1-2. So ćerena o starešine?

 AKO već disavo vreme služineja sar sluga pomoćniko, verovatno trudineja tut te razvijine o osobine kola valjanena tuće te šaj te ove starešina. Da li mangeja pana pobuter te pomožine te phralenđe ađahar so ka služine sar starešina? (1. Tim. 3:1).

² So ćerena o starešine? On predvodinena ki služba, brininena pe ando stado, sikavena e phralen hem e phenjen hem ohrabrinena len pe lafencar hem pe primereja. Odolese, i Biblija phenela soj tane on dinde amenđe „sar dar“ (Ef. 4:8).

3. Sar šaj jekh phral te ovel starešina? (1. Timoteju 3:1-7; Titu 1:5-9)

³ So valjani te ćere te šaj te služine sar starešina? Te šaj te ove starešina nane dovoljno samo te ovel tut disave veštine. Ko sveto, but putija te šaj te khuve ki buti jedino so valjani tano te oven tut veštine. Ama, te šaj ove starešina nane dovoljno samo te ove šukar učitelj hem te đane te propovedine. Valjani te ispunine o uslovija kola pominena pe ki 1. Timoteju 3:1-7 hem Titu 1:5-9. (Čitin.) Ko akava članko ka vaćera ando disave osobine kola pominena pe ko akala stihija. Ka dikha sar šaj jekh phral te ovel le šukar anav, te ovel šukar poglavari hem te ovel spremno te pomožini ki skupština.

 SAR ŠAJ TE OVEL TUT ŠUKAR ANAV?

4. Sar šaj jekh phral te ovel le šukar anav?

⁴ Te šaj te ove starešina valjani te ove manuš „kase nane so te phenel pe“, avere lafencar te ovel tut šukar anav ki skupština. Isto ađahar, valjani te ove „ko šukar glaso hem maškaro manuša avrijal i skupština“. Naravno, o manuša kola na služinena e Jehovase šaj na ka složinen pe odoleja ko so verujineja. Ama, niked na valjani te de len razlog te sumnjinen ko odova so hijan pošteno hem šukar manuš (Dan. 6:4, 5). Odolese, puć tut: „Da li hijum ko šukar glaso maškaro phralja hem maškaro manuša avrijal i skupština?“

5. So značini te mange odova soj tano šukar?

⁵ Ako „[mangeja] odova soj tano šukar“, tu ka dikhe averenge šukar osobine hem ka pohvaline len sebepi odova. Isto ađahar, ka ove bahtalo sose ćereja diso averenđe, čak hem odova so na ađićeri pe tutar (1. Sol. 2:8). Sose tano važno jekh starešina te „mangel odova soj tano šukar“? Odolese so pobaro deo ando po vreme ka valjani te brinini pe andi skupština hem te ispunini pe zadatkija (1. Petr. 5:1-3). Ama, o bahtalipe kova avela ando odova so služini averenđe tano pobaro andi bilo koja žrtva koja ćerela (Dela 20:35).

6. So značini te ove „gostoljubivo“? (Jevrejima 13:2, 16; dikh i slika.)

⁶ Tu mothoveja so hijan „gostoljubivo“ ked ćereja šukar buća averenđe, čak hem okolenđe kolencar na hijan paše (1. Petr. 4:9). Ko jekh biblijako rečniko pisini so jekh gostoljubivo manuš tano šukar čak premalo okola kolen na penđari hem bahtalo tano ked šaj te vićini len koro peste. Puć tut: „Da li hijum penđardo sar neko koj tano ljubazno premalo gostija kola avena ki dvorana?“ (Čitin Jevrejima 13:2, 16.) O manuš kova tano gostoljubivo, ov tano ljubazno premalo sa o gostija. Na primer, premalo okola soj tane ćorore, premalo phralja kola avena te ićeren govorija hem premalo okola kola trudinena pe te ohrabrinen e phralen, sar soj tane o pokrajinska nadglednikija (Post. 18:2-8; Posl. 3:27; Luka 14:13, 14; Dela 16:15; Rimlj. 12:13).

7. Sar jekh starešina mothovi so na mangela but o pare?

⁷ „Na valjani but te mangel o pare“. Odova značini so o pare hem o materijalna  buća nane najvažna ko to životi. Bilo te ove barvalo ja ćororo, o Kraljevstvo valjani te ovel tuće ko prvo than (Mat. 6:33). Koristin to vreme, ti snaga hem te materijalna buća te služine e Jehovase, te brinine tut andi ti porodica hem te pomožine e phralenđe (Mat. 6:24; 1. Jov. 2:15-17). Puć tut: „Kobor tane maje važna o pare? Da li hijum zadovoljno odoleja so isi man? Da li uvek mangava te oven man pobuter pare hem poviše materijalna buća?“ (1. Tim. 6:6, 17-19).

