5. ČLANKO PROUČIBASE
ĐILI 108 E Devleso mangipe
Sar pomožini amen e Devleso mangipe?
O Isus Hrist alo ko sveto te spasini e grešnikonen (1. TIM. 1:15)
SO KA SIKJLOVA?
Ka dikha sar pomožini amen i otkupnina hem sar šaj te mothova amari zahvalnost e Jehovase.
1. So šaj te ćera te šaj o Jehova te ovel bahtalo?
ZAMISLIN so nekase kas but mangeja dinđan jekh šužo hem praktično poklon. Kobor bi samo oveja razočarimo ako bi odija osoba ćhivela le ki strana hem niked na bi koristini le. Ki aver strana, sigurno bi ovela tuće drago ked bi dikheja so odija osoba koristini odova poklon hem zahvalno tani sebepi odova. So mangela te phenel amenđe akava primer? O Jehova dinđa pe Ćhave amenđe. Kobor tano samo bahtalo ked amen mothovaja zahvalnost aso oleso mangipe kova podstakninđa le te del i otkupno žrtva (Jov. 3:16; Rimlj. 5:7, 8).
2. Sostar ka vaćera ko akava članko?
2 Sar nakhena o berša, amen šaj te bistra soj tani i otkupnina jekh but posebno poklon. Ama, ako više na hijam zahvalna asi otkupnina odova tano sar ka phene ćhivaja o poklon kova dinđa amen o Jehova negde kaj na dikhaja le hem na razmislinaja olestar. Te na bi odova desini pe, amen mora često te razmislina ando odova so o Jehova hem o Isus ćerđe amenđe. Akava članko ka pomožini amen ko odova. Ka dikha sar i otkupnina pomožini amen akana hem sar šaj te pomožini amen ki budućnost. Isto ađahar, ka dikha sar šaj te mothova so hijam zahvalna aso Jehovaso mangipe, posebno ko period andi Spomen-svečanost.
SAR I OTKUPNINA POMOŽINI AMEN AKANA?
3. Sar i otkupnina akana pomožini amen?
3 E Hristesi otkupno žrtva već akana pomožini amen. Sebepi odija žrtva, o Jehova oprostini amare grehija. Ov nane dužno te ćerel odova, ama mangela. Jekh psalmista kova hine but zahvalno so o Jehova oprostini, phenđa: „Tu, Jehova, hijan šukar hem spremno hijan te oprostine“ (Ps. 86:5; 103:3, 10-13).
4. Kase o Jehova dinđa i otkupnina? (Luka 5:32; 1. Timoteju 1:15)
4 Disave šaj mislinena so na zaslužinena o Jehova te oprostini lenđe. U stvari, tačno tano so amen na zaslužinaja odova. O apostol Pavle haljilo odova hem phenđa: „Na hijum dostojno te ovav vićimo apostol.“ Ama, palo odova phenđa: „Sebepi e Devleso bizaslužimo šukaripe, me hijum apostol“ (1. Kor. 15:9, 10). Ked kajinaja amen aso amare grehija, o Jehova oprostini amenđe. Sose? Na sose zaslužinaja odova, nego sose mangela amen. Ako mislineja so na zaslužineja o Jehova te oprostini tuće, ma bistri so ov dinđa i otkupnina na e savršeno manušenđe, nego e nesavršeno manušenđe kola kajinena pe. (Čitin Luka 5:32; 1. Timoteju 1:15.)
5. Da li o Jehova mora te oprostini amare grehija? Objasnin.
5 Niko amendar na valjani te mislini so o Jehova mora te oprostini lese sose beršencar služini lese. Naravno, o Jehova niked na bistrela sa o šukar buća kola ćerđam lese (Jevr. 6:10). Ama, ov na dinđa e Isuse sar žrtva te platini amenđe odova so ćerđam. Odolese, pogrešno bi ovela te mislina so zaslužinaja e Jehovaso oproštaj odolese so but berša služinaja lese. Ako amen verujinaja ko odova, tegani odova bi značini so mislinaja so amenđe na valjani e Isusesi otkupno žrtva. (Uporedin e stihoja ando Galatima 2:21.)
6. Sose o Pavle dinđa sa pestar ki služba e Jehovase?
6 O Pavle đanđa so bizo obzir kobor buća ćerela ki služba e Jehovase, ov nane dužno te oprostini lese. Sose onda ov odobor trudinđa pe? Na te dokažini so zaslužini o Jehova te oprostini lese nego te mothovi soj tano zahvalno aso Jehovaso bizaslužimo šukaripe (Ef. 3:7). Sar o Pavle hem amen valjani revno te služina e Jehovase, na te bi zaslužinaja e Jehovaso milosrđe, nego te mothova so hijam zahvalna aso odova so ćerela amenđe.
