42. ČLANKO PROUČIBASE
ĐILI 103 O pastirija tane poklon kotar Devel
Mothov so hijan zahvalno so dobinđam „manušen sar dar“
Ked ukljilo upre dinđa e manušen sar dar (EF. 4:8)
SO KA SIKLJOVA?
Ka dikha sar o sluge pomoćnikija, o starešine hem o pokrajinska nadglednikija pomožinena amen. Isto ađahar, ka dikha sar šaj te mothova zahvalnost aso odova so akala verna manuša ćerena.
1. Sar dikhaja so o Isus tano velikodušno premalo amende?
NIJEKH manuš našti te ovel velikodušno sar o Isus. Ked hine ki phuv, ov but putija pomožinđa e manušenđe ađahar so ćerđa čudija (Luka 9:12-17). Ov hine odobor velikodušno so čak po životi dinđa amenđe (Jov. 15:13). Palo uskrsenje, nastavinđa te ovel velikodušno. Sar so obećinđa, ov rodinđa e Jehovastar te del amen sveti duh prekalo kova sikavi amen hem utešini amen (Jov. 14:16, 17, fusn.; 16:13). A prekalo sastankija, o Isus hem ponodri sikavi amen sar te ćera učenikonen ki celo phuv (Mat. 28:18-20).
2. Premalo Efešanima 4:7, 8, koj tane o manuša kola tane dinde „sar dar“?
2 Isi pana jekh poklon kova o Isus dinđa amen. O apostol Pavle pisinđa so palo odova so đelo ko nebo, ov „dinđa e manušen sar dar“. (Čitin Efešanima 4:7, 8.) O Pavle objasninđa so o Isus dinđa akale manušen te pomožinen ki skupština ko razna načinija (Ef. 1:22, 23; 4:11-13). Avdije, o manuša kola tane dinde „sar dar“ tane o sluge pomoćnikija, o starešine hem o pokrajinska nadglednikija. a Naravno, sare on tane nesavršena hem ćerena greške (Jak. 3:2). Ama amaro Gospod, o Isus Hrist, koristini len te pomožinen amen. On tane oleso poklon amenđe.
3. Vaćer jekh primer sar šaj sare te pomožina e manušenđe kolen dobinđam „sar dar“.
3 O Isus akale manušenđe dinđa zadatko te zorjaćeren i skupština (Ef. 4:12). Sare amen šaj te pomožina len ki odija važno buti. Na primer, ked gradini pe i dvorana neko amendar tano direktno uključimo. Ama, avera pomožinena ađahar so ćerena diso hajbase, anena sa so valjani ili ćerena diso aver. Ko slično način, sare šaj te pomožina e slugenđe, e starešinenđe hem e pokrajinsko nadglednikonenđe odoleja so vaćeraja hem so ćeraja. Akana ka dikha sar pomožini amenđe odova so on ćerena hem sar šaj te mothova olenđe hem e Isusese so ceninaja len.
O SLUGE POMOĆNIKIJA „POMOŽINENA AVERENĐE“
4. Ko kola načinija o sluge pomoćnikija pomožinđe ko prvo veko?
4 Ko prvo veko, disave phralja hine naimenujime sar sluge pomoćnikija (1. Tim. 3:8). Izgleda so on hine okola kola pomožinđe averenđe kolendar o Pavle vaćeri ki 1. Korinćanima 12:28. Isto ađahar, on ćerđe but buća ki skupština. Odolese, o starešine šaj hine te ovel len pobuter vreme te sikaven e Devlese narodo hem te brininen pe ando stado. Na primer, o sluge pomoćnikija šaj pomožinđe ko odova te prepisinen pe o sveta spisija ili đelje te ćinen sa so valjani asi odija buti.
5. Save važna buća o sluge pomoćnikija avdije ćerena?
5 Razmislin samo kola važna buća o sluge pomoćnikija ćerena ki skupština (1. Petr. 4:10). On brininena pe asi blagajna, aso područje, asi literatura, asi audio-video oprema, služinena ki pomoćno služba hem pomožinena te održini pe i dvorana. Sa akala buća tane neophodna te šaj jekh skupština šukar te funkcionišini (1. Kor. 14:40). Isto ađahar, disave sluge pomoćnikija isi len tačke ko sastanko Hrišćansko đivdipe hem služba hem ićerena javna predavanja. Jekh sluga šaj te pomožini e nadglednikose andi jekh grupa asi služba. A podijekh puti, o sposobna sluge pomoćnikija đana e starešinencar ko pastirska posete.