8. So značini te ovel tut „granica ko sa“ hem „samokontrola“?

⁸ Ako isi tut „granica ko sa“ hem „samokontrola“, tegani mothoveja so hijan razumno. Na primer, tu na haja hem na pijeja previše, te šeja hem ti frizura tane skromna hem pazineja savi rekreacija birineja. Na živineja sar o manuša ko akava sveto (Luka 21:34; Jak. 4:4). Ked avera provocirinena tut, tu aćhoveja smirimo. Tu „na maćoveja“ niti hijan ko glaso so but pijeja. Puć tut: „Da li ko mo životi dićhola so isi man granica ko sa hem samokontrola?“

9. So značini te ove „razborito“ hem „organizovano“?

⁹ Ako hijan „razborito“, tu pažljivo procenineja o buća ađahar so koristineja e biblijake načelija. Hor razmislineja ando odola načelija hem odova pomožini tut ispravno te dikhe ki disavi buti hem te ane šukar odluka. Na aneja odluke ki sig nego trudineja tut te oven tut sa o potrebna informacije (Posl. 18:13). Sebepi odova, aneja mudra odluke kola tane pali Jehovasi volja. Ako hijan „organizovano“, tu hijan tačno. Isto ađahar, hijan penđardo sar neko koj tano pouzdano hem sar neko ko uvek sledini o smernice. O osobine kola razmotrinđam ko akava podnaslov, ka pomožinen tut te ove penđardo ko šukar glaso. Akana ka dikha so jekh phral valjani te ćerel te šaj te ovel šukar poglavari.

OV ŠUKAR POGLAVARI

10. Sar jekh phral šaj te ovel „šukar poglavari ko po ćher“?

¹⁰ Ako isi tut porodica hem mangeja te ove starešina, tegani hem te ćherutne valjani te oven šukar primer averenđe. Odolese, tu valjani te ove „šukar poglavari ko [to] ćher“. Odova značini so valjani te brinine tut andi ti porodica hem te ane šukar odluke. Isto ađahar, valjani te ovel tut porodično proučibe, redovno te đa olencar ko sastankija hem te pomožine lenđe te den po najšukar ki služba. Sose tano odova važno? O apostol Pavle phenđa: „Ako neko na đanela sar te predvodini pe porodica, sar ka brinini pe andi Devlesi skupština?“ (1. Tim. 3:5).

11-12. Ako jekh phral mangela te ovel starešina, sose tano važno sar olese ćhave ponašinena pe? (Dikh i slika.)

¹¹ Ako hijan dad hem te ćhave nane punoletna, on „valjani te oven poslušna hem šukar te ponašinen pe“. Tu valjani mangipaja te vaspitine len hem te sikave len. Sar sa avera ćhave, hem te ćhave mangena te asan hem te ćhelen pese. Ama odolese so šukar vaspitineja len, on ka oven poslušna, ka poštujinen averen hem ka ponašinen pe šukar. Isto ađahar, valjani te de sa tutar te pomožine lenđe te oven paše e Jehovaja, te ićeren pe ko načelija hem te napredujinen đi o krštenje.

¹² O starešina valjani te ovel manuš „kase ćhave tane vernikija hem nane ko glaso sar okola kola ćerena lošna buća ili tane buntovna“. Ked o ćhavo ja i ćhaj, kola tane krstime ja napredujinena premalo krštenje, ćerena ozbiljno greh, sar odova šaj te utičini upro olengo dad? Ako o dad na sikavđa pe ćhaven hem na dinđa len  disciplina, ov verovatno našti te služini sar starešina. (Dikh i Stražarsko kula kotar 15. oktobar 1996. berš str. 21, odl. 6-7.)

BRININ TUT ANDO PHRALJA HEM PHENJA

13. Sar šaj te mothove so hijan „razumno“ hem so „na hijan zorale šereso“?

¹³ O phralja kola isi len šuže osobine šaj but te pomožinen ki skupština. Jekh „razumno“ manuš trudini pe te ovel averencar ko mir hem pomožini averenđe te ovel len mir maškaro peste. Ako mangeja te ove penđardo sar razumno manuš, tegani trudin tut pažljivo te šune averen hem ov spremno te prihvatine averengo mišljenje. Na primer, ako nekobor starešine složinena pe jekha odlukaja koja tani premalo biblijake načelija, da li ka podržine odija odluka iako šaj mangljan diso aver? Tu na hijan „zorale šereso“. Odova značini so na insistirineja o buća te ćeren pe ađahar sar so tu pheneja. Cenineja o savetija kola dobineja averendar (Post. 13:8, 9; Posl. 15:22). Isto ađahar, „na valjani te svađine tut“ ili te ove „holjamo“. Umesto te ove grubo, tu hijan ljubazno hem mothoveja poštovanje averenđe. Sar miroljubivo manuš, trudineja tut te ove ko mir averencar, čak hem ko phare situacije (Jak. 3:17, 18). Te ljubazna lafija šaj te smirinen averen, čak hem e protivnikonen (Sud. 8:1-3; Posl. 20:3; 25:15; Mat. 5:23, 24).

