1. So avdije but manuša ćerena?

 ŠAJ primetinđan so avdije but manuša mislinena samo pestar. Na primer, ko društvena mreže šaj te dikha sar disave falinena kokri pes ja odova so ćerena. Ama, samo hari manuša mothovena čast e Devlese, e Jehovase. Ko akava članko ka vaćera so značini te mothova čast e Jehovase hem sose valjani te ćera odova. Isto ađahar, ka dikha sar e Jehovase šaj te mothova čast koja ov zaslužini hem sar pana hari ov ka proslavini po anav.

SO ZNAČINI TE MOTHOVA ČAST E JEHOVASE?

2. Sar o Jehova ki gora Sinaj mothovđa pi moć hem pi slava? (Dikh i slika.)

² I Biblija mothovi so o Jehova tano najbaro Devel, kova zaslužini i slava hem i čast. Nekobor dive palo odova so izbavinđa e Izraelcen ando Egipat, o Jehova ko jekh posebno način mothovđa pi moć. Zamislin akava: Milionija Izraelcija ćedinđe pi ki gora Sinaj te šunen so o Jehova mangela te phenel lenđe. Tegani, jekh gusto oblako ućharđa i gora. Kotar jekhvar svugde hine ćuro. Hine baro zemljotres hem šundilo glasno zvuk ando rog (Izl. 19:16-18; 24:17; Ps. 68:8). Šaj samo te zamislina sar osetinđe pe o Izraelcija đi o Jehova mothovđa pi moć hem pi slava.

3. Sar šaj te mothova čast e Jehovase?

³ Da li o manuša ki phuv šaj te mothoven čast e Jehovase? Ja, šaj. Jekh način tano te vaćera averenđe andi olesi moć hem ando olese šuže osobine. Amen mothovaja čast e Devlese hem ked priznajinaja so sa šaj te ćera  sose ov pomožini amen (Is. 26:12). O kralj David hine šukar primer sose mothovđa čast e Jehovase. Ki molitva koja phenđa anglo Izraelcija, ov vaćerđa e Jehovase: „Tu, Jehova, hijan najbaro hem veličanstveno. Tu isi tut šužipe, slava hem moć, sose tuće pripadini sa soj tano ko nebo hem ki phuv.“ Ked o David završinđa i molitva, „celo narodo hvalinđa e Jehova“ (1. Let. 29:11, 20).

4. Sar o Isus mothovđa čast e Jehovase?

⁴ Ked o Isus hine ki phuv, ov mothovđa čast pe Dadese ađahar so averenđe phenđa so ov dela le moć te ćerel čudija (Mar. 5:18-20). Isto ađahar, o Isus pomožinđa e manušenđe te haljon kobor tano šukar o Jehova ađahar so vaćerđa olestar hem ando odova savo tano premalo avera. Jekh puti đi sikavđa e manušen ki sinagoga, šunđa le jekh romni ani koja hine o demoni 18 berš. Sebepi odova, oj našti hine ni te ispravini pe. O Isus haljilo kobor hine laće pharo hem manglja te pomožini laće. Odolese, mangipaja phenđa laće: „Romnije, oslobodimi hijan ando to nabormipe.“ Palo odova, ćhivđa pe vasta upro late hem oj odmah ispravinđa pe hem počminđa te slavini e Devle. Odija romni hine but zahvalno e Devlese so saćilji (Luka 13:10-13). Ćaće hine la šukar razlog te slavini e Jehova, a hem amen isi amen.

SO PODSTAKNINI AMEN TE MOTHOVA ČAST E JEHOVASE?

