Ked daja sovel odova tano diso ozbiljno hem tegani daja lafi so ka ćera diso hem but putija pominaja so o Devel tano amaro svedoko. I sovel šaj te ovel pisimi ja dindi lafencar.

Disave šaj te mislinen so nane šukar te da sovel sose o Isus phenđa: „Nisar ma den sovel. . . Ked vaćerena: ’Ja‘, nek odova značini ’ja‘, a ked vaćerena: ’Na‘, nek odova značini ’na‘. Soj tano pobuter odolestar, ando Beng tano“ (Mat. 5:33-37). Naravno, o Isus đanđa so premalo Mojsijeso zakon podijekh puti o Izraelcija valjanđe te den sovel hem so angleder e Devlese verna sluge dinđe sovel (Post. 14:22, 23; Izl. 22:10, 11). Isto ađahar, ov đanđa so hem o Jehova dinđa sovel (Jevr. 6:13-17). Odolese, o Isus na mislinđa so niked na valjani te da sovel. Umesto odova, ov upozorinđa e manušen so na valjani te den sovel aso disave nevažna buća. Uvek valjani te ćera odova so phenđam, sose o Jehova rodela amendar te ćera ađahar.

So ka ćera ako neko rodela amendar te da sovel? Sar prvo, puć tut da li šaj te ćere odova so deja lafi so ka ćere. Ako na hijan sigurno so šaj te ćere odova, ovela bi pošukar te na de sovel. Ko Devleso Lafi pisini: „Pošukar tano te na de to lafi, nego te de to lafi hem te na ispunine le“ (Prop. 5:5). Sar dujto, dikh kola e biblijake načelija vaćerena odolestar, hem palo odova ćer odova so ti savest mukhela tut te ćere. Akana ka dikha disave načelija andi Biblija.

Disavo puti šaj te odlučina te da sovel ako tano odova premali Devlesi volja. Na primer, ked venčinena pe e Jehovase svedokija dena zavet. Odola zavetija tane sar jekh vrsta sovel. Anglo Devel hem anglo manuša o ćhavo hem i ćhaj dena lafi so ka mangen hem so ka poštujinen jekh jekhe sa đi tane đivde. (Ked venčinena pe, disave parija šaj na phenena ista odola lafija, ama ipak dena zavet anglo Devel.) Tegani ovena rom hem romni hem valjani te aćhon ko brak sa đi tane đivde (Post. 2:24; 1. Kor. 7:39). Asavko bračno zavet tano premali Devlesi volja.

Disavo puti o Jehova na mangela te da sovel. O prava hrišćanija na dena sovel so ka len o oružje te braninen pi phuv ja so ka mukhen e Devle. Ked bi ćerena ađahar, on na bi mothovena so ićerena pe ko Devlese zakonija. Amen „na hijam deo ando akava sveto“ hem odolese na učestvujinaja ko odova so ćerela pe ko akava sveto (Jov. 15:19; Is. 2:4; Jak. 1:27).

 Podijekh puti premali amari savest valjani te odlučina da li ka da sovel ja na. Angleder te da sovel, valjani šukar te razmislina ando Isuseso savet: „Den e carese e careso, a e Devlese e Devleso“ (Luka 20:25).

Na primer, ko disave phuvja jekh hrišćanin šaj valjani te del sovel te šaj te dobini državljanstvo ja pasoš. Ako tegani valjani te del lafi so ka ćerel diso so nane premalo Devleso zakon, olesi savest na ka mukhel le te ćerel odova. O vlastija šaj ka mukhen le hari te menjini o lafija te šaj olesi savest te mukhel le te del sovel.

Ako jekh hrišćanin hari menjinđa o lafija hem dela sovel, tegani ov mothovi so ićeri pe ko lafija ando Rimljanima 13:1, kuri pisini: „Svako manuš nek ovel podložno e vlastenđe soj tane upreder oleste.“ Odolese, jekh hrišćanin šaj te odlučini so nane pogrešno te del sovel sose ov samo ćerela odova so o Devel rodela olestar.

But tano važno te šuna amari savest ked rodela pe amendar te ćera disavo gest đi daja sovel. O Rimljanija hem o Skitija ko purano vreme dinđe sovel upro po mač hem odova značinđa so o devel ando maribe hine sar garancija so odija osoba vaćeri o ćaćipe. Ked dinđe sovel, o Grkija vazdinđe pe vasta premalo nebo. Ađahar mothovđe so isi neko ko šunela odova soj tano vaćerdo hem ko dikhela odova soj tano ćerdo hem kase o manuša tane odgovorna.

Naravno, jekh e Devleso sluga na ka del sovel upro disavo simboli kova tano povezimo e hovavne religijencar. Ama, so ako hijan ko sudo hem rodela pe tutar te ćhive to vas upri Biblija hem te de sovel so ka vaćere o ćaćipe? Ki akija situacija, šaj ka odlučine te ćere odova sose i Biblija vaćeri so disave verna manuša ando purano vreme ked dinđe sovel ćerđe hem disavo gest (Post. 24:2, 3, 9; 47:29-31). Ama, ma bistri so ked deja sovel, tu deja lafi anglo Devel so ka vaćere o ćaćipe. Tegani, tu valjani te vaćere o ćaćipe ko bilo kova pućibe.

Amaro amalipe e Jehovaja tano but važno amenđe. Odolese, angleder te da sovel amen valjani te molina amen hem te razmislina da li tano odova premalo biblijake zakonija hem da li amari savest ka mukhel amen te ćera odova. Ako dinđan sovel, valjani te ićere tut ko to lafi (1. Petr. 2:12).