19. ČLANKO PROUČIBASE
Sar šaj te zorjaćera amari vera ko Jehovaso obećanje ando nevo sveto?
Ked [o Jehova] diso phenela, zar na ka ćerel odova? (BR. 23:19)
ĐILI 142 Te ićera amen ki amari nada
SOSTAR KA VAĆERA a
1-2. So valjani te ćera đi ađićeraja o nevo sveto?
AMEN hijam but zahvalna e Jehovase so obećinđa amenđe so ka avel o nevo sveto (2. Petr. 3:13). Na đanaja ked o Jehova tačno ka ćerel odova, ama odova so ovela ko sveto jasno mothovi so na ka valjani pana but te ađićera (Mat. 24:32-34, 36; Dela 1:7).
2 Bizo obzir kobor berš hijam ko ćaćipe, amen valjani te zorjaćera amari vera ko odova obećanje. Sose? Odolese so hem i najzorali vera šaj te slaboni. O apostol Pavle phenđa so i slabo vera tani sar „greh kova lokho šaj te peravi amen“ (Jevr. 12:1). Te ne bi amari vera slaboni, valjani redovno te razmislina ando buća kola mothovena so o nevo sveto tano paše (Jevr. 11:1).
3. Sostar ka vaćera ko akava članko?
3 Ko akava članko ka dikha ko kola trin načinija šaj te zorjaćera amari vera ko Jehovaso obećanje ando nevo sveto: (1) ađahar so ka razmislina andi otkupnina, (2) ađahar so ka razmislina andi Jehovasi moć hem (3) ađahar so ka ova zaokupime e duhovno bućencar. Palo odova, ka dikha sar odova so o Jehova phenđa e Avakumese šaj te zorjaćeri hem amari vera. Ama, najangleder ka dikha ko kola situacije posebno ka pomožini amen amari vera ko Jehovaso obećanje so pana hari ka avel o nevo sveto.
KO KOLA SITUACIJE VALJANI AMENĐE BARI VERA
4. Aso kola odluke valjani amenđe bari vera?
4 Svako dive valjani te ana disave odluke hem sebepi odova valjani amenđe bari vera. Na primer, valjani te odlučina kasa ka družina amen, ki savi škola ka đa, savi zabava ka birina, kasa ka khuva ko brako, da li ka oven amen ćhave hem savi buti ka ćera. Šukar bi ovela te puća amen: „Da li me odluke mothovena so hijum svesno so pana hari ka ovel uništimo akava sveto hem so ka avel o nevo sveto? Ili ćerava odova so ćerena o manuša kola na verujinena so šaj te živina zauvek?“ (Mat. 6:19, 20; Luka 12:16-21). Ako mangaja te ana šukar odluke, valjani te zorjaćera amari vera so o nevo sveto tano but paše.
5-6. Sose valjani te ovel amen bari vera ked hijam ko pharipa? Vaćer jekh primer.
5 Isto ađahar, šaj isi amen pharipa sebepi kola valjani te ovel amen bari vera. Šaj isi amen progonstvo, hijam but naborme ili isi amen disavo aver pharipe sebepi kova hijam obeshrabrime. Ki početka, šaj mislinaja so šaj te istrajina ko amaro problemi. Ama, ako ov but trajini, valjani te ovel amen bari vera te šaj te istrajina hem te služina e Jehovase radosno (Rimlj. 12:12; 1. Petr. 1:6, 7).
6 Ked isi amen pharipe, šaj mislinaja so o nevo sveto niked na ka avel. Ama, da li odova značini so amari vera tani slabo? Na. Razmislin ando jekh primer. Ako o jevend but trajini hem but tano šudro, šaj mislinaja so o nilaj niked na ka avel. Ama, o nilaj sigurno ka avel. Isto ađahar, ked isi amen kušnje, šaj te ova but obeshrabrime hem te mislina so o nevo sveto niked na ka avel. Ama, ako isi amen bari vera, amen ka ova uverime so o Devel sigurno ka ispunini pe obećanja (Ps. 94:3, 14, 15; Jevr. 6:17-19). Odolese, valjani hem ponodri te ćhiva e Jehova ko prvo than ko amaro životi.
7. Kas na valjani te mukha te utičini upro amende?
7 Amenđe valjani bari vera hem đi hijam ki služba. But manuša kolenđe propovedinaja i „šukar vest“ mislinena so o nevo sveto tano samo jekh šuži paramiz (Mat. 24:14; Jezek. 33:32). Amen na valjani te mukha olengo mišljenje te utičini upro amende. Odolese, valjani hem ponodri te zorjaćera amari vera. Akana ka dikha ko kola trin načinija šaj te ćera odova.
RAZMISLIN ANDI OTKUPNINA
8-9. Sar odova so razmislinaja andi otkupnina šaj te zorjaćeri amari vera?
8 Jekh način sar šaj te zorjaćera amari vera tano ađahar so ka razmislina andi otkupnina. I otkupnina uverini amen so o Devel sigurno ka ispunini sa pe obećanja. Ked razmislinaja odolestar sose o Jehova dinđa amen i otkupnina hem kobor bari žrtva ćerđa, amen pana pobuter verujinaja so ov ka ispunini po obećanje so ka živina večno. Sose šaj te phena odova?
