30. ČLANKO PROUČIBASE
ĐILI 36 Te arakha amaro vilo
So sikljovaja ando izraelska kraljija?
Palem ka dikhen i razlika maškaro pravedno hem o lošno manuš, maškaro okova kova služini e Devlese hem okova kova na služini lese (MAL. 3:18)
SO KA SIKLJOVA?
Ko akava članko ka sikljova kotar kraljija ando Izrael. Odova ka pomožini amen te đana so valjani te ćera te šaj te ugodina e Devlese.
1-2. So ki Biblija pisini ando disave izraelska kraljija?
KI BIBLIJA pisini so pobuter ando 40 manuša vladinđe sar kraljija ko Izrael. a Isto ađahar, koro late pisini so on ćerđe. Na primer, pisini so disave šukar kraljija ćerđe lošna buća. Te dikha o primer kotar kralj David. O Jehova phenđa: „Mo sluga [. . .] o David hine maje verno celone vileja hem ćerđa samo odova soj tano ispravno anglo me jaćha“ (1. Kralj. 14:8). Ama, odova manuš ćerđa preljuba jekha romnjaja hem naredinđa olako rom te ovel mudardo ko maribe (2. Sam. 11:4, 14, 15).
2 Ki aver strana, ki Biblija pisini ando disave šukar buća kola ćerđe o kraljija kola na hine verna. Te dikha o primer ando Rovoam. Anglo Jehovase jaćha „ov ćerđa odova soj tano lošno“ (2. Let. 12:14). Ama, ov ćerđa hem disave šukar buća. Na primer, šunđa e Jehova ked phenđa lese te na borini pe protiv o izraelska deš plemenija hem te mukhel len te birinen pese kralje. Isto ađahar, ćerđa but dizja te oven zorale te šaj te zaštitini e Devlese narodo ando dušmanija (1. Kralj. 12:21-24; 2. Let. 11:5-12).
3. Kova važno pućibe pojavinđa pe hem sostar ka vaćera ko akava članko?
3 Ama, isi jekh pućibe: „Ako o izraelska kraljija ćerđe hem šukar hem lošna buća, sar o Jehova odlučinđa kova kralj tano verno anglo lese jaćha?“ O odgovor ko odova pućibe ka pomožini amen te haljova so amen valjani te ćera te šaj te ugodina lese. Ka razmotrina trin buća ando kola o Jehova razmislinđa đi odlučinđa da li disavo kralj hine šukar ja lošno. Sar prvo, ka dikha da li odova kralj manglja e Jehova celone vileja. Sar dujto, da li ando vilo kajinđa pe ked ćerđa disavo greh. Sar trito, da li palo odova služinđa e Jehovase ko ispravno način.
MANGLJE E JEHOVA CELONE VILEJA
4. Savi razlika hine maškaro kraljija kola hine verna e Jehovase hem kola na hine?
4 O kraljija kola manglje te ugodinen e Jehovase služinđe lese celone vileja. b Jekh šukar kralj kova vićinđa pe Josafat „celone vileja služinđa e Jehovase“ (2. Let. 22:9). Ki Biblija ando kralj Josija pisini: „Na hine asavko kralj kova irinđa pe e Jehovase hem služinđa lese celone vileja“ (2. Kralj. 23:25). So i Biblija vaćeri ando Solomon kova ko phuripe ćerđa odova soj tano lošno? Ov na služinđa „celone vileja verno e Jehovase“ (1. Kralj. 11:4). A kotar Avijam, jekh aver kralj kova na hine lese verno, pisini: „Oleso vilo na hine potpuno verno e Jehovase“ (1. Kralj. 15:3).
5. Objasnin so značini te služina e Jehovase celone vileja.
5 Tegani, so značini te služina e Jehovase celone vileja? Odova značini so na služinaja lese samo sose đaneja so odova ađahar valjani. Nego služinaja lese sose but mangeja le hem hor poštujineja le, a odova trajini celo životi.
6. Sar šaj amaro vilo te ovel potpuno verno e Jehovase? (Poslovice 4:23; Matej 5:29, 30)
6 Sar šaj te oponašina e kraljen kola manglje e Jehova celone viljeja? Valjani te cida amen ando buća kola šaj te slabonćeren amaro mangipe premalo Jehova. Na primer, valjani te pazina so dikhaja hem so ćereja ko amaro slobodno vreme. Isto ađahar, valjani te pazina kasa družinaja amen hem savo stav isi amen premalo materijalna buća. Ako dikhaja so disavi andi akija buti ćhivela amen te na manga e Jehova celone vileja, valjani odmah te cida amen odolestar sose na mangaja te našala amaro mangipe premalo Jehova. (Čitin Poslovice 4:23 hem Matej 5:29, 30.)
