1-2. Sose svako berš đaja ki Spomen-svečanost?

 ANGLEDER skoro 2 000 berš, o Isus dinđa po životi amenđe hem sebepi odova amen šaj te ovel amen večno životi. Ki rat angleder te merel, o Isus phenđa pe učenikonenđe te setinen pe ko oleso meribe (1. Kor. 11:23-26).

² Amen šunaja akija zapovest odolese so but mangaja le (Jov. 14:15). Ko period andi Spomen-svečanost, amen mothovaja so hijam zahvalna e Isusese ađahar so hor razmislinaja ando odova so ov ćerđa hem molinaja amen. Isto ađahar, ko odova period amen đaja pobuter ki služba hem vićinaja e manušen te aven ki odija svečanost. A soj tano najvažno, amen na mukhaja nikase hem nisose te ćhinavi amen te ava ki odija svečanost.

3. Sostar ka vaćera ko akava članko?

³ But putija nane lokho te ićeri pe i Spomen-svečanost. Ko akava članko ka dikha, sar e Jehovaso narodo ipak ćerela odova. Sar (1) on ićerena i Spomen-svečanost ađahar sar so o Isus zapovedinđa, (2) vićinena e manušen te aven hem (3) avena ki Spomen-svečanost iako isi len pharipa.

4. So sikljovaja ki Spomen-svečanost hem sose valjani te ova zahvalna aso odova? (Luka 22:19, 20)

⁴ Svako berš šunaja jekh biblijako govor kova dela amen odgovor ko but pućiba. Na primer, sose e manušenđe valjani i otkupnina hem sar jekh manuš šaj te platini bute manušenge grehija. Isto ađahar, podsetinaja amen so predstavinena o maro hem o vino hem ko šaj te lel odola simbolija. (Čitin Luka 22:19, 20.) Razmislinaja hem andi but šuži budućnost koja ka ovel len okola kola isi len nada so ka živinen ki phuv (Is. 35:5, 6; 65:17, 21-23). Amen hijam zahvalna so đanaja o ćaćipe. But manuša na đanena o ćaćipe hem kobor tani važno e Isusesi žrtva. Isto ađahar, on na setinena pe ko oleso meribe ađahar sar so ov phenđa. Sose tano odova ađahar?

5. Palo odova so o apostolija mulje, sar but manuša počminđe te setinen pe ko Isuseso meribe?

⁵ Palo odova so e Isusese učenikija mulje, ki skupština pojavinđe pe o hovavne hrišćanija (Mat. 13:24-27, 37-39). On vaćerđe „hovavne sikljoviba te šaj te ciden palo peste e učenikonen“ (Dela 20:29, 30). Jekh andi buti koja sikavđe tani so o Isus na dinđa po telo jekhvar zauvek te šaj te akhari o grehija ando but manuša, nego so olesi žrtva valjani te del pe stalno (Jevr. 9:27, 28). Avdije, but manuša verujinena ko akava hovajbe. Na primer, o manuša ko disave crkve svako kurko, podijekh puti čak hem svako dive ćedena pe hem ćerena jekh svečanost. Tegani, on mislinena so o maro hem o vino, ovena e Isuseso doslovno telo hem rat. On verujinena so svako puti ked učestvujinena ki odija svečanost, e Isuseso telo hem rat žrtvujini pe. O manuša ko avera religije na setinena pe odobor često ko Isuseso meribe. But manuša na haljona so tačno značini e Isusesi žrtva. Disave šaj te pućen pe: „Da li me grehija ćaće šaj te oven oprostime sebepi e Isusesi žrtva?“ Sose on odova pućena pe? Odolese so upro lende utičinena o manuša kola phenena so amare grehija našti te oven oprostime sebepi e Isusesi otkupno žrtva. Sar e Isusese učenikija pomožinena averenđe te haljon so značini e Isusesi žrtva?

6. So jekh grupa haljilji ko 1872. berš?

⁶ Ko 1890. berš, jekh grupa, kaj hine hem o Čarls Tejz Rasel, počminđe hor te istražinen i Biblija. On manglje te haljon so ćaće značini e Isusesi žrtva hem sar valjani te setina amen ko oleso meribe. Ko 1872. berš, on haljilje so o Isus dinđa po životi sar otkupnina butenđe. Ama, odova so sikljilje na garavđe samo pese. On odova vaćerđe hem avere manušenđe, prekalo knjige, novine hem časopisija. Ko krajo, on počminđe jekh puti ko berš te ićeren i Spomen-svečanost ađahar sar so ćerđe o hrišćanija ko prvo veko.

