4. ČLANKO PROUČIBASE
ĐILI 18 Zahvalna asi otkupnina
So mothovi amenđe i otkupnina?
O Devel mothovđa mangipe (1. JOV. 4:9)
SO KA SIKLJOVA?
Ka dikha so i otkupnina mothovi amenđe ando Jehovase hem e Isusese osobine.
1. Sose tano šukar svako berš te ićera i Spomen-svečanost?
SIGURNO složineja tut odoleja so i otkupnina tani jekh but šukar poklon (2. Kor. 9:15). Odolese so o Isus mulo amenđe, amen šaj te ova e Jehovase amala. Isto ađahar, šaj te ovel amen prilika te živina večno. Isi amen but razlogija te ova zahvalna e Jehovase kova dinđa i otkupnina odolese so but mangela amen (Rimlj. 5:8). Te šaj te aćhova zahvalna hem te na bistra so o Jehova hem o Isus ćerđe amenđe, o Isus zapovedinđa te ićera i Spomen-svečanost (Luka 22:19, 20).
2. Sostar ka vaćera ko akava članko?
2 Akava berš i Spomen-svečanost ka ićeri pe ki subota, ko 12. april ko 2025. berš. Sigurno sare planirinaja te ava ki odija svečanost. Šukar bi ovela ko period andi Spomen-svečanost te arakha vreme hor te razmislina a ando odova so o Jehova hem o Isus ćerđe amenđe. Ko akava članko ka vaćera odolestar so i otkupnina mothovi amenđe ando Jehova hem ando oleso Ćhavo. A ko aver članko ka dikha sar i otkupnina koristini amenđe hem sar šaj te mothova zahvalnost asi odija žrtva.
SO I OTKUPNINA MOTHOVI AMENĐE ANDO JEHOVA?
3. Sar šaj o meribe ando jekh manuš te oslobodini buten ando greh hem ando meribe? (Dikh i slika.)
3 I otkupnina mothovi kobor o Jehova mangela i pravda (Pon. zak. 32:4). Sar odova? Razmislin akalestar: Odolese so o Adam na šunđa e Jehova, amen nasledinđam o greh hem o meribe (Rimlj. 5:12). Te šaj te ova oslobodime, o Jehova bićhalđa pe Ćhave te avel ki phuv te del po životi sar otkupnina. Ama, sar šaj o meribe ando jekh savršeno manuš, te oslobodini bute manušen ando greh hem ando meribe? O apostol Pavle phenđa: „Odolese so jekh manuš na hine poslušno, but manuša ulje grešnikija, ađahar odolese so jekh hine poslušno, but manuša ka oven pravedna“ (Rimlj. 5:19; 1. Tim. 2:6). Avere lafencar, jekh nesavršeno manuš hine neposlušno hem amen nasledinđam o greh hem o meribe. Odolese, te šaj te ova oslobodime, jekh savršeno manuš valjanđa te ovel poslušno e Devlese.
Sar so jekh manuš bikinđa amen ko ropstvo ando greh hem meribe, ađahar jekh manuš spasinđa amen (Dikh o 3. odlomko)
4. Sose o Jehova jednostavno na mukhlja e Adamese ćhave kola hine lese poslušna te živinen večno?
4 Da li o Jehova ćaće morandilo te bićhali e Isuse te merel amenđe? Našti li hine jednostavno te mukhel e Adamese ćhaven kola ka oven lese poslušna te živinen večno? Sar nesavršena manuša šaj mislinaja so odova bi ovela najšukar rešenje. Ama, aso Jehova odova na bi ovela pravedno te ćerel. Sose? Odolese so odova bi ovela samći o Adam niked na grešinđa hem olese ćhave nane nesavršena. Ama, amen đanaja so odova nane ađahar.
