Da li tuće pharo redovno te proučine i Biblija hem te uživine đi ćereja odova? Verovatno, sare podijekh puti osetinaja amen ađahar. Ama, razmislin ando avera buća kola ćereja redovno, sar na primer o nanđojbe. Ov lela amendar vreme, ama palo odova osetinaja amen but pošukar. O proučavanje šaj te uporedina sar o nanđojbe „e panjeja, ko Devleso Lafi“ (Ef. 5:26). Aće disave predlogija kola šaj te pomožinen amen.

• Ćer tuće raspored. O lično proučavanje tano maškaro „buća kola tane ćaće važna“ (Fil. 1:10). Te na bi bistreja ked valjani te proučine, pisin tuće ko jekh lil o dive hem vreme hem ćhiv odova negde kuri šaj te dikhe le. Isto ađahar, šaj te ćere tuće alarm ko telefoni kova ka podsetini tut ked valjani te proučine.

• Razmislin so ka pomožini tut te ovel tut koncentracija. Da li isi tut but koncentracija ili hari? Tu najšukar penđareja tut. Odolese, le odova ko obzir ked odredineja kobor vreme ka proučine. So valjani te ćere ako alo o vreme kova odredinđan te proučine, a tuće na proučini pe? Probin barem deš minutija te proučine. Pošukar tano barem hari te proučine nego hić. Ama, jekh puti ked počmineja, ka ovel tuće polokho te nastavine (Fil. 2:13).

• Odredin angleder sostar ka proučine. Ako ađićereja te avel o vreme te proučine, pa tegani te odredine so ka proučine na ka koristine mudro o vreme (Ef. 5:16). Ćer tuće spisko so bi mangeja te proučine. Ako isi tut disavo pućibe, pisin le ko to spisko. Ko krajo ando proučavanje šaj te ćhive pana disave ideje ko to spisko.

• Ako ka valjani ćer disave promene. I najvažno buti tani svako kurko te proučine. Odolese, ako ka valjani promin o dive, o vreme ked hem kobor ka proučine ili o teme kola ka proučine.

But šaj te pomožini amenđe ako svako kurko proučinaja. Ka ova popaše e Jehovaja, ka ana mudra odluke hem ka ova but ohrabrime (Is. Nav. 1:8).