41. ČLANKO PROUČIBASE
ĐILI 13 O Isus, amaro primer
So šaj te sikljova ando Isusese poslednja 40 dive ki phuv?
Pojavinđa pe lenđe 40 dive hem vaćerđa lenđe ando Devleso Kraljevstvo (DELA 1:3)
SO KA SIKLJOVA?
Ka sikljova sar šaj te oponašina e Isuseso primer kova mothovđa ko poslednja 40 dive ki phuv.
1-2. So desinđa pe duje učenikonenđe đi đelje ko Emaus?
AKANA tano 16. nisan 33. berš. E Isusese učenikija tane tužna hem but darana. Duj olendar pođinđe ko Emaus, jekh gav kova tano oko 11 kilometrija dur ando Jerusalim. But tane obeshrabrime odolese so o Isus, o manuš kas sledinđe, tano mudardo. Našalđe pi nada so o Mesija ka ćerel disave šukar buća aso Jevreja. Ama, desinđa pe diso so na očekujinđe.
2 Jekh manuš resela len ko drumo hem počmini te phirel olencar. Odola duj učenikija phenena lese kola okrutna buća desinđe pe e Isusese. Odova manuš tegani počmini te vaćeri lenđe ando buća kola niked na ka bistren. „Počmindoj kotar Mojsije hem sa o Prorokija“, ov objasnini lenđe sose o Mesija morandilo te patini hem te merel. Ked reslje ko Emaus, on haljilje so odova manuš tano o Isus kas o Devel uskrsninđa. Šaj samo te zamislina kobor hine bahtale ked haljilje so o Mesija tano đivdo! (Luka 24:13-35).
3-4. (a) Sar o Isus pomožinđa pe učenikonenđe hem so hine sebepi odova? (b) So ka sikljova ko akava članko? (Dela apostolska 1:3)
3 Ko odola 40 dive đi hine ki phuv, o Isus nekobor putija pojavinđa pe e učenikonenđe. (Čitin Dela apostolska 1:3.) Ov ohrabrinđa len sose hine tužna hem but darandilje. Sebepi odova, on ulje radosna hem hine len snaga te propovedinen hem te sikaven e manušen andi šukar vest kotar Devleso Kraljevstvo. a
4 Amenđe šaj but te pomožini ako proučinaja odolestar so o Isus ćerđa ko odova period. Ko akava članko ka dikha, sar o Isus odova vreme koristinđa (1) te ohrabrini pe učenikonen, (2) te pomožini len pana pošukar te haljon o sveta spisija hem (3) te pripremini len aso pobare odgovornostija. Akana ka dikha sar ki svako andi akija buti šaj te oponašina e Isuse.
OHRABRIN AVEREN
5. Sose e Isusese učenikonenđe valjanđa ohrabrenje?
5 E Isusese učenikonenđe valjanđa ohrabrenje. Sose? Odolese so disave aćhavđe po ćher, pe porodica hem pi buti te šaj te sledinen le (Mat. 19:27). Avera hine maltretirime sose ulje olese učenikija (Jov. 9:22). Sare on hine spremna te ćeren akala žrtve sose verujinđe so o Isus tano o obećimo Mesija (Mat. 16:16). Ama, ked mulo, on hine but tužna hem obeshrabrime sose na đanđe so ka ovel olencar.
6. So o Isus ćerđa palo odova so uskrsninđa?
6 O Isus haljilo so olese učenikija tane tužna na sose isi len slabo vera, već odolese so našalđe le. Odolese, odova isto dive ked uskrsninđa, počminđa te ohrabrini len. Na primer, đi i Marija Magdalena runđa ko oleso grobo, ov pojavinđa pe laće othe (Jov. 20:11, 16). Isto ađahar, pojavinđa pe e duje učenikonenđe kolendar vaćerđam ki početka. A pojavinđa hem e Petarese (Luka 24:34). So šaj te sikljova ando Isuseso primer? Te dikha so hine ked prvo puti pojavinđa pe.
