1. Ko dinđa amen sposobnost te vaćera?

 O JEHOVA dinđa amen sposobnost te vaćera. Samo so hine stvorimo, o Adam šaj hine te vaćeri pe nebesko Dadeja. Isto ađahar, šaj hine te ćerel hem neve lafija. Odova ćerđa ked dinđa anava e životinjenđe (Post. 2:19). Šaj samo te zamisline kobor hine bahtalo ked prvo puti vaćerđa pe šuže romnjaja, e Evaja! (Post. 2:22, 23).

2. Sar o manuša angleder koristinđe i sposobnost te vaćeren, a sar avdije?

² Ama, sigate palo odova, o poklon kova o Devel dinđa amen počminđa te koristini pe ko lošno način. O Beng hovavđa e Eva hem sebepi odova o manuša ulje grešna hem nesavršena (Post. 3:1-4). O Adam krivinđa e Eva pa čak hem e Jehova sebepi odova so ov grešinđa (Post. 3:12). O Kain hovavđa e Jehova palo odova so mudarđa pe phralje, e Avelje (Post. 4:9). Hari palo odova, o Lameh ćerđa jekh đili koja mothovđa kobor o manuša hine nasilna ko oleso vreme (Post. 4:23, 24). Ama, save tane o manuša avdije? Disavo puti, o političarija na lađana anglo avera te vaćeren ružna lafija. Isto ađahar, avdije tano pharo te arakha disavo film ko kova na akošena. Čak ki škola hem ki buti o manuša na lađana te koristinen ružna lafija. Odova so o manuša avdije koristinena odobor ružna lafija mothovi amenđe kobor o sveto ulo lošno.

3. Ko so valjani te pazina hem sostar ka vaćera ko akava članko?

 ³ Ama, isi jekh opasnost. Ako sikljiljam te šuna ružna lafija, but sigate hem amen ka počmina te koristina len. Sar e Devlese sluge, amen mangaja te ćera e Jehova te ovel bahtalo na samo odoleja so na ka vaćera ružna lafija, već hem odoleja so ka hvalina le. Ko akava članko, ka dikha sar šaj odova te ćera (1) ki služba, (2) ko sastankija, hem (3) đi vaćeraja averencar. Ama, najangleder ka dikha sose tano e Jehovase važno so vaćeraja.

4. Premalo Malahija 3:16, sose tano e Jehovase važno odova so vaćeraja?

⁴ Čitin Malahija 3:16. Da li đaneja sose o Jehova ki pi knjiga pisini o anava ando okola kase lafija mothovena so darana olestar hem so razmislinena ando oleso anav? Odova so vaćeraja mothovi soj tano amenđe ko vilo. O Isus phenđa: „O muj vaćeri odova soj tano o vilo pherdo“ (Mat. 12:34). Odova sostar vaćeraja mothovi kobor mangaja e Jehova. O Jehova mangela te del večno životi e manušenđe kola mangena le.

5. (a) Sar amare lafija utičinena ki amari služba e Jehovase? (b) Sar so dikhaja ki slika, sar na valjani te koristina amari ćhib?

⁵ Da li o Jehova ka prihvatini sa odova so ćeraja olese ja na, zavisini odolestar sar koristinaja amari ćhib (Jak. 1:26). Disave manuša kola na mangena e Devle tane holjame, gruba hem ponosna (2. Tim. 3:1-5). Amen na mangaja te ova sar olende, već mangaja amare lafija te ćeren e Jehova te ovel bahtalo. Ama, da li o Jehova ka ovel bahtalo ako ko sastankija hem ki služba hijam ljubazna, a ćhere ked niko na dikhela amen hem na šunela amen hijam neljubazna amare ćherutnencar? (1. Petr. 3:7).

6. Đi soste anđa odova so i Kimberli pazinđa ki pi ćhib?

⁶ Amare lafija šaj averenđe te mothoven so amen služinaja e Jehovase.  Ađahar o manuša šaj te dikhen i razlika „maškaro okova kova služini e Devlese hem okova kova na služini lese“ (Mal. 3:18). Te dikha jekh primer. Amari phen i Kimberli * hem olaki amalin valjanđe zajedno te ćeren jekh zadatko ki škola. Odija amalin dikhlja so i Kimberli tani averćhane ando avera. Oj nikastar na vaćerđa palo dumo, uvek hine ljubazno hem niked na akošlja. Olaki amalin hine oduševimi hem odolese počminđa te proučini i Biblija. O Jehova tano bahtalo ked sebepi odova sar vaćeraja, o manuša mangena te sikljon olestar.

7. Sar mangeja te koristine ti ćhib?

⁷ Sare amen mangaja te hvalina e Jehova amare lafencar hem te ova pana popaše amare phralencar. Odolese, akana ka dikha sar šaj hem ponodri te ova primer ko odova sar vaćeraja.