9 So i otkupnina sa uključinđa? O Jehova bićhalđa pe prvobijande Ćhave, koleja hine but paše, te avel ando nebo ki phuv sar savršeno manuš. Ki phuv, o Isus hine le razna pharipa. Ko krajo, but patinđa hem mulo. Kobor samo bari cena o Jehova platinđa! O Jehova niked ne bi mukhela pe Ćhave te patini hem te merel samo te bi amen jekh kratko vreme živinaja šukar (Jov. 3:16; 1. Petr. 1:18, 19). Odolese so dinđa pe mangle Ćhave, šaj te ova sigurna so o Jehova ka del amen o večno životi.
RAZMISLIN ANDI JEHOVASI MOĆ
10. Premalo Efešanima 3:20, so o Jehova šaj te ćerel?
10 O dujto način sar šaj te zorjaćera amari vera tano ađahar so ka razmislina andi Jehovasi moć. Ov isi le moć te ćerel sa odova so phenđa. Avdije, but manuša mislinena so o večno životi nane moguće. Ama, o Jehova but putija obećinđa diso so o manuša niked našti te ćeren. Sose? Odolese soj tano ov Svemoćno Devel (Jov 42:2; Mar. 10:27). Sebepi odova, na hijam iznenadime so ov obećini so ka ćerel but šukar buća. (Čitin Efešanima 3:20.)
11. Vaćer ando disave e Jehovase obećanja. (Dikh o okvir „ Disave obećanja kola ispuninđe pe“.)
11 Razmislin ando disave buća kola o Jehova phenđa so ka ćerel, a kola dićhilje so samći niked na ka ispuninen pe. Na primer, e Avrahamese hem e Saraće phenđa so ka ovel len ćhavo, iako hine but phure (Post. 17:15-17). Isto ađahar, e Avrahamese phenđa so olese potomkija ka nasledinen i hanansko phuv. Sar đelo o vreme, e Avrahamese potomkija, o Izraelcija, hine robija ko Egipat hem dićhilo so samći niked na ka ispunini pe odova obećanje. Ama, ko krajo svako lafi ispuninđa pe. Kasnije, o Jehova phenđa e Jelisavetaće so ka bijani murše ćhave, iako hine but phuri. Isto ađahar, e Marijaće, koja hine ćhaj, phenđa so ka bijani olese Ćhave. Ađahar ispuninđa o obećanje kova beršencar angleder phenđa ko edensko vrt (Post. 3:15).
12. So o lafija ando Isus Navin 23:14 hem Isaija 55:10, 11 mothovena andi Jehovasi moć?
12 Ked razmislinaja ando Jehovase obećanja hem odolestar sar ispuninđe pe, amen haljovaja kobor tani bari olesi moć. Isto ađahar, amaro poverenje ko olese obećanja ando nevo sveto ovela pana pobaro. (Čitin Isus Navin 23:14; Isaija 55:10, 11.) Tegani, amen šaj te pomožina averenđe te haljon so o nevo sveto nane samo suno, već so ćaće ka avel. Ked vaćerđa ando nevo nebo hem andi nevi phuv, o Jehova phenđa: „Ko akala lafija šaj te verujini pe hem ćaćutne tane“ (Otkr. 21:1, 5).
OV ZAOKUPIMO E DUHOVNO BUĆENCAR
SASTANKIJA
Sar šaj akala buća te zorjaćeren amari vera? (Dikh o 13. odlomko)
13. Sar šaj o sastankija te zorjaćeren amari vera? Objasnin.
13 Trito način sar šaj te zorjaćera amari vera tano ađahar so ka ova zaokupime e duhovno bućencar. Na primer, razmislin sar šaj o sastankija te pomožinen tut. Amari phen i Ana, b koja beršencar služini ki punovremeno služba, phenela: „O sastankija pomožinena man te zorjaćerav mi vera. Čak ako o phral ki bina nane odobor vešto učitelj hem na vaćeri diso nevo, me but putija šunava diso so šaj te pomožini man pana pošukar te haljovav odova so pisini ki Biblija hem ađahar mi vera ovela pana pozorali.“ Isto ađahar, amari vera šaj te zorjaćeren averenge šukar pripremime komentarija ko sastanak (Rimlj. 1:11, 12; 10:17).
