45. ČLANKO PROUČIBASE
ĐILI 138 O parne bala tane kruna
Sikljov ando poslednja lafija kola phenđe o verna manuša
Nane li mudrost maškaro phure manuša hem i razboritost ko okola so but živinena? (JOV 12:12)
SO KA SIKLJOVA?
Ako šunaja e Jehova, ov obećini amenđe so ka blagoslovini amen akana, a ki budućnost ka del amen večno životi.
1. Sose šaj te sikljova ando phure?
SARINENĐE amenđe valjani savet ked anaja važna odluke. But savetija šaj te dobina kotar starešine ja kotar avera zrela hrišćanija. Ako tane but pophureder amendar, na valjani odmah te mislina so olengo savet našti te pomožini amen. O Jehova mangela te sikljova ando phure. On hine len pobuter vreme amendar te stekninen iskustvo, razboritost hem mudrost (Jov 12:12).
2. Sostar ka vaćera ko akava članko?
2 Ko purano vreme, o Jehova prekalo pe verna phure sluge ohrabrinđa hem vodinđa pe narodo. Na primer, prekalo Mojsije, o David hem o apostol Jovan. On na živinđe ko isto vreme hem olenge okolnostija hine but averćhane. Angleder te meren, on dinđe mudra savetija e ternenđe. Svako olendar phenđa kobor tano važno te šuna e Devle. O Jehova dinđa olenge lafija te oven pisime ki Biblija te šaj te sikljova diso olendar. Bilo te ova terne ja phure, olenge savetija šaj but te pomožinen amen (Rimlj. 15:4; 2. Tim. 3:16). Ko akava članko, ka razmotrina o poslednja lafija kola phenđe akala trin verna phure hem ka dikha so šaj te sikljova olendar.
„KA DEL TUMEN DUGO TE ŽIVINEN“
3. Ko kola načinija o Mojsije služinđa e Jehovase hem olese narodose?
3 O Mojsije dinđa sa pestar te ćerel e Jehovasi volja. Ov hine proroko, sudija, zapovedniko hem pisco. Hine le baro iskustvo ko životi. Izbavinđa e Izraelcen kotar ropstvo ando Egipat hem pe jaćhencar dikhlja but čudija kola ćerđa o Jehova. O Devel koristinđa le te pisini o prva panđ knjige ki Biblija, o 90. hem moguće o 91. psalam. Verovatno pisinđa hem i knjiga Jov.
4. Kas o Mojsije ohrabrinđa hem sose?
4 Hari angleder te merel, ked hine le 120 berš, o Mojsije vićinđa sa e Izraelcen te setinćeri len ko buća kola o Jehova ćerđa lenđe. Disave Izraelcija ked hine terne pe jaćhencar dikhlje but znakija hem čudija kola o Jehova ćerđa hem sar kazninđa e Egipćanen (Izl. 7:3, 4). Dikhlje sar o Jehova odvojinđa o Crveno more hem phirindoj nakhlje le. Palo odova, dikhlje sar uništinđa e faraonese vojska (Izl. 14:29-31). Đi hine ki pustinja, o Jehova brininđa pe olendar hem but putija zaštitinđa len (Pon. zak. 8:3, 4). Akana ked valjanđa lenđe samo pana hari te khuven ki Obećimi phuv, o Mojsije iskoristinđa i poslednjo prilika te ohrabrini e narodo. a
5. Premalo Ponovljeni zakoni 30:19 20, ko so e Izraelcen uverinđe e Mojsijese poslednja lafija?
5 So o Mojsije phenđa? (Čitin Ponovljeni zakoni 30:19, 20.) E Izraelcen ađićerđa but šuži budućnost. Uzo Jehovaso blagoslov, on šaj hine but berša te živinen ki Obećimi phuv. Odija phuv hine but šuži hem anela hine šuže plodija. Aće so o Mojsije phenđa lenđe andi odija phuv: „[Uduri] isi bare hem šuže dizja kola tumen na gradinđen, ćhera pherde razno šuže bućencar aso kola tumen na ćerđen buti, bunarija kola na hanđen, vinogradija hem masline kola na sadinđen“ (Pon. zak. 6:10, 11).
6. Sose o Devel dozvolinđa avera narodija te legaren e Izraelcen ko ropstvo?
6 Ama, o Mojsije upozorinđa e Izraelcen ko diso. Te šaj te živinen ki odija but šuži phuv, on morandilje te šunen e Jehovase zapovestija. O Mojsije podstakninđa len te „birinen o životi“ ađahar so ka šunen e Jehova hem ka oven paše oleja. Ama, o Izraelcija na šunđe le. Odolese, sar đelo o vreme, o Jehova dozvolinđa o Asircija, a kasnije hem o Vaviloncija te legaren len ko ropstvo (2. Kralj. 17:6-8, 13, 14; 2. Let. 36:15-17, 20).