6. Sose but ceninaja e phralen kola služinena sar sluge pomoćnikija?
6 Sar o sluge pomoćnikija pomožinena ki skupština? I Beberli b, jekh phen andi Bolivija, phenela: „Sebepi o sluge pomoćnikija, me uživinava ko sastankija. On sa pripreminena, odolese me šaj te đilabav, te dav komentarija, te šunav govorija hem te sikljovav but buća ando videa hem slike. Brininena pe andi amari sigurnost hem ando okola kola šunena o sastankija prekalo video-poziv. Palo sastanak, on pomožinena te čistini pe i dvorana, brininena pe andi blagajna hem andi literatura. Ćaće hijum lenđe zahvalno sebepi sa odova.“ I Lesli, koja živini ki Kolumbija hem kaso rom služini sar starešina, phenela: „Mo rom but oslonini sluge pomoćnikija sose on brininena pe aso but buća ki skupština. Bizo lende, ov bi ovela le pobari buti hem odolese hijum lenđe but zahvalno soj tane revna hem spremna te pomožinen.“ Sare but ceninaja odova so ćerena o sluge pomoćnikija ki amari skupština (1. Tim. 3:13).
7. Sar šaj te mothova so ceninaja odova so ćerena o sluge pomoćnikija? (Dikh i slika.)
7 Iako šaj osetinaja zahvalnost aso odova so o sluge pomoćnikija ćerena, i Biblija podstaknini amen te mothova amari zahvalnost (Kol. 3:15). O Kšištof, jekh starešina andi Finska, phenela sar mothovi pi zahvalnost: „Me bićhalava lil ja poruka ki koja pisinava disavo stih ili konkretno pominava sar jekh sluga pomoćniko ohrabrinđa man ili sose ceninava odova so ćerela.“ O Paskal hem i Žael, kola živinena ki Nova Kaledonija, konkretno molinena pe aso sluge pomoćnikija. O Paskal phenela: „Ko poslednje vreme, but molinaja amen aso sluge pomoćnikija, zahvalinaja amen e Jehovase olenđe hem molinaja le te ovel olencar hem te pomožini len.“ O Jehova šunela asavke molitve hem odova pomožini celona skupštinaće (2. Kor. 1:11).
O STAREŠINE KI SKUPŠTINA BUT „TRUDINENA PE“
8. Sose o Pavle phenđa so o starešine ko prvo veko but trudinđe pe? (1. Solunjanima 5:12, 13).
8 Ko prvo veko, o starešine dinđe sa pestar te pomožinen e phralenđe ki skupština. (Čitin 1. Solunjanima 5:12, 13; 1. Tim. 5:17.) On predvodinđe ki skupština ađahar so ićerđe o sastankija hem anđe odluke sar starešinstvo. Isto ađahar, mangipaja savetujinđe e phralen hem e phenjen te šaj te zaštitinen i skupština (1. Sol. 2:11 12; 2. Tim. 4:2). Naravno, odola starešine valjanđe te izdržinen pe porodicen hem te ovel len zorali vera ko Jehova (1. Tim. 3:2, 4; Titu 1:6-9).
9. Kola tane disave odgovornostija kola isi len o starešine avdije?
9 Avdije, o starešine isi len but buti. On dena sa pestar ki služba (2. Tim. 4:5). On tane but šukar primer sose tane revna ki služba, organizujinena o propovedibe hem sikavena amen sar te propovedina hem te sikava e manušen. Isto ađahar, on tane milosrdna hem nepristrasna sudije. Ked jekh hrišćanin ćerela ozbiljno greh, o starešine trudinena pe te pomožinen le palem te ovel paše e Jehovaja. Ko isto vreme, on pazinena i skupština te aćhol čisto (1. Kor. 5:12, 13; Gal. 6:1). Ama, najangleder o starešine tane pastirija (1. Petr. 5:1-3). On ićerena šukar spremime govorija, trudinena pe te upoznajinen sarinen ki skupština hem te đan ko pastirska posete. Isto ađahar, nesave starešine pomožinena te gradinen pe hem te održinen pe o dvorane hem te organizujinen pe o kongresija. Disave tane ko Odbor aso odnosija e bolnicencar ja ki Grupa koja posetini e phralen hem e phenjen ki bolnica. O starešine ćaće but trudinena pe amenđe!
