16. ČLANKO PROUČIBASE
„To phral ka uštel“
O Isus odgovorinđa [e Martaće]: „To phral ka uštel“ (JOV. 11:23)
ĐILI 151 O Devel ka vazdel len
SOSTAR KA VAĆERA a
1. Sar jekh ćhavo mothovđa so isi le vera ko uskrsenje?
O MATEJ hine but nabormo hem odolese valjanđa nekobor puti te đal ki operacija. Ked hine le efta berš, ov pe porodicaja dikhlja amari masekosi emisija. Ko krajo andi emisija, ko muzičko spot hine mothovdo sar ka ađićera okolen kola ka uskrsninen. b Ked završinđa pe i emisija, o Matej đelo ko pe roditeljija, dolinđa len kotar vas hem phenđa: „Tata, mama dikhena hem ako merava, me palem ka uštav. Ka ovel sa šukar, ma sikirinen tumen, samo ađićeren man.“ Šaj li te zamisline sar osetinđe pe akala roditeljija ked dikhlje kobor olenge ćhavese tani realno i nada ko uskrsenje?
2-3. Sose tano šukar te razmislina ando uskrsenje?
2 Amen valjani te razmislina andi amari nada ko uskrsenje (Jov. 5:28, 29). Sose? Odolese so šaj iznenada te desini pe te ovel amen disavo ozbiljno nabormipe ili te našala nekas kas but mangaja (Prop. 9:11; Jak. 4:13, 14). Tegani i nada ko uskrsenje šaj but te pomožini amen (1. Sol. 4:13). I Biblija uverini amen so o Jehova but šukar đanela amen hem but mangela amen (Luka 12:7). O Jehova odobor šukar đanela amen so šaj te uskrsnini amen ađahar sar so hijam le angleder te mera hem te setina amen ko sa o buća so hine angleder. Odolese so mangela amen, o Jehova dinđa amen mogućnost te živina večno. Čak hem ako ka mera, ov šaj palem te uskrsnini amen.
3 Ko akava članko, najangleder ka dikha sose šaj te verujina ko uskrsenje. Palo odova, ka razmotrina o izveštaj ko kova temeljini pe amaro vodećo stih: „To phral ka uštel“ (Jov. 11:23). Ko krajo, ka dikha sar šaj te ova pana posigurna so o uskrsenje ćaće ka ovel.
SOSE ŠAJ TE VERUJINA KO USKRSENJE?
4. Ko so valjani te ova uverime te šaj te verujina so neko ka ispunini po obećanje? Objasnin.
4 Te šaj te verujine nekase kova obećini diso, valjani te ove uverimo so ov isi le želja hem moć ili sposobnost te ispunini odova so obećinđa. Zamislin so jekh oluja uništinđa to ćher. Jekh amal alo koro tute hem phenela: „Me ka pomožinav tut te gradine palem to ćher.“ Ov tano iskreno hem verujineja so ćaće mangela te pomožini tut. Ako đanela te ćerel odija buti hem isi le alati, tegani hijan sigurno soj tano sposobno te pomožini tut. Odolese verujineja lese so ka ćerel odova so phenđa. A so šaj te phena ando Devleso obećanje ko uskrsenje? Da li o Devel isi le želja hem moć te ispunini odova obećanje?
5-6. Sose šaj te ova sigurna so o Jehova isi le želja te uskrsnini e mulen?
5 Da li o Jehova isi le želja te vazdel okolen so mulje? Naravno. Ov dinđa nekobor manuša ki Biblija te pisinen ando oleso obećanje so ka vazdel e mulen (Is. 26:19; Os. 13:14; Otkr. 20:11-13). A ked o Jehova diso obećini, ov odova uvek ispunini (Is. Nav. 23:14). O Jehova jedva ađićeri te vazdel okolen so mulje. Sose šaj te phena odova?
6 Razmislin ando Jovese lafija. Ov hine sigurno so ako merela o Jehova jedva ka ađićeri palem te dikhel le (Jov 14:14, 15, fusn.). O Jehova isi le bari želja palem te dikhel sa pe slugen kola mulje. Odolese, ov jedva ađićeri te irini len ko životi saste hem bahtale. So ka ovel okolencar kola mulje, a na hine len prilika te upoznajinen o ćaćipe? O Jehova mangela hem olen te uskrsnini (Dela 24:15). Ov mangela te del len prilika te oven olese amala hem te živinen večno (Jov. 3:16). Ćaće, o Jehova isi le bari želja te vazdel sa okolen kola mulje.