7. So i Marija ćerđa ko grobo hem ko so odova podstakninđa e Isuse? (Jovan 20:11-16; dikh i slika.)
7 Čitin Jovan 20:11-16. Rano sabale ko 16. nisan, nekobor romnja đelje ko Isuseso grobo (Luka 24:1, 10). Jekh ando odola romnja hine i Marija Magdalena. Ked reslja ko grobo, ov hine ćućo. Odolese, đelji te phenel odova e Petarese hem e Jovanese. On duj prastandoj đelje đi o grobo, a oj đelji palo lende. Palo odova so dikhlje so o grobo tano ćućo, alje pese ćhere. Ama, i Marija aćhilji othe hem runđa. Oj na đanđa so o Isus tano othe hem so posmatrini la. Ov dikhlja so rovela sebepi oleso hem manglja te utešini la. Odolese, pojavinđa pe laće hem ćerđa diso jednostavno so but ohrabrinđa la. Ov vaćerđa olaja hem dinđa la jekh važno zadatko, te đal hem te vaćeri olese učenikonenđe so ov uskrsninđa (Jov. 20:17, 18).
Oponašin e Isuse ađahar so ka trudine tut te haljove kola problemija o phralja isi len hem ka utešine len (Dikh o 7. odlomko)
8. Sar šaj te oponašina e Isuse?
8 Sar šaj te oponašina e Isuse? Ađahar so ka ohrabrina amare phralen hem phenjen hem ponodri te služinen e Jehovase. Sar o Isus, hem amen valjani te trudina amen te haljova kola problemija isi len, sar osetinena pe hem te utešina len. Te dikha o primer andi amari phen i Džoslin, kasi phen mulji ko saobraćajno udes. Oj phenela: „Masekoncar osetinđum bari dukh.“ Ama, jekh phral hem olesi romni vićinđe la te đal koro lende hem mukhlje la te vaćeri sar osetini pe. On pažljivo šunđe la hem phenđe laće soj tani but vredno anglo Jehovase jaćha. I Džoslin phenela: „Osetinđum ka phene tasljovava ko more kuri isi bari oluja, ama o Jehova koristinđa e phralen te spasinen man. On pomožinđe man palem te ovel man želja te nastavinav te služinav e Jehovase.“ Hem amen šaj te ohrabrina amare phralen ako mukhaja len te vaćeren sar osetinena pe hem ako pažljivo šunaja len so vaćerena. Ađahar šaj te utešina len hem te pomožina lenđe ponodri te služinen e Jehovase (Rimlj. 12:15).
POMOŽIN AVERENĐE TE HALJON E DEVLESO LAFI
9. So o učenikija našti hine te haljon hem sar o Isus pomožinđa len?
9 E Isusese učenikija verujinđe ko Devleso Lafi hem trudinđe pe te primeninen le ko po životi (Jov. 17:6). Ama, našti hine te haljon sose o Isus mulo sar zločinco. O Isus đanđa so olese učenikija isi len vera hem mangena e Jehova, ama haljilo so valjani pana pošukar te haljon odova so pisini ko sveta spisija (Luka 9:44, 45; Jov. 20:9). Odolese, pomožinđa len te haljon odova so čitinena. Te dikha sar ćerđa odova ked pojavinđa pe e učenikonenđe ko drumo aso Emaus.
10. Sar o Isus pomožinđa pe učenikonenđe te haljon soj tano ov o Mesija? (Luka 24:18-27)
10 Čitin Luka 24:18-27. Zapazin so o Isus na phenđa odmah odole duje manušenđe koj tano ov. Sose? Šaj manglja on te phenen soj tano lenđe ki godi hem ko vilo. Ađahar hem hine. On phenđe lese so nadinđe pe so o Isus ka oslobodini len andi rimsko vlast. O Isus mukhlja len te phenen sa so hine len. Palo odova, ov koristinđa o sveta spisija te pomožini len te haljon so but proročanstvija ispuninđe pe. b Kasnije odija isto rat, ov reslja pe avere učenikonencar hem olenđe objasninđa so značinena odola proročanstvija (Luka 24:33-48). So šaj te sikljova ando akava izveštaj?
11-12. (a) So sikljovaja ando odova sar o Isus sikavđa o ćaćipe? (Dikh i slika.) (b) Sar jekh phral pomožinđa e Nortijese?
11 Sar šaj te oponašina e Isuse? Ked proučineja nekasa, koristin taktična pućiba kola ka podstakninen le te phenel so isi le ki godi hem ko vilo (Posl. 20:5). Ked ka haljove odova, mothov lese sar ki Biblija šaj te arakhi o stihija kola šaj te pomožinen le ki olesi situacija. Ma vaćer lese so te ćerel. Umesto odova, puć le sar haljola odola stihija. Ohrabrin le te razmislini sar šaj te primenini e biblijake načelija. Te dikha o primer ando amaro phral o Norti kotar Gana.
