1. Ko so šaj te ova sigurna?

 AMEN hijam e Jehovase sluge hem đanaja so o Jehova but mangela amen hem mangela te ovel amen najšukar životi (Rimlj. 8:35-39). Isto ađahar, amen hijam sigurna so ako primeninaja o načelija andi Biblija, on ka pomožinen amen (Is. 48:17, 18). Ama, so šaj te ćera ako ovena amen problemija kola na očekujinđam?

2. Kola problemija šaj te oven amen hem so šaj te puća amen?

² Sa e Jehovase sluge isi len problemija. Na primer, šaj neko andi amari porodica razočarinđa amen. Šaj hijam but naborme hem odolese našti te ćera odobor kobor bi mangaja ki služba e Jehovase. A neko amendar šaj doživinđa disavi prirodno katastrofa ja progonstvo. Ked isi amen asavke problemija šaj pućaja amen: „Sose baš maje desini pe odova? Da li diso grešinđum? Da li odova značini so o Jehova na blagoslovini man?“ Da li nekad osetinđan tut ađahar? Ako ja, na hijan jedino. But amare phralja hem phenja osetinena pe sar tute (Ps. 22:1, 2; Avak. 1:2, 3).

3. So šaj te sikljova ando Psalam 34:19?

³ Čitin Psalam 34:19. Ko akava stih šaj te dikha duj važna buća. Sar prvo, o pravedna manuša isi len pharipa. Sar dujto, o Jehova ikali amen ando odola pharipa. Sar ćerela odova? Jekh način tano ađahar so pomožini amen te dikha realno ko buća kola desinena pe amenđe. O Jehova phenela so ka uživina đi služinaja lese, ama ov na phenela so akana na ka oven amen problemija (Is. 66:14). Ov podstaknini amen te razmislina andi budućnost  ked ka uživina ko životi ađahar sar so ov mangela (2. Kor. 4:16-18). A đi odova vreme na avela, ov pomožini amen te aćhova lese verna svako dive (Tužb. 3:22-24).

4. Sostar ka vaćera ko akava članko?

⁴ Akana ka razmotrina disave primerija ando Jehovase sluge kotar purano vreme hem kotar amaro vreme. Sar so ka dikha, hem amen šaj te oven amen disave neočekivana problemija. Tegani, valjani te uzdajina amen ko Jehova sose ov uvek ka pomožini amen (Ps. 55:22). Đi ka razmotrina akala primerija, puć tut: „So bi me ćerava te ovav ko olengo than? Sar akala primerija zorjaćerena mo poverenje ko Jehova? So ando akala primerija šaj te primeninav ko mo životi?“

5. Kola pharipa hine le o Jakov sebepi o Lavan? (Dikh i slika kotar naslovno strana.)

⁵ E Jehovase sluge ko purano vreme hine len but problemija kola na očekujinđe. Te dikha o primer ando Jakov. Oleso dad phenđa lese te đal ki pi familija ko Lavan, kova služinđa e Jehovase hem te ženini pe jekha olese ćhajaja. Oleso dad hine sigurno so o Jehova but ka blagoslovini le (Post. 28:1-4). O Jakov ćerđa odova. Mukhlja pi phuv Hanan hem đelo ko Lavan kova hine le duj ćhaja, i Lija hem i Rahela. O Jakov zaljubinđa pe upro olesi potikni ćhaj i Rahela hem hine spremno olaće te ćerel buti efta berš (Post. 29:18). Ama, ked alo o vreme te ženini pe olaja, o Lavan prevarinđa le. Umesto te del le e Rahela, ov dinđa le pe pobare ćhaja e Lija. Phenđa lese so palo jekh kurko ka del le hem e Rahela, ako ka ćerel olaće buti pana efta berš (Post. 29:25-27). O Lavan hine but nepravedno premalo Jakov hem 20 berš iskoristinđa le (Post. 31:41, 42).

6. Kola avera problemija hine le o Jakov?

⁶ O Jakov hine le hem avera problemija. Ov hine le bari porodica hem olese ćhave na nakhlje šukar maškaro peste. On čak bikinđe pe phrale e Josife ko ropstvo. A olese duj ćhave, o Simeon hem o Levije, lađaćerđe pe porodica hem e Jehovaso anav. Isto ađahar, olesi romni i Rahela, mulji ko bijanibe. Uzo odova, ko phure berša morandilo te selini pe ko Egipat sebepi so hine baro bokhalipe (Post. 34:30; 35:16-19; 37:28; 45:9-11, 28).