7. Sose valjani te cida amen ando buća kola šaj lošno te utičinen upro amende?
7 Amen na valjani te mukha amaro vilo te ovel podelimo. Ako na pazinaja, šaj te mislina so sa đi hijam zaokupime e duhovno bućencar, o lošna buća našti te utičinen upro amende. Ama, nane ađahar. Aće jekh primer. Zamislin so hijan avri hem but tano šudro. Khuveja andre hem odmah thareja i jag. Ama, so ka ovel ako mukheja o udara phravde? Pa sa o šudro ka khuvel andre. So sikljovaja? Nane dovoljno samo te ćera o buća kola ćerena amen te ova paše e Jehovaja. Sar so ne bi mukhaja phravde o udara te khuvel o šudro, amen na valjani te mukha o lošna buća kola avena ando akava sveto te khuven ko amaro vilo (Ef. 2:2).
KAJINĐE PE ANDO VILO
8-9. Sar reagujinđa o David hem o Jezekija ked dobinđe ukor? (Dikh i slika .)
8 Sar so phenđam ko prvo odlomko, o kralj David ćerđa ozbiljno greh. Ama, ked o prorok Natan phenđa lese sar o Jehova osetini pe, ov ando vilo kajinđa pe (2. Sam. 12:13). Ov na ćerđa pe soj tano olese žao te šaj o Natan te mislini so ov kajini pe hem te na dobini kazna. O lafija kola pisinđa ko 51. psalam mothovena so ov ćaće ando vilo kajinđa pe (Ps. 51:3, 4, 17, uvod).
9 O kralj Jezekija isto grešinđa. Ki Biblija pisini: „Oleso vilo ulo oholo. Odolese o Devel holjanđa upro leste, a hem upri Juda hem upro Jerusalim“ (2. Let. 32:25). Sose o Jezekija ulo ponosno? Šaj odolese so o Jehova dinđa le barvalipe, pomožinđa lese te pobedini e manušen andi Asirija ja šaj odolese so saćarđa le. Šaj o ponos ćhivđa le te mothovi sa po barvalipe e manušenđe ando Vavilon. O prorok Isaija morandilo te phenel lese so o Jehova holjanđa upro leste (2. Kralj. 20:12-18). Ama sar o David, hem o Jezekija ando vilo kajinđa pe (2. Let. 32:26). Sar o Jehova dikhlja upro Jezekija sebepi odova? Sar upro verno kralj kova „ćerđa odova soj tano ispravno“ (2. Kralj. 18:3).
O kralj David hem o kralj Jezekija hine ponizna hem pokajinđe pe aso pe grehija (Dikh o 8. hem o 9. odlomko)
10. Sar o kralj Amasija reagujinđa ked o proroko alo koro leste?
10 O judejsko kralj kova vićinđa pe Amasija ćerđa odova soj tano šukar, „ama na celone vileja“ (2. Let. 25:2). Ko so ov grešinđa? Palo odova so o Jehova pomožinđa lese te pobedini e Edomcen, o Amasija počminđa te služini olenge devlenđe. c Ked e Jehovaso proroko manglja te vaćeri oleja ando odova, ov na manglja ni te šunel le hem uspudinđa le (2. Let. 25:14-16).
11. Premali 2. Korinćanima 7:9, 11, so valjani te ćera te šaj o Jehova te oprostini amenđe? (Dikh o slike.)
11 So sikljovaja ando akala primerija? Valjani te kajina amen aso diso so ćerđam hem te da sa amendar te na ponovina odova. So ako o starešine dena amen savet aso diso so amen mislinaja so nane odobor važno? Amen na valjani te mislina so o Jehova na mangela amen ja so o starešine isi len diso protiv amende. Čak hem e izraelsko kraljenđe kola hine šukar valjanđa savet hem ukor (Jevr. 12:6). Ked dobinaja disavo ozbiljno savet amen valjani (1) te ova ponizna hem te prihvatina le, (2) te menina amen hem (3) te nastavina te služina e Jehovase celone vileja. Ako kajinaja amen, o Jehova ka oprostini amenđe. (Čitin 2. Korinćanima 7:9, 11).
