1. Sose daja komentarija ko sastankija?

 SOSE đaja ko sastankija? Najvažno razlog tano sose odoleja hvalinaja e Jehova (Ps. 26:12; 111:1). Isto ađahar, ko sastankija amen ohrabrinaja jekh jekhe ko akala phare dive (1. Sol. 5:11). A ked vazdaja amaro vas hem daja komentari, tegani ćeraja o solduj buća.

2. Ked šaj te komentarišina ko sastankija?

² Svako kurko, isi amen prilika te komentarišina ko sastankija. Na primer, ko sastanko ko radno dive šaj te komentarišina ko biserija ando Devleso Lafi, ko Skupštinako proučibe andi Biblija ili ko avera tačke. A ko vikend šaj te komentarišina ked razmotrini pe i Stražarsko kula.

3. Sose šaj te ovel amenđe pharo te komentarišina hem sar šaj te pomožinen amen o lafija ando Jevrejima 10:24, 25?

³ Amen mangaja te hvalina e Jehova hem te ohrabrina amare phralen hem phenjen. Ama, šaj te ovel amenđe pharo te komentarišina sebepi so isi amen bari trema ja sebepi so bi mangaja počesto te komentarišina, ama na dobinaja uvek komentari ked vazdaja amaro vas. So šaj te pomožini amenđe? O lafija kola o apostol Pavle pisinđa e Jevrejenđe. Ked vaćerđa odolestar kobor tano važno te ćeda amen, ov phenđa so valjani te razmislina sar te „ohrabrina jekh jekhe.“ (Čitin Jevrejima 10:24, 25.) Ako isi amen trema te komentarišina, but šaj te pomožini amenđe ako razmislinaja kobor avera šaj te ohrabrinen pe, čak ako daja jekh jednostavno komentari.  A ako na dobinaja komentari uvek ked vazdaja amaro vas, šaj te ova bahtale so hem avera ki skupština isi len prilika te komentarišinen (1. Petr. 3:8).

4. Ando kola trin buća ka vaćera ko akava članko?

⁴ Ko akava članko, najangleder ka vaćera odolestar sar šaj te ohrabrina averen ako hijam ki tikni skupština, kaj nane but manuša kola šaj te komentarišinen. Palo odova, ka dikha sar šaj te ohrabrina averen ako hijam ki bari skupština, kaj isi but manuša kola vazdena po vas. Ko krajo ka dikha, sar šaj te ohrabrina averen odoleja so vaćeraja ko amaro komentari.

5. Sar šaj te ohrabrina jekh jekhe ako hijam ki tikni skupština ja grupa?

⁵ Ko tikne skupštine ja grupe, nane but manuša kola šaj te komentarišinen. Podijekh puti, o voditelj šaj ka valjani te ađićeri neko te vazdel po vas. Sebepi odova, o sastanak šaj te ovel dosadno, a odova nane baš ohrabrujuće. So šaj tu te ćere? Ov spremno počesto te vazde to vas. Ađahar ka ohrabrine hem averen te ćeren odova.

6-7. Sar šaj te ovel amen pohari trema ked daja komentarija?

⁶ So šaj te ćere ako isi tut but bari trema te de komentari? But đene isi len trema. Ama, ako mangeja te ohrabrine te phralen hem te phenjen, sose ne bi ćhiveja tuće cilj te istražine sar šaj te ovel tut pohari trema ked komentarišineja? Sar šaj te ćere odova?

⁷ Šaj te pomožinen tuće disave predlogija ando člankija kola iklilje angleder ki Stražarsko kula. b Na primer, jekh ando predlog hine te spremine tut šukar (Posl. 21:5). Ako šukar đaneja o materijali, ka ovel tuće polokho te komentarišine. Isto ađahar, te komentarija valjani te oven kratka (Posl. 15:23; 17:27). Ako tane te komentarija kratka, ka ovel tut pohari trema. Ako vaćereja jekh ja duj rečenice, te phralenđe ka ovel polokho te haljon tut, nego ako deja disavo baro komentari hem pomineja but buća. Ako deja jekh tikno komentari hem vaćereja te lafencar, odova ka mothovi so šukar spreminđan tut hem šukar haljoveja odova sostar vaćeri pe ko materijali.

