1-2. Sar e Jehovase lafija ando Isaija 65:16, 17 ohrabrinena amen te na odustajina?

I TEMA ando kongres kova hine ko 2017. berš podstakninđa amen te na odustajina. Ko odova kongres sikljiljam sar šaj te istrajina ko amare problemija. Kotar tegani nakhlje štar berš, ama amen pana istrajinaja ko akava lošno sveto.

² Kola problemija isi tut? Da li našalđan nekas andi ti porodica ja dijekhe šukar amale? Da li hijan nabormo? Da li tano to đivdipe popharo sebepi so akana phuriljan? Da li doživinđan disavi prirodno katastrofa ja progonstvo? Da li neko maltretirini tut? Da li tano tuće pharo sebepi i pandemija kotar koronavirus? Amen jedva ađićeraja te avel o dive ked sa akala problemija ka oven palo amende hem ked ka bistra sa odola lošna buća kola hine. (Čitin Isaija 65:16, 17.)

3. So valjani te ćera hem sose?

³ O životi ko akava sveto tano pharo. Ama, sar đala o vreme, ka ovel pana popharo (Mat. 24:21). Sose tano važno hem ponodri te ova istrajna? Odolese so o Isus phenđa: „Ako ka istrajinen đi o krajo, tumen ka arakhen tumaro đivdipe“ (Luka 21:19). Ked razmislinaja ando odova sar avera istrajinena, odova šaj te del amen snaga te istrajina ko amare problemija.

4. Sose šaj te phena so o Jehova tano najšukar primer andi istrajnost?

⁴ Koj tano najšukar primer andi istrajnost? O Jehova, o Devel. Šaj hijan iznenadimo akaleja. Ama, ako hari razmislineja, ka haljove sose tano odova ađahar. Akale svetoja vladini o Beng hem odolese isi but problemija. O Jehova isi le moć te cidel sa akava lošnipe kova isi ki phuv (Rimlj. 9:22). Ama, o Devel tano istrajno hem ađićeri po vreme te  cidel sa akala lošnipa kotar i phuv. Akana ka dikha enja buća ko kola tano o Jehova istrajno.

5. Sar e Devleso anav meljaćeri pe hem so tu mislineja odolestar?

⁵ Oleso anav tano meljaćerdo. O Jehova mangela po anav hem mangela amen te poštujina oleso anav (Is. 42:8). Već šov hiljade berš odova anav meljaćeri pe (Ps. 74:10, 18, 23). Odova počminđa ko edensko vrt ked o Beng (so značini „klevetnik“) optužinđa e Devle so na mangela te del e Adamese hem e Evaće odova so valjani lenđe te šaj te oven bahtale (Post. 3:1-5). Kotar tegani, o Jehova tano nepravedno optužimo so na mangela te del e manušenđe odova so ćaće valjani lenđe. Ked hine ki phuv, o Isus but brininđa pe sose olese Dadeso anav meljaćeri pe. Sebepi odova, ov sikavđa pe učenikonen te molinen pe ađahar: „Dade amareja, kova hijan ko nebo, nek svetini pe to anav“ (Mat. 6:9).

6. Sose o Jehova mukhlja dovoljno vreme te nakhel?

⁶ O manuša odbacinena e Devle hem na mangena ov te ovel olengo vladari. Jedino o Jehova isi le pravo te vladini upro nebo hem upri phuv hem oleso način sar vladini tano najšukar (Otkr. 4:11). Ama, o Beng pokušinđa te ćhivel e anđelen hem e manušen te mislinen so o Jehova nane le pravo te vladini. Valjanđa te nakhel dovoljno vreme te šaj te mothovi pe so o Jehova isi le pravo te vladini. Odolese soj tano mudro, o Devel dinđa dovoljno vreme e manušenđe te vladinen, te šaj te dikhel pe so on našti te oven uspešna ako na šunena ole (Jer. 10:23). Sebepi soj tano strpljivo, niko na ka šaj te phenel so o Devel nane le pravo te vladini. Sare ka đanen so o Jehova tano najšukar vladari hem so jedino oleso Kraljevstvo ka anel mir hem sigurnost ki phuv.

7. Ko pobuninđa pe protiv o Jehova hem so ov pana hari ka ćerel?

⁷ Disave olese ćhave pobuninđe pe protiv oleste. Ked o Jehova ćerđa e anđelen hem e prvo manušen, e Adame hem e Eva, on hine savršena, bizi mana. Ama, jekh buntovno anđeo, o Satana (so značini „protivnik“) ćhivđa e savršeno manušen, e Adame hem e Eva, te irinen po dumo e Jehovase. Isto ađahar, avera anđelija hem disave manuša pobuninđe pe protiv o Devel (Jud. 6). Kasnije, čak disave Izraelcija, kolen o Jehova birinđa te oven oleso narodo, odbacinđe le hem počminđe te služinen avere devlenđe (Is. 63:8, 10). Sa akava but dukhavđa e Jehova. Ama, ov istrajinđa hem pana ka istrajini sa đi na uništini okolen kola pobuninđe pe protiv oleste. Palo odova, o Jehova hem olese verna sluge ka oven bahtale hem na ka valjani više te trpinen o lošnipe kova isi ko akava sveto.