5. Kola razlogija isi amen te poštujina e Jehova?

⁵ Amen mothovaja čast e Jehovase sose but poštujinaja le. Isi amen but razlogija te poštujina le. Ov tano svemoćno hem olesi moć nane la krajo (Ps. 96:4-7). Olesi mudrost tani but bari hem šaj te dikha la ko odova so stvorinđa. Dinđa amen životi hem sa odova so valjani amenđe (Otkr. 4:11). Ov tano verno (Otkr. 15:4). Sa so ćerđa tano šukar hem uvek ićeri pe ko pe obećanja (Is. Nav. 23:14). Odolese, o prorok Jeremija olestar phenđa: „Maškaro sa o mudra manuša ando narodija hem ko sa olenge kraljevstvija nane nijekh sar tute“ (Jer. 10:6, 7). Ćaće, isi amen but razlogija te poštujina amare nebesko Dade. Ama, amen na samo so poštujinaja le, već hem but mangaja le.

6. Sose mangaja e Jehova?

⁶ Amen mothovaja čast e Jehovase sose but mangaja le. Razmislin ando nekobor e Jehovase osobine sebepi kola mangaja le. Ov tano milosrdno hem samilosno (Ps. 103:13; Is. 49:15). But tano saosećajno. Ked amen diso dukhala hem ole dukhala (Zah. 2:8). Pristupačno tano sose pomožini amen te ova paše oleja (Ps. 25:14; Dela 17:27). Ov tano ponizno sose „teljari pe te dikhel odova soj tano ko nebo hem ki phuv“ hem „andi prašina e jadno manuše vazdela“ (Ps. 113:6, 7). Sebepi sa akala šuže osobine, amen mangaja te mothova čast amare Devlese (Ps. 86:12).

7. Koja posebno prilika isi amen?

⁷ Amen mothovaja čast e Jehovase sose mangaja o manuša te penđaren le. But manuša na đanena o ćaćipe ando Jehova. Sose? Odolese so o Satana korjaćerđa olengi godi ađahar so širini hovajba olestar (2. Kor. 4:4). Ov ubedinđa e manušen so o Devel osvetini pe lenđe, so na brinini pe olendar hem soj tano odgovorno asi sa i patnja ko sveto.  Ama, amen đanaja o ćaćipe ando amaro Devel. Odolese, isi amen prilika te mothova e manušenđe savo tano amaro Devel hem ađahar te mothova lese čast (Is. 43:10). Ko 96. psalam vaćeri pe ando odova sar šaj te mothova čast e Jehovase. Đi ka razmotrina disave stihija ando odova psalam, razmislin sar šaj te mothova lese čast koja ov zaslužini.

SAR ŠAJ TE MOTHOVA ČAST E JEHOVASE KOJA OV ZASLUŽINI?

8. Kova tano jekh način sar šaj te mothova čast e Jehovase? (Psalam 96:1-3)

⁸ Čitin Psalam 96:1-3. Amen šaj te mothova čast e Jehovase odoleja so vaćeraja olestar. Ko akala stihija, e Jehovase sluge tane podstaknime te đilaben e Jehovase, te hvalinen oleso anav, te vaćeren i šukar vest ando spasenje hem maškaro narodija te vaćeren andi olesi slava. Ked sa akava ćeraja, amen mothovaja čast amare nebesko Dadese. E Jehovase sluge ko purano vreme mothovđe lese čast ađahar so averenđe vaćerđe ando olese šukar osobine hem ando šukar buća kola ov ćerđa lenđe (Dan. 3:16-18; Dela 4:29). Sar šaj amen te ćera odova?

9-10. So sikljovaja andi Anđelina? (Dikh i slika.)

⁹ Te dikha o iskustvo andi amari phen i Anđelina a kotar Amerika. Oj hrabro braninđa e Jehovaso anav ki buti. Ki firma ki koja počminđa te ćerel buti, hine vićimi ko jekh sastanak kuri sa okola so hine neve valjanđe te vaćeren diso pestar. I Anđelina planirinđa te mothovi nekobor slike ko kola dićhola kobor tani bahtali soj tani e Jehovaso svedoko. Ama, angleder te avel olako redo, jekh kolega uštinđa hem phenđa so ov barilo ki porodica ando Jehovase svedokija. Palo odova, počminđa te marel muj aso odova ko so amen verujinaja. Oj phenđa: „Mo vilo počminđa te khuvel. Ano mande mislinđum: ’Da li ka mukhav neko te vaćeri hovajba ando Jehova? Ja ka uštav hem ka phenav savo tano mo Devel?‘ “

