko kova tano jekh natpis, kova šaj tano pisimo maškaro 700. hem 600. berš angleder i nevi era. Akava bar arakhlje ki jekh pećina, koja koristinđa pe sar grobnica, paše uzo Hevron, ko Izrael. Ko bar pisini: „Nek o Jahve Savaot del armanja e Agafe, e Agavese ćhave.“ Sar akava natpis mothovi so odova so pisini ki Biblija tano tačno? Akava mothovi so e Devleso anav, Jehova ja Jahve, ko hebrejski JHVH, hine penđardo hem so ko purano vreme o manuša koristinđe le. Avera natpisija ko grobnice mothovena so o pećine koristinđe pe sar thana kuri o manuša šajinđe te arakhen pe nekasa ja kuri garavđe pe. But putija ko zidija, ko pećine, on bi pisinena e Devleso anav hem o lična anava, kola uključinđe razna oblikija ando e Devleso anav.

Ando odola natpisija, i doktorka andi filozofija ko Univerzitet ki Džordžija, i Rejčel Nabulsi, phenela: „Odova so but putija koristini pe o anav JHVH tano važno... O tekstija hem o natpisija mothovena so o JHVH hine važno ko Izrael hem ki Juda.“ Akava mothovi so i Biblija, kuri e Devleso anav, ko hebrejski JHVH, pojavini pe hiljade putija, tani tačno. But putija ko e manušenge anava garavđa pe e Devleso anav.

O izraz „Jahve Savaot“, kova tano ko bar, značini „o Jehova upro vojske.“ Izgleda so akava mothovi so ko purano vreme na koristinđa pe samo e Devleso anav, već hem o izraz „o Jehova upro vojske.“ Odolese haljola pe sose o izraz „o Jehova upro vojske“, 283 putija pojavini pe ko hebrejsko deo andi Biblija, najviše ko knjige ando prorokija Isaija, Jeremija hem Zaharija.