8-9. Kola hovajba o Beng vaćeri ando Jehova hem so šaj amen te ćera?

⁸ O Beng stalno vaćeri hovajba ando Devel. Ov optužinđa e Jove hem sa e Jehovase verna slugen so služinena e Devlese samo te ovel olenđe šukar (Jov 1:8-11; 2:3-5). Hem avdije, o Beng optužini e Jehovase slugen (Otkr. 12:10). Amen šaj te mothova so o Beng hovavi, ađahar so ka istrajina ko amare problemija hem so ka da sa amendar te aćhova verna e Jehovase, odolese so mangaja le. Sar so blagoslovinđa e Jove, o Jehova ka blagoslovini hem amen ako hijam istrajna (Jak. 5:11).

⁹ O Beng prekalo religiozna vođe sikavi e manušen so o Jehova tano okrutno hem so  olestar avena o patnje. Disave čak phenena so ked jekh ćhavoro merela, o Devel lelja le sebepi so valjani lese pana jekh anđeo ko nebo. Odova ćaće lađaćeri e Devle. Amen đanaja so odova nane ađahar. Ked hijam naborme ja ked merela amendar neko, amen niked na phenaja so odova ćerela o Devel. Umesto odova, amen verujinaja so pana hari o Devel ka saćari sa e nabormen hem so ka vazdel e mulen. Odolese, mangaja te vaćera sa e manušenđe kobor o Devel mangela len. Ađahar daja prilika e Devlese te odgovorini okolese kova marela lese muj (Posl. 27:11).

10. So o lafija ando Psalam 22:23, 24 vaćerena amenđe ando Jehova?

¹⁰ Ked olese sluge patinena. O Jehova tano saosećajno Devel. Ov tano tužno ked dikhela so patinaja sebepi so hijam progonime, naborme ja sebepi amare mane. (Čitin Psalam 22:23, 24.) Ov mangela te ćhinavi amari dukh hem ka ćerel odova. (Uporedin e stihonencar ando Izlazak 3:7, 8; Isaija 63:9.) Pana hari, ov ka „kosel svako asvi kotar [amare] jaćha hem na ka ovel više meribe, ni muke, ni rojbe, ni dukha“ (Otkr. 21:4).

11. Sar o Jehova osetini pe ked olese verna sluge merena?

¹¹ Ked merena olese amala. Sar o Jehova tegani osetini pe? Ov jedva ađićeri palem te dikhel len (Jov 14:15). Šaj samo te zamisline kobor nedostajini lese oleso amal, o Avraham (Jak. 2:23). Zamislin samo kobor nedostajini lese o Mojsije hem kobor mangela palem te vaćeri oleja (Izl. 33:11). Isto ađahar, ov jedva ađićeri te šunel sar o David hem avera psalmistija đilabena o đilja kolencar hvalinena le (Ps. 104:33). Iako o Jehova našalđa pe amalen, ov na bisterđa  len (Is. 49:15). Ov pana đanela sa olendar. Ki Biblija pisini so „olese tane on sare đivde“ (Luka 20:38). Pana hari, ov ka irini len ko đivdipe hem palem ka šunel len sar molinena pe olese hem ka dikhel sar služinena olese. Ako hem tu našalđan nekas, akava šaj but te ohrabrini tut.

12. Sose tano e Jehovase avdije but pharo?

¹² Ked o lošna manuša dukhavena avere manušen. Ked hine i pobuna ko Eden, o Jehova đanđa so o buća ki phuv ka oven but lošna. Ov mrzini ked dikhela so ki phuv isi lošnipe, nepravda hem nasilje. Ov oduvek brininđa pe ando manuša kola nane zaštitime, sar soj tane o udovice hem o ćhave bizo dad (Zah. 7:9, 10). E Jehovase tano but pharo ked dikhela so olese verna sluge tane progonime ja ked tane ko phanlipe. Ov sigurno so o Jehova mangela sarinen kola tane istrajna sar ov.

13. Kola odvratna buća o Devel dikhela so o manuša ćerena hem so pana hari ka ćerel?

¹³ Ked o manuša nemoralno živinena. Iako o manuša hine stvorime te oponašinen e Devle, o Beng mangela te rumini len. Ked ko e Nojese dive o Jehova „dikhlja so o manuša ki phuv hine but rumime... olese hine žao so stvorinđa e manušen ki phuv hem osetinđa dukh ko vilo“ (Post. 6:5, 6, fusn., 11). Da li o manuša tane avdije averćhane? Na! O Beng tano bahtalo ked dikhela so o nemoralna buća, maškaro jekh rom hem jekh romni ja maškaro duj murša ja duj đuvlja, o manuša prihvatinena sar diso normalno (Ef. 4:18, 19). Ov tano but bahtalo ked dikhela so o manuša kola služinena e Devlese ćerena greh. Ama, o Jehova na ka ovel zauvek strpljivo. Pana hari, ov ka uništini okolen kola nemoralno živinena hem na mangena te menjinen pe.

