2. ČLANKO PROUČIBASE
ĐILI 132 Akana hijam jekh
Romalen, poštujinen tumare romnjen
Romalen, poštujinen tumare romnjen (1. PETR. 3:7)
SO KA SIKLJOVA?
Ka dikha sar šaj o roma te mothoven so poštujinena pe romnjen odoleja so ćerena hem so vaćerena.
1. Kova tano jekh razlog sose o Jehova ćerđa o brak?
O JEHOVA tano „bahtalo Devel“ hem mangela hem amen te ova bahtale (1. Tim. 1:11). Ov dinđa amen but poklonija te šaj te uživina (Jak. 1:17). Jekh ando odola poklonija tano o brak. Ked duj đene khuvena ko brak, on obećinena so ka mangen hem so ka poštujinen jekh jekhe. Ako trudinena pe te oven paše jekh jekheja, on šaj te oven but bahtale (Posl. 5:18).
2. Sar but roma ponašinena pe premalo pe romnja?
2 Nažalost, avdije but bračna parija bistrena so obećinđe so ka mangen hem so ka poštujinen jekh jekhe. Sebepi odova, nane bahtale. Akana sigende, jekh izveštaj andi svetsko zdravstveno organizacija phenđa so but roma tane nasilna premalo pe romnja, vaćerena lenđe but gruba lafija hem maltretirinena len ko avera načinija. Jekh rom kova ćerela akala buća, šaj anglo avera mothovi poštovanje pe romnjaće, ama ćhere maltretirini la. Isto ađahar, but roma dikhena pornografija. Odolese, o romnja nane bahtale hem osetinena pe so nane mangle.
3. Sose šaj disave roma maltretirinena pe romnjen?
3 Sose disave roma ponašinena pe lošno premalo pe romnja? Šaj olengo dad hine nasilno hem odolese mislinena so odova ponašanje tano normalno. A avera šaj barilje ki kultura ki koja hine normalno o „pravo murš“ te koristini pi snaga te mothovi e romnjaće koj tano gazda. Avera murša, na hine sikavde te kontrolišinen pe emocije, sar soj tani i holi. Disave murša redovno dikhena pornografija hem odolese mislinena so o đuvlja tane odothe samo te šaj te zadovoljinen olenge seksualna želje. Isto ađahar, but stručnjakija phenđe so ki pandemija andi koronavirus, but roma počminđe te maltretirinen pe romnjen. Naravno, sa akala buća nane opravdanje aso odova so o roma ćerena.
4. Ko so o roma kola služinena e Jehovase valjani te pazinen hem sose?
4 O roma kola služinena e Jehovase, valjani te pazinen te na utičini upro lende o pogrešno mišljenje ando đuvlja kova isi ko akava sveto. a Sose? Jekh razlog tano odova so sostar o manuš razmislini odova šaj hem te ćerel. O apostol Pavle e hrišćanenđe ko Rim phenđa: „Ma mukhen hem ponodri te oblikujini tumen akava sveto“ (Rimlj. 12:1, 2). Ked o Pavle pisinđa e hrišćanenđe akala lafija, olengi skupština jekh vreme već postojinđa. Ama, e Pavlese lafija mothovena so disave ki skupština pana mukhlje upro lende te utičinen o običaija hem o razmišljanje ando sveto. Odolese, ov podstakninđa len te meninen po način sar razmislinena hem sar ponašinena pe. Odova savet hem avdije šaj te primeninen o roma kola služinena e Jehovase. Nažalost, disave roma mukhlje upro olengo mišljenje te utičini akava sveto hem čak maltretirinena pe romnjen. b Sar o Jehova očekujini o roma te ponašinen pe premalo pe romnja? O odgovor ko akava pućibe tano ko vodećo stih aso akava članko.
5. Premali 1. Petrova 3:7, sar valjani jekh rom te ponašini pe premali pi romni?
5 Čitin 1. Petrova 3:7. O Jehova zapovedinđa e romenđe te poštujinen pe romnjen. Jekh rom kova poštujini pe romnja, ka ponašini pe šukar premalo late hem ka mothovi laće mangipe. Ko akava članko ka dikha, sar šaj jekh rom te mothovi so poštujini pe romnja. Ama, najangleder ka dikha sar jekh rom mothovi so na poštujini pe romnja.