12 O Norti počminđa te proučini i Biblija ked hine le 16 berš. Sigate palo odova, olesi porodica počminđa te protivini pe lese. So pomožinđa lese te aćhol verno? O phral kova proučinđa oleja već mothovđa lese so pisini ko Matej 10. poglavlje hem vaćerđa lese so o prava hrišćanija ka oven progonime. O Norti phenela: „Ked o progonstvo počminđa, me hijum le uverimo so arakhljum o ćaćipe.“ O phral mothovđa lese hem o stih ando Matej 10:16 kuri pisini so valjani te ova oprezna. Palo odova, vaćerđe sar šaj akava stih te pomožini e Nortijese te objasnini pe verovanja pe porodicaće, ama ko način kova ka mothovi poštovanje. O Norti krstinđa pe hem manglja te ovel pioniri. Ama, oleso dad očekujinđa olestar te đal ko fakultet. Umesto te phenel e Nortijese so te ćerel, odova phral koristinđa nekobor pućiba kola pomožinđe lese te razmislini ando biblijake načelija hem kokri te anel ispravno odluka. So o Norti ćerđa? Ov odlučinđa te ovel pioniri. Oleso dad phenđa lese te ikljol ando ćher. Sar o Norti osetinđa pe sebepi odova? Ov phenela: „Uverimo hijum so anđum ispravno odluka.“ Ked ohrabrinaja averen te razmislinen ando biblijake načelija, amen pomožinaja len te oven zrela hrišćanija (Ef. 3:16-19).
Oponašin e Isuse ađahar so ka koristine i Biblija te pomožine e manušenđe te aven đi o ispravno zaključak (Dikh o 11. odlomko) e
POMOŽIN E PHRALENĐE TE OVEN „DAR“ AVERENĐE
13. So o Isus ćerđa te šaj o propovedibe te nastavini pe palo odova so irinđa pe ko nebo? (Efešanima 4:8)
13 Đi hine ki phuv, o Isus savršeno ćerđa odova so oleso Dad phenđa lese (Jov. 17:4). Ama, ov niked na hine le asavko stav: „Ako mangeja diso te ovel ćerdo sar so valjani, tegani odova valjani kokri te ćere.“ Trin tekvaš berš, o Isus hem propovedinđa hem dinđa obuka e učenikonenđe. Angleder te irini pe ko nebo, ov dinđa len zadatko te propovedinen, te sikaven o ćaćipe andi šukar vest hem te brininen pe ando Devlese bakre. Disave kola predvodinđe hine len pohari ando 30 berš. (Čitin Efešanima 4:8.) Sar o Isus koristinđa o poslednja 40 dive te pomožini akale verno hem bućarne manušenđe te oven sar „dar“ e manušenđe?
14. So o Isus sikavđa pe učenikonen ko poslednja 40 dive ki phuv? (Dikh i slika.)
14 O Isus dinđa e učenikonenđe savetija kola valjanđe lenđe, ama ko šukar način. Na primer, ov dikhlja so olese učenikija isi len sumnje hem odolese dinđa len savet (Luka 24:25-27; Jov. 20:27). Isto ađahar, phenđa lenđe so pobuter valjani te razmislinen ando odova sar te pomožinen e Devlese narodose, a na sar te zaradinen pobuter pare (Jov. 21:15). Setinćerđa len te na uporedinen odova so on ćerena ki Jehovasi služba odoleja so avera šaj te ćeren (Jov. 21:20-22). Uzo odova, ov ispravinđa o pogrešna stavija kola hine len ando Devleso Kraljevstvo hem pomožinđa len te usredsredinen pe ko odova te propovedinen i šukar vest (Dela 1:6-8). So šaj o starešine te sikljon ando Isus?
Oponašin e Isuse ađahar so ka sikave averen te prihvatinen pobare odgovornostija (Dikh o 14. odlomko)
15-16. (a) Sar o starešine oponašinena e Isuse? Objasnin. (b) Sar o savet pomožinđa amare phralese e Patrikese?
15 Sar šaj o starešine te oponašinen e Isuse? On valjani te den obuka e phralenđe, čak hem e ternenđe, te šaj te prihvatinen pobare odgovornostija. c O starešine na ađićerena olendar te oven savršena. On valjani te den len savet ko jekh ljubazno hem blago način te šaj odola terne phralja te haljon so valjani te oven ponizna, pouzdana hem spremna te pomožinen averenđe (1. Tim. 3:1; 2. Tim. 2:2; 1. Petr. 5:5).