7. So šaj te sikljova ando Mojsijese lafija? (Dikh i slika.)
7 So sikljovaja? Ako ka šuna e Jehova, amen ka živina večno. Sar o Izraelcija, kola hine ko prago te khuven ki Obećimi phuv, hem amen hijam ko prago ando nevo sveto kuri celo phuv ka ovel raj (Is. 35:1; Luka 23:43). O Beng hem olese demonija više na ka oven (Otkr. 20:2, 3). Više na ka ovel i religija koja vaćeri hovajbe ando Jehova (Otkr. 17:16). Niti više o manušikane vladavine ka maltretirinen e narodo (Otkr. 19:19, 20). O Jehova na ka dozvolini nijekh manuš te ćerel bilo savo problemi (Ps. 37:10, 11). Sa o manuša kola ka živinen ko raj ka ićeren pe ko Jehovase zakonija hem odolese ka ovel mir ki phuv. Sare ka mangen jekh jekhe hem ka ovel len poverenje jekh upro jekheste (Is. 11:9). Jedva ađićeraja te avel odova vreme! Isto ađahar, ako ka šuna e Jehova, na ka živina samo nekobor hiljade berš, već zauvek (Ps. 37:29; Jov. 3:16).
Ako ka šuna e Jehova, ka živina ko raj na samo nekobor hiljade berš, već zauvek (Dikh o 7. odlomko)
8. Sar o obećanje ando večno životi pomožinđa jekhe phralese kova beršencar tano misionari? (Judina 20, 21)
8 Ako ki godi ićeraja e Devleso obećanje so ka živina večno, odova ka pomožini amen te šuna e Jehova bizo obzir save kušnje ka oven amen. (Čitin Judina 20, 21.) Odova obećanje šaj te del amen snaga te borina amen protiv amare slabostija. Jekh misionari kova beršencar služini ki Afrika phenđa so but putija hine ki kušnja te ćerel diso so o Jehova na mangela. Ov phenela: „Haljiljum so na ka šaj te živinav ko raj ako na šunava e Jehova. Odova pomožinđa maje te borinav man hem pobuter te molinav man asi snaga. Uzi Jehovasi pomoć, hine man čisto savest hem šaj hine te nastavinav te služinav lese.“
„KA OVE USPEŠNO KO SA“
9. Kola pharipa hine le o David?
9 O David hine but šukar kralj. Isto ađahar, hine hem muzičari, pesniko, ratniko hem proroko. Hine le bare pharipa ko životi. Nekobor berš morandilo te garavi pe ando ljubomorno kralj o Saul kova manglja te mudari le. Palo odova so ulo kralj, ov palem morandilo te garavi pe sose oleso ćhavo o Avesalom manglja te mudari le hem te ovel kralj ko oleso than. Iako hine le sa akala pharipa hem čak ćerđa disave ozbiljna greške, ov ipak aćhilo verno e Devlese sa đi na mulo. O Jehova olestar phenđa soj tano „manuš palo [oleso] vilo“. Odolese, šukar tano te šuna e Davidese mudra savetija (Dela 13:22; 1. Kralj. 15:5).
10. Sose o David dinđa savet e Solomonese angleder te ovel kralj?
10 Razmislin ando savet kova o David dinđa pe ćhavese, e Solomonese kova ulo kralj palo leste. Odole terne ćhave o Jehova birinđa te gradini o hram kuri o manuša šaj hine te služinen lese (1. Let. 22:5). Odija na hine lokhi buti. So phenđa lese o David? Hajde te dikha.
11. Premali 1. Kraljevima 2:2, 3, kova savet o David dinđa e Solomonese hem so hine đi ov šunđa le? (Dikh i slika.)
11 So o David phenđa? (Čitin 1. Kraljevima 2:2, 3.) Ov phenđa pe ćhavese so ako ka šunel e Jehova, ov ka ovel uspešno. Beršencar, o Jehova dinđa e Solomonese but buća hem but pomožinđa lese (1. Let. 29:23-25). Ov ćerđa o hram, pisinđa nekobor biblijake knjige hem olese lafija tane pisime ko avera thana ki Biblija. Hine penđardo premali pi mudrost hem po barvalipe (1. Kralj. 4:34). Ama sar so o David phenđa, o Solomon šaj hine te ovel uspešno samo ako ka šunel e Jehova. Nažalost, ked phurilo, o Solomon počminđa te služini e hovavne devlenđe. Odolese, više na hine le ni e Jehovaso blagoslov ni mudrost koja valjanđa lese te šaj šukar hem pravedno te vladini (1. Kralj. 11:9, 10; 12:4).