SAR JEKH ROM MOTHOVI SO NA POŠTUJINI PE ROMNJA?
6. So o Jehova mislini ando roma kola maltretirinena pe romnjen? (Kološanima 3:19)
6 Ked tano nasilno. O Jehova mrzini svakone kova tano nasilno (Ps. 11:5). Ov posebno mrzini ked o roma maltretirinena pe romnjen (Mal. 2:16; čitin Kološanima 3:19). Premalo vodećo stih andi 1. Petrova 3:7, ako o rom na ponašini pe šukar premali pi romni, ov rumini po amalipe e Jehovaja. Sebepi odova, o Jehova šaj čak na ka šunel olese molitve.
7. Premalo Efešanima 4:31, 32, so o roma valjani te ciden pestar? (Dikh o „Objasnime lafija“.)
7 Ked o rom pištini upri pi romni ili uvredini la pe lafencar. Disave roma tane but holjame đi vaćerena pe romnjencar hem povredinena len pe lafencar. Ama, o Jehova „mrzini i holi, o gnev, o pištiba hem o pogrdno govor“. c (Čitin Efešanima 4:31, 32.) Ov šunela sa. E Jehovase tano bitno sar o rom vaćeri pe romnjaja, čak hem ked niko nane uzo lende. Ako jekh rom uvredini pe romnja pe lafencar, odova na ka rumini samo olengo brak nego hem oleso amalipe e Jehovaja (Jak. 1:26).
8. So o Jehova mislini andi pornografija hem sose?
8 Ked dikhela pornografija. O Jehova mrzini i pornografija. Odolese, o rom kova dikhela asavke melale buća rumini po amalipe e Jehovaja hem na mothovi poštovanje pe romnjaće. d O Jehova očekujini ando roma te oven verna pe romnjenđe. Odolese, jekh rom niked na ka ćerel nemoral avera romnjaja, čak ni ki godi na ka avel lese odova. O Isus phenđa so svako ko dikhela jekha đuvlja hem mislini ano peste te ovel olaja, ov već ćerđa preljuba „ko po vilo“ (Mat. 5:28, 29). e
9. Sose o Jehova mrzini ked jekh rom terini pe romnja ked isi len seksualna odnosija te ćerel diso so oj na mangela?
9 Ked ko seksualna odnosija terini pe romnja te ćerel diso so na mangela. Disave roma šaj te terinen pe romnjen ked isi len seksualna odnosija te ćeren disave buća sebepi kola ka osetinen pe ponizime hem iskoristime. O Jehova mrzini asavko sebično ponašanje. Ov očekujini ando roma te mangen pe romnjen, te ponašinen pe šukar premalo lende hem te poštujinen olenge osećanja (Ef. 5:28, 29). So ako jekh e Jehovaso svedoko terini pe romnja te ćerel diso so na mangela ili dikhela pornografija? Sar ov šaj te menini pe?
SAR ŠAJ JEKH ROM TE MENINI PE?
10. Sar šaj e romenđe te pomožini e Isuseso primer?
10 So šaj te pomožini jekhe romese te na maltretirini pe romnja hem te na ponizini la? Ov valjani te trudini pe te oponašini e Isuse. Iako o Isus niked na ženinđa pe, o način sar ponašinđa pe premalo pe učenikija tano šukar primer e romese sar valjani te ponašini pe premali pi romni (Ef. 5:25). Akana ka dikha, sar o Isus ponašinđa pe premalo pe apostolija hem sar vaćerđa olencar.
11. Sar o Isus ponašinđa pe e apostolencar?
11 O Isus uvek hine ljubazno premalo apostolija hem poštujinđa len. Ov niked na hine okrutno premalo lende. Iako hine olengo Gospod hem Učitelj, ov na hine le potreba te dokažini lenđe po autoritet, nego ponizno služinđa lenđe (Jov. 13:12-17). Ov phenđa pe apostolenđe: „Sikljoven mandar, sose me hijum blago hem ponizno ko vilo, hem ka ovel tumen nevi snaga“ (Mat. 11:28-30). O Isus hine blago. I blago osoba nane slabo, oj tani dovoljno jako te šaj te kontrolišini kokri pes. Ked tani provocirimi, oj tani smirimi hem kontrolišini pe emocije.
