1. Sar upro jekh terno ćhavo utičinđa o govor kova hine ko kongres 1935. berš?

JEKH terno ćhavo hine le 18 berš ked krstinđa pe ko 1926. berš. Olese roditeljija hine Istraživačija andi Biblija, sar tegani hine penđarde e Jehovase svedokija. On hine len trin murša hem duj ćhaja. Trudinđe pe te sikaven len te služinen e Jehovase hem te oponašinen e Isuse Hriste. Sar sa avera Istraživačija andi Biblija, hem akava iskreno terno ćhavo svako berš lela hine o maro hem o vino ked hine e Gospodesi večera. Ama, olesi nada asi budućnost menjinđa pe ked šunđa jekh but važno govor kova vićinđa pe „Veliko mnoštvo.“ Akava govor ićerđa o phral Raterford 1935. berš ko kongres, ko Vašington, ki Amerika. So o Istraživačija andi Biblija haljilje ko odova kongres?

2. Kova važno ćaćipe o phral Raterford objasninđa ko po govor?

² Ko po govor, o phral Raterford objasninđa koj tano o „baro mnoštvo“ kova spomini pe ko Otkrivenje 7:9. Ði tegani, o Istraživačija andi Biblija mislinđe so o baro mnoštvo tani jekh grupa ando manuša kola ka đan ko nebo, ama kola na hine odobor verna sar o pomazanikija. O phral Raterford koristinđa e Devleso Lafi te objasnini so o manuša kotar baro mnoštvo nane birime te đan ko nebo, već soj tane e Hristese avera bakre * kola ka preživinen i „bari nevolja“  hem so ka živinen večno ki phuv (Otkr. 7:14). O Isus obećinđa: „Isi man hem avera bakre, kola nane kotar akava tor. Valjani hem olen te anav hem on ka šunen mo glaso, hem on ka oven jekh stado jekhe pastireja“ (Jov. 10:16). Akala „avera bakre“ tane e Jehovase verna svedokija kola isi len nada so ka živinen večno ko raj ki phuv (Mat. 25:31-33, 46). Akana ka dikha sar odova nevo razumevanje utičinđa upro but e Jehovase svedokija, sar so utičinđa hem upro terno phral kole pominđam upre (Ps. 97:11; Posl. 4:18).

3-4. So haljilje hiljade phralja ko kongres kova hine ićerdo ko 1935. berš hem sose?

³ Uzbudljivo trenutko ko odova kongres hine ked o govorniko phenđa e publikaće: „Molinava te ušten sa okola kola isi len nada so večno ka živinen ki phuv.“ Jekh phral kova hine ko odova kongres phenđa so pobuter kotar ekvaš uštilje. Tegani, o phral Raterford phenđa: „Dikhen! O baro mnoštvo!“ Palo odova hine jekh baro aplauz. Okola kola uštilje haljilje so nane birime te živinen ko nebo. On jasno haljilje so na hine pomazime e Devlese sveto duhoja. Tajsato dive, ko kongres krstinđe pe 840 đene. But olendar hine avera bakre.

⁴ Palo odova govor, odova terno ćhavo kolestar vaćerđam angleder hem hiljade avera ćhinavđe te len o maro hem o vino ki e Gospodesi večera. But đene osetinđe pe sar jekh ponizno phral kova phenđa: „Poslednjo puti leljum o maro hem o vino ki Spomen-svečanost ko 1935. berš. Haljiljum so o Jehova na koristinđa po sveti duh te del man nada te živinav ko nebo. Umesto odova, hine man nada so ka živinav ki phuv hem so ka pomožinav ko odova i phuv palem te ovel raj“ (Rimlj. 8:16, 17; 2. Kor. 1:21, 22). Kotar tegani, o broj ando baro mnoštvo but barilo. On hem o pomazanikija kola aćhilje ki phuv služinena e Jehovase piko pikeja.