7. Sar pomožini amenđe odova so haljilje o Čarls Rasel hem olese saradnikija?

⁷ Odova so haljilje odola hrišćanija hem amenđe avdije pomožini. Sar? Uzi Jehovasi pomoć, amen akana đanaja so značini e Isusesi žrtva hem so ov ka ćerel ki budućnost (1. Jov. 2:1, 2). Isto ađahar, andi Biblija haljiljam so disave manuša isi len nada so ka živinen večno ki phuv, a avera so ka živinen ko nebo. Ked razmislinaja ando odova kobor o  Jehova mangela amen hem sar e Isusesi žrtva pomožini amenđe, amen ovaja sa popaše oleja (1. Petr. 3:18; 1. Jov. 4:9). Isto sar amare phralja kola živinđe angleder, hem amen vićinaja e manušen te aven amencar ki Spomen-svečanost koja ićeri pe ađahar sar so o Isus sikavđa pe učenikonen.

8. So e Devleso narodo ćerđa te šaj te vićini e manušen te aven ki Spomen-svečanost? (Dikh i slika.)

⁸ E Jehovaso narodo već beršencar vićini e manušen te aven ki Spomen-svečanost. Pana ko 1881. berš, o phralja hem o phenja ki Amerika dobinđe jekh obaveštenje so šaj te ćeden pe ko jekhe phraleso ćher ki Alegenija, ki Pensilvanija te ićeren i Spomen-svečanost. Kasnije, svako skupština kokri pese ćerđa odova. Ko mart, 1940. berš, e objaviteljenđe hine phendo so šaj te vićinen hem e manušen kotar po tereni. Ko 1960. berš, o phralja hine len prilika ando Betel te dobinen pozivnice asi Spomen-svečanost. Kotar tegani, o phralja delinđe milijarde pozivnice. Ama, sose e Devleso narodo odobor trudini pe te vićini e manušen te aven ki Spomen-svečanost?

9-10. Kase pomožini odova so vićinaja e manušen te aven ki Spomen-svečanost? (Jovan 3:16)

⁹ Jekh razlog sose vićinaja e manušen te aven ki Spomen-svečanost tano sose mangaja te pomožina len te haljon so o Jehova hem o Isus ćerđe e manušenđe. (Čitin Jovan 3:16.) Nadinaja amen so  odova so ka dikhen hem ka šunen ka pomožini lenđe te sikljon pana pobuter ando Jehova hem so odova ka podstaknini len te služinen lese. Ama, odija svečanost pomožini hem averenđe.

¹⁰ Ki Spomen-svečanost vićinaja hem okolen kola tane neaktivna, sose mangaja te setinćera len so o Jehova pana mangela len. But olendar avena ki Spomen-svečanost hem amen hijam bahtale ked dikhaja len. Odova so alje setinćeri len kobor angleder hine bahtale đi služinđe e Jehovase. Te dikha o primer andi amari phen i Monika b. Ko period andi pandemija, oj palem počminđa te propovedini. Palo odova so hine ki Spomen-svečanost ko 2021. berš, oj phenela: „Akija Spomen-svečanost maje hine but posebno. Prvo puti palo 20 berš, palem počminđum te propovedinav hem te vićinav e manušen te aven ki Spomen-svečanost. Dinđum sa mandar te ćerav odova, sose mangljum te mothovav kobor hijum zahvalno e Jehovase hem e Isusese aso sa odova so ćerđe maje“ (Ps. 103:1-4). Ama, bizo obzir da li o manuša ka aven ja na, amen hem ponodri ka delina o pozivnice hem ka vićina len te aven, sose đanaja so o Jehova cenini amaro trud.

11. Save blagoslovija isi amen odolese so vićinaja e manušen te aven ki Spomen-svečanost? (Agej 2:7)

¹¹ Amen isi amen bare blagoslovija odolese so vićinaja e manušen te aven ki Spomen-svečanost. Na primer, ko 2021. berš, iako hine pandemija, ki Spomen-svečanost alje 21 367 603 manuša. Odova tano duj tekvaš putija pobuter nego so isi e Jehovase svedokija ko celo sveto! Amen đanaja so e Jehovase nane bitna o broja, već o manuša (Luka 15:7; 1. Tim. 2:3, 4). Odolese, šaj te ova sigurna so ked daja o pozivnice, o Jehova pomožini amenđe te arakha e manušen kola isi len šukar vilo. (Čitin Agej 2:7.)