SLUŽBA
Sar šaj akala buća te zorjaćeren amari vera? (Dikh o 14. odlomko)
14. Sar šaj i služba te zorjaćeri amari vera?
14 Isto ađahar, i služba šaj but te zorjaćeri amari vera (Jevr. 10:23). Amari phen i Barbara, koja pobuter ando 70 berš služini e Jehovase, phenela: „Ked god hijum ki služba, mi vera ovela pana pozorali. So pobuter vaćerava e manušenđe ando Jehovase obećanja, pana pobuter mi vera ovela zorali.“
LIČNO PROUČIBE
Sar šaj akala buća te zorjaćeren amari vera? (Dikh o 15. odlomko)
15. Sar šaj o lično proučibe te zorjaćeri amari vera? (Dikh o slike.)
15 Pana jekh način sar šaj te zorjaćera amari vera tano prekalo amaro lično proučibe. E Suzanaće but pomožini odova so isi la raspored ked proučini. Oj phenela: „Ki nedelja pripreminava i Stražarsko kula aso aver kurko. Ko ponedeljak hem utorak spreminava man aso sastanko ko radno dive. Ko avera dive proučinava diso aver.“ Odova so i Suzan isi la šukar raspored pomožini laće te zorjaćeri pi vera. Amari phen i Ajrin, koja beršencar služini ko amaro glavno sedište, haljilji so ked proučini o proročanstvija andi Biblija odova but zorjaćeri olaki vera. Oj phenela: „But oduševini man so e Jehovase proročanstvija ispuninđe pe đi ko najtikno detalji.“ c
„SIGURNO KA ISPUNINI PE“
16. Sose o lafija kola o Jehova phenđa e Avakumese šaj hem amen te ohrabrinen? (Jevrejima 10:36, 37)
16 Disave e Jehovase sluge odobor berš služinena olese so mislinena so o krajo već valjanđa te avel. Ama, o Jehova haljola sar osetinena pe olese sluge. Odolese, ov uverinđa e Avakume: „Odija vizija ka ispunini pe ko vreme kova tano odredimo aso odova. Oj prastala premalo po krajo hem na ka hovavi. Čak hem te harini, ađićer la! Odolese so sigurno ka ispunini pe hem na ka harini!“ (Avak. 2:3). Da li o Jehova akale lafencar manglja te ohrabrini samo e Avakume? Na, ov manglja hem amen te ohrabrini. O apostol Pavle akala lafija primeninđa upro hrišćanija kola ađićerena te avel o nevo sveto. (Čitin Jevrejima 10:36, 37.) Čak iako dićhola so o kraj harini, amen šaj te ova sigurna so o Jehova ka ispunini po obećanje!
17. Sar jekh phen primeninđa o savet kova o Jehova dinđa e Avakumese?
17 But ando Jehovase sluge šunđe oleso savet hem beršencar ađićerena ov te ispunini po obećanje. Amari phen i Luiza, koja služini e Jehovase kotar 1939. berš, phenela: „Ko odova vreme mislinđum so o Armagedon ka avel angleder te završinav i srednjo škola. Ama, odova na ulo. Sar đelje o berša, but pomožinđa man odova so čitinđum o izveštaija kotar Noje, Avraham, Josif hem avera. On morandilje beršencar te ađićeren angleder so dobinđe pi nagrada kotar Jehova. Odova so uvek verujinđam so o Jehova ka ispunini pe obećanja pomožinđa hem maje hem averenđe te ova uverime so o nevo sveto tano but paše.“ But phenja hem phralja kola beršencar služinena e Jehovase složinena pe olaja.
18. Sar šaj odova soj tano stvorimo te pomožini amen te zorjaćera amari vera so o nevo sveto ćaće ka avel?
18 O nevo sveto pana na alo. Ama, razmislin ando buća kola tane trenutno akate sar soj tane o ćerenja, o kašta, o životinje, hem o manuša. Niko amendar našti te phenel so akala buća na postojinena. Iako hine vreme ked on na postojinđe, on tane akana akate samo odolese sose o Jehova ćerđa len (Post. 1:1, 26, 27). Amaro Devel phenđa so ki phuv ka ovel raj hem ov ka ispunini odova obećanje. Ko nevo sveto, o manuša ka živinen večno hem ka ovel len savršeno sastipe. Amen šaj te ova sigurna so o nevo sveto ka avel ko vreme ked o Jehova odredinđa (Is. 65:17; Otkr. 21:3, 4).
19. Sar šaj te zorjaćere ti vera?
19 Đi na avela o nevo sveto, koristin svako prilika te zorjaćere ti vera. Uvek ov zahvalno asi otkupnina. Razmislin andi Jehovasi moć. Ov zaokupimo e duhovno bućencar. Ked ka ćere sa akala buća hem tu ka ove maškar „okola kola sebepi pi vera hem po strpljenje dobinena okova soj tano obećimo“ (Jevr. 6:11, 12; Rimlj. 5:5).
ĐILI 139 Dikh tut ko nevo sveto
a But đene avdije na verujinena ko Devleso obećanje ando nevo sveto. On mislinena so odova tano samo suno. Ki aver strana, amen hijam sigurna so o Jehova ka ispunini sa odova so obećinđa. Ama, sar šaj hem ponodri te zorjaćera amari vera? O odgovor ka dobina ko akava članko.
b Disave anava tane menime.
c But amare časopisija kola vaćerena ando biblijake proročanstvija šaj te arakha ki tema „Proročanstvija“ ko Indeks ando publikacije. Na primer, dikh o članko „Jehovina proročanstva se ispunjavaju“ ki Stražarsko kula kotar 1. januar 2008. berš, ki srpsko ćhib.