8. Sar o Jehova osetini pe ked dikhela so trudinaja amen te komentarišina?

⁸ So ako probinđan diso ando akala predlogija, ama našti te de pobuter ando jekh ja duj komentarija? Ov sigurno so o Jehova cenini to trud (Luka 21:1-4). Ov na rodela te ćere pobuter ando odova so šaj (Fil. 4:5). Dikh so šaj te ćere, ćhiv tuće cilj hem molin tut e Jehovase te pomožini tut te na ovel tut trema. Ki početka, to cilj šaj te ovel te de samo jekh kratko komentari.

9. Sose šaj te ovel pharo te komentarišine ki bari skupština?

⁹ Ako ki ti skupština isi but objaviteljija, šaj te oven disave avera pharipa. Šaj ki ti skupština but phralja hem phenja vazdena po vas hem odolese šaj na dobineja često komentari ked vazdeja to  vas. Na primer, amari phen i Danijela c uvek uživinđa te del komentarija. Oj ko odova dikhlja sar deo andi pi služba, sar način te ohrabrini averen hem te zorjaćeri pi vera. Ama, ked selinđa pe ki jekh pobari skupština, oj često na dobinđa komentarija. Podijekh puti, čak nakhlja celo sastanko, a oj na dinđa ni jekh komentari. Oj phenela: „Hijum le but obeshrabrimi, mislinđum so propustinava disavi prednost. A ked odova but putija desini pe tuće, čak šaj te počmine te puće tut: ’Da li o phralja namerno ćerena odova‘?“

10. So šaj te ćere te šaj te komentarišine?

¹⁰ Da li podijekh puti osetinđan tut sar i Danijela? Ako ja, šaj alo tuće ki godi više te na de komentari, već samo te šune o sastanko. Ama, ma ćhinav te pokušine te de komentari. So šaj te ćere? Šukar tano te spremine nekobor komentarija. Ako na dobinđan komentari ki početka, šaj ka dobine pokasno. Ked spremineja i Stražarsko kula, razmislin sar tano svako odlomko povezimo e temaja ando članko. Ked ćereja odova, šaj te ovel tut jekh but šukar komentari. Isto ađahar, šaj te spremine komentari ko odlomkija kola vaćerena ando pohor buća kola nane lokho te objasninen pe (1. Kor. 2:10). Sose? Odolese so tegani verovatno na ka vazden but đene po vas. Ama, so te ćere ako primeninđan sa akala predlogija, ama palem već nekobor sastankija na dobineja komentari? Tegani, šaj angleder o sastanko te vaćere e phralese kova vodini o sastanko ko kova odlomko mangeja te komentarišine.

11. Ko so podstakninena amen o lafija ando Filipljanima 2:4?

¹¹ Čitin Filipljanima 2:4. O apostol Pavle podstakninđa e hrišćanen te dikhen averengi korist. Sar šaj amen te primenina akava savet ked hijam ko sastanak? Ađahar so na ka bistra so isto sar amen hem avera mangena te komentarišinen.

12. Kova tano jekh način sar šaj te ohrabrina averen đi hijam ko sastanak? (Dikh i slika.)

 ¹² Razmislin kotar akava primer. Da li tu ked bešeja te amaleja vaćereja odobor but so to amal na avela đi o lafi? Naravno so na. Tu mangeja o solduj te vaćeren. Isto ađahar, ked hijam ko sastanak, amen mangaja te mukha hem avera te komentarišinen. U stvari, jekh ando najšukar način sar šaj te ohrabrina amare phralen hem phenjen, tano ađahar so ka da len prilika te komentarišinen (1. Kor. 10:24). Akana ka dikha sar šaj te ćera odova.

13. So šaj te ćera te šaj hem avera te ovel len prilika te komentarišinen?

¹³ Ked tane amare komentarija kratka, amen mukhaja than averenđe te komentarišinen. O starešine hem avera zrela objaviteljija šaj te oven primer ko odova. Ama, čak hem ked isi tut kratko komentari, ma vaćer ando but buća. Ako vaćereja sa so pisini ko odlomko, tegani na ka ovel so te phenen avera. Na primer, ko akava odlomko vaćeri pe ando duj buća: (1) amare komentarija te oven kratka hem (2) te na vaćera ando but buća. Ako tu prvo komentarišineja aso akava odlomko, tegani sose ne bi pomineja samo jekh buti kotar akala duj?