5. Sose šaj te ova sigurna so o Jehova uvek ka ćerel odova soj tano pravedno?
5 Isto ađahar, ked o Jehova na bi obezbedini i otkupnina hem ked bi mukhela e Adamese ćhaven te živinen večno iako tane nesavršena, tegani ov na bi ićeri pe ko pe merilija andi pravda. Sebepi odova, o manuša bi verovatno pućena pe da li ov hem ko avera buća ka ićeri pe ko pe merilija. Na primer, disave bi pućena pe, da li ćaće ka ispunini pe obećanja? Ama, amen na valjani te brinina amen aso odova. Sose? Odolese so o Jehova ćerđa odova soj tano pravedno. Čak te šaj te ćerel odova, ov žrtvujinđa pe Ćhave. Odolese, šaj te ova sigurna so o Jehova uvek ka ćerel odova soj tano pravedno.
6. Kova tano pana jekh razlog sose o Jehova bićhalđa pe Ćhave te merel amenđe? (1. Jovanova 4:9, 10)
6 I otkupnina na pomožini amen samo te haljova kobor tano o Jehova pravedno nego hem so but mangela amen (Jov. 3:16; čitin 1. Jovanova 4:9, 10). Ov na bićhalđa pe Ćhave samo te šaj amen te živina večno, već hem te šaj te ova deo andi olesi porodica. Razmislin akalestar: Ked o Adam grešinđa, ov više našti hine te ovel deo andi Jehovasi porodica. Odolese, ni amen ked bijandiljam na hijam le deo andi odija porodica. Ama, sebepi i otkupnina sa o manuša kola mothovena vera ko Jehova hem šunena le, jekh dive šaj te oven deo andi olesi porodica. Čak hem akana o Jehova šaj te oprostini amare grehija hem šaj te ova paše oleja hem amare phralencar. O Jehova ćaće but mangela amen (Rimlj. 5:10, 11).
7. Sar odova so o Isus patinđa pomožini amen te haljova kobor o Jehova mangela amen?
7 Amen šaj pošukar te haljova kobor o Jehova mangela amen ako razmislinaja kobor koštinđa le i otkupnina. O Satana phenđa so ked e Devlese sluge ka ovel len pharipa nijekh na ka aćhol lese verno. Te šaj te mothovi so odova nane tačno, o Jehova mukhlja e Isuse te patini angleder te merel (Jov 2:1-5; 1. Petr. 2:21). O Jehova dikhlja sar o protivnikija marena lese muj, sar o vojnikija marena le hem kovinena le ko stubo. Palo odova, dikhlja sar merela ko bare dukha (Mat. 27:28-31, 39). Ov hine le moć odmah te ćhinavi odova. Na primer, ked o protivnikija phenđe „nek o Devel akana izbavini le ako mangela le“, ov šaj hine odmah te ćerel odova (Mat. 27:42, 43). Ama, ako bi o Jehova ćerela odova i otkupnina na bi ovela platimi hem amen na bi ovela amen nada. Odolese, ov mukhlja e Isuse te patini hem ko krajo te merel.
8. Da li o Jehova osetinđa dukh đi dikhlja sar oleso Ćhavo patini? Objasnin. (Dikh i slika.)
8 Na valjani te mislina so odolese so o Jehova tano svemoćno, nane le osećanja. Amen hijam ćerde premali olesi slika hem isi amen osećanja. Odolese tano logično hem o Jehova te ovel le osećanja. Ki Biblija pisini so ov osetini dukh hem tuga (Ps. 78:40, 41). Razmislin hem ando Avraham hem ando Isak. O Jehova zapovedinđa e Avrahamese te del pe jedino ćhave sar žrtva (Post. 22:9-12; Jevr. 11:17-19). Šaj samo te zamislina sar osetinđa pe o Avraham đi pripreminđa pe te vazdel i ćhurik hem te mudari pe ćhave. Akana zamislin kobor bari dukh o Jehova osetinđa đi dikhlja sar o manuša mučinena olese Ćhave hem ko krajo mudarena le. (Ko amaro sajt jw.org dikh o video Oponašinen olengi vera – Avraham 2. deo.)
