O phralja kotar Betel pobuter ando jekh berš ćerđe ko odova te ovel radio-stanica ko Staten Ajland, ko Njujork. Palo odova so ćhinđe o kašta hem čistinđe i phuv, on najangleder ćerđe jekh baro ćher aso radnikija hem jekh posebno zgrada asi oprema. Ked sa odova završinđe, počminđe te ćeden i oprema koja valjanđa lenđe te šaj i radio-stanica te ćerel buti. Ama, angleder odova hine nekobor problemija kola valjanđe te rešinen.

E phralenđe hine pharo te ćhiven i glavno antena asi radio stanica. Oj hine 91 metre dugačko hem valjanđa te ćhivel pe maškaro duj stubija kola hine 61 metre uće. O prvo puti na uspinđe. Ama, o phralja uzdajinđe pe upro Jehova hem ko krajo uspinđe. O Kalvin Proser, o phral kova ćerđa ko odova projekat, phenđa: „Ked bi uspinaja ando prvo puti, šaj hine te ova ponosna upro amende hem te phena: ’Dikh so šukar ćerđam.‘ “ O phralja phenđe so on uspinđe sose o Jehova pomožinđa len. Ama, akana hine len jekh aver problemi.

I radio-stanica hine diso nevo hem na hine lokho te ćinel pe i oprema aso odova. Odolese, o phralja koristinđe i oprema koja neko već angleder koristinđa. Umesto te ćinen mikrofon, on koristinđe o mikrofon kova isi ko obično telefoni. Jekh rat ko februar, o phralja odlučinđe te probinen odija oprema. Valjanđa lenđe diso so ka mukhen ki radio stanica hem odlučinđe te đilaben amare đilja. O Ernest Lou setini pe ko jekh smešno iskustvo kova desinđa pe odija rat. Đi o  phralja đilabđe, dobinđe poziv kotar sudija Raterford b, kova šunđa len ko po radio ko Bruklin, kova hine oko 25 kilometrija dur olendar.

Ov phenđa lenđe: „Prekininen odija buka. Ka phene šunava mačken.“ O phralja lađandilje hem ćhinavđe o program. Ama, ki aver strana, akana hine sigurna so i radio-stanica ćerela buti hem soj tani spremno te koristinen la.

Ko 24. februar ko 1924. berš, ked hine o prvo emitovanje, o phral Raterford phenđa so odija radio-stanica ka koristini pe aso zadatko kova o Hrist dinđa. Ov phenđa so i svrha andi radio-stanica tani „te objasnini pe e manušenđe so sikavi i Biblija, bizo obzir ki koja religija pripadinena hem te pomožini len te haljon ko kova vreme živinena.“

O prvo emitovanje hine but uspešno. I radio-stanica koristinđa pe 33 berš hem odothe mukhlje pe razna programija koja e Jehovasi organizacija ćerđa.

Ko jul ko 1924. berš, o Istraživačija andi Biblija hine len kongres ko Kolumbus, Ohajo. O phralja hem o phenja kotar celo sveto alje ko odova kongres. O govorija hine ićerde ko arapski, engleski, francuski, nemački, grčki, mađarski, italijanski, litvanski, poljski, ruski, ukrajinski hem ko skandinavska ćhibja. Disave govorija o manuša šaj hine te šunen hem prekalo radio. O phralja ćerđe dogovor o lokalna novine svako dive te pisinen jekh članko ando kongres.

Ko četvrtak, ko 24. jul, pobuter ando 5 000 phralja hem phenja ikljilje ki služba ki diz kuri hine o kongres. Ki služba, on dinđe oko 30 000 knjige hem počminđe nekobor hiljade biblijake kursija. Ki Stražarsko kula pisinđa so akava dive hine „najradosno deo ando kongres.“

Ko petak, 25. jul o phral Raterford ko jekh govor hrabro čitinđa jekh lil kova osudini e sveštenikonen. Ko odova lil pisinđa so o politička, religiozna hem trgovačka vođe „cidena e manušen ando odova te šunen o ćaćipe ando Devleso Kraljevstvo prekalo kova  o Jehova ka blagoslovini sa e manušen“. Isto ađahar, odothe pisinđa so on grešinena so podržinena o Društvo naroda hem so phenena so odova tano način sar o Devel ka vladini ki celo phuv. Valjanđa bari hrabrost te šaj o Istraživačija andi Biblija te phenen akava e manušenđe.

Kasnije, ki Stražarsko kula pisinđa so o kongres kova hine ko Kolumbus zorjaćerđa e phralengi hem e phenjengi vera. Isto ađahar, pomožinđa lenđe te oven hrabra hem te propovedinen, čak hem ko progonstvo. O phral Leo Klaus, kova hine ko odova kongres, phenđa: „Palo kongres, amen jedva ađićerđam te đa ki služba hem te vaćera e manušenđe odija poruka.“

I poruka koja o phral Raterford čitinđa ko po govor hine štampimi ko jekh traktati kova vićinđa pe O sveštenikija tane optužime. O Istraživačija andi Biblija ko oktobar počminđe te delinen odova traktati. Ko Klivlend, ki jekh tikni diz ki Oklahoma, o Frenk Džonson delinđa odova traktati hem valjanđa palo odova te ađićeri pana 20 minutija e phralen hem phenjen. Odolese so propovedinđa odothe, but manuša hine holjame upro leste. O phral Frenk valjanđa te garavi pe hem odolese sigate arakhlja jekh crkva koja hine paše hem garavđa pe odothe. I crkva hine ćući, odolese mukhlja o traktati ki sveštenikosi Biblija hem ki svako stolica. Palo odova, sigate ikljilo andi crkva. Odolese so hine le pana vreme, odova ćerđa hem ko pana duj crkve.