¹⁰ Ked olako kolega završinđa, i Anđelina kratko ano peste molinđa pe. Palo odova, ljubazno phenđa lese: „Mi situacija tani slično. Me isto bariljum sar e Jehovaso svedoko hem pana hijum Svedoko.“ Iako i situacija na hine lokhi, oj aćhilji smirimi. Pe kolegenđe mothovđa  o slike kuri pe amalencar radosno služini e Jehovase hem taktično objasninđa ko so verujini (1. Petr. 3:15). So hine sebepi odova? Ked završinđa, odole manušeso vilo kovlilo. Čak pominđa disave šukar iskustvija kola hine le đi družinđa pe e Jehovase svedokonencar. I Anđelina phenela: „O Jehova zaslužini te branina le. Ćaće tani bari čast te vaćera o ćaćipe olestar.“ Amen isto isi amen čast te branina e Jehova ked avera na poštujinena le.

11. Sar e Jehovase sluge mothovđe so uvek ićerđe pe ko načelo kotar Psalam 96:8?

¹¹ Čitin Psalam 96:8. Amen mothovaja čast e Jehovase ađahar so koristinaja amare materijalna buća. E Jehovase sluge uvek mothovđe lese čast ko asavko način (Posl. 3:9). Na primer, o Izraelcija dinđe dobrovoljna prilogija te gradini pe hem te održini pe o hram (2. Kralj. 12:4, 5; 1. Let. 29:3-9). Disave e Isusese učenikija „koristinđe pi imovina“ te šaj ov hem o apostolija te ovel len odova so valjani lenđe (Luka 8:1-3). O hrišćanija ando prvo veko dinđe prilogija aso pe phralja ked hine ko pharipa (Dela 11:27-29). Amen isto šaj te mothova čast e Jehovase ađahar so ka da dobrovoljna prilogija.

12. Sar šaj amare prilogija te anen čast e Jehovase? (Dikh i slika.)

¹² Te dikha jekh iskustvo kova mothovi sar amare prilogija anena čast e Jehovase. Ko 2020. berš ko Zimbabve hine jekh bari suša koja but trajinđa. But manuša harićkase hine ka meren andi bokh. Maškaro lende hine hem amari phen i Priska. Iako ko odova period na hine hić lokho, oj nastavinđa te ćerel odova so đi tegani ćerđa. Svako sreda hem petak đelji ki služba, čak hem đi hine i sezona ked valjanđa te sejini pe. Olake komšije marđe laće muj so đelji ki služba, a na đelji te ćerel buti ko pe njive. On phenđe laće: „Ka mere bokhatar.“ I Priska uvek phenđa lenđe: „O Jehova niked na aćhavđa pe verna slugen.“ Hari palo odova, oj dobinđa humanitarno pomoć ando amare phralja. Amari organizacija šaj hine te pomožini olaće hem avere phralenđe, odolese so amen dinđam dobrovoljna prilogija. Olake komšije hine oduševime hem phenđe laće: „O Devel ćaće  na mukhlja tut, odolese mangaja te sikljova diso pobuter olestar.“ Olake efta komšije počminđe te aven ko sastankija.