5. Sar o Jehova dikhela upro okola kola ćhinavđe te len o maro hem o vino ki Spomen-svečanost?

⁵ Sar o Jehova dikhlja upro okola kola palo 1935. berš, ćhinavđe te len o simbolija ki Spomen-svečanost? So ako avdije neko ando e Jehovase svedokija lela o maro hem o vino ki Spomen-svečanost, ama kasnije haljola so nane pomazimo sveto duhoja? (1. Kor. 11:28). Disave lelje o simbolija sose na haljilje koja nada isi len. Ama, ako iskreno priznajinena pi greška, ćhinavena te len o maro hem o vino hem nastavinena verno te služinen e Jehovase, ov sigurno ka prihvatini len sar deo ando avera bakre. Iako na lena više o maro hem o vino, on pana prisustvujinena ki Spomen-svečanost sose tane but zahvalna aso odova so o Jehova hem o Isus ćerđe olenđe.

6. So o Isus zapovedinđa e anđelenđe te ćeren?

⁶ Sebepi so i bari nevolja samo so na alji, ovela bi šukar te dikha so ko 7. šero ko Otkrivenje pana pisini kotar o pomazanikija hem kotar o baro mnoštvo ando avera bakre. Odothe pisini so Isus zapovedinđa e anđelenđe te ićeren o štar bavlala kotar uništenje. On na valjani te dozvolinen akala bavlala te phuden ki phuv đi sa o pomazana hrišćanija na ovena zapečatime, so značini so o Jehova potvrdini soj tane verna (Otkr. 7:1-4). Sar nagrada sose hine verna, e Hristese pomazana phralja ka oven kraljija hem  sveštenikija oleja ko nebo (Otkr. 20:6). Sa okola kola tane deo andi e Devlesi nebesko porodica jedva ađićerena te dikhen sar o 144 000 pomazanikija dobinena pi nebesko nagrada.

7. Premalo Otkrivenje 7:9, 10, kas o Jovan dikhela ki vizija hem so on ćerena? (Dikh i slika ki naslovno strana.)

⁷ Palo odova so vaćerđa ando 144 000 kraljija hem sveštenikija, o Jovan dikhela diso but uzbudljivo, o „baro mnoštvo“ kova preživinđa o Armagedon. I prvo hem i dujto grupa razlikujinena pe, odolese so i dujto grupa tani but pobari hem ki odija grupa nane odredimo kobor manuša ka oven. (Čitin Otkrivenje 7:9, 10.) On tane „uravde ko parne fistanja“ so mothovi so arakhlje pe ando „melalipe“ kotar e Bengeso sveto hem aćhilje verna e Devlese hem e Hristese (Jak. 1:27). On ko sa o glaso vaćerena so on tane spasime sebepi odova so ćerđe o Jehova hem o Isus, e Devleso Bakro. Celo vreme ko vasta ićerena e palmake grane, so mothovi so radosno prihvatinena e Isuse sar e Kralje, kas o Jehova pomazinđa (Uporedin e stihonencar ando Jovan 12:12, 13).

8. So o Otkrivenje 7:11, 12 vaćeri amenđe andi e Jehovasi nebesko porodica?

⁸ Čitin Otkrivenje 7:11, 12. Sar ka osetinen pe okola kola tane ko nebo ked ka dikhen o baro mnoštvo? O Jovan dikhela so sare ko nebo radujinena pe hem hvalinena e Devle ked dikhena o baro mnoštvo. E Jehovasi nebesko porodica ka ovel but bahtali ked ka dikhel sar ispunini pe akija vizija – sar o baro mnoštvo avela andi bari nevolja.

9. Premalo Otkrivenje 7:13-15, so o baro mnoštvo ćerela akana?

⁹ Čitin Otkrivenje 7:13-15. O Jovan pisini so okola kola tane deo ando baro mnoštvo „thovđe pe bare fistanja hem parnjaćerđe len ko e Bakreso rat.“ Odova značini so on isi len čisto savest hem so o Jehova dikhela upro lende sar pravedna (Is. 1:18). On tane predajime hem krstime hrišćanija, kola isi len zorali vera ki e Isusesi žrtva hem kola isi len šukar odnos e Jehovaja (Jov. 3:36; 1. Petr. 3:21). Sebepi odova on šaj te terđon anglo e Devleso presto hem „služinena lese dive hem rat“ akate ki phuv. On tane revna hem dena sa pestar te propovedinen ando Kraljevstvo hem te ćeren učenikonen sose e Devleso Kraljevstvo tano olenđe považno ando sa aver (Mat. 6:33; 24:14; 28:19, 20).

