43. ČLANKO PROUČIBASE
ĐILI 90 Te zorjaćera jekh jekhe
Sar šaj te pobedina o sumnje?
Sa proverinen te šaj te uverinen tumen so odova tano o ćaćipe (1. SOL. 5:21)
SO KA SIKLJOVA?
Ka dikha sar šaj te pobedina o sumnje kola šaj te utičinen ki amari služba e Jehovase.
1-2. (a) Ko so šaj e Jehovase sluge te sumnjinen? (b) So ka razmotrina ko akava članko?
SA O MANUŠA, bizo obzir da li tane terne ili phure podijekh puti isi len sumnje. a Na primer, zamislin so jekh terni osoba pućela pe da li o Jehova ćaće brinini pe olatar. Šaj nane sigurno da li valjani te krstini pe. Ili zamislin jekhe phrale kova ked hine terno ko prvo than ko po životi ćhivđa o Kraljevstvo, a na i karijera. Akana tano ko berša hem isi le pare samo aso pe porodicake osnovna potrebe. Ov šaj pućela pe da li anđa mudro odluka ked hine terno. Zamislin so jekh phuri phen nane la više snaga. Oj tani šaj obeshrabrimi sose više našti te ćerel odova so angleder ćerđa. Da li nekad pućljan tut: „Da li o Jehova ćaće brinini pe mandar? Da li vredinena o žrtve kola ćerđum? Da li šaj pana diso te ćerav e Jehovase?“
2 Ako na trudinaja amen te arakha odgovor ko akala pućiba, amen šaj te našala amari vera ko Jehova ili šaj te ćhinava te služina lese. Ko akava članko ka razmotrina sar šaj o načelija te pomožinen amen ako sumnjinaja (1) so o Jehova brinini pe amendar, (2) ko odluke kola anđam ili (3) so šaj pana te ova korisna e Jehovase.
SAR ŠAJ TE POBEDINA O SUMNJE?
3. Kova tano jekh način sar šaj te pobedina amare sumnje?
3 Jekh način sar šaj te pobedina amare sumnje tano te roda odgovorija ko amare pućiba ki Biblija. Ako odova ćeraja, amari vera ko Jehova hem amaro amalipe oleja ka oven pozorale hem ka aćhova „verna“ (1. Kor. 16:13).
4. Ko so i Biblija podstaknini amen ki 1. Solunjanima 5:21?
4 Čitin 1. Solunjanima 5:21. I Biblija podstaknini amen: „Sa proverinen te šaj te uverinen tumen so odova tano o ćaćipe.“ Sar šaj te ćera odova? Ked na hijam sigurna ko diso, šaj te proverina so i Biblija vaćeri odolestar. Na primer, razmislin andi jekh terni osoba koja pućela pe da li o Devel brinini pe olatar. Da valjani odova pućibe te aćhavi bizo odgovor? Na, oj valjani te proverini so o Jehova mislini odolestar.
5. Sar šaj te arakha o odgovor ko amare pućiba?
5 Ked čitinaja i Biblija, odova tano sar ka phene o Jehova vaćeri amencar. Ama, te šaj te odgovorini ko amare pućiba, nane dovoljno samo te čitina. Amen valjani ko amare publikacije te proučina andi tema koja zanimini amen (Posl. 2:3-6). Valjani te molina amen e Jehovase te pomožini amen te arakha odgovor ko amare pućiba. Palo odova, šaj te roda o načelija kola ka pomožinen amen ki amari situacija. Isto ađahar, ka ovel šukar te čitina ando verna sluge kola hine ki slično situacija.
6. Sar o sastankija pomožinena amen te pobedina amare sumnje?
6 Isto ađahar, o Jehova vaćeri amencar hem ko sastankija. Ako hijam redovna ko sastankija, šaj ko nesavo govor ili ko nekaso komentari te šuna diso so ka ovel odgovor ko amaro pućibe (Posl. 27:17). Akana ka dikha sar šaj te pobedina amare sumnje.
AKO PUĆEJA TUT DA LI O JEHOVA BRININI PE TUTAR
7. So disave šaj te pućen pe?
7 Da li nekad pućljan tut: „Da li o Jehova uopšte primetini man?“ Ako osetineja so na hijan važno, tegani šaj mislineja soj tano nemoguće te ove amal e Stvoriteljeja ando celo svemir. Šaj hem o kralj David slično mislinđa. Ov oduševinđa pe so o Jehova obratini pažnja čak hem upro manuša. Odolese phenđa: „Jehova, soj tano jekh manuš te obratine pažnja upro leste, soj tano o manušikano ćhavo te brinine tut olese?“ (Ps. 144:3). Kaj šaj te arakhe odgovor ko akava pućibe?
