Te šaj te ugodina e Jehovase, amen valjani te ovel amen vera. Ama, ki Biblija pisini so „nane len sare vera“ (2. Sol. 3:2). Ked o apostol Pavle phenđa akala lafija, ov mislinđa upro „rumime hem lošna manuša“ kola progoninđe le. Ama, odova so phenđa andi vera šaj te odnosini pe hem ko avera manuša. Disave manuša na mangena te verujinen so postojini Devel kova sa stvorinđa (Rimlj. 1:20). Avera phenena so postojini disavi moćno sila hem verujinena ko odova. Ama, odova nane dovoljno te šaj te ugodinen e Jehovase.

Amen valjani te verujina so o Jehova postojini hem so nagradini okolen kola revno rodena le (Jevr. 11:6). Te šaj te ovel amen asavki vera, amenđe valjani e Devleso sveti duh. Odova duh šaj te dobina ađahar so ka molina amen (Luka 11:9, 10, 13). Pana jekh način sar šaj te dobina e Devleso sveti duh tano te čitina oleso Lafi. Palo odova, šaj hor te razmislina ando odova so čitinđam hem šaj te trudina amen te primenina odova so sikljiljam. Tegani e Jehovaso sveti duh šaj te utičini ko amaro životi hem te pomožini amen te ovel amen vera te šaj te ugodina lese.