7. Sar o Jehova mothovđa e Jakovese so mangela le?

⁷ Iako o Jakov hine le but problemija, ov na našalđa pi vera ko Jehova hem ko olese obećanja. O Jehova mothovđa e Jakovese so mangela le. Na primer, iako o Lavan hine nepravedno premalo leste, o Jehova blagoslovinđa e Jakove hem dinđa le but buća. Isto ađahar, razmislin kobor hine zahvalno e Jehovase ked palem reslja pe e Josifeja, iako beršencar mislinđa so hine mulo. Odolese so hine paše e Jehovaja, o Jakov istrajinđa ko sa pe problemija (Post. 30:43; 32:9, 10; 46:28-30). Ako hem amen hijam paše e Jehovaja, šaj te istrajina ko problemija kola avena iznenada.

8. So o kralj David manglja te ćerel?

⁸ O kralj David našti hine te ćerel sa odova so manglja ki služba e Jehovase. Na primer, ov hine le bari želja te ćerel o hram hem phenđa odova e Natanese. O  Natan phenđa lese: „Ćer sa odova soj tano tuće ko vilo, sose o pravo Devel tano tuvaja“ (1. Let. 17:1, 2). Šaj samo te zamislina kobor akala lafija ohrabrinđe e Davide. Ov šaj odmah počminđa te ćerel plan sar te gradini o hram.

9. Sar o David reagujinđa ked šunđa so ov na ka gradini o hram?

⁹ Sigate palo odova, e Jehovaso proroko palem alo ko David. Odija isto rat, o Jehova phenđa e Natanese so o David na ka ćerel o hram, već jekh ando oleso ćhavo (1. Let. 17:3, 4, 11, 12). Sar o David reagujinđa ked šunđa odova? Ov meninđa po cilj. Počminđa te ćedel pare hem materijali kova ka valjani lese ćhavese, e Solomonese, te ćerel o hram (1. Let. 29:1-5).

10. Sar o Jehova blagoslovinđa e Davide?

¹⁰ Odmah palo odova so e Davidese hine phendo so na ka gradini o hram, o Jehova ćerđa savez oleja. O Jehova obećinđa lese so jekh ando oleso potomko ka vladini zauvek (2. Sam. 7:16). Ko nevo sveto, đi ka trajini i Hiljadaberšengi vladavina, o David ka ovel but radosno ked ka haljol so o Kralj, o Isus, tano andi olesi loza. Akava izveštaj pomožini amenđe te haljova so čak hem ako našti te ćera sa so mangaja ki služba e Jehovase, ov šaj te blagoslovini amen ko način sar so ni na očekujinđam.

11. Sar o hrišćanija ko prvo veko hine blagoslovime, iako o Kraljevstvo na alo tegani ked on očekujinđe? (Dela apostolska 6:7)

¹¹ O hrišćanija ko prvo veko hine len disave pharipa kola na očekujinđe. Na primer, on hine len bari želja te avel e Devleso Kraljevstvo, ama na đanđe ked tačno ka avel (Dela 1:6, 7). Ama, so ćerđe? On hem ponodri propovedinđe. Đi odova ćerđe, on šaj hine te dikhen sar o Jehova blagoslovini olengo trud. (Čitin Dela apostolska 6:7.)

12. So o hrišćanija ko prvo veko ćerđe ked hine baro bokhalipe?

¹² Ko jekh period, ki celo phuv hine baro bokhalipe (Dela 11:28). Ni e hrišćanenđe ko prvo veko na hine lokho. Sar odova utičinđa upro lende? O roditeljija šaj sikirinđe pe da li ka ovel len so te den pe ćhavenđe te han. Isto ađahar, disave terne šaj planirinđe te đan pana pobuter ki služba, ama akana morandilje te ćeren odova ked i situacija ka ovel hari pošukar. Ama, save god okolnostija hine len, o hrišćanija prilagodinđe pe. On koristinđe svako prilika te propovedinen i šukar vest hem te delinen averencar odova so hine len (Dela 11:29, 30).