14. So ka pomožini amenđe te odlučina da li te vazda amaro vas? (Dikh i slika.)

¹⁴ Razmislin kobor često ka vazde to vas. Ako but puti vazdeja to vas, tegani o phral kova vodini disavi tačka šaj te osetini pe neprijatno hem so mora te del tut komentari, iako avera na hine len prilika te komentarišinen. Sebepi odova, avera šaj na ka mangen te vazden po vas (Prop. 3:7).

15. (a) Sar valjani te reagujina ako na dobinđam prilika te komentarišina? (b) Sar šaj o voditelj te mothovi so mislini sarinendar? (Dikh o okvir „ Ako tu hijan voditelj“)

¹⁵ Ked ko sastanko but objaviteljija  vazdena po vas, amen šaj na ka dobina prilika but puti te komentarišina. Podijekh puti, o voditelj našti sarinenđe te del komentarija. Odova šaj te obeshrabrini amen, ama na valjani te uvredina amen ako na dobinđam komentari (Prop. 7:9).

16. Sar šaj te ohrabrine okolen so komentarišinena?

¹⁶ Ako našti te komentarišine odobor kobor bi mangeja, tegani sose ne bi pažljivo šuneja averen sar komentarišinena hem palo sastanko te đa te phene lenđe so hine len šuže komentarija? Ked pohvalineja te phralen hem te phenjen, tu šaj te ohrabrine len isto sar hem ked deja komentari (Posl. 10:21). I pohvala tani pana jekh način sar šaj te ohrabrina jekh jekhe.

17. (a) Sar šaj o roditeljija te pomožinen pe ćhavenđe? (b) Sar soj tano mothovdo ko video, kola štar korakija tane potrebna te šaj te pripremina jekh komentari? (Dikh i fusnota.)

¹⁷ Sar šaj pana te ohrabrina jekh jekhe ko sastankija? Ako hijan roditelj, pomožin te ćhavenđe te pripreminen pe komentarija premalo pe berša (Mat. 21:16). Disavo puti, iako ki kula razmotrinena pe disave ozbiljna teme, sar soj tane o problemija ko brako ja o teme  ando moral, verovatno isi jekh ja duj odlomkija ko kola šaj te komentarišinen te ćhave. Isto ađahar, pomožin te ćhavenđe te haljon sose o phral našti te del len komentari svako puti ked vazdena po vas. Ađahar ka pomožine len te na ovel lenđe pharo ked avera ka dobinen prilika te komentarišinen (1. Tim. 6:18). d

18. So na valjani te ćera ked vaćeraja amaro iskustvo? (Poslovice 27:2)

¹⁸ Sare šaj te pripremina komentarija kola ka hvalinen e Jehova hem ka ohrabrinen amare phralen hem phenjen (Posl. 25:11). Disavo puti, ked ko komentari mangeja kratko te phene to iskustvo, ma vaćer but tutar (Čitin Poslovice 27:2; 2. Kor. 10:18). Umesto odova, vaćer ando Jehova, ando oleso Lafi hem ando oleso narodo (Otkr. 4:11). Naravno, ako o pućibe aso odlomko rodela te vaćera amaro mišljenje, tegani ka ćera odova. Na primer, asavko pućibe ka ovel amen ko aver odlomko.

19. (a) So ka ovel ako sare mothovaja so razmislinaja jekh jekhestar? (Rimljanima 1:11, 12) (b) So posebno cenineja ko disavo komentari?

¹⁹ Iako nane amen disave pravilija sar valjani te komentarišina, sare šaj te da sa amendar amare komentarija te ohrabrinen averen. Odova značini so disave šaj ka valjani hari pobuter te komentarišinen. A avera valjani te oven zadovoljna so isi len prilike te komentarišinen hem te oven bahtale so hem avera komentarišinena. Ked ko sastankija svako amendar dikhela averengi korist, tegani sare šaj zajedno te ohrabrina amen. (Čitin Rimljanima 1:11, 12.)