8. Savo primer aćhavđa amenđe o Isus?

⁸ Ov ljubazno hem mothov so poštujineja averen čak ked tane gruba. Ked o Isus hine ki phuv, o manuša phenđe lese soj tano halano, so but pijela, so o Beng pomožini lese, so na ićeri pe ko Zakon ando sabat hem so na poštujini e Devle (Mat. 11:19; 26:65; Luka 11:15; Jov. 9:16). Ama, o Isus na holjanđa upro lende hem na vaćerđa olencar ko isto način. Sar o Isus, hem amen na valjani te irina e manušenđe ked tane gruba premalo amende (1. Petr. 2:21-23). Ama, nane lokho te mothova asavki samokontrola (Jak. 3:2). So šaj te pomožini amenđe?

9. So ka pomožini amenđe te kontrolišina amari ćhib ked hijam ki služba?

⁹ Ako ki služba tano neko neljubazno premalo tute, ma ov uznemirimo već de sa tutar te haljove sose tano asavko. Amaro phral o Sam, phenela: „Ked hijum ki služba razmislinava odolestar kobor e manušenđe valjani o ćaćipe hem niked na bistrava so svako manuš šaj te menjini pe.“ Disavo puti o manuša tane holjame sose aljam ko pogrešno vreme. Ked ki služba tano neko holjamo, amen šaj te ćera odova so ćerela amari phen i Lusia. Šaj kratko te molina e Jehova te pomožini amen te ovel amen mir, te mothova poštovanje hem te na phena diso so ka uvredini e osoba.

10. Premali 1. Timoteju 4:13, kova cilj valjani te ovel amen?

¹⁰ De sa tutar pana pošukar te sikave averen. Iako o Timotej hine but šukar ki služba, ov hem ponodri morandilo te sikljol sar šaj pana pošukar te sikavi averen.  (Čitin 1. Timoteju 4:13.) Sar šaj amen pana pošukar te sikava e manušen? Valjani šukar te spremina amen asi služba. E Jehovasi organizacija dinđa amen but buća kola šaj te pomožinen amen pana pošukar te sikava averen. Disave olendar tane amari brošura Sikljov pošukar te čitine hem te sikave hem o deo kotar Radno sveska „De sa tutar ki služba.“ Da li već koristineja akala publikacije? Ked šukar spremineja tut asi služba, na ka ovel tut odobor bari trema hem ka dićhol so hijan uverimo ko odova so vaćereja.

11. Sar disave phralja hem phenja ulje pana pošukar učiteljija?

¹¹ Amen šaj te ova pana pošukar učiteljija ađahar so sikljovaja averendar. Amaro phral o Sam dikhlja so disave amare phralja hem phenja tane šukar učiteljija. Odolese, ov pažljivo šunela sar on sikavena averen hem trudini pe te sikavi e manušen sar olende. Amari phen i Talia sikljola sar te odgovorini ko disavo pućibe ađahar so pažljivo šunela sar amare phralja ko pe govorija odgovorinena ko disave pućiba.

12. Soj tano pharo disavenđe te ćeren?

¹² Sare amen šaj te učestvujina ko sastankija ađahar so ka đilaba hem so ka da šukar pripremime komentarija (Ps. 22:22). Disavenđe tano pharo te đilaben hem te den komentarija. Da li tano hem tuće pharo? Ako tano ađahar, sikljov so pomožinđa averenđe te na lađan te đilaben hem te na daran te den komentarija ko sastankija.

13. So šaj te pomožini tut celone vileja te đilabe ko amare sastankija?

¹³ Celone vileja đilab amare đilja. O najvažno razlog sose đilabaja ko amare sastankija tano te hvalina e Jehova. Amari phen i Sara mislini so na đanela odobor šukar te đilabi. Ama, oj mangela te hvalini e Jehova. Sebepi odova ked pripremini pe aso sastankija, oj pripremini hem o đilja. Ked vežbini te đilabi, trudini pe dikhel sar o lafija andi đili tane povezime odoleja sostar ka vaćeri pe ko sastanko. Oj phenela: „Ked razmislinava ando lafija kola isi ki đili, tegani nane maje važno kobor šukar đilabava.“

14. So šaj te pomožini tuće ako daraja te de komentarija ko sastankija?

¹⁴ Redovno de komentarija. Disavenđe odova šaj te ovel but pharo. I Talia phenela: „But maje pharo te dav komentarija sose isi man bari trema ked valjani te vaćerav anglo avera. O manuša odova  na primetinena sose odova na dićhola ko mo glaso.“ Ama, i Talia dela sa pestar te komentarišini. Ked pripremini pe aso sastankija, oj razmislini odolestar so o prvo komentari valjani te ovel kratko hem direktno odgovor ko pućibe. Oj phenela: „Odova mothovi soj tano šukar ako tano mo odgovor kratko hem jednostavno sose asavko odgovor o voditelj rodela.“