E Davidese poslednja lafija kola phenđa pe ćhavese e Solomonese pomožinena amen te haljova so o Jehova ka del amen mudrost te ana šukar odluke ako ka šuna le (Dikh o 11. hem o 12. odlomko) b
12. So šaj te sikljova ando Davidese lafija?
12 So sikljovaja? Ked šunaja e Jehova, ov ka blagoslovini amen hem ka pomožini amen (Ps. 1:1-3). Naravno, ov na obećinđa so ka ova barvale hem penđarde sar o Solomon. Ama, ako ka šuna le, ov ka del amen mudrost te ana šukar odluke (Posl. 2:6, 7; Jak. 1:5). Olese načelija šaj te pomožinen amen ked valjani te ana odluke andi buti, škola, zabava hem pare. Ako ka ićera amen ko odola načelija, amen ka arakha amaro amalipe oleja hem ka ovel amen večno životi (Posl. 2:10, 11). Isto ađahar, šaj te oven amen šukar amala hem amari porodica ka ovel bahtali.
13. So pomožinđa amara phenjaće te ovel la pošukar životi?
13 I Karmen, koja živini ko Mozambik, mislinđa so ako ka završini bari škola olako životi ka ovel but pošukar. Oj đelji ko fakultet hem počminđa te studirini arhitektura. Oj pisinđa: „But mangljum odova so sikljiljum odothe. Ama, odova lelja mandar but vreme hem snaga. Ki škola morandiljum te ovav kotar ekvaš ko ofto sabale đi ko šov raćate. Hine maje pharo te đav ko sastankija hem mo amalipe e Jehovaja na hine sar angleder. Hor ano mande, haljiljum so pokušinava te služinav duje gospodarenđe“ (Mat. 6:24). I Karmen molinđa pe e Jehovase hem proučinđa amare publikacije. Oj phenđa: „Palo odova so dobinđum šukar savet ando zrela phralja hem andi mi daj, odlučinđum te aćhavav o fakultet te šaj punovremeno te služinav e Jehovase. Odija hine najšukar odluka koja anđum hem hijum but bahtali so ćerđum odova.“
14. Koja važno buti istakninđe o Mojsije hem o David?
14 O Mojsije hem o David but manglje e Jehova hem đanđe so hine but važno te šunen le. Ko pe poslednja lafija, on ohrabrinđe e Izraelcen te sledinen olengo primer ađahar so ka aćhon paše e Jehovaja. O solduj phenđe lenđe so ako na ka aćhon verna e Jehovase, on našti te oven olese amala ili te dobinen oleso blagoslov. Olengo savet tano hem amenđe but važno. Beršencar palo lende, pana jekh e Jehovaso sluga mothovđa kobor tano važno te aćhova verna e Devlese.
„NANE POBARO BAHTALIPE“
15. So sa o apostol Jovan nakhlja ko po životi?
15 O Jovan hine paše e Isuseja hem hine oleso apostol (Mat. 10:2; Jov. 19:26). Ov propovedinđa oleja, dikhlja o čudija kola ćerđa hem aćhilo uzo leste ked hine lese najpharo. Hine othe ked kovinđe e Isuse ko stubo hem dikhlja le palo odova so uskrsninđa. Isto ađahar, dikhlja sar ko prvo veko ko skupštine avena sa pobuter manuša. Dovoljno živinđa te šaj te dikhel sar i šukar vest „propovedinđa pe ki celo phuv“ (Kol. 1:23).
16. Kas o Jovan ohrabrinđa ko pe lila?
16 Ked o Jovan hine but phuro, ov hine le čast te pisini i knjiga Otkrivenje (Otkr. 1:1). Pisinđa hem jekh jevanđelje kova akhari oleso anav. Isto ađahar, pisinđa hem trin lila kola isto akharena oleso anav. Po trito lil pisinđa e verno hrišćanese, e Gajese kole manglja sar pe ćhave (3. Jov. 1). Đi tegani, sigurno hine but manuša upro kola dikhlja sar upro pe ćhave. Odova so pisinđa akava verno phuro manuš ohrabrinđa e Isusese učenikonen tegani, a hem akana.
