1. Soj tano o duhovno raj hem so valjani te ova odlučna te ćera?

 AVDIJE ki phuv isi jekh simbolično than kova tano pherdo e manušencar kola ćerena šukar buća. Odola manuša isi len but baro mir hem odlučna tane niked te na mukhen odova than. Isto ađahar, on mangena hem avera manuša te aven hem te uživinen zajedno olencar. Kova tano odova than? O duhovno raj! a

2. Soj tano posebno ko duhovno raj?

² O Jehova ćerđa jekh simbolično than kaj oleso narodo uživini ko mir hem ko jekhipe, iako živinena ko Satanaso but lošno sveto kuri o manuša mrzinena jekh jekhe (1. Jov. 5:19; Otkr. 12:12). O Devel dikhela sar akava sveto lošno utičini upro manuša. Ama, ov ćerela oleso narodo te osetini pe sigurno te šaj hem ponodri radosno te služini lese. Ko oleso Lafi, aso duhovno raj phenela pe soj tano „sklonište“ hem „bašta koja isi la dovoljno pani“ (Is. 4:6; 58:11). Uzo Jehovaso blagoslov, okola so živinena ko odova raj tane bahtale hem osetinena pe sigurno, iako živinena ko phare poslednja dive (Is. 54:14; 2. Tim. 3:1).

3. Sar o proročanstvo ando Isaija 65. poglavlje ispuninđa pe ko purano vreme?

³ Prekalo prorok Isaija, o Jehova phenđa sar ka ovel okolenđe kola ka oven ko duhovno raj. Ando odova šaj  te čitina ko Isaija 65. poglavlje. Odova so uduri pisini najangleder ispuninđa pe ko 537. berš a. n. e. Ko odova vreme, o Izraelcija hine oslobodime ando ropstvo ko Vavilon hem irinđe pe ćhere. O Jehova blagoslovinđa pe narodo hem pomožinđa lese te obnovini o Jerusalim hem o hram kuri služinđe lese (Is. 51:11; Zah. 8:3).

4. Sar o proročanstvo ando Isaija 65. poglavlje ispunini pe ko amaro vreme?

⁴ O dujto ispunjenje ando Isaijaso proročanstvo počminđa ko 1919. berš ki n. e. Tegani e Jehovase sluge hine oslobodime ando Baro Vavilon. Palo odova, o duhovno raj hari pohari počminđa te proširini pe ki celo phuv. O revna objaviteljija ando Kraljevstvo ćerđe but skupštine hem mothovđe but šuže osobine. But đene, kola angleder hine nasilna hem živinđe nemoralno, uravđe „i nevi ličnost koja tani ćerdi premali Devlesi volja“ (Ef. 4:24). Naravno, but blagoslovija kolendar o Isaija pisinđa ka ispuninen pe doslovno tek ko nevo sveto. Ama, pana akana but pomožini amen odova so živinaja ko duhovno raj. Akana ka dikha sar akava duhovno raj utičini upro amende hem sose na valjani niked te mukha le.

O BLAGOSLOVIJA KO DUHOVNO RAJ

5. Sar so pisini ko Isaija 65:13, ko so uživinaja ko duhovno raj?

⁵ Duhovno ćale hem osvežime. Ko Isaijaso proročanstvo tano mothovdo so isi bari razlika maškaro okola so živinena ko duhovno raj hem okola so na živinena odothe. (Čitin Isaija 65:13.) O Jehova velikodušno dela pe slugenđe sa so valjani lenđe te šaj te zadovoljinen pe duhovna potrebe. Amen isi amen oleso sveti duh, oleso Lafi hem but publikacije, avere lafencar, šaj te ha, te pija hem te radujina amen. (Uporedin e stihoja ando Otkrivenje 22:17.) Ki aver strana, okola so nane ko duhovno raj „ka oven bokhale. . . trošale. . . ka lađan“. Olenge duhovna potrebe nane zadovoljime (Am. 8:11).

6. Sar tane ko Joilo 2:21-24 opisujime o buća kola o Jehova dela amen hem sar šaj te pomožinen amen?

⁶ Ko po proročanstvo, o Joilo koristinđa o osnovna buća aso životi, sar soj tane o điv, o vino hem o maslinovo ulje, te bi mothovi so o Jehova velikodušno ka del pe narodose odova so valjani lese, pa hem i duhovno hrana (Joilo 2:21-24). Na primer, dinđa amen Biblija, publikacije, sajt, sastankija, pokrajinska sastankija hem kongresija. Akala buća šaj te koristina svako dive hem on ka pomožinen amen te ova duhovno ćale hem osvežime.

7. Sose hijam radosna? (Isaija 65:14)

⁷ Radosna hem zadovoljna. E Devleso narodo tano but radosno hem zahvalno e Jehovase. (Čitin Isaija 65:14.) Sose tane odobor radosna? Odolese so ki Biblija arakhlje o ćaćipe hem o utešna obećanja. Isto ađahar, isi len but šuži nada koja temeljini pe ki Isusesi otkupno žrtva. Ked vaćeraja amare phralencar hem phenjencar ando akala buća, ćaće hijam but radosna (Ps. 34:8; 133:1-3).