7-8. Sose šaj te ova sigurna so o Jehova isi le moć te vazdel okolen kola mule?
7 Da li o Jehova isi le moć te vazdel okolen kola mulje? Naravno! Ov tano „Svemoćno“ (Otkr. 1:8). Ov isi le moć te uništini sa pe dušmanen, pa čak hem o meribe (1. Kor. 15:26). Odova but utešini amen hem zorjaćeri amen. Te dikha o iskustvo kotar amari phen i Ema Arnold. Olaće hem olake porodicaće na hine lokho te aćhon verna ko Dujto svetsko rat. Ko nacističko koncentraciono logor, on našalđe bute manušen kolen manglje. Odolese, te šaj te utešini pe ćhaja, i Ema phenđa: „Ako okola kola mulje niked na ka ušten, odova značini so amaro dušmani, o meribe, tano pozoralo ando Devel. A odova našti te ovel. Niko nane pozoralo ando Devel.“ O Svemoćno Devel kova ćerđa o životi isi le moć hem te irini ko životi okolen kola mulje.
8 Pana jekh razlog sose šaj te verujina so o Jehova šaj te uskrsnini okolen kola mulje tano so ov pamtini sa o buća. Ov svako ćereni vićini ko anav (Is. 40:26). Isto ađahar, pamtini sa okolen so mulje (Jov 14:13; Luka 20:37, 38). Ov pamtini čak hem o najtikno detalji olendar. Na primer, sar izgledinđe, save manuša hine hem save iskustvija ili uspomene hine len.
9. Sose verujineja so o Jehova ka ispunini po obećanje so ka uskrsnini e mulen?
9 Amen šaj te ova sigurna so o Jehova ka vazdel e mulen odolese so isi le hem želja hem moć te ćerel odova. Pana jekh razlog sose verujinaja ko odova obećanje tano sose o Jehova već ćerđa odova. Ko purano vreme, ov dinđa moć disave verno manušenđe hem e Isusese te vazden e mulen. Akana ka vaćera ando jekh uskrsenje kova ćerđa o Isus kolestar pisini ko Jovan 11. poglavlje.
E ISUSESO AMAL MULO
10. So desinđa pe đi o Isus propovedinđa dur andi Vitanija hem so tegani ćerđa? (Jovan 11:1-3)
10 Čitin Jovan 11:1-3. Zamislin so desinđa pe ki Vitanija ko krajo ando 32. berš, ki nevi era. Ko odova gav živinđe e Isusese amala i Marija, i Marta hem o Lazar (Luka 10:38-42). Ama, o Lazar naborsalo hem olese phenja but sikirinđe pe. On manglje te javinen odova e Isusese hem odolese bićhalđe jekhe manuše te phenel lese odova. Sebepi so o Isus hine ki aver strana andi reka Jordan, valjanđa lese duj dive te avel đi i Vitanija (Jov. 10:40). Odova manuš pana na reslja đi o Isus, a o Lazar već mulo. Iako o Isus đanđa so oleso amal mulo, ov na pođinđa odmah ki Vitanija nego palo duj dive. Ked reslja uduri, već nakhlje štar dive sar o Lazar mulo. Tegani, o Isus manglja te ćerel diso pe amalenđe hem te proslavini e Devle (Jov. 11:4, 6, 11, 17).
11. So kotar akava izveštaj sikljovaja ando amalipe?
11 Ko akava izveštaj šaj te sikljova but buća ando amalipe. Ked i Marija hem i Marta bićhalđe poruka e Isusese, on na phenđe lese te avel ki Vitanija. On samo phenđe so oleso amal, o Lazar tano nabormo (Jov. 11:3). Ked o Lazar mulo, ov šaj hine hem dural te uskrsnini le. Ama, ov ipak manglja te đal ki Vitanija te ovel e Marijaja hem e Martaja. Da li isi tut dijekh amal kova avela te pomožini tuće bizo te puće le? Tu đaneja so uvek šaj te oslonine tut upro leste ko „phare dive“ (Posl. 17:17). Odolese, sar o Isus, hem amen valjani te pomožina averenđe. Hajde te dikha so pana ulo.