13. Kola blagoslovija o hrišćanija dobinđe đi trajinđa o bokhalipe?

¹³ Kola blagoslovija o hrišćanija dobinđe đi trajinđa o bokhalipe? Okola so dobinđe odova so valjanđa lenđe šaj hine te dikhen sar o Jehova pomožini len (Mat. 6:31-33). On verovatno hine pana popaše e phralencar hem e phenjencar kola pomožinđe len. Isto ađahar, okola kola bićhalđe pomoć ja okola kola pomožinđe ko aver način šaj hine te dikhen kobor bahtalipe isi ked dela pe (Dela 20:35). O Jehova blagoslovinđa sa e hrišćanen kola prilagodinđe pe ko neve okolnostija.

14. So desinđa pe e Pavlese hem e Varnavase hem so ulo palo odova? (Dela apostolska 14:21, 22)

¹⁴ But putija, o hrišćanija ko prvo veko hine progonime. Disavo puti čak ked  najhari očekujinđe. Te dikha so ulo e Varnavase hem e Pavlese đi propovedinđe ki Listra. Ki početka, o manuša hine šukar premalo lende hem šunđe odova sostar vaćerđe. Ama, kasnije o protivnikija pherđe e manušengi godi hem fordinđe bara upro Pavle hem mukhlje le te merel (Dela 14:19). Ama, o Varnava hem o Pavle hem ponodri propovedinđe ko avera thana. So ulo sebepi odova? On ćerđe učenikonen hem olenge lafija hem olengo primer zorjaćerđe avere phralen hem phenjen. (Čitin Dela apostolska 14:21, 22.) Butenđe pomožinđa odova so o Pavle hem o Varnava na ćhinavđe te propovedinen ked hine progonime. Isto ađahar, ako amen hem ponodri ćeraja o zadatko kova o Jehova dinđa amen, ov but ka blagoslovini amen.

15. So sikljovaja ando phral Makmilan?

¹⁵ Angleder o 1914. berš, e Jehovaso narodo ađićerđa diso te ovel. Te dikha o primer ando phral o Makmilan. Sar but avera e Jehovase sluge, hem ov mislinđa so tegani ka dobini pi nebesko nagrada. Odolese, ko septembar 1914. berš, ićerđa jekh govor ko kova phenđa: „Akava tano verovatno o poslednjo govor kova ka ićerav.“ Naravno, odova na hine oleso poslednjo govor. O phral Makmilan kasnije pisinđa: „Šaj but đene amendar sigate anđe zaključak so tegani ka đan ko nebo. Odova so amen valjani te ćera tano te da sa amendar ki služba.“ Amaro phral baš odova ćerđa. Ov hine but revno. Ohrabrinđa bute phralen kola hine ko phanlipe odolese so na manglje te đan ko maribe. Isto ađahar, hem ko pe phure berša hine redovno ko sastankija. Sar amare phralese pomožinđa odova so dinđa sa pestar ki služba đi ađićerđa pi nagrada? Hari angleder te merel ko 1966. berš, ov phenđa: „Akana tani mi vera pana pozorali nego so hine angleder.“ Ov tano šukar primer amenđe, pogotovo ako već jekh vreme istrajinaja ko disave pharipa (Jevr. 13:7).

16. Kova neočekivano pharipe hine len o phral hem i phen Dženings? (Jakovljeva 4:14)

¹⁶ But ando Jehovase sluge kotar jekhvar ovena naborme. Na primer, ko po iskustvo amaro phral o Herbert Dženings b phenđa so zajedno pe romnjaja uživinđe đi služinđe sar misionarija ki Gana. Ama, sar đelo o vreme, o doktorija phenđe lese so isi le ozbiljno emocionalno poremećaj. O phral Dženings citirinđa o lafija andi Jakovljeva 4:14 hem objasninđa so odija situacija but iznenadinđa len. (Čitin.) Ov phenđa: „Odolese so hijam le svesna so našti više te služina odothe hem te ova zajedno amare amalencar, odlučinđam te irina amen ki Kanada kuri šaj hine te brininav man ando mo sastipe.“ O Jehova pomožinđa lenđe hem ponodri verno te služinen lese, iako hine len bare pharipa.