8. Kola duj važna buća isi ko duhovno raj?

⁸ O mangipe hem o jekhipe maškaro Jehovaso narodo tane duj važna buća kola isi ko duhovno raj. O „jekhipe“ pomožini amen te zamislina sar ka ovel o  životi ko nevo sveto, kuri e Jehovase sluge ka ovel len pana pobaro mangipe hem jekhipe (Kol. 3:14). Jekh phen phenela so prvo primetinđa ko Jehovaso narodo: „Na đanđum sar te ovav bahtali, čak ni ki mi porodica. Prvo puti osetinđum ćaćutno mangipe ked upoznajinđum e Jehovase svedokonen.“ Sare kola mangena te oven ćaće bahtale hem zadovoljna valjani te oven ko duhovno raj. Bizo obzir so akava sveto mislini ando Jehovase sluge, on isi len šukar anav anglo Jehova hem maškaro phralja hem phenja (Is. 65:15).

9. Premalo Isaija 65:16, 17 so ka ovel e bućencar sebepi kola avdije patinaja?

⁹ Unutrašnjo mir. Ko Isaija 65:14 pisini so okola kola na mangena te oven ko duhovno raj „ka pištinen sebepi o dukha ko vilo hem but ka roven odolese so [olengo] duho ka ovel phago“. Ama, so ka ovel e bućencar sebepi kola avdije patinaja? On „ka bistren pe, hem ka oven garavde kotar [e Devlese] jaćha“. (Čitin Isaija 65:16, 17.) O Jehova ka cidel amare problemija hem više ni na ka setina amen sar osetinđam amen sebepi olende.

10. Sose hijan zahvalno so isi tut prilika te ove te phralencar hem te phenjencar? (Dikh i slika.)

¹⁰ Pana akana, ked hijam ko amare sastankija amen osetinaja unutrašnjo mir hem bistraja ko amare problemija. Isto ađahar, pomožinaja amare phralenđe te osetinen mir ko vilo ked mothovaja o plodija ando Devleso sveti duh, sar soj tane mangipe, radost, mir, šukaripe hem blagost (Gal. 5:22, 23). But hijam zahvalna so hijam deo andi Jehovasi organizacija. Okola so aćhona ko duhovno raj ka dikhen sar potpuno ispunini pe e Devleso obećanje ando „nevo nebo hem nevi phuv“.

11. Premalo Isaija 65:18, 19, sar upro amende utičini o duhovno raj kova o Jehova ćerđa?

¹¹ Zahvalna. O Isaija otkrijinđa sose isi amen razlog te radujina amen ko duhovno raj. Akava simbolično raj ćerđa o Jehova. (Čitin Isaija 65:18, 19.) Odolese, nane čudno so o Jehova koristini amen te pomožina e manušenđe te ciden pe ando akale svetose organizacije kola na sikavena len o ćaćipe ando Devel hem te oven deo ando duhovno raj. Amen uživinaja ko blagoslovija kola isi amen odolese so hijam ko ćaćipe hem podstaknime  hijam te vaćera averenđe olendar (Jer. 31:12).

12. Sar upro tute utičinena o lafija ando Isaija 65:20-24 hem sose?

¹² Amen hijam zahvalna hem asi nada koja isi amen odolese so hijam ko mir e Jehovaja. Razmislin samo so sa ka dikha hem ka ćera ko nevo sveto! Ki Biblija pisini: „Uduri više na ka ovel ćhavoro kova bi palo bijanibe živini samo nekobor dive niti phuro kova na ka doživini sa pe berša.“ Amen ka ćera „ćhera hem ka [beša] ano lende, ka [sadina] drakha hem ka [ha] olengo plod.“ Na ka ćera „phari buti badijava“ sose ka blagoslovini amen o Jehova. Ov obećini amenđe so ka ovel amen jekh sigurno hem smisaono životi. „Angleder te vićinen“, ov ka đanel svakonese potrebe hem sarinenđe ka del „odova so mangena“ (Is. 65:20-24; Ps. 145:16).

13. Sar tane ko Isaija 65:25 opisujime o promene kola ćerena o manuša ked počminena te služinen e Jehovase?

¹³ Mir hem sloga. Uzi Jehovasi pomoć, okola so angleder hine nasilna hem agresivna ćerđe bare promene ko po životi. (Čitin Isaija 65:25.) On but trudinđe pe te ciden pestar o lošna osobine (Rimlj. 12:2; Ef. 4:22-24). Naravno, sare amen so služinaja e Jehovase hijam nesavršena, odolese hem ponodri ka ćera disave greške. Ama, na valjani te bistra so o Jehova ćedinđa „sa o vrste ando manuša“. Odolese, maškaro amende isi mir hem jekhipe (Titu 2:11). Odova tano čudo kova samo amaro Svemoćno Devel šaj te ćerel!