12. Sar o Isus vaćerđa averencar?
12 O Isus pe lafencar uvek utešinđa hem ohrabrinđa averen. Ked vaćerđa pe učenikonencar niked na hine grubo (Luka 8:47, 48). Čak hem ked olese protivnikija vređinđe le ili pokušinđe te provocirinen le, „ov na irinđa lenđe“ (1. Petr. 2:21-23). Disavo puti, ov birinđa te ćutini umesto te reagujini grubo (Mat. 27:12-14). Savo šužo primer e romenđe kola služinena e Jehovase!
13. So značinena o lafija o rom ka „spojini pe pekle romnjaja“? (Matej 19:4-6; dikh i slika.)
13 O Isus phenđa e romenđe te oven verna pe romnjenđe. Ov citirinđa pe Dade, kova phenđa so o rom valjani te „spojini pe pekle romnjaja“. (Čitin Matej 19:4-6.) O grčko glagol „spojini pe“ kova tano koristimo ko akava stih doslovno značini „te lepini pe“. Odolese, o mangipe maškaro jekh rom hem jekh romni valjani te ovel odobor baro so ka phene on duj tane lepime. Ako jekh olendar povredini avere, o solduj ka patinen. Jekh rom kova but mangela pe romnja, na ka dikhel nijekh oblik andi pornografija. Ov odmah ka cidel pe jaćha ando „buća kola ništa na vredinena“ (Ps. 119:37). U stvari, ov sar o Jov ćerela savez pe jaćhencar te na dikhel požudno nijekha romnja (Jov 31:1).
Jekh verno rom na mangela te dikhel pornografija (Dikh o 13. odlomko) g
14. So valjani jekh rom te ćerel te šaj palem te ovel paše e Jehovaja hem pe romnjaja?
14 Jekh rom kova maltretirini pe romnja hem lafencar povredini la, valjani te ćerel nekobor buća te šaj palem te ovel paše e Jehovaja hem pe romnjaja. So valjani te ćerel? Prvo, ov valjani te haljol so isi le baro problemi. Na valjani te bistrel so o Jehova sa dikhela (Ps. 44:21; Prop. 12:14; Jevr. 4:13). Dujto, valjani te ćhinavi te maltretirini pe romnja hem te menini po ponašanje (Posl. 28:13). Trito, valjani e Jehovase hem pe romnjaće te phenel soj lese žao hem te rodel lendar oproštaj (Dela 3:19). Isto ađahar, valjani te molini e Jehova te del le želja te menini pe hem te pomožini lese te kontrolišini pe mislija, po govor hem pe postupkija (Ps. 51:10-12; 2. Kor. 10:5; Fil. 2:13). Štarto, valjani te postupini premalo pe molitve ađahar so ka sikljol te mrzini svako oblik ando nasilje hem o pogrdno govor (Ps. 97:10). Panđto, valjani odmah te rodel pomoć ando starešine (Jak. 5:14-16). Šovto, valjani te ćerel pese plan kova ka pomožini le te na ćerel palem akala lošna buća. Jekh rom kova dikhela pornografija valjani te ićeri pe ko akala šov buća. O Jehova ka pomožini lese te menini pe (Ps. 37:5). Ama, nane dovoljno samo te ćhinavi te ćerel akala buća kola povredinena olese romnja. Ov valjani te sikljol te mothovi poštovanje pe romnjaće. Sar šaj te ćerel odova?
SAR ŠAJ TE MOTHOVE SO POŠTUJINEJA TE ROMNJA?