15. Sar o Jehova dikhela ko amare komentarija?

¹⁵ Čak hem okola kola na lađana podijekh puti bezdinena pe te den komentarija. Sose? Amari phen i Žuliet, phenela: „Disavo puti bezdinava man te dav komentarija sose darava so mo komentari tano but jednostavno hem nane dovoljno šukar.“ Ama, ma bistri so o Jehova rodela amendar te da olese amaro najšukar. * Ov tano bahtalo ked dikhela so amen komentarišinaja ko sastankija, iako disavo puti isi amen bari trema.

16. Save lafija na valjani te koristina?

¹⁶ Ma uvredin averen (Ef. 4:31). Sar so vaćerđam angleder, nijekh phral ja phen na ka koristini ružna lafija hem na ka akoši. Ama, isi hem avera načinija sar šaj amare lafencar te povredina averen hem valjani te pazina te na koristina asavke lafija. Na primer, na valjani te vaćera lošno andi nekasi kultura ja nacija. Isto ađahar, na mangaja te povredina averen ađahar so ka mara lenđe muj. Jekh phral phenela: „Podijekh puti marđum muj nekase sose mislinđum so odova tano smešno. Ama, ađahar samo povredinđum odola osoba. Sar đelje o berša, mi romni but pomožinđa man ađahar so ked hijam le kokri phenđa maje da li me lafija povredinđe ola ja nekas avere.“

17. Premalo Efešanima 4:29, sar šaj te ohrabrina averen?

¹⁷ Zorjaćer averen te lafencar. De sa tutar te pohvaline nekas umesto te kritikujine ja te žaline tut. (Čitin Efešanima 4:29.) Iako o Izraelcija hine len but razlogija te oven zahvalna, on stalno žalinđe pe. Ako amen stalno žalinaja amen hem avera ka počminen te ćeren odova. Setin tut so ulo ked o deš uhodija anđe lošno izveštaj. Sa o Izraelcija počminđe te buninen pe protiv o Mojsije (Br. 13:31–14:4). Ki aver strana, i pohvala šaj te del nekase but bari snaga. E Jeftajesi ćhaj šaj hine te ćerel po zadatko  sose olake amalinja redovno alje te ohrabrinen la hem te pohvalinen la (Sud. 11:40). I Sara phenela: „Ked pohvalinaja averen, amen pomožinaja lenđe te haljon so o Jehova hem amare phralja hem phenja ki skupština but mangena len.“ Odolese, ked god šaj pohvalin te phralen hem te phenjen.

18. Premalo Psalam 15:1, 2, sose valjani te vaćera o ćaćipe hem so odova značini?

¹⁸ Vaćer o ćaćipe. Amen našti te ugodina e Jehovase ako hovavaja. Ov mrzini svako hovajbe (Posl. 6:16, 17). Iako avdije e manušenđe tano normalno te hovaven, o Jehova mangela ko hovajba te dikha ađahar sar so ov dikhela. (Čitin Psalam 15:1, 2.) Naravno, amen na hovavaja. Ama, ki aver strana na garavaja disave buća samo sose mangaja te ćhiva nekas te mislini diso so nane ćaće.

19. Ko so pana valjani te pazina?

¹⁹ Ma vaćer averendar palo dumo (Posl. 25:23; 2. Sol. 3:11). I Žulijet phenela kobor odova lošno utičini upro late. Oj phenela: „Ked šunava so neko lošno vaćeri averendar, odova obeshrabrini man. Palo odova, našalava mo poverenje ki odija osoba koja vaćeri averendar palo dumo. Ko krajo, sar đanava so tajsato dive na ka vaćeri lošno mandar?“ Ako anglo tute neko počmini te vaćeri lošno averendar, tegani ćhinav odova razgovor hem počmin te vaćere diso šukar (Kol. 4:6).

20. Sar mangeja te koristine ti sposobnost te vaćere?

²⁰ Amen živinaja ko sveto kuri o manuša koristinena ružna lafija. Odolese, valjani te da sa amendar amare lafencar te ugodina e Jehovase. Ma bistri so i sposobnost te vaćera tani poklon ando Jehova hem olese tano važno sar vaćeraja. Ov ka blagoslovini amen ked daja sa amendar amare lafencar te hvalina le ki služba, ko sastankija hem đi vaćeraja averencar. Ked o Jehova ka uništini akava lošno sveto, amenđe ka ovel polokho te hvalina le amare lafencar (Jud. 15). Ama, đi na avela odova dive, de sa tutar te hvaline le te lafencar (Ps. 19:14).