14. Sar o lafija ando Isaija 65:25 ispuninđe pe upro jekh terno phral?

¹⁴ Da li o manuša ćaće šaj te meninen pe? Razmislin ando akava iskustvo. Jekh terno ćhavo, angleder te pherel 20 berš, but putija hine ko zatvor. Ov hine le but nemoralno hem nasilno životi. Ko zatvor hine odolese so ćorđa e manušenge vorda, khuvđa ko ćhera hem ćerđa pana lošna buća. Hine spremno svakoneja te marel pe. Ked prvo puti šunđa o ćaćipe hem počminđa te avel ko sastankija, hine uverimo so arakhlja o smisao ando životi, a odova tano te služini e Jehovase ko duhovno raj. Palo po krštenje, često razmislinđa sar o lafija kotar Isaija 65:25 primeninena pe upro leste. Ov hine nasilno sar lav, ama ulo mirno sar bakro.

15. Sose mangaja te vićina e manušen te aven ko duhovno raj hem sar šaj te ćera odova?

¹⁵ O stih ando Isaija 65:13 počmini e lafencar: „Ađahar vaćeri o Svevišnjo Gospod Jehova“. O 25. stiho završini pe e lafencar: „Phenela o Jehova“. Olese lafija uvek ispuninena pe (Is. 55:10, 11). O duhovno raj već akana postojini. Amare phralja hem phenja tane ćaće poklon ando Jehova. Odolese so hijam deo andi Jehovasi porodica pana akana isi amen baro mir hem osetinaja amen sigurna iako živinaja ko akava lošno sveto (Ps. 72:7). Odolese, mangaja te pomožina so poviše manušenđe te oven deo andi amari porodica. Odova šaj te ćera ađahar so ka da sa amendar te ćera učenikon (Mat. 28:19, 20).

SAR ŠAJ TE PODSTAKNINA AVEREN TE AVEN KO DUHOVNO RAJ?

16. Ko šaj te privucini e manušen te aven ko duhovno raj?

¹⁶ Svako amendar šaj te ćerel diso te šaj o duhovno raj te ovel privlačno e manušenđe. Odova šaj te ćera ađahar so  ka oponašina e Jehovaso primer. Ov na anela e manušen silaja ki pi organizacija. Umesto odova, ov mangipaja „privucini“ len koro peste (Jov. 6:44; Jer. 31:3). O iskrena manuša kola upoznajinena e Jehova hem dikhena savo baro mangipe isi le, mangena te oven paše oleja. Sar šaj amare osobine hem amaro ponašanje te podstaknini e manušen te aven ko duhovno raj?

17. Sar šaj te podstaknina e manušen te aven ko duhovno raj?

¹⁷ Jekh način sar šaj te podstaknina e manušen te aven ko duhovno raj tano te mothova mangipe hem šukaripe premalo amare phralja hem phenja. Mangaja o manuša kola avena ko amare sastankija te phenen isto so phenđe hem o nevernikija kola verovatno hine ko sastankija ko purano Korint: „Ćaće tano o Devel maškar tumende“ (1. Kor. 14:24, 25; Zah. 8:23). Odolese, hem ponodri valjani te šuna o savet: „Oven ko mir jekh jekheja“ (1. Sol. 5:13).

18. So šaj te podstaknini e manušen te aven ki amari organizacija?

¹⁸ Valjani uvek te trudina amen upro amare phralja hem phenja te dikha sar o Jehova. Odova ćeraja ađahar so usredsredinaja amen ko olenge šukar osobine, a na ko mane kola ko krajo ka našalđon. Amen šaj te rešina bilo savo problemi ako uvek hijam „šukar jekh premalo avereste, samilosna hem [ako] ando vilo [oprostinaja] jekh jekhese“ (Ef. 4:32). O manuša kola mangena avera premalo lende ađahar te ponašinen pe, ka mangen te oven deo ando duhovno raj. b

 AĆHOV KO DUHOVNO RAJ

19. (a) Sar soj tano mothovdo ko okvir „ On mukhlje o duhovno raj, ama palem irinđe pe“, so disave phenđe palo odova so irinđe pe ko duhovno raj? (b) So valjani te ova odlučna te ćera? (Dikh i slika.)

¹⁹ Amen ćaće but ceninaja amaro duhovno raj! Ćaće tano but šužo hem odothe isi but manuša. Mangaja hem ponodri te ova zahvalna aso duhovno raj kova o Jehova ćerđa. Sare kola mangena te oven osvežime, zadovoljna, te oven len unutrašnjo mir hem sloga valjani te aven ko duhovno raj hem niked te na mukhen le! Ama, valjani te ova oprezna sose o Satana dela sa pestar te cidel amen kotar Jehova (1. Petr. 5:8; Otkr. 12:9). Na mangaja te mukha le te uspini ko po cilj. Odolese, valjani te da sa amendar te arakha o šužipe, i čistoća hem o mir ando duhovno raj.