O Jehova osetinđa bari dukh ko vilo đi dikhlja sar oleso Ćhavo patini (Dikh o 8. odlomko)
9. So ando Jehovaso mangipe sikljovaja kotar Rimljanima 8:32, 38, 39?
9 I otkupnina mothovi amenđe so niko na mangela amen sar o Jehova, čak ni amari najpaše familija ni amaro najšukar amal. (Čitin Rimljanima 8:32, 38, 39.) Šaj te phena so o Jehova mangela amen hem pobuter amendar. Da li mangeja te živine večno? O Jehova odova mangela pana poviše. Da li mangeja te oven oprostime te grehija? O Jehova jedva ađićeri te ćerel odova. A odova so ov rodela amendar tano te cenina i otkupnina, te mothova vera koro leste hem te ova lese poslušna. I otkupnina tani ćaće baro dokaz so o Jehova mangela amen. A ko nevo sveto ka dikha pana pobuter sar o Jehova ka mothovi amenđe po mangipe (Prop. 3:11).
SO I OTKUPNINA MOTHOVI AMENĐE ANDO ISUS?
10. (a) Sose o Isus hine but uznemirimo angleder te merel? (b) Sar o Isus mothovđa so odova so o Beng phenđa tano hovajbe? (Dikh o okvir „ E Isusesi žrtva mothovđa so o Beng hovavi“.)
10 O Isus but brininđa pe so o manuša ka mislinen ando oleso Dad (Jov. 14:31). Ov but sikirinđa pe so o manuša ka mislinen ando Jehova, sose valjanđa te merel sar neko ko na poštujini e Devle hem sar zločinco. Odolese, phenđa: „Mo Dad, ako šaj, nek nakhel man akija čaša“ (Mat. 26:39). Ama, ov aćhilo verno e Devlese sa đi o krajo hem ađahar mothovđa so sa odova so o Beng vaćerđa ando oleso Dad tano hovajbe.
11. Sar o Isus mothovđa so mangela e manušen? (Jovan 13:1)
11 Isto ađahar, i otkupnina mothovi kobor o Isus brinini pe ando manuša, posebno ando pe učenikija (Posl. 8:31; čitin Jovan 13:1). Na primer, ov đanđa so disave buća ka ovel lese pharo te ćerel, pogotovo odova so valjanđa te merel. Ama, ov ćerđa odova na samo sose o Jehova phenđa lese nego sose manglja e manušen. Ov po mangipe mothovđa ađahar so propovedinđa lenđe, sikavđa len hem pomožinđa lenđe. Čak hem odova dive ked valjanđa te merel, ov odvojinđa vreme te thovel pe apostolenge pre, te sikavi len hem te ohrabrini len (Jov. 13:12-15). Palo odova, đi hine ko stubo, phenđa e zločincose so šaj te živini večno hem arakhlja ko ka brinini pe andi olesi daj (Luka 23:42, 43; Jov. 19:26, 27). O Isus na mothovđa mangipe premalo manuša samo odoleja so mulo nego hem odoleja so hine šukar premalo lende celo vreme đi hine ki phuv.
12. Sar o Isus pana ćerela žrtve sebepi amaro?
12 O Isus mulo jekhvar hem zauvek, ama ov pana ćerela žrtve sebepi amaro (Rimlj. 6:10). Sar odova? Ov hem ponodri dela sa pestar te šaj te koristini amenđe i otkupno žrtva. Razmislin ando odova so akana ćerela. Ov tano amaro Kralj, Prvosveštenik hem poglavari ki skupština (1. Kor. 15:25; Ef. 5:23; Jevr. 2:17). Odgovorno tano aso odova te ćeden pe o pomazanikija hem o baro mnoštvo. Odova zadatko ka trajini sa đi na završini pe i bari nevolja (Mat. 25:32; Mar. 13:27). b Isto ađahar, ko akala poslednja dive brinini pe ando odova olese verna učenikija te ovel len duhovno hrana (Mat. 24:45). A đi ka trajini olesi Hiljadaberšengi vladavina hem ponodri ka del amen odova so valjani amenđe. Odolese, ked o Jehova dinđa pe Ćhave, ov na dinđa le samo te merel amenđe, već hem te ćerel but avera buća.