Ked dobinaja savet amen valjani (1) te ova ponizna hem te prihvatina le, (2) te menina amen hem (3) te služina e Jehovase celone vileja (Dikh o 11. odlomko) f
SLUŽINĐE E JEHOVASE KO ISPRAVNO NAČIN
12. Ko so o verna kraljija hine averćhane ando okola so na hine verna?
12 O kraljija kolen o Jehova dikhlja sar verna, služinđe lese ko ispravno način. Isto ađahar, on ohrabrinđe olese narodo te ćerel odova. Naravno, sar so dikhljam, on hine len pe mane. Ama, on služinđe samo e Jehovase hem dinđe sa pestar te uništinen e idolen kola hine ki olengi phuv. d
13. Sose o Jehova upro Ahav dikhlja sar neverno?
13 Sose disave kraljija anglo Jehovase jaćha hine neverna? Sigurno na hine lošno sa odova so ćerđe. Na primer, o lošno kralj o Ahav palo odova so šunđa so o Navutej sebepi oleso hine mudardo, ov ponizinđa pe hem hine lese žao (1. Kralj. 21:27-29). Isto ađahar, gradinđa dizja hem anđa pobede aso Izraelcija (1. Kralj. 20:21, 29; 22:39). Ama, o Ahav ćerđa hem diso so hine but lošno. Sebepi pi romni, ov služinđa e hovavne devlenđe hem ćhivđa e narodo te ćeren odova. Aso akava, niked na kajinđa pe (1. Kralj. 21:25, 26).
14. (a) Sose o Jehova upro Rovoam dikhlja sar neverno? (b) So ćerđe but kraljija kola na hine verna?
14 Te dikha o primer ando jekh aver kralj kova na hine verno – o Rovoam. Sar so vaćerđam ko dujto odlomko, ov ćerđa but šukar buća. Ama, ked ulo moćno, ov ćhinavđa te šunel e Jehovaso zakon hem počminđa te služini e hovavne devlenđe (2. Let. 12:1). Palo odova, podijekh puti služinđa e Jehovase, a podijekh puti e hovavne devlenđe (1. Kralj. 14:21-24). O Rovoam hem o Ahav na hine jedina kraljija kola na služinđe e Jehovase ko ispravno način. But avera kraljija služinđe e hovavne devlenđe hem podstakninđe e Devlese narodo te ćerel odova. Da li o Jehova disave kralje dikhlja sar šukar ja lošno zavisinđa ando odova da li služinđa lese ko ispravno način.
15. Sose e Jehovase hine važno olese narodo te ovel lese verno?
15 Sose e Jehovase hine važno o kraljija te služinen lese ko ispravno način? Odolese so on hine odgovorna te pomožinen e narodose te služini lese ko ispravno način. Isto ađahar, ked o narodo služinđa e hovavne devlenđe odova ćhivđa len te ćeren hem avera ozbiljna grehija hem te oven lošna premalo avera (Os. 4:1, 2). Uzo odova, o kraljija hem i izraelsko nacija hine predajime e Jehovase. Odolese, ki Biblija pisini so ked na hine verna e Jehovase hem služinđe e hovavne devlenđe, on samći ćerđe preljuba (Jer. 3:8, 9). Ked jekh osoba ćerela preljuba, oj but povredini pe rome ja pe romnja. Isto ađahar, i osoba koja na aćhola verno e Jehovase, anela lese bari dukh (Pon. zak. 4:23, 24). e
16. Premalo so o Jehova procenini da li tano neko šukar ja lošno?
16 So šaj te sikljova? Valjani te cida amen ando sa soj tano povezimo e hovavne religijaja. Ama, hem uvek te služina e Jehovase ađahar sar so ov rodela hem te ova zaokupime e duhovno bućencar. O prorok Malahija phenđa premalo so o Jehova procenini da li tano neko šukar ja lošno. Ov pisinđa: „Palem ka dikhen i razlika maškaro pravedno hem o lošno manuš, maškaro okova kova služini e Devlese hem okova kova na služini lese“ (Mal. 3:18). Odolese, valjani te pazina ništa te na ćhinavi amen, čak ni amare mane ja greške, te služina e Jehovase. Najbaro greh kova šaj te ćera tano te ćhinava te služina e Jehovase.