17. Sar o iskustvo ando amaro phral o Dženings pomožinđa avere phralenđe?

¹⁷ Amaro phral o Dženings hine but iskreno ked vaćerđa po iskustvo hem odova pomožinđa bute phralenđe hem phenjenđe. Jekh amari phen pisinđa: „Niked ništa na ohrabrinđa man odobor kobor ohrabrinđa man akava članko...  Ked čitinđum sar o phral Dženings morandilo te mukhel po zadatko te šaj te brinini pe ando po sastipe, odova pomožinđa maje te haljovav sar me valjani te dikhav ki mi situacija.“ A jekh phral pisinđa: „Deš berš služinđum sar starešina, ama morandiljum te mukhav mo zadatko odolese so peljum ki bari depresija. Sebepi so našti hine više te ćerav mo zadatko hine maje pharo čak te čitinav o iskustvija ko amare časopisija... Ama, odova sar o phral Dženings istrajinđa, iako na hine lese lokho, dinđa man bari snaga.“ Akava setinćeri amen so sare šaj te ohrabrina jekh jekhe, iako isi amen bare pharipa. Čak hem ako o buća ko amaro životi na đana ađahar sar so mislinđam, amen hem ponodri šaj amare primereja te mothova so isi amen vera hem so hijam istrajina (1. Petr. 5:9).

18. Sar soj tano mothovdo ki slika, so sikljovaja andi jekh udovica kotar Nigerija?

¹⁸ Đi trajinđa i pandemija andi koronavirus, but e Jehovase sluge hine len pharipa. Na primer, jekh udovica andi Nigerija hine la hari hrana hem pare. Jekh sabaj, olaki ćhaj pućlja la so ka han ked ka spreminen odova poslednjo rizi so hine len. Amari phen phenđa pe ćhajaće so nane len više ni pare ni so te han. Ama, ka ćeren odova so ćerđa i udovica kotar Sarepta. Ka pripreminen po poslednjo habe hem ka uzdajinen pe upro Jehova (1. Kralj. 17:8-16). Angleder so čak počminđe te razmislinen odolestar so ka han ručkose odova dive, on dobinđe jekh pherdi kesa ando phralja hem phenja. Ki odija kesa hine dovoljno hrana aso duj kurće. Akija phen phenela so na hine ni svesno kobor o Jehova pažljivo šunđa la so phenđa pe ćhajaće. Ćaće,  ked osloninaja amen upro Jehova, amare neočekivana problemija šaj čak te ćeren te ova popaše e Jehovaja (1. Petr. 5:6, 7).

19. Savo progonstvo doživinđa amaro phral o Aleksej Jeršov?

¹⁹ Ko poslednja nekobor berš, but amare phralja hem phenja doživinena progonstvo kova ni na očekujinđe. Te dikha o primer ando amaro phral Aleksej Jeršov, kova živini ki Rusija. Ked ko 1994. berš amaro phral krstinđa pe, e Jehovaso narodo ko odova than hine len disavi versko sloboda. Ama, sar đelje o berša, i situacija ki Rusija meninđa pe. Ko 2020. berš, i policija khuvđa ko akale phraleso ćher, ćerđa pretres hem lelja lestar disave buća. Nekobor masek palo odova, i vlada predajinđa krivično prijava protiv oleste. Te šaj i situacija te ovel pana pološno, ov hine optužimo sebepi disave video-snimkija kola ćerđa jekh osoba koja pobuter ando berš dive ćerđa pe so mangela te proučini i Biblija. Odova so ćerđa hine but lošno!

20. Sar o phral Jeršov ulo pana popaše e Jehovaja?

²⁰ Da li amare phralese o progonstvo anđa diso šukar? Ja, oleso amalipe e Jehovaja akana tano pana pozoralo. Ov phenela: „Mi romni hem me akana pana pobuter molinaja amen. Haljiljum so bizi e Jehovasi pomoć niked ne bi šaj te ikljovav ko krajo akale problemencar. Odova so proučinava i Biblija pomožini man te na ovav obeshrabrimo. Razmislinava ando verna manuša kola živinđe ko purano vreme. Ki Biblija isi but šukar primerija kola mothovena kobor tano šukar te aćhove smirimo ked isi tut pharipa hem te oslonine tut upro Jehova.“

21. So sikljiljam ko akava članko?

²¹ So sikljiljam ko akava članko? O životi ko akava sveto šaj te anel amenđe problemija kola ni na očekujinaja. Ama, o Jehova šaj te pomožini amen ako uzdajinaja amen upro leste. Sar so phenela amaro vodećo stih, „but pharipa isi le o pravedno manuš, ama ando sa o Jehova ikali le“ (Ps. 34:19). Odolese, na valjani te razmislina kobor tane bare amare problemija, nego kobor tani bari e Jehovasi moć te pomožini amenđe. Sar o apostol Pavle, hem amen šaj te phena: „Sa šaj te ćerav prekalo okoleste kova dela man zoralipe“ (Fil. 4:13).