13. Premalo Psalam 96:9, so valjani te ćera te šaj te mothova čast e Jehovase?

¹³ Čitin Psalam 96:9. Amen mothovaja čast e Jehovase odoleja sar ponašinaja amen. O sveštenikija kola služinđe ko Jehovaso ćher valjanđe te nanđon hem te oven čista (Izl. 40:30-32). Avdije, amen valjani te ova čista na samo ađahar so ka nanđova, već hem so ka cida amen ando sa odova so o Jehova mrzini (Ps. 24:3, 4; 1. Petr. 1:15, 16). Ki Biblija pisini so valjani te huljava i purani ličnost hem te urava i nevi ličnost. Odova značini so ka da sa amendar te cida amen ando pogrešna razmišljanja hem postupkija kola na sviđinena pe e Jehovase. Amen valjani te razmislina hem te postupina ko način kova ka mothovi so oponašinaja e Jehova hem olese osobine (Kol. 3:9, 10). Uzi Jehovasi pomoć, čak hem okola soj tane but nemoralna hem nasilna šaj te meninen pe hem te uraven i nevi ličnost.

14. So sikljiljan ando Džekeso iskustvo? (Dikh i slika.)

¹⁴ Akana ka razmotrina o iskustvo ando Džek, jekh opasno hem nasilno manuš kaso nadimak hine Demoni. Sebepi o lošna buća kola ćerđa, hine osudimo ko meribe. Ama, đi ađićerđa odova, jekh phral kova alo ko zatvor te propovedini, nudinđa lese te proučini hem ov prihvatinđa. Iako ćerđa but lošna buća, ov huljavđa i purani ličnost hem palo disavo vreme krstinđa pe. Odobor meninđa pe, so ko dive ked valjanđa te ovel mudardo, disave čuvarija runđe ked pozdravinđe pe oleja. Jekh narednik kova ćerđa buti ko zatvor phenđa: „O Džek hine jekh ando najlošno zatvoreniko, ama akana tano jekh ando najšukar.“ Jekh kurko palo oleso meribe, o phralja kola alje te ićeren o sastanak ko zatvor, upoznajinđe jekhe zatvoreniko kova prvo puti alo ko sastanak. So podstakninđa le te avel? Ov hine oduševimo kobor o Džek meninđa pe hem manglja te đanel so valjani te ćerel te šaj te služini e Jehovase. Kotar akava iskustvo dikhaja  so amaro ponašanje šaj te anel slava amare nebesko Dadese (1. Petr. 2:12).

SAR O JEHOVA PANA HARI KA PROSLAVINI PO ANAV?

15. Sar o Jehova pana hari potpuno ka proslavini po anav? (Psalam 96:10-13)

¹⁵ Čitin Psalam 96:10-13. Ko poslednja stihija ando 96. psalam o Jehova tano mothovdo sar pravedno Sudija hem Kralj. Sar o Jehova pana hari ka proslavini po anav? Ađahar so ka anel pravda ki phuv. Ov ka uništini o Baro Vavilon kova lađaćeri oleso sveto anav (Otkr. 17:5, 16; 19:1, 2). Okola kola ka dikhen so o Baro Vavilon tano uništimo, šaj tegani ka počminen te služinen e Jehovase. Ko Armagedon, o Jehova ka uništini e Satanaso sveto hem okolen kola protivinena pe lese hem meljaćerena oleso anav. A ka spasini okolen kola mangena le, šunena le hem anena lese čast (Mar. 8:38; 2. Sol. 1:6-10). Pali završno kušnja ko krajo andi Hristesi hiljadaberšengi vladavina, o Jehova potpuno ka posvetini po anav (Otkr. 20:7-10). Tegani, „i phuv ka ovel pherdi đandipaja andi Jehovasi slava sar soj tano o more pherdo panjeja“ (Avak. 2:14).

16. So hijam odlučna te ćera? (Dikh i slika.)

¹⁶ Kobor samo ka ovel šukar ked svako manuš ki phuv ka slavini e Jehovaso anav! Ama đi odova vreme na avela, amen šaj te koristina svako prilika te slavina amare Devle. Te šaj te pomožini amen te haljova kobor tano odova važno, o Vodeće telo birinđa o Psalam 96:8 te ovel amare beršeso stiho aso 2025. berš, kuri pisini: „Den e Jehovase i čast koja zaslužini sebepi po anav.“