NIKED MA ĆHINAV TE SIKLJOVE
13. Sar šaj hem ponodri te sikljove ando Jehovaso hem e Isuseso mangipe?
13 Šaj but te sikljove ando Jehovaso hem e Isuseso mangipe ako hem ponodri razmislineja ando odova so on ćerđe. Ko period andi Spomen-svečanost šaj te čitine jekh ja pobuter Jevanđelja. Ma čitin but poglavlja kotar jekh puti. Umesto odova, čitin pohari hem rode pana razlogija sose valjani te mange e Jehova hem e Isuse. Isto ađahar, odova so ka sikljove šaj te vaćere averenđe.
14. Premalo Psalam 119:97, so šaj te pomožini amen te sikljova pobuter andi otkupnina hem avera buća? (Dikh i slika.)
14 Ako već beršencar služineja e Jehovase, šaj pućeja tut da li pana isi diso nevo so šaj te sikljovav andi Devlesi pravda, ando oleso mangipe hem andi otkupnina. Uvek šaj te sikljova neve buća ando akala hem avera teme. Odolese, so šaj te ćere? Čitin hem proučin ando odola teme ko amare publikacije. Ked ka arakhe diso so na haljoveja, istražin odova. Palo odova, razmislin odolestar so proučinđan hem dikh so odova vaćeri tuće ando Jehova, ando oleso Ćhavo hem ando olengo mangipe. (Čitin Psalam 119:97.)
Čak iako beršencar služinaja e Jehovase, amen šaj pana te sikljova neve buća andi otkupnina kola ka pomožinen amen pobuter te ova zahvalna (Dikh o 14. odlomko)
15. Sose hem ponodri valjani te roda biserija andi Biblija?
15 Ma obeshrabrin tut so ked čitineja i Biblija ja istražineja amare publikacije na arakheja uvek diso nevo. Zamislin jekhe manuše kova rodela zlato. Ov but putija satencar ja divencar rodela sa đi na arakhi disavo zlato. Ama, ov na odustajini već strpljivo rodela, sose olese tano dragoceno svako grami ando zlato. Kobor pobuter amen valjani te cenina o biserija kola arakhaja ko Devleso Lafi (Ps. 119:127; Posl. 8:10). Odolese, čitin i Biblija hem nastavin te istražine hem te arakhe neve buća (Ps. 1:2).
16. Sar šaj te oponašine e Jehova hem e Isuse?
16 Đi proučineja, razmislin sar šaj odova te primenine ko to životi. Na primer, oponašin e Jehova ađahar so na ka ćere razlika maškar o manuša. Oponašin e Isuseso mangipe kova mothovđa premalo po Dad hem premalo manuša ađahar so ka ove spremno te ćere odova so o Jehova mangela hem ađahar so ka pomožine averenđe čak ked nane lokho. Isto ađahar, oponašin e Isuse ađahar so ka propovedine e manušenđe te šaj hem on te ovel len prilika te đanen kola šukar buća o Jehova ćerela lenđe hem te mothoven vera ki otkupnina.
17. Sostar ka vaćera ko aver članko?
17 So pobuter haljovaja so značini i otkupnina hem ceninaja la, pana pobuter ka manga e Jehova hem e Isuse. Ked amaro mangipe premalo lende ka barjol, tegani hem on pobuter ka mangen amen (Jov. 14:21; Jak. 4:8). Odolese hem ponodri koristin odova so o Jehova dela amen te šaj pana pobuter te sikljove andi otkupnina. Ko aver članko ka dikha save blagoslovija isi amen sebepi i otkupnina hem sar šaj te mothova so hijam zahvalna aso Jehovaso mangipe.
ĐILI 107 Te mothova mangipe sar o Devel
a OBJASNIME LAFIJA: Hor te razmislina značini te usredsredina amen samo ki jekh tema hem hor te istražina la.
b Te ćedel pe „odova soj tano ko nebo“ sostar o Pavle vaćeri ko Efešanima 1:10, nane isto so hem te ćeden pe o birime sostar o Isus vaćeri ko Matej 24:31 hem ko Marko 13:27. O Pavle vaćeri ando vreme ked o Jehova birini okolen so ka vladinen e Isuseja ađahar so pomazini len pe sveto duhoja. A o Isus vaćeri ando period đi ka trajini i bari nevolja ked o pomazanikija kotar phuv ka oven ćedime ko nebo.
