Ki asavki situacija, i skupština ka dikhel so o brak kova hine le angleder završinđa pe ked palem khuvđa ko brak hem ko nevo brak ka dikhen sar brak kova važini anglo zakon. Te šaj te haljova sar aljam đi odova zaključko, akana ka dikha so o Isus phenđa ando razvod hem ando odova palem te khuvel pe ko brak.

Ko Matej 19:9 o Isus phenđa kova tano jedino razlog aso razvod premalo Devleso Lafi. Ov phenđa: „Ko razvedini pe andi pi romni, osim sebepi o blud, hem ženini pe averaja, ćerela preljuba.“ Kotar akala Isusese lafija haljovaja so (1) o blud tano jedino biblijako razlog aso razvod hem (2) o manuš kova razvedini pe andi pi romni bizo te ovel le biblijako razlog hem ženini pe averaja ćerela preljuba. *

Da li akala e Isusese lafija značinena so o rom kova ćerđa preljuba hem razvedinđa pe andi pi romni šaj palem te khuvel ko brak premali Biblija? Ne mora te značini. Ked o rom ćerela preljuba, i romni koja tani prevarimi šaj te odlučini da li ka oprostini pe romese ja na. Ako oj našti te oprostini lese hem rodela razvod, tegani o solduj tane slobodna palo razvod palem te khuven ko brak nekasa avereja.

Ki aver strana, i romni šaj mangela te arakhi po brak hem phenela soj tani spremno te oprostini lese. Ama, so ako o rom kova ćerđa preljuba na mangela više te ovel pe romnjaja hem rodela zakonski te razvedini pe olatar? Odolese so i romni tani spremno te oprostini lese hem te aćhol ko brak oleja, premali Biblija ov nane slobodno palem te ženini pe. Ako ov odlučini te khuvel ko brak avera romnjaja, iako nane slobodno te ćerel odova, ov palem ćerela preljuba. Odolese, o starešine andi skupština palem ka formirinen disciplinsko odbor (1. Kor. 5:1, 2; 6:9, 10).

Ked o rom kova premali Biblija nane slobodno aso brak palem ženini pe, sar i skupština valjani te dikhel ko brak kova hine le angleder hem ko brak kova isi le akana? Premali Biblija, da li o brak kova hine le angleder pana važini? Da li olesi prvo romni pana šaj te odlučini da li te oprostini lese ja na? Da li ko oleso nevo brak i skupština ka dikhel sar ko preljubničko brak?

Angleder, sa đi i prvo romni hine đivdi, sa đi palem na khuvđa ko brak ja na ćerđa blud, i skupština ko odova nevo brak dikhlja sar ko preljubničko brak. Ama, ked o Isus vaćerđa ando razvod hem kotar odova palem te khuvel pe ko brak, ov na vaćerđa ando bračno drug kova tano prevarimo. Umesto odova, ov phenđa so ako o rom rodela razvod bizo te ovel le biblijako razlog  hem ženini pe avera romnjaja, ov ćerela preljuba. Ki asavki situacija, premalo Isusese lafija, odoleja so razvedinđa pe hem palem khuvđa ko brak, soj tano preljuba, ćhinavi pe o prvo brak.

Ked o rom razvedini pe andi pi romni hem palem ženini pe, o brak kova hine le e prvona romnjaja više na važini hem olatar na ađićeri pe te odlučini da li ka oprostini lese ja na. Oj više na valjani te anel odija phari odluka. Isto ađahar, sar i skupština dikhela ko nevo brak na ka zavisini odolestar da li i prvo romni mulji, palem khuvđa ko brak ja da li ćerđa blud. *

Ko primer kova đi akana razmotrinđam, o rom ćerđa preljuba hem sebepi odova ov hem olesi romni razvedinđe pe. Ama, so ako o rom razvedinđa pe iako na ćerđa preljuba hem palo odova palem ženinđa pe? Ja so ako o rom na ćerđa preljuba angleder o razvod već palo razvod hem palo odova ženinđa pe averaja iako olesi prvo romni hine spremno te oprostini lese? Ko sa akala primerija, odoleja so razvedinđa pe hem palem khuvđa ko brak (soj tano preljuba) ćhinavi pe o prvo brak. Akana akava nevo brak važini anglo zakon. Ko srpsko izdanje andi Stražarsko kula kotar 1. april 1980. berš ki 31. strana objasnini pe so o rom akana khuvđa ko nevo brak hem našti samo ađahar te ćhinavi odova brak hem te irini pe e prvona romnjaće. O prvo brak završinđa pe ked ov razvedinđa pe, ćerđa preljuba hem palem ženinđa pe.

Akava nevo objašnjenje na značini so o hrišćanija ko brak na dikhena sar diso soj tano sveto hem so i preljuba nane ozbiljno greh. Ked o rom razvedini pe andi pi romni, iako nane le biblijako razlog hem palo odova ženini pe avera romnjaja iako premali Biblija nane slobodno aso odova, o starešine andi skupština ka formirinen disciplinsko odbor sose ćerđa preljuba. (Ako odija nevi romni tani phen hem sebepi olako ka formirini pe disciplinsko odbor sose hem oj ćerđa preljuba.) Iako ko odova nevo brak na ka dikhel pe sar ko preljubničko brak, odova phral but berša na ka ovel le disave posebna zaduženja ki skupština sa đi o phralja hem o phenja tane uznemirime sebepi o lošna buća kola ćerđa hem sa đi mislinena so ov na zaslužini olengo poštovanje. Angleder te den le bilo kova zaduženje, o starešine ka razmislinen sar živini i prvo romni hem olenge tikne (maloletna) ćhave ako aćhavđa len (Mal. 2:14-16).

Akana ked dikhljam kola posledice šaj te oven ked neko razvedini pe iako nane le biblijako razlog aso odova hem palem ženini pe, mudro tano te oponašina e Jehova hem ko brak te dikha sar diso sveto (Prop. 5:4, 5; Jevr. 13:4).