16 Te dikha sar o savet pomožinđa amare phralese kova vićini pe Patrik. Ked hine terno, ov hine grubo hem na hine ljubazno, čak ni premalo phenja. Jekh zrelo starešina dikhlja so o Patrik valjani te menini pe. Dinđa le savet, ama ko jekh šukar način. O Patrik phenela: „But maje drago so ćerđa odova. Angleder, na hine maje sa jekh ked bi avera dobinena disave odgovornostija ja zadatkija kola me mangljum. Ama, palo odova savet haljiljum so nane najvažno te oven man disave odgovornostija ki skupština nego ponizno te služinav e phralenđe hem phenjenđe.“ Sebepi odova, ked hine le 23 berš ulo starešina (Posl. 27:9).
17. Sar o Isus mothovđa so isi le poverenje upro pe učenikija?
17 O Isus na phenđa pe učenikonenđe samo te propovedinen e manušenđe, već hem te sikaven len (Mat. 28:20). O učenikija šaj mislinđe so nane sposobna aso odova. Ama, o Isus hine sigurno so on odova šaj te ćeren. Odobor hine sigurno so phenđa lenđe: „Sar so o Dad bićhalđa man, ađahar hem me bićhalava tumen“ (Jov. 20:21).
18. Sar šaj o starešine te oponašinen e Isuse?
18 Sar šaj o starešine te oponašinen e Isuse? Ađahar so ka sikaven e phralen hem ka den len disave odgovornostija (Fil. 2:19-22). Na primer, šaj te zamolinen e ternen te pomožinen te čistini pe hem te održini pe i dvorana. Ked ka den e phralenđe disavo zadatko, o starešine ka sikaven len hem sar te ćeren le. A palo odova, ka ovel len hem poverenje upro lende so on šaj te ćeren odova. O Metju, kova akana sigende ulo starešina, tano but zahvalno so o iskusna starešine sikavđe le sar te ćerel razna zadatkija ki skupština hem so hine len poverenje upro leste. Ov phenela: „Ked ćerđum greške, pomožinđe man te dikhav so šaj te sikljovav ando odola greške hem aver puti te ovav pošukar.“ d
19. So valjani te ova odlučna te ćera?
19 Palo po uskrsenje, o Isus 40 dive hine ki phuv hem odova vreme koristinđa te ohrabrini, te sikavi hem te del obuka averenđe. Hajde hem amen te ova odlučna te sledina oleso primer (1. Petr. 2:21). Ov ka pomožini amen te ćera odova. O Isus obećinđa: „Me hijum tumencar ko sa o dive đi o svršetko ando akava poretko“ (Mat. 28:20).
ĐILI 15 Slavin e Kralje!
a Ko Jevanđelja hem ko avera knjige ki Biblija pisini so o Isus pojavinđa pe e učenikonenđe nekobor putija palo uskrsenje. Pojavinđa pe e Marija Magdalenaće (Jov. 20:11-18), avere romnjenđe (Mat. 28:8-10; Luka 24:8-11), e duje učenikonenđe (Luka 24:13-15), e Petarese (Luka 24:34), e apostolenđe ked o Toma na hine othe (Jov. 20:19-24), e apostolenđe ked o Toma hine othe (Jov. 20:26), e efta učenikonenđe (Jov. 21:1, 2), anglo 500 učenikija (Mat. 28:16; 1. Kor. 15:6), pe phralese e Jakovese (1. Kor. 15:7), sa e apostolenđe (Dela 1:4) hem e apostolenđe paše uzi Vitanija (Luka 24:50-52). Šaj pana pojavinđa pe sledbenikonenđe, ama i Biblija na vaćeri odolestar (Jov. 21:25).
b Ako mangeja te đane kola proročanstvija vaćerena ando Mesija, ko amaro sajt dikh o članko „Da li o proročanstvija mothovena so o Isus hine o Mesija?“
c Ko disave situacije, disave terne starešine šaj te oven naimenujime te služinen sar pokrajinska nadglednikija čak ked isi len 25-30 berš. Ama, odola phralja najangleder valjani te ovel len iskustvo sar starešine.
d Aso dodatna predlogija sar te pomožini pe e terne phralenđe te ispuninen o uslovija aso odgovornostija, dikh i Stražarsko kula kotar avgust 2018. berš, str. 11-12, odl. 15-17 hem i Stražarsko kula kotar 15. april 2015. berš str. 3-13.
e SO DIKHAJA KO SLIKE: Jekh phral pomožini e manušese koleja proučini te razmislini ando odova so pisini ki Biblija hem palo odova ov haljola sar te ugodini e Jehovase.