7. Sar i otkupnina pana pomožini amen akana? (Rimljanima 5:1; Jakovljeva 2:23)
7 Pana jekh način sar i otkupnina već akana pomožini amen tano so šaj te ova but paše e Jehovaja. a Sar so vaćerđam ko prethodno članko, ked bijandiljam, amen na hijam le paše e Jehovaja. Ama sebepi i otkupnina, amen hijam „ko mir e Devleja“ hem šaj te ova paše oleja. (Čitin Rimljanima 5:1; Jakovljeva 2:23.)
8. Sose hijam zahvalna e Jehovase so šaj te molina amen olese?
8 I molitva tani jekh but šukar poklon. Odova poklon isi amen odolese so hijam paše e Jehovaja. Ov šunela na samo amare molitve ko sastanak, nego hem ked molinaja amen kokri. I molitva šaj te del amen mir, ama na pomožini amen samo ko odova. Oj šaj te zorjaćeri amaro amalipe e Jehovaja (Ps. 65:2; Jak. 4:8; 1. Jov. 5:14). Đi hine ki phuv, o Isus često molinđa pe e Jehovase odolese so đanđa so ov šunela le hem so i molitva ka pomožini le te ovel pana popaše pe Dadeja (Luka 5:16). Ćaće hijam but zahvalna so sebepi e Isusesi otkupno žrtva, amen šaj te ova e Jehovase amala hem te vaćera oleja ki molitva.
SAR ŠAJ I OTKUPNINA TE POMOŽINI AMEN KI BUDUĆNOST?
9. Sar e Jehovase slugenđe i otkupnina ka pomožini ki budućnost?
9 Sar e Jehovase slugenđe i otkupnina ka pomožini ki budućnost? Ađahar so ka ovel len prilika te živinen večno. But manuša našti te verujinen ko odova sose već beršencar o manuša merena. Ama, e Jehovasi namera ki početka hine o manuša te živinen večno. Ked o Adam na bi grešini, nikase na bi perela ki godi so našti te živini večno. Ama, iako tano akana pharo te zamislina odova, amen šaj te verujina so šaj te živina večno odolese so o Jehova platinđa bari cena – dinđa pe Ćhave (Rimlj. 8:32).
10. So o pomazanikija hem o avera bakre jedva ađićerena?
10 Iako o večno životi ka dobina ki budućnost, o Jehova mangela pana akana te razmislina odolestar. O pomazanikija jedva ađićerena te oven ko nebo te vladinen zajedno e Isuseja upri phuv (Otkr. 20:6). O avera bakre radujinena pe so ka živinen ko raj ki phuv kuri više na ka oven dukha hem muke (Otkr. 21:3, 4). Da li hijan maškaro avera bakre kola nadinena pe so ka živinen ki phuv? Odija nane potikni nagrada ando nebesko životi! U stvari, o Jehova stvorinđa amen te živina ki phuv hem o večno životi ka anel amenđe baro bahtalipe.
11-12. So jedva ađićereja ko raj? (Dikh o slike.)
11 Zamislin savo ka ovel o životi ko raj. Tegani na ka ova naborme niti ka mera (Is. 25:8; 33:24). O Jehova ka ispunini sa amare želje. So bi mangeja te sikljove te ćere ko raj? Da li mangeja te đane pobuter ando životinje? Te bašalje disavo instrumenti ja te crtine? Ko raj ka valjanen amenđe arhitektija, majstorija hem zemljoradnikija. Isto ađahar, ka valjanen amenđe manuša kola ka sadinen hem ka pripreminen i hrana, ka ćeren alatija hem ka brininen pe andi phuv (Is. 35:1; 65:21). Tegani ka ovel tut vreme te sikljove pana but pobuter buća.
12 But ka ova radosna ked ka dikha so ka uskrsninen amare mangle kola mule (Dela 24:15). Isto ađahar, zamislin kobor buća ka sikljove ando Jehova đi ka posmatrine o buća kola stvorinđa (Ps. 104:24; Is. 11:9). Najšukar ando sa tano so ko raj niked na ka grešina hem na ka ovel amen potreba te roda e Jehovastar oproštaj. Da li bi akala blagoslovija zamenineja odoleja „jekh vreme te [uživine] ko greh“? (Jevr. 11:25). Sigurno na! Akala blagoslovija vredinena pobuter andi bilo koja žrtva koja avdije valjani te ćera. Ma bistri, o raj ki phuv na ka ovel diso so uvek ka ađićera. Odova ka ovel than kuri svako dive ka živina. Ništa ando akava na bi ovela moguće ked o Jehova na bi mangela amen odobor so hine spremno čak pe Ćhave te del amenđe.