8. Premali 1. Samuilova 16:6, 7, 10-12, so o Jehova dikhela ko manuša?
8 Ki Biblija šaj te dikha so o Jehova obratini pažnja upro okola so averenđe izgledinena sar nevažna. Na primer, o Jehova bićhalđa e Samuilo te đal ko Jesej hem uduri te pomazini jekhe ando olese ćhave te ovel kralj ko Izrael. O Jesej hine le ofto ćhave. Ama, vićinđa samo eftan te upoznajini len o Samuilo. E najtikne, e Davide, na vićinđa. b A o Devel baš ole birinđa. (Čitin 1. Samuilova 16:6, 7, 10-12.) O Jehova dikhlja soj tano ko Davideso vilo. Đanđa so akava terno ćhavo but mangela le.
9. Sose šaj te ove sigurno so o Jehova brinini pe tutar? (Dikh i slika.)
9 Razmislin sar o Jehova već mothovđa so brinini pe tutar. Ov dela tut najšukar savetija (Ps. 32:8). Sar šaj te ćerel odova ako na đanela tut šukar? (Ps. 139:1). Ako primenineja e Jehovase savetija hem dikheja sar pomožini tut, ka uverine tut so brinini pe tutar (1. Let. 28:9; Dela 17:26, 27). O Jehova dikhela kobor trudineja tut. Isto ađahar, dikhela te šuže osobine hem mangela te ovel paše tuvaja (Jer. 17:10). Ov ka ovel but bahtalo ako mangeja hem tu te ove paše oleja (1. Jov. 4:19).
„Ako rodeja [e Jehova], ka mukhel tut te arakhe le“ (1. Let. 28:9) (Dikh o 9. odlomko) c
AKO PUĆEJA TUT DA LI O ODLUKE KOLA ANĐAN TANE ŠUKAR
10. So šaj te puća amen ked razmislinaja ando odluke kola anđam?
10 Podijekh puti, disave šaj te razmislinen ando pe odluke hem te pućen pe da li anđe šukar odluke. On šaj aćhavđe i karijera ili disavi šukar platimi buti te šaj pobuter te služinen e Jehovase. Ama, odova šaj hine angleder but berš. Šaj razmislinena ando manuša kola anđe averćhane odluke hem akana izgledini so isi len but pare hem so uživinena ko životi. Odolese, šaj pućena pe: „Da li vredinena o žrtve kola ćerđum e Jehovase? Ili šaj valjanđum te ćerav poviše buti te šaj akana te ovel man but pare?“
11. Sose o pisco ando 73. psalam hine obeshrabrimo?
11 Ako diso slično pućeja tut, zapazin sar osetinđa pe o pisco ando 73. psalam. Ov dikhlja sar o manuša kola na služinena e Jehovase tane saste, barvale hem izgledinena so nane len brige (Ps. 73:3-5, 12). Ked dikhlja so olenđe đala šukar ko životi, hine le osećaj so sa odova so ćerđa ki služba e Jehovase hine uzaludno. Ked razmislinđa odolestar, ov phenđa: „O nevolje pogodinena man svako dive“ (Ps. 73:13, 14). Sar borinđa pe protiv pe negativna mislija?
12. Premalo Psalam 73:16-18, sar o pisco pobedinđa pe negativna osećanja?
12 Čitin Psalam 73:16-18. O psalmista đelo ko Jehovaso svetilište. Uduri, šaj hine jasno te razmislini. Ov haljilo so iako izgledini so disave isi len šužo životi, on nane len nada asi budućnost. Sebepi odova, više na hine obeshrabrimo hem hine uverimo so odova so ćhivđa e Jehova ko prvo than ko životi hine najšukar odluka koja anđa. Odolese, hine odlučno te nastavini te služini e Jehovase (Ps. 73:23-28).
13. So šaj te ćere ako pućeja tut da li anđan šukar odluke? (Dikh i slika.)
13 Sar o psalmista, hem tu šaj te pobedine te negativna osećanja. Sar? Razmislin ando šukar buća kola isi tut, sar na primer e Jehovaso blagoslov. O manuša ko sveto odova nane len. Olenđe tano najvažno ko životi te ovel len šukar buti, sose nane len nada asi budućnost. Ama, o Jehova obećini so ka del tut blagoslovija kola našti ni te zamisline (Ps. 145:16). Isto ađahar, razmislin akalestar: „Da li šaj te đane savo bi životi ovela tut ked bi aneja averćhane odluke?“ Jekh buti tani sigurno: Ako aneja odluke odolese so mangeja e Devle hem e manušen, uvek ka ovel tut odova so ka ćerel tut bahtalo.