14. Sose valjani te nakhel disavo vreme te šaj neko te ovel starešina hem sar šaj te mothovi soj tano verno?

¹⁴ O phral kova „akana sigende ulo verniko“ našti odmah te ovel starešina. Iako na valjani te ove krstimo but berša, tuće valjani vreme te šaj te ove zrelo hrišćanin. Sar o Isus, hem tu valjani te ove ponizno hem spremno te služine e Jehovase ko bilo kova način. Valjani te ove strpljivo hem te ađićere ko Jehova te dobine pobuter odgovornostija ki skupština (Mat. 20:23; Fil. 2:5-8). Isto ađahar, valjani te ove „verno“. Odova značini so ka ove paše e Jehovaja, ka ićere tut ko olese merilija hem ka sledine o uputstvija andi olesi organizacija (1. Tim. 4:15).

15. Da li jekh starešina valjani te ovel najšukar govorniko? Objasnin.

 ¹⁵ Ki Biblija jasno pisini so o nadgledniko valjani te ovel „sposobno te sikavi“. Da li odova značini so valjani te ove najšukar govorniko? Na. Nane sa o starešine najšukar govornikija. Ama, ked đana ki služba ja ked đana ko pastirska posete, o starešine valjani te đanen šukar te koristinen i Biblija te šaj te sikaven hem te ohrabrinen e phralen hem e phenjen. (Uporedin e stihonencar andi 1. Korinćanima 12:28, 29 hem Efešanima 4:11). Iako na valjani te ove najšukar govorniko, ipak valjani te trudine tut te ove pošukar učitelj. Sar šaj te ćere odova?

16. Sar šaj te ove pana pošukar učitelj? (Dikh i slika.)

¹⁶ „Valjani te ićeri pe ko ćaćutne lafija.“ Te šaj te ove pošukar učitelj, ked sikaveja hem ked deja savet te lafija valjani te temeljinen pe ki Biblija. Odolese, trudin tut te proučine i Biblija hem amare publikacije (Posl. 15:28; 16:23). Đi ćereja odova, obratin pažnja sar amare publikacije objasninena disave stihija te šaj te primenine len ko ispravno način. Ked sikaveja, trudin tut te rese đi e manušengo vilo. Te šaj te ove pošukar učitelj, rode savet ando iskusna starešine hem primenin olenge predlogija (1. Tim. 5:17). O starešine valjani te đanen „sar te hrabrinen“ pe phralen hem phenjen. Ama, disavo puti valjani hem te den len savetija ja čak te „ukorinen“ len. Đi ćerena odova, valjani te oven ljubazna. Ako hijan ljubazno hem odova so sikaveja temeljini pe ko Devleso Lafi, tu ka ove pošukar učitelj odolese so oponašineja e najbare Učitelje, e Isuse (Mat. 11:28-30; 2. Tim. 2:24).

DE SA TUTAR HEM PONODRI TE POMOŽINE E PHRALENĐE

17. (a) So šaj te pomožini e slugenđe te ispuninen po cilj? b) So o starešine valjani te oven len ki godi ked proceninena da li neko šaj te ovel starešina? (Dikh o okvir „ Ov razumno ked procenineja averen“.)

¹⁷ Disave sluge pomoćnikija šaj te mislinen so niked našti te oven starešine sose isi  but buća ko kola valjani te ćeren. Ama, ma bistri so ni o Jehova ni olesi organizacija na očekujini savršeno te mothove odola osobine (1. Petr. 2:21). E Jehovaso duho šaj te pomožini tut te razvijine len (Fil. 2:13). Da li isi disavi osobina ki koja mangeja te ove pošukar? Molin tut e Jehovase aso odova. Istražin andi odija osobina hem rode savet ando starešine.

18. So sa o sluge pomoćnikija tane podstaknime te ćeren?

¹⁸ Sare amen, čak hem okola kola već služinena sar starešine, valjani hem ponodri te razvijina o osobine kolendar vaćerđam ko akava članko (Fil. 3:16). Da li hijan sluga pomoćniko? De sa tutar hem ponodri te napredujine. Molin tut e Jehovase te sikavi tut hem te oblikujini tut te šaj pana pošukar te služine lese hem te pomožine e phralenđe (Is. 64:8). Nek o Jehova blagoslovini to trud te šaj te ispunine o uslovija te služine sar starešina.