10. Ko so tano o baro mnoštvo uverimo hem kova obećanje ka dikhen sar ispunini pe?

¹⁰ O baro mnoštvo kova avela andi bari nevolja tano uverimo so o Devel hem ponodri ka brinini pe olendar sose isi len e Devleso obećanje kova phenela: „Okova kova bešela ko presto ka phravel poklo šatori upro olende.“ Konačno ka ispunini pe o obećanje kova o avera bakre but vreme ađićerena te ovel: „[O Devel] ka kosel svako asvi kotar olenge jaćha hem na ka ovel više meribe, ni muke, ni rojbe, ni dukha“ (Otkr. 21:3, 4).

11-12. (a) Premalo Otkrivenje 7:16, 17, kola blagoslovija ki budućnost ka dobini o baro mnoštvo? (b) So šaj o avera bakre te ćeren ki Spomen-svečanost hem sose?

¹¹ Čitin Otkrivenje 7:16, 17. Trenutno, disave ando e Jehovase svedokija tane bokhale sebepi so i ekonomsko situacija tani phari ja sebepi o građanska nemirija ja o maribe. Avera tane phanle sebepi pi vera. Ama, on tane but bahtale sose đanena so palo odova so ka ovel uništimo akava lošno sveto, on ka ovel len pherdo habe ko fizičko hem duhovno pogledi. Ði o Jehova  ka uništini e Bengeso sveto, o baro mnoštvo ka ovel zaštitimo ando oleso gnev kova e manušenđe ka ovel sar „baro tatipe.“ Palo odova so ka završini pe i bari nevolja, o Isus ka legari okolen kola preživinđe ko „thana kotar avela o [večno] đivdipaso pani.“ Razmislin samo akalestar: O baro mnoštvo isi le jekh posebno nada. Kotar sa o milijarde manuša kola iked živinđe, samo on šaj niked na ka meren! (Jov. 11:26).

¹² O avera bakre isi len but šuži nada sebepi koja tane but zahvalna e Jehovase hem e Isusese! Iako o Jehova na birinđa len te oven ko nebo, ov mangela len isto kobor mangela hem e pomazanikonen. Hem o pomazanikija hem o avera bakre šaj te slavinen e Devle hem e Hriste. Jekh način sar ćerena odova tano ađahar so prisustvujinena ki e Gospodesi večera.

13-14. Sose valjani hem o pomazanikija hem o avera bakre te aven ki Spomen-svečanost?

¹³ Obično, hari đene ando okola kola prisustvujinena ki Spomen-svečanost lena o maro hem o vino. Ko celo sveto, ko but skupštine nane nijekh ando okola kola lena o simbolija. But baro broj ando okola kola prisustvujinena ki Spomen-svečanost isi len nada so ka živinen ki phuv. Ama, sose tegani prisustvujinena ki e Gospodesi večera? Ando isto razlog sebepi kova o manuša prisustvujinena ko pe amalengo venčanje. On mangena te mothoven so mangena hem so podržinena odova bračno par. Isto ađahar, o avera bakre prisustvujinena ki Spomen-svečanost sebepi so mangena hem podržinena e Hriste hem e pomazanikonen. Uzo odova, on prisustvujinena hem sose mangena te mothoven pi zahvalnost asi e Isusesi žrtva, sose sebepi odija žrtva on šaj večno te živinen ki phuv.

¹⁴ Pana jekh važno razlog sose o avera bakre prisustvujinena ki Spomen-svečanost tano sose mangena te ićeren pe ki e Isusesi zapovest. Ked o Isus uspostavinđa i Spomen-svečanost pe verno učenikonencar, ov phenđa lenđe: „Ćeren akava te setinen tumen upro mande“ (1. Kor. 11:23-26). Odolese, o avera bakre ka oven prisutna ki Spomen-svečanost sa đi ki phuv ka oven  pomazanikija. Uzo odova, on vićinena sarinen kola mangena te aven ki Spomen-svečanost.