10. Sose ceninaja amare starešinen?
10 O Jehova prorekninđa so o pastirija šukar ka brininen pe amendar hem so više na ka ovel amen sostar te dara (Jer. 23:4). Ko odova uverinđa pe i Johana, amari phen kotar Finska, ked olaki daj but naborsalji. Oj phenela: „Nane maje lokho te phenav averenđe sar osetinava man, ama jekh starešina kole na đanđum odobor šukar hine strpljivo mancar, molinđa pe mancar hem uverinđa man so o Jehova mangela man. Na setinava man tačno so phenđa maje, ama setinava man so palo odova više na darandiljum. Verujinava so o Jehova bićhalđa le te pomožini maje baš tegani ked valjanđa maje.“ Sar o starešine ki ti skupština pomožinđe tuće?
11. Sar šaj te mothova so ceninaja e starešinen? (Dikh i slika.)
11 O Jehova mangela te mothova e starešinenđe so ceninaja len „sebepi olengi buti“ (1. Sol. 5:12, 13). I Henrijeta, koja živini ki Finska, phenela: „O starešine spremno pomožinena averenđe, ama odova na značini so on isi len pobuter snaga amendar ili so nane len pe problemija. Podijekh puti samo phenava lenđe: ’Tu ćaće hijan šukar starešina. Nadinava man so đaneja odova.‘ “ Jekh phen andi Turska koja vićini pe Sera, phenela: „E starešinenđe valjani ohrabrenje te šaj te ćeren pi buti. Odolese, šaj te pisina lenđe lil, te vićina len koro amende ili te đa olencar ki služba.“ Da li isi disavo starešina kole posebno cenineja sebepi odova so ćerela? Razmislin sar šaj te mothove lese so cenineja odova (1. Kor. 16:18).
Tu šaj te ohrabrine e naimenujime phralen te istrajinen ko po zadatko (Dikh o odlomkija 7, 11, 15)
O POKRAJINSKA NADGLEDNIKIJA ZORJAĆERENA AMEN
12. Kas o Isus pana ćhivđa te zorjaćeri e phralen? (1. Solunjanima 2:7, 8)
12 Ko prvo veko, o Isus Hrist ćhivđa disave manušen te pomožinen ki skupština ko jekh aver način. Ov usmerinđa e starešinen ko Jerusalim te bićhalen e Pavle, e Varnava hem avere phralen te služinen sar putujuća nadglednikija (Dela 11:22). Sose? Kotar isto razlog sose dinđa te oven sluge pomoćnikija hem starešine – te zorjaćeren e phralen (Dela 15:40, 41). Akala manuša ćerđe bare žrtve hem čak rizikujinđe po životi te šaj te sikaven hem te zorjaćeren e phralen. (Čitin 1. Solunjanima 2:7, 8.)
13. Kola tane disave odgovornostija kola isi len o pokrajinska nadglednikija?
13 O pokrajinska nadglednikija but putujinena. Podijekh puti hem nekobor hiljade kilometrija te šaj te posetinen e skupštinen. Svako kurko jekh pokrajinsko nadgledniko ićeri nekobor govorija, đala ko pastirska posete, ićeri o sastanak e pionirencar, e starešinencar hem o sastankija asi služba. Ov spremini govorija hem organizujini o pokrajinska sastankija hem o kongresija. Isto ađahar, ov tano instruktor ki škola aso pionirija hem organizujini o posebno sastanko e pionirencar andi pokrajina. Ama, isi le hem avera važna zadatkija, a podijekh puti čak hitna, kola dela le i podružnica.