17. Premali 3. Jovanova 4, so anela baro bahtalipe?
17 So o Jovan pisinđa? (Čitin 3. Jovanova 4.) Ko po trito lil, o Jovan phenđa soj tano bahtalo so dikhela sar olese phralja hem phenja šunena e Devle. Ko vreme ked pisinđa akala lafija, disave počminđe te širinen o hovavne sikljoviba hem te ćeren bare problemija ki skupština. Ama, avera nastavinđe te živinen „premalo ćaćipe“. On šunđe e Jehova hem živinđe „premalo olese zapovestija“ (2. Jov. 4, 6). Akala verna hrišćanija na radujinđe samo e Jovane već hem e Jehova (Posl. 27:11).
18. So šaj te sikljova ando Jovanese lafija?
18 So sikljovaja? Ako ka aćhova verna e Jehovase, ka ova bahtale hem amen hem avera (1. Jov. 5:3). Na primer, bahtale hijam sose ćeraja e Jehova te ovel bahtalo. Ov tano but bahtalo ked dikhela so cidaja amen ando odova soj tano lošno hem šunaja olese zapovestija (Posl. 23:15). O anđelija ko nebo isto radujinena pe (Luka 15:10). Isto ađahar, hem amen hijam bahtale ked dikhaja so amare phralja hem phenja aćhona verna, iako tane progonime ja tane ko iskušenje te ćeren diso neispravno (2. Sol. 1:4). Ked e Satanaso sveto ka ovel uništimo, amen ka ova but bahtale so aćhiljam verna e Jehovase.
19. So phenđa amari phen i Rejčel? (Dikh i slika.)
19 Amen hijam but bahtale ked averen sikavaja ando Jehova. I Rejčel, koja živini ki Dominikansko Republika, phenela soj tani bari čast averen te sikava ando Jehova. Oj pomožinđa nekobor manušenđe te penđaren e Jehova hem aće so phenela: „Nane man lafija kolencar bi opisinava i radost koja osetinava ked proučinava nekasa hem dikhava sar barjola oleso mangipe premalo Jehova, sar oslonini pe upro leste hem sar menini po životi te šaj te ćerel le bahtalo. Odija radost tani pobari ando bilo kova trud ja žrtva koja ćerđum te pomožinav le.“
Amen hijam bahtale ked sikavaja averen te mangen e Jehova hem te oven lese poslušna (Dikh o 19. odlomko)
SIKLJOV ANDO POSLEDNJA LAFIJA KOLA PHENĐE O VERNA MANUŠA
20. Sar amen hijam sar o Mojsije, o David hem o Jovan?
20 O Mojsije, o David hem o Jovan živinđe ko purano vreme hem olenge okolnostija hine but averćhane amarendar. Ama, ko but buća hijam sar olende. On služinđe e ćaćutne Devlese, a hem amen ćeraja odova. Sar olende, hem amen molinaja amen e Jehovase, osloninaja amen upro leste hem rodaja oleso vođstvo. Sar odola verna phure manuša, hem amen hijam uverime so o Jehova blagoslovini okolen kola šunena le.
21. Kola blagoslovija ka dobina ako ka šuna o savet ando Mojsije, o David hem o Jovan?
21 Odolese, hajde sare te šuna o savet ando akala phure manuša hem te ićera amen ko Jehovase zapovestija. Ako ka šuna e Jehova, ka ovel amen uspeh ko sa so ćeraja. Ov ka del amen „dugo te živina“, avere lafencar zauvek (Pon. zak. 30:20). Ka ova radosna sose ka ugodina amare nebesko Dadese kova ka blagoslovini amen pobuter nego so šaj te zamislina (Ef. 3:20).
ĐILI 129 Te istrajina đi o krajo
a But Izraelcija kola dikhlje o čudo ko Crveno more na khuvđe ki Obećimi phuv (Br. 14:22, 23). O Jehova phenđa so sa okola kola isi len 20 berš ja pobuter, ka meren ki pustinja (Br. 14:29). Ama, but ando okola so hine len pohari ando 20 berš aćhilje đivde, sar soj tane o Isus Navin, o Halev hem but ando Levijeso pleme. On nakhlje i reka Jordan hem khuvđe ki Obećimi phuv (Pon. zak. 1:24-40).
b SO DIKHAJA KO SLIKE: Levo: O David dela poslednjo savet pe ćhavese, e Solomonese. Desno: O phralja hem o phenja uživinena ki Škola aso pionirija đi o Jehova sikavi len.