15. Sar šaj te hvalina e Devle hem e Hriste ki Spomen-svečanost?

¹⁵ Ki Spomen-svečanost, isi amen prilika te slavina e Devle hem e Hriste ked đilabaja hem molinaja amen. O govor kova ka ićeri pe akava berš vićini pe „Ov zahvalno odolese so o Devel hem o Isus ćerđe tuće!“ Odova govor ka pomožini amen te ova pana pozahvalna e Jehovase hem e Hristese. Ði o simbolija ka nakhen kotar vas ko vas, amen šaj te razmislina ando odova so on predstavinena – e Isuseso telo hem oleso rat. Ka razmislina hem ando mangipe kova o Jehova mothovđa ked dozvolinđa oleso Ćhavo te merel te šaj te ovel amen đivdipe (Mat. 20:28). Sare kola mangena amare nebesko Dade hem olese Ćhave ka mangen te prisustvujinen ki Spomen-svečanost.

16. Soj tano zajedničko aso pomazanikija hem aso avera bakre?

¹⁶ I razlika maškaro pomazanikija hem o avera bakre nane ko odova da li tani e Jehovase jekh grupa povredno andi aver. O solduj grupe tane olese jednako vredna. Ko krajo, ov platinđa isto cena, dinđa pe mangle Ćhave, hem aso pomazanikija hem aso avera bakre. I razlika maškaro akala duj grupe tani so isi len različita nade. Ama, o solduj grupe mora te aćhon verna e Devlese hem e Hristese (Ps. 31:23). Ma bistri, e Devleso sveti duh podjednako delujini upro sarinende. Odova značini so o Jehova dela po sveti duh svakonese premalo olese potrebe.

17. So jedva ađićerena o pomazanikija kola aćhilje ki phuv?

¹⁷ Ked bijanđona, o pomazana hrišćanija nane len nada te đan ko nebo. Odija nada valjani o Devel te ćhivel lenđe ko vilo. On razmislinena andi pi nada, vaćerena e Jehovaja odolestar hem jedva ađićerena te dobinen pi nagrada ko nebo. On našti ni te zamislinen sar ka izgledini olengo duhovno telo (Fil. 3:20, 21; 1. Jov. 3:2). Ama, jedva ađićerena te dikhen e Jehova, e Isuse, e anđelen hem avere pomazanikonen hem te oven olencar ko nebesko Kraljevstvo.

18. So o avera bakre jedva ađićerena?

¹⁸ O avera bakre radujinena pe so ka živinen večno ki phuv. Odija želja isi len sa o manuša (Prop. 3:11). Jedva ađićerena o dive ked ka pomožinen ko odova i phuv te ovel raj. But radujinena pe ked ka avel o dive te gradinen pe ćhera, te sadinen  pe bašte, te barjaćeren pe ćhaven hem ked sare ka ovel len savršeno sastipe (Is. 65:21-23). Isto ađahar, jedva ađićerena te putujinen ko but thana ki phuv te dikhen o more, o planine, o šume, hem te istražujinen sa o buća kola o Jehova stvorinđa. Ama soj tano najvažno, on tane bahtale sose đanena so olengo amalipe e Jehovaja ka ovel pana pozoralo hem so pana popaše ka oven oleja.

19. Koja prilika sare isi amen ki Spomen-svečanost hem ked ka ićeri pe akava berš?

¹⁹ Svako e Devleso sluga dobinđa šuži nada asi budućnost ando Jehova (Jer. 29:11). Ki Spomen-svečanost svako amendar isi le bari prilika te slavini e Devle hem e Hriste sebepi odova so on ćerđe te šaj te ovel amen večno đivdipe. I Spomen-svečanost tani najvažno događaj ko kova o prava hrišćanija ćedena pe. Oj ka ićeri pe palo odova so ka perel o kham ki subota 27. mart 2021. berš. But manuša živinena ko thana kuri slobodno šaj te prisustvujinen ko akava važno događaj. Avera ka prisustvujinen iako doživinena protivljenje. Disave ka ićeren i Spomen-svečanost ko phanlipe. Bizo obzir sar ka proslavina i Spomen-svečanost valjani te ićera ki godi so o Jehova, o Isus, o anđelija hem o uskrsnime pomazanikija dikhena amen. Odolese, nek svako skupština, grupa hem svako amendar bahtalipaja proslavini i Spomen-svečanost!