14. So ovela e phuvjaja hem e životinjencar sebepi o manuš?

¹⁴ Ked o manuša uništinena odova so o Devel ćerđa. Ked o manuš vladini, odova na samo so anela lošnipe e manušese, već hem e phuvjaće hem e životinjenđe aso kola o Jehova phenđa te brinini pe (Prop. 8:9; Post. 1:28). O naučnikija phenena so aso nekobor berš pobuter ando milion vrste ando životinje hem biljke više na ka postojinen. Odolese, haljovaja sose tane o manuša zabrinime asi amari planeta. Ama, o Jehova obećinđa so ka „uništinen pe okola so uništinena i phuv“ hem so pana hari i phuv palem ka ovel raj (Otkr. 11:18; Is. 35:1).

15-16. So valjani te podstaknini amen te ova istrajna sar o Jehova? Vaćer jekh primer.

¹⁵ Razmislin ko kola sa problemija o Jehova već beršencar istrajini. (Dikh o okvir „ Ko kola buća o Jehova tano istrajno?“) O Jehova šaj hine pana but berša angleder te cidel o lošnipe. Ama, ov tano strpljivo sebepi amaro šukaripe. Razmislin akalestar: Zamislin so o doktori phenđa jekhe dadese hem jekha dajaće so olengi beba tani but nabormi hem so ka merel sigate palo odova so ka bijanđol. Iako đanena so ka ovel pharo te brininen pe olatar, odola roditeljija zadržinđe e beba hem hine but bahtale ked oj bijandilji. Odolese so mangena la, on ka istrajinen ko sa o pharipa hem ka den sa pestar te ovel la najšukar životi.

¹⁶ Isto ađahar, sa e Adamese hem e Evake ćhave bijandilje sar nesavršena manuša. Ama, o Jehova mangela len hem brinini pe olendar (1. Jov. 4:19). Ando poređenje kova dikhljam, o roditeljija naštinđe te saćaren  pe beba. Ama, o Jehova tano averćhane olendar hem pana hari ka cidel sa pe ćhavenge muke. Ov već odredinđa o dive ked ka cidel sa o lošnipe kova isi ki phuv (Mat. 24:36). Odolese, oleso mangipe valjani te podstaknini amen te istrajina đi o krajo.

17. Premalo Jevrejima 12:2, 3, sar šaj e Isuseso primer hem amen te podstaknini te ova istrajna?

¹⁷ O Jehova tano najšukar primer andi istrajnost. O Isus hine istrajno sar po Dad. Đi hine ki phuv, e Isuse vređinđe, marđe lese muj hem ćhivđe le ko stubo sebepi amaro. (Čitin Jevrejima 12:2, 3.) Odova so o Jehova tano istrajno dinđa e Isusese snaga hem ov te istrajini. E Jehovaso primer šaj hem amenđe te del snaga.

18. Sar o lafija andi 2. Petrova 3:9 pomožinena amen te haljova soj tano šukar so o Jehova tano strpljivo?

¹⁸ Čitin 2. Petrova 3:9. O Jehova đanela ked tano najšukar vreme te cidel sa o lošnipa kola isi ki phuv. Sebepi soj tano strpljivo, but manuša penđarđe le hem služinena lese. Olenđe tano drago so o Jehova tano odobor strpljivo sose hine len prilika te bijanđon, te sikljon olestar hem te predajinen po životi olese. Ked o Jehova ka nagradini sa odole manušen, tegani ka mothovi pe so hine šukar so o Jehova hine strpljivo sa akava vreme.

19. So valjani te ova odlučna te ćera hem koja nagrada ka dobina?

¹⁹ O Jehova sikavi amen sar šaj te ova bahtale đi istrajinaja. Ov aćhilo bahtalo, iako o Beng ćerela pharipa ki phuv (1. Tim. 1:11). Hem amen šaj te aćhova radosna đi strpljivo ađićeraja o Jehova te posvetini po anav, te mothovi so isi le pravo te vladini, te cidel sa o lošnipa hem te ćhinavi sa amare problemija. Nek odova so amaro nebesko Dad tano istrajno, dela tut snaga hem tu te aćhove istrajno đi o krajo. Ako ka ćere ađahar, tegani ka dikhe sar ispuninena pe akala lafija: „Bahtalo tano o manuš kova istrajini ki kušnja, sose ked ka nakhel i kušnja, ka primini i nagrada – o đivdipe kova o Jehova obećinđa okolenđe kola mangena le“ (Jak. 1:12).