Razmislin ando blagoslovija kola o Jehova obećini tuće (Dikh o 13. odlomko) d
KED MISLINEJA SO VIŠE NAŠTI TE OVE KORISNO E JEHOVASE
14. Sose disave našalđe po samopouzdanje hem so šaj te pućen pe?
14 Disave e Jehovase sluge našti te ćeren o buća kola bi mangena sose tane phure, naborme ili nemoćna. Odolese, šaj te mislinen so nane vredna anglo Jehovase jaćha. On šaj te pućen pe: „Da li hijum pana korisno e Jehovase?“
15. Ko so hine uverimo o pisco ando 71. psalam?
15 O pisco ando 71. psalam hine le slična osećanja. Ov molinđa pe: „Ma aćhav man ked na ka ovel man više snaga“ (Ps. 71:9, 18). Ama, o psalmista hine uverimo so ako verno služini e Jehovase, ov ka vodini le hem ka pomožini le. Ov haljilo so o Jehova tano zadovoljno okolencar so dena po najšukar olese iako isi len disavo ograničenje (Ps. 37:23-25).
16. So sa o phure šaj te ćeren e Jehovase hem averenđe? (Psalam 92:12-15)
16 Ako hijan phuro, razmislin so o Jehova mislini tutar. Ov šaj te pomožini tut te aćhove duhovno zoralo čak hem ako isi tut disave fizička ograničenja. (Čitin Psalam 92:12-15.) Umesto te razmisline ando odova so našti više te ćere, razmislin ando odova so šaj te ćere. Na primer, šaj te ohrabrine averen te šukar primereja. Šaj te vaćere lenđe sar o Jehova pomožinđa tut sa akala berša hem kola obećanja ki budućnost jedva ađićereja te ispuninen pe. Niked ma bistri kobor te molitve šaj but te pomožinen averenđe (1. Petr. 3:12). Bizo obzir save tane amare okolnostija, sare šaj te da diso e Jehovase hem averenđe.
17. Sose na valjani te uporedina amen averencar?
17 Ako na osetineja tut šukar so našti te ćere diso pobuter ki služba e Jehovase, ov sigurno so ov cenini so god šaj te ćere. Šaj uporedineja odova so ćereja odoleja so avera šaj te ćeren. Ma ćer odova! Sose? Odolese so o Jehova na ćerela odova (Gal. 6:4). Na primer, i Marija dinđa e Isusese ko poklon jekh skupoceno mirisno ulje (Jov. 12:3-5). Ki aver strana, i ćorori udovica ko hram dinđa samo duj tikne novčićija kola na hine len bari vrednost (Luka 21:1-4). O Isus na uporedinđa akale duje romnjen. Ama, dikhlja so osolduj mothovđe vera. O Isus savršeno oponašinđa pe dade. Odolese, šaj te ove sigurno so o Jehova dikhela sa so ćereja odolese so mangeja le hem so isi tut vera. Ov but cenini odova, čak hem ako tu mislineja so odova tano but tikno.
18. So ka pomožini amen te pobedina amare sumnje? (Dikh o okvir „ E Jehovaso Lafi šaj te pomožini tut te pobedine o sumnje“.)
18 Sare podijekh puti isi amen disave sumnje. Ama sar so dikhljam, e Devleso Lafi, i Biblija, šaj te pomožini amen te pobedina len. Trudin tut te arakhe odgovorija ko pućiba kola mučinena tut hem tegani više na ka ove zabrinuto nego ka ovel tut mir. O Jehova obratini pažnja upro svakoneste. Ov cenini sa o žrtve so ćerđan hem obećini so ka blagoslovini tut. Ov sigurno so o Jehova mangela sa pe verna slugen hem brinini pe olendar.
ĐILI 111 Bari tani amari radost
a OBJASNIME LAFIJA: Ko akava članko, vaćeraja ando sumnje kola šaj te ćhiven amen te puća amen da li vredinaja anglo Jehovase jaćha ili da li tane mudra o odluke kola anđam. Odola sumnje na mothovena so nane amen vera ko Jehova ili ko olese obećanja.
b Iako i Biblija na vaćeri kobor berš hine le o David ked o Jehova birinđa le, verovatno hine tinejdžer. (Dikh i Stražarsko kula ando 1. septembar 2011. berš, str. 29, odl. 2.)