14. Sose ceninaja odova so ćerena o pokrajinska nadglednikija?
14 Sar o pokrajinska nadglednikija pomožinena e phralenđe hem e phenjenđe ki skupština? Jekh phral andi Turska, phenela: „Svako puti ked alo o pokrajinsko nadgledniko koro amende, ohrabrinđa man te ovav pobuter e phralencar te šaj te pomožinav len. Upoznajinđum bute phralen kola služinena sar pokrajinska nadglednikija, ama niked na osetinđum so bilo ko olendar tano but zauzeto ja so na mangela te vaćeri mancar.“ I Johana, kolatar angleder vaćerđam, hine ki služba e pokrajinsko nadglednikoja, ama nikas na arakhlje ćhere. Oj phenela: „Ipak, niked na ka bistrav odova dive. Me solduj phenja selinđe pe hem but nedostajinđe maje. O pokrajinsko nadgledniko ohrabrinđa man hem pomožinđa maje te haljovav so akana šaj našti te živina uzi amari porodica hem amala, ama ko nevo sveto ka ovel amen but prilike te ova zajedno.“ Sar i Johana, but amendar pana setinena pe sar o pokrajinska nadglednikija ohrabrinđe len (Dela 20:37–21:1).
15. (a) Premali 3. Jovanova 5-8, sar šaj te mothova so ceninaja e pokrajinsko nadglednikonen? (Dikh i slika.) (b) Sose valjani te mothova so ceninaja e romnjen ando naimenujime phralja hem sar šaj te ćera odova? (Dikh o okvir „ Ma bistren olenge romnjen“.)
15 O apostol Jovan podstakninđa e Gaje te mothovi gostoljubivost premalo phralja kola posetinđe o skupštine hem te ispratini len ko drumo ađahar sar so mangela o Devel. (Čitin 3. Jovanova 5-8.) Jekh način sar šaj amen odova te ćera tano te vićina e pokrajinsko nadgledniko ko ručko. Pana jekh način tano ađahar so ka đa ko sastankija asi služba. I Lesli, kola pominđam angleder, mothovi pi zahvalnost hem ko avera načinija. Oj phenela: „Me molinava man e Jehovase te brinini pe ando olenge potrebe. Me hem mo rom pisinaja lenđe lila hem phenaja lenđe kozom olenge posete pomožinena amen.“ Ma bistri, o pokrajinska nadglednikija tane samo manuša hem isi len pe problemija. Podijekh puti tane naborme, uznemirime pa čak hem razočarime. Šaj te ljubazna lafija ili dijekh tikno poklon te ovel odgovor ko olenge molitve (Posl. 12:25).
AMENĐE VALJANENA MANUŠA KOLA TANE DINDE „SAR DAR“
16. Premalo Poslovice 3:27, so šaj o phralja te pućen pe?
16 Ko celo sveto, amenđe valjani phralja kola ka predvodinen ki skupština. Ako hijan krstimo phral, da li šaj te ćere diso? (Čitin Poslovice 3:27.) Da li šaj te ćhive tuće cilj te služine sar sluga pomoćniko? Ako već služineja sar sluga pomoćniko, da li šaj te ćere ko odova te služine sar starešina? c Da li šaj te menine disave buća ko to životi hem te predajine i molba asi Škola aso objaviteljija ando Kraljevstvo? Sebepi odova so ka sikljove ki odija škola, o Isus šaj pana pošukar te pomožini e phralenđe hem e phenjenđe prekalo tute. Ako osetineja tut so na hijan sposobno aso akala buća molin tut e Jehovase, rode olestar prekalo po sveti duh te pomožini tut te ćere bilo kova zadatko kova tano tuće dindo (Luka 11:13; Dela 20:28).
17. So ando amaro Kralj o Isus Hrist mothovi amenđe odova so dinđa amen e „manušen sar dar“?
17 O phralja kolen o Isus „dinđa sar dar“ tane dokaz so ov vodini amen ko akala poslednja dive (Mat. 28:20). Na hijam li zahvalna so amaro Kralj but mangela amen, soj tano velikodušno, saosećajno hem dela amen phralen kola brininena pe amendar? Odolese, rode prilike te mothove so cenineja akale manušen. Niked ma bistri te zahvaline tut e Jehovase kolestar avela „svako šukar hem savršeno“ poklon (Jak. 1:17).
ĐILI 99 Baro mnoštvo ando phralja
a O starešine kola služinena sar članija ando Vodeće telo, pomoćnikija ando Vodeće telo, članija ando Odbor kotar podružnica hem okola so isi len avera zadatkija tane isto dinde „sar dar“.
b Disave anava tane menime.
c Ako mangeja te đane sar šaj te ispunine o uslovija aso sluga pomoćniko ili starešina, dikh o člankija „Da li isi tut cilj te ove sluga pomoćniko?“ hem „Da li isi tut cilj te služine sar starešina?“ ki Stražarsko kula ando novembar 2024. berš.