12. So o Isus obećinđa e Martaće hem sose oj šaj hine te verujini ko odova obećanje? (Jovan 11:23-26)
12 Čitin Jovan 11:23-26. I Marta šunđa so o Isus alo uzi Vitanija hem odmah ikljilji anglo leste hem phenđa lese: „Gospode, te ove hine akate, mo phral na bi merela“ (Jov. 11:21). Ćaće, o Isus šaj hine te saćari e Lazare. Ama, ov manglja te ćerel diso pobuter. Ov phenđa laće: „To phral ka uštel.“ Isto ađahar, ov dinđa la pana jekh razlog te verujini lese ked phenđa laće: „Me hijum o uskrsenje hem o đivdipe.“ O Devel dinđa e Isuse moć te vazdel e mulen. Angleder, ov vazdinđa jekha tiknja ćhaja kratko palo olako meribe. Isto ađahar, vazdinđa jekhe ćhave izgleda ko isto dive ked mulo (Luka 7:11-15; 8:49-55). Ama, da li šaj te uskrsnini nekas kova već štar dive mulo hem kaso telo počminđa te ćirnjol?
„LAZARE, IKLJOV!“
O Isus mothovđa baro saosećanje premalo pe amala kola patinđe (Dikh o 13. hem 14. odlomko)
13. Premalo Jovan 11:32-35, so ćerđa o Isus ked dikhlja so i Marija hem avera manuša rovena? (Dikh i slika.)
13 Čitin Jovan 11:32-35. Te dikha so pana desinđa pe. I Marija, e Lazaresi aver phen, avela anglo Isus. Oj phenela lese isto odova so phenđa hem olaki phen: „Gospode, te ove hine akate, mo phral na bi merela.“ Oj hem o manuša kola hine olaja hine but tužna. Ked dikhlja len sar rovena, e Isusese hine but pharo. Odobor hine lese žao so hem ov počminđa te rovel. Ov haljola kobor tani bari i dukh ked neko merela. Odolese, jedva ađićeri te kosel o asva ando manuša kola patinena.
14. So sikljovaja ando Jehova kotar odova so o Isus runđa e Marijaja?
14 Odova so o Isus runđa ked dikhlja e Marijaki dukh, mothovi amenđe kobor tano o Jehova samilosno Devel. Sose šaj te phena odova? Sar so dikhljam ko okova članko, o Isus savršeno mothovđa savo tano oleso Dad (Jov. 12:45). Odolese, ked čitinaja so o Isus hine tužno sebepi so olese amala runđe, amen haljovaja so hem o Jehova tano tužno ked dikhela so patinaja (Ps. 56:8). Ked haljovaja kobor tano o Jehova samilosno Devel, odova podstaknini amen te ova pana popaše oleja.
O Isus mothovđa so isi le moć te uskrsnini e manušen (Dikh o 15. hem 16. odlomko)
15. Sar so pisini ko Jovan 11:41-44, vaćer so hine ko Lazareso grobo. (Dikh i slika.)
15 Čitin Jovan 11:41-44. O Isus alo ko Lazareso grobo hem phenđa te ciden o bar. Tegani, i Marija phenđa so e Lazareso telo sigurno but khandela. Ama, o Isus phenđa laće: „Zar na phenđum tuće so ka dikhe e Devlesi slava ako ka verujine?“ (Jov. 11:39, 40). Palo odova, o Isus vazdinđa pe jaćha premalo nebo hem anglo sarinende molinđa pe. Ov manglja sa i slava te del e Jehovase sebepi odova so ka ćerel. Ko sa o glaso phenđa: „Lazare, ikljov!“ Hem o Lazar ikljilo ando grobo. O Isus ćerđa odova so o manuša mislinđe so niked našti te ovel. c
16. Sar o izveštaj kotar Jovan 11. poglavlje zorjaćeri amari vera ko uskrsenje?
16 O izveštaj kova čitinaja ko Jovan 11. poglavlje zorjaćeri amari vera ko uskrsenje. Sar? Setin tut so o Isus phenđa e Martaće. Ov phenđa laće: „To phral ka uštel“ (Jov. 11:23). Sar po Dad, ov isi le hem želja hem moć te ispunini odova obećanje. Odova so o Isus runđa mothovi so isi le bari želja te vazdel okolen so mule hem te cidel i dukh okolendar so tugujinena. Ked uskrsninđa e Lazare, ov mothovđa so isi le moć te ćerel odova. Isto ađahar, razmislin ando lafija kola o Isus phenđa e Martaće: „Zar na phenđum tuće so ka dikhe e Devlesi slava ako ka verujine?“ (Jov. 11:40). Ćaće, isi amen šukar razlog te verujina so o Jehova ka ispunini po obećanje hem so ka vazdel e mulen. Ama, so šaj te ćera te bi amari nada ko uskrsenje ovela pana pobari?