12. Sose tano podijekh puti pharo te ićeri pe i Spomen-svečanost? (Dikh i slika.)

¹² O Isus phenđa so ko poslednja dive ka oven amen bare pharipa, sar soj tane protivljenje, progonstvo, mariba, zarazna nabormipa hem pana diso (Mat. 10:36; Mar. 13:9; Luka 21:10, 11). Disavo puti, sebepi akala buća šaj te ovel amenđe pharo te ićera i Spomen-svečanost. So amare phralja hem phenja ćerđe te šaj te ikljon ko krajo akale problemencar hem sar o Jehova pomožinđa lenđe?

13. Sar o Jehova blagoslovinđa amare phrale kova hine ko phanlipe?

¹³ Phanlipe. Amare phralja kola tane ko phanlipe dena sa pestar te šaj te ićeren i Spomen-svečanost. Te dikha o primer ando amaro phral o Artem. Ko 2020. berš, ko period andi Spomen-svečanost, ov hine ćhivdo ki jekh čelija koja hine la 17 kvadratija. Odothe hine pana panđ manuša oleja. Iako hine ko phanlipe, ov nesar dobinđa o buća asi Spomen-svečanost hem planirinđa te ićeri jekh govor kokri pese. Ama, o manuša kola hine ki odija čelija but pušinđe hem akošlje. Odolese pućlja len da li šaj barem jekh sati te na pušinen hem te na akošen. O Artem but iznenadinđa pe ked phenđe lese so đi trajini o govor, on  na ka ćeren odova. Ov phenela: „Pućljum len da li mangena te đanen diso andi Spomen-svečanost.“ Iako phenđe so na mangena, palo odova ked dikhlje sar o Artem ićeri i Spomen-svečanost, on manglje te đanen diso pobuter odolestar.

14. Sar o phralja ićerđe i Spomen-svečanost ko period andi pandemija?

¹⁴ Period andi pandemija. Sebepi i koronavirus, e Devlese sluge našti hine te ićeren i Spomen-svečanost uživo. Ama, odova na ćhinavđa len te ićeren i Spomen-svečanost. c O skupštine kola hine len internet, ićerđe la prekalo video-poziv. Ama, so hine e manušencar kola na hine len internet? Ko asavke phuvja o phralja kotar podružnica dogovorinđe pe disave manušencar o govor te prenosini pe prekali televizija ja radio. Uzo odova, o phralja ki podružnica sniminđe o govor asi Spomen-svečanost ko prekalo 500 ćhibja. A avera verna phralja dinđe sa pestar odova snimko  te resel đi okola kola na hine len internet.

15. So sikljiljan andi Su?

¹⁵ Protivljenje ki porodica. Disavenđe hine but pharo te ićeren i Spomen-svečanost sose olengi porodica but protivinđa pe lenđe. Te dikha o primer andi jekh romni. Oj vićini pe Su hem proučini i Biblija. Ko 2021. berš, jekh dive angleder i Spomen-svečanost phenđa e phenjaće koja proučini olaja so našti te avel ki Spomen-svečanost sose olaki porodica but protivini pe laće. Odija phen čitinđa laće o lafija ando Luka 22:44 hem phenđa laće so valjani te ćerel odova so o Isus ćerđa, te molini pe e Jehovase hem te mukhel o problemi ko olese vasta. Tajsato dive, i Su pripreminđa o simbolija hem dikhlja o jutarnjo program asi Spomen-svečanost. Odija rat hine kokri ki soba hem šaj hine te pratini i Spomen-svečanost prekalo telefoni. Palo odova, i Su pisinđa e phenjaće: „Erati but ohrabrinđan man. Ćerđum sa so šaj te ovav ki Spomen-svečanost, a o Jehova but pomožinđa man. Našti te phenav tuće kobor hijum zahvalno e Jehovase sebepi sa odova.“ So mislineja, da li o Jehova hem tuće ka pomožini ako ka ove ki asavki situacija?

16. Sose šaj te ova sigurna so o Jehova ka blagoslovini amen ked trudinaja amen te ova ki Spomen-svečanost? (Rimljanima 8:31, 32)

¹⁶ E Jehovase tano but drago ked dikhela so daja sa amendar te ićera i Spomen-svečanost. Šaj te ova sigurna so ov ka blagoslovini amen ako hijam zahvalna aso sa odova so ćerđa amenđe. (Čitin Rimljanima 8:31, 32.) Odolese, hajde sare te ova ki Spomen-svečanost akava berš. Isto ađahar, ko period andi Spomen-svečanost, trudin tut te ćere diso pobuter e Jehovase.