So jedva ađićereja te ćere ko raj? (Dikh o 11. hem o 12. odlomko)
MOTHOV SO HIJAN ZAHVALNO ASO JEHOVASO MANGIPE
13. Sar šaj te mothova so hijam zahvalna e Jehovase aso oleso mangipe? (2. Korinćanima 6:1)
13 Sar šaj te mothova so hijam zahvalna e Jehovase so dinđa amen i otkupnina? Ađahar so ćhivaja le ko prvo than ko amaro životi (Mat. 6:33). O Isus mulo sarinenđe, „odolese, okola kola živinena više na valjani te ćeren odova so on mangena, već valjani te ćeren odova so mangela okova kova mulo olenđe hem hine uskrsnimo“ (2. Kor. 5:15). O Jehova tano šukar hem oprostini amenđe. Odolese, ked trudinaja amen te služina lese, amen mothovaja so haljovaja kobor šukar buća ćerđa amenđe hem kobor hijam lese zahvalna. (Čitin 2. Korinćanima 6:1.)
14. Sar šaj te mothova so isi amen poverenje ko smernice kola dobinaja ando Jehova?
14 Amen šaj te mothova so mangaja e Jehova ađahar so isi amen poverenje upro leste hem sledinaja olese smernice. Sar šaj te ćera odova? Ked anaja disavi odluka, sar na primer kobor bari škola ka završina ja koja buti ka prihvatina, amen valjani te razmislina so o Jehova mangela te ćera (1. Kor. 10:31; 2. Kor. 5:7). Ako ćeraja odova angleder te ana disavi odluka, tegani amari vera, amaro mangipe hem amari nada ka oven pozorale (Rimlj. 5:3-5; Jak. 2:21, 22).
15. Sar šaj te mothova amari zahvalnost ko period andi Spomen-svečanost?
15 Isi pana jekh način sar šaj te mothova zahvalnost aso Jehovaso mangipe. Odova šaj te ćera ađahar so ko period andi Spomen-svečanost daja sa amendar te mothova e Jehovase kobor hijam lese zahvalna asi otkupnina. Uzo odova so amen ka ava ki odija svečanost, valjani te trudina amen hem averen te vićina (1. Tim. 2:4). Ked ka vićina len, šaj te phena lenđe so ka ćerel pe odothe. Šaj ka pomožini amenđe ako ka mothova lenđe o videa kotar amaro sajt Sose o Isus mulo? hem Setin tut ko Isuseso meribe. O starešine valjani te den sa pestar te vićinen okolen soj tane neaktivna. Šaj samo te zamislina savi radost ka ovel ko nebo hem ki phuv ked jekh ando našalde bakre ka irini pe olese (Luka 15:4-7). Ki Spomen-svečanost valjani te da sa amendar te pozdravina amen sarinencar, posebno okolencar kola tane neve ja kola but vreme na alje ki dvorana. Amen mangaja sare kola ka aven te osetinen pe šukar (Rimlj. 12:13).
16. Sose valjani te trudina amen te ćera diso pobuter ki služba ko period andi Spomen-svečanost?
16 Da li šaj te ćere diso pobuter ki služba ko period andi Spomen-svečanost? Odova tano šukar način te mothove e Jehovase hem e Isusese kobor hijan lenđe zahvalno. So pobuter đaja ki služba, pana pobuter ka dikhe sar o Jehova pomožini tuće hem ka barjol to poverenje upro leste (1. Kor. 3:9). Isto ađahar, trudin tut te ićere tut ko raspored aso čitibe andi Biblija kova tano dindo ki brošurica Svako dive razmotrin e Devleso Lafi ili ki tabela koja šaj te arakhe ki Radno sveska. Palo odova, šaj odola stihija te istražine ko to lično proučavanje.
17. Ked amen ćereja e Jehova te ovel bahtalo? (Dikh o okvir „ Sar šaj te mothove so hijan zahvalno e Jehovase?“)
17 Šaj sebepi te okolnostija našti te ćere sa so pisini ko akava članko. Ma bistri so o Jehova na uporedini odova so tu ćereja hem odova so avera ćerena. Ov dikhela soj tano ko to vilo. But tano bahtalo ked dikhela so hijan but zahvalno aso baro poklon kova dinđa, i otkupnina (1. Sam. 16:7; Mar. 12:41-44).
18. Sose hijam zahvalna e Jehovase hem e Isusese?
18 Sebepi i otkupnina amare grehija šaj te oven oprostime, šaj te ova amala e Jehovaja hem šaj te radujina amen so ka živina večno. Odolese, valjani te ova zahvalna e Jehovase aso oleso mangipe kova podstakninđa le te del amen akala šuže buća (1. Jov. 4:19). Isto ađahar, valjani te mothova so hijam zahvalna e Isusese kova odobor manglja amen so hine spremno te merel amenđe (Jov. 15:13).
ĐILI 154 Mangipe so na ćhinavđola
a O Jehova pe slugenđe ando purano vreme oprostinđa čak angleder i otkupnina te ovel platimi. Odova šaj hine te ćerel sose hine le poverenje so oleso Ćhavo ka aćhol verno đi o krajo. Odolese, anglo Jehovase jaćha i otkupnina hine platimi but vreme angleder o Isus te merel (Rimlj. 3:25).