SAR ŠAJ TE OVA PANA POSIGURNA SO O USKRSENJE ĆAĆE KA OVEL?
17. So na valjani te bistra đi čitinaja ando manuša kola uskrsninđe?
17 Čitin hem hor razmislin ando uskrsenja kola hine ko purano vreme. I Biblija vaćeri ando ofto manuša kola mulje hem uskrsninđe. d Odolese, sose na bi proučineja svako odova izveštaj? Đi ćereja odova, ma bistri so odola manuša ćaće živinđe ki phuv. Isto ađahar, dikh so šaj te sikljove odolestar. Razmislin sar svako odova izveštaj mothovi so o Jehova isi le želja hem moć te vazdel okolen so mulje. Uzo odova, razmislin ando najvažno uskrsenje – o uskrsenje ando Isus Hrist. Ked o Isus uskrsninđa, but manuša dikhlje le. Ked razmislinaja odolestar, odova šaj but te zorjaćeri amari vera (1. Kor. 15:3-6, 20-22).
18. Sose tano šukar te šuna o đilja kola vaćerena ando uskrsenje? (Dikh i fusnota.)
18 Šunen, đilaben hem razmislinen ando đilja kola vaćerena ando uskrsenje e (Ef. 5:19). Akala đilja pomožinena amen o uskrsenje te ovel amenđe diso ćaće hem zorjaćerena amari vera. Odolese, ko porodično proučibe šunen, vežbinen len hem dikhen so šaj te sikljoven kotar lafija ando odola đilja. Palo odova, ked ka ovel tut disavo pharipe ja ako ka desini pe te merel neko kas mangljan, e Jehovaso duho ka setinćeri tut ko lafija ando odola đilja hem odova ka utešini tut hem ka zorjaćeri tut.
19. Sar šaj te zamislina o uskrsenje? (Dikh o okvir „ So bi pućeja len?“)
19 Ćer tuće slika ki godi. O Jehova ćerđa amen ađahar te šaj te zamislina sar ka ovel amenđe ko nevo sveto. Jekh amari phen phenela: „Odobor zamislinava man ko nevo sveto so šaj te osetinav sar mirišinena o luluđa ko raj.“ Zamislin sar ka osetine tut ked ka rese e manušen kolendar vaćeri i Biblija. Kas jedva ađićereja te dikhe? So mangeja te puće le? Zamislin o trenutko ked palem ka dikhe okole kova mulo tutar. Razmislin so prvo ka phene lese. Sar ka dolen tumen ki angalja. Kobor bahtale ka oven ked ka dikhen jekh jekhe.
20. So valjani te ova odlučna te ćera?
20 But hijam zahvalna e Jehovase so obećinđa so amare mule palem ka ušten. Sigurna hijam so ov ka ispunini odova obećanje sose ov isi le hem želja hem moć te ćerel odova so phenđa. Hajde sare te ova odlučna te zorjaćera amari vera ko uskrsenje. Ked ka ćera odova, ka ova pana popaše e Jehovaja kova sarinenđe dela po lafi: „Tumare manglje palem ka ušten“.
ĐILI 147 Ka ovel večno đivdipe
a Ako našalđan nekas kas but mangljan, i nada ko uskrsenje sigurno dela tut bari uteha. Ama, sar šaj averenđe te objasnine sose verujineja ko uskrsenje? Sar šaj ti vera ko uskrsenje te ovel pana pobari? Akava članko ka pomožini amen te zorjaćera amari vera ko uskrsenje.
b O muzičko spot vićini pe Samo što nije hem ikljilo ki amari masekosi emisija ko novembar 2016. berš.
c Dikh o članko „Zašto je Isusu trebalo četiri dana da stigne do Lazarevog groba?“ ki Stražarsko kula kotar 1. januar 2008. berš, str. 31, ki srpsko ćhib.
d Dikh o okvir „Biblijski zapisi o osam osoba koje su vraćene u život“ ki Stražarsko kula kotar 1. avgust 2015. berš, ki str. 4, ki srpsko ćhib.
e Đilaben hem razmislinen ando akala đilja: „Dikh tut ko nevo sveto“ (đili 139), „Dikh ki nagrada!“ (đili 144) hem „O Devel ka vazdel len“ (đili 151). Isto ađahar, ko amaro sajt jw.org dikh amare savremena đilja: „Samo što nije“, „U novom svetu tom“ hem „Ponovo ćemo biti zajedno“.