15. Sar šaj jekh rom te mothovi so mangela pe romnja?
15 Mothov laće so mangeja la. Disave phralja kola isi len bahtalo brak, isi len navika svako dive te mothoven pe romnjaće kobor mangena la (1. Jov. 3:18). Jekh rom odova šaj te ćerel ko disave tikne buća, sar na primer ađahar so ka dolel la ando vas ja so ka zagrlini la. Ov šaj te bićhali laće jekh poruka hem te phenel laće: „Nedostajineja maje.“ Ili te pućel la: „Sar hijan avdije?“ Podijekh puti, šaj te pisini laće jekh lil hem te phenel laće kobor mangela la. Ked jekh rom ćerela akala buća, ov mothovi so poštujini pe romnja hem tegani zorjaćeri po brak.
16. Sose o rom valjani te pohvalini pe romnja?
16 Mothov laće kobor cenineja la. Jekh rom kova poštujini pe romnja, ov ohrabrini la pe lafencar. Jekh način sar ćerela odova tano so na bistrela te zahvalini pe laće aso sa o šukar buća kola ćerela (Kol. 3:15). Ked o rom pohvalini pe romnja, oj tani bahtali. Tegani osetini pe sigurno, mangli hem cenimi (Posl. 31:28).
17. Sar šaj o rom te mothovi so poštujini pe romnja?
17 Ov šukar hem obzirno. Jekh rom kova mangela pe romnja, ov hem cenini la. Upro late dikhela sar jekh dragoceno poklon ando Jehova (Posl. 18:22; 31:10). Sebepi odova, ov tano šukar hem obzirno premalo late čak ked isi len seksualna odnosija. Na ka terini la te ćerel diso so ka anel đi odova oj te osetini pe neprijatno, ponizimi ili so ka uznemirini olaki savest. f Isto ađahar, ka pazini hem olesi savest te ovel čisto anglo Jehova (Dela 24:16).
18. So o roma valjani te oven odlučna te ćeren? (Dikh o okvir „ Štar načinija ko kola mothoveja so poštujineja te romnja“.)
18 Romalen, oven sigurna o Jehova dikhela hem cenini odova so trudinena tumen te mothoven poštovanje tumare romnjenđe odoleja so ćerena hem so vaćerena. Pazinen te na ćeren diso so ka povredini len, već oven šukar hem obzirna premalo lende. Mothoven so mangena hem so ceninena tumare romnjen. Ako poštujinena len, ka arakhen odova soj tano najvažno – tumaro amalipe e Jehovaja (Ps. 25:14).
ĐILI 131 „O Devel ćerđa len te oven jekh“
a E romenđe šaj te značini ako čitinena o članko „Dikh upro đuvlja sar o Jehova“ ki Stražarsko kula kotar januar 2024. berš.
b E romnjen kolen o rom marela šaj te pomožini ako čitinena o članko „Pomoć žrtvama porodičnog nasilja“ ko serije ando člankija ko deo „Razna teme“ ko amaro sajt hem ki amari aplikacija JW Library®.
c OBJASNIME LAFIJA: „O pogrdno govor“ tano ked vaćereja disave but lošna buća nekase sose mangeja te uvredine le hem te ćere te osetini pe lošno. Odova uključini hem ked stalno vaćereja nekase so na sviđini pe tuće koro leste. Znači, sa so o rom phenela te bi uvredini ili povredini pe romnja tano pogrdno govor.
d Ko amaro sajt ili ki amari aplikacija JW Library dikh o članko „Pornografija razara brak“.
e E romnjaće kaso rom dikhela pornografija šaj te pomožini o članko „So šaj te ćere ako to bračno drug dikhela pornografija?“ ki Stražarsko kula kotar avgust 2023. berš.
f Ki Biblija na pisini soj tano ispravno, a so nane ispravno te ćerel pe ked o rom hem i romni isi len seksualna odnosija. Jekh par valjani te anel odluke kola ka mothoven so mangena te poštujinen e Jehova, te ugodinen jekh jekhese hem te ovel len čisto savest. Jekh par na bi valjani te vaćeri averencar ando akala buća, sose odija tani olengi privatnost.
g SO DIKHEJA KI SLIKA: Jekhe phrale olese kolege kola nane Svedokija terinena te dikhel jekh pornografsko časopis.