17. Sose valjani te pazina kasa ka khuva ko brak?
17 Ako razmislineja odolestar te khuve ko brak, e Malahijase lafija šaj te pomožinen tut te arakhe tuće šukar rom ja romni. Razmislin ando akava. Jekh osoba šaj te ovel la šukar osobine, ama ako na služini e Jehovase, da li tani oj pravedno anglo Jehovase jaćha? (2. Kor. 6:14). Ako ka khuve ko brak asavke osobaja, da li oj ka pomožini tuće te ove popaše e Jehovaja? E Solomonese romnja šaj hine len disave šukar osobine. Ama, on na služinđe e Jehovase hem sebepi olengo hari pohari o Solomon počminđa te služini e hovavne devlenđe (1. Kralj. 11:1, 4).
18. So valjani o roditeljija te sikaven pe ćhaven?
18 Tumen o roditeljija šaj te koristinen o izveštaija ando kraljija te pomožinen tumare ćhavenđe te ovel len želja te služinen e Jehovase. Pomožinen tumare ćhavenđe te haljon so premali Jehovasi volja hine o kraljija kola služinđe lese hem podstakninđe olese narodo te ćerel odova. Sikaven tumare ćhaven tumare lafencar hem primereja so o duhovna buća tane tumenđe najvažna. A odola buća tane: o čitibe hem o proučibe, o sastankija hem i služba (Mat. 6:33). Ako odova na ćerena, tumare ćhave šaj te mislinen soj tane ki organizacija samo sebepi tumaro. Sebepi odova, on na ka ćhiven e Jehova ko prvo than, čak šaj hem te aćhaven le.
19. Da li neko ko ćhinavđa te služini e Jehovase šaj palem te irini pe olese? (Dikh o okvir „ Tu šaj te irine tut e Jehovase“)
19 Ako neko ćhinavđa te služini e Jehovase, da li odova značini so ov našti palem te ovel e Jehovaso amal? Na, sose odija osoba šaj te kajini pe hem palem te služini e Jehovase. Te šaj te ćerel odova, šaj ka valjani te nakhavi po ponos hem te prihvatini i pomoć ando starešine (Jak. 5:14). Ćaće vredini te trudine tut te ove palem e Jehovaso amal.
20. Sar o Jehova ka dikhel upro amende ako hijam sar o kraljija kola hine verna?
20 So sikljiljam ando izraelska kraljija? Amen šaj te ova sar o kraljija kola hine verna ako celone vileja hijam verna e Jehovase. Sikljov ando te greške, kajin tut hem menin tut. Ma bistri kobor tano važno ko ispravno način te služine e jedino ćaćutne Devlese, e Jehovase. Ako aćhoveja lese verno, ov upro tute ka dikhel sar neko ko ćerela odova soj tano ispravno anglo olese jaćha.
ĐILI 45 O mislija ando mo vilo
a Ko akava članko, o lafija „izraelska kraljija“ odnosinena pe upro sa o kraljija kola vladinđe upro Jehovaso narodo. Bizo obzir da li vladinđe upro duj plemenija ando kraljevstvo kotar Juda, upro deš plemenija kotar kraljevstvo ando Izrael ja upro 12 plemenija.
b OBJASNIME LAFIJA: Ki Biblija but putija koristini pe o lafi „vilo“ te mothovi save manuša hijam andral. Avere lafencar save tane amare želje, mislija, stavija, motivija, sposobnostija hem ciljija kola mangaja te ispunina.
c Ko purano vreme, o kraljija kola na hine Izraelcija hine len običaj te služinen e devlenđe ando narodija kolen pobedinđe.
d O kralj Asa ćerđa ozbiljna grehija (2. Let. 16:7, 10). Ama, ki Biblija pisini so ov ćerđa odova soj tano ispravno anglo Jehovase jaćha. Ked e Jehovaso proroko opomeninđa le, ki početka na šunđa le, ama verovatno kasnije kajinđa pe. O Asa hine le pobuter šukar osobine nego mane. Ov služinđa samo e Jehovase hem trudinđa pe te cidel o idolija kotar po kraljevstvo (1. Kralj. 15:11-13; 2. Let. 14:2-5).
e Ko Mojsijeso zakon o prva duj zapovestija zabraninđe te služini pe avere devlenđe osim e Jehovase (Izl. 20:1-6).
f SO DIKHAJA KO SLIKE: Jekh terno starešina mothovi kobor tano zabrinuto sose jekh phral isi le problemi alkoholeja. Odova phral ponizno prihvatini o savet, ćerela promene koro peste hem nastavini verno te služini e Jehovase.