O Frenk sigate irinđa pe ko than kaj o phralja valjanđe te len le. Ov garavđa pe pali benzinsko pumpa hem pazinđa te na dikhen le o manuša kola rodinđe le. Odola manuša nakhlje vordancar odothar, ama na dikhlje le. Sigate palo lende, alje o phralja hem o phenja kola propovedinđe odothe paše lelje le hem đelje.

Jekh phral phenela: „Đi ikljiljam andi diz nakhljam uzo odola crkve. Angli svako crkva hine oko 50 manuša. Disave olendar čitinđe odova traktati, a disave ićerđe le ko vas hem ađićerđe te avel o svešteniko. Baš ko pravo vreme ikljiljam andi diz. Zahvalna hijam e Jehovase so pomožinđa amen te delina odova traktati, a te na astaren amen.“

Ko avera phuvja, o Istraživačija hrabro propovedinđe. Ki severno Francuska, o Jozef Kret propovedinđa e manušenđe andi Poljska kola ćerđe buti ko rudniko. Ov planirinđa te ićeri jekh govor e temaja „Pana hari o mule ka ušten“. Ked o phralja hem o phenja dinđe i pozivnica aso odova govor, jekh svešteniko kova uduri živinđa phenđa e manušenđe te na đan. Ama, oleso upozorenje anđa diso pozitivno. Više ando 5 000 manuša hine prisutna ko odova govor, pa čak hem odova svešteniko. O phral Kret vićinđa e svešteniko te branini pe verovanja, ama ov odbinđa. Palo govor, o phral Kret dinđa sa i literatura koja hine le sose dikhlja so o manuša mangena te đanen pobuter ando Devleso Lafi (Am. 8:11).

O phral Kloud Braun đelo ki Afrika ki država koja tani akana penđardi sar Gana hem uduri propovedinđa. Sebepi olese govorija hem i literatura koja dinđa, but manuša šunđe o ćaćipe. O Džon Blankson, kova đelo ko farmaceutsko fakultet, šunđa jekh oleso  govor. Ov sigate haljilo so odova tano o ćaćipe. O Džon phenela: „Sebepi o ćaćipe hijum le but bahtalo hem odolestar vaćerđum bute manušenđe ko fakultet.“

O Džon haljilo so i Biblija na vaćeri ando Trojstvo. Odolese, đelo ko svešteniko te vaćeri oleja odolestar. O svešteniko but holjanđa hem počminđa te pištini: „Tu na hijan hrišćanin, tu hijan ki Bengesi strana. Ikljov akatar!“

Ked alo ćhere, ov pisinđa jekh lil odole sveštenikose hem phenđa lese te ikljon negde te šaj te vaćeren ando Trojstvo. Odova svešteniko phenđa lese te đal ko kabinet ando glavno profesor ko farmaceutsko fakulteti. Ked alo, o profesor pućlja le da li ov ćaće pisinđa lil e sveštenikose?

„Ja, gospodine“, odgovorinđa o Džon.

O profesor rodinđa ando Džon te pisini jekh lil e sveštenikose kuri ka izvinini pe lese. Odolese, o Džon pisinđa:

„Gospodine, mo profesor phenđa maje te izvininav man tuće. Hem odova mangava te ćerav, ama samo ako priznajineja so odova so sikaveja tano hovajbe.“

O profesor hine šokirimo hem pućlja le: „Blankson, akava tano odova so tu mangeja te pisine?“

„Ja, odova mangljum te pisinav.“

„Tegani ka ove fordimo andi škola. Našti te aćhove ki škola ako ka vaćere protiv o svešteniko hem protiv i religija koja akija država podržini.“

„Ama gospodine, ked amen hijam ko to čas hem na haljovaja diso, da li odova značini so našti ništa te puća tut?“

„Naravno so šaj te pućen man.“

„Pa gospodine, odova desinđa pe. Odova gospodin sikavđa amen andi Biblija hem me pućljum le jekh pućibe. Ako našti hine te odgovorini maje ko pućibe, sose bi me valjani te izvininav man olese?“

Ko krajo, o Blankson aćhilo ki škola iako na izvininđa pe e sveštenikose.

Kasnije, ki Stražarsko kula pisinđa: „Amen šaj te phena odova so o David phenđa: ’Tu ka de man snaga asi borba’ (Ps. 18:39). Odova berš hijam le but ohrabrime, odolese so dikhljam sar o Jehova pomožinđa amen. Isto ađahar, bahtale hijam so šaj te propovedina i šukar vest.“

Ko krajo ando odova berš, o phralja ćerđe plan te ovel amen pana jekh radio-stanica. Oj hine gradimi ko Čikago, ki Amerika. Odija stanica vićinđa pe „LAFI“. Tegani, o phralja koristinđe pana pozorali oprema te šaj i vest ando Kraljevstvo te šunen hem o manuša kola živinđe but dur, čak ko sever, ki Kanada.

Ko 1925. berš, o Jehova pomožinđa e phralenđe te haljon diso nevo ando Otkrivenje 12. poglavlje. Sebepi odova nevo objašnjenje, disave ćhinavđe te služinen e Jehovase. Ama, but đene hine bahtale so šaj hine te haljon so desini pe ko nebo hem sar odova utičini upro Devlese sluge ki phuv.