KI DAVIDESI vojska hine o manuša kola na hine Izraelcija, sar soj tane o Amonco o Selek, o Urija Hetejin hem o Moavco o Jetem a (1. Let. 11:39, 41, 46). Isto ađahar, ki olesi vojska hine hem o Hereteja, Feleteja hem o manuša ando Gat (2. Sam. 15:18). Izgleda so o Hereteja hem o Feleteja hine but paše e Filistejencar (Jezek. 25:16). O Gesureja avena andi filistejsko diz Gat (Is. Nav. 13:2, 3; 1. Sam. 6:17, 18).

Sose o David dozvolinđa akala strancija te oven ki olesi vojska? Ov hine le poverenje upro lende sose hine lese verna, a soj tano považno, on hine verna e Jehovase. Na primer, jekh biblijako rečniko ando Hereteja hem Feleteja, phenela: „Đi o David vladinđa, on aćhilje lese verna ko najphare situacije“ (The New Interpreter’s Dictionary of the Bible). Sar mothovđe pi vernost? Ked sa o Izraelcija aćhavđe e Davide, o Hereteja hem o Feleteja aćhilje oleja hem pomožinđe lese te ćhinavi e Savasi pobuna (2. Sam. 20:1, 2, 7). Ki jekh aver situacija, e Davideso ćhavo, o Adonija, pokušinđa te ovel kralj ko Solomoneso than. Ama, o Hereteja hem o Feleteja aćhilje verna e Davidese hem pomožinđe lese te ćhivel e Solomone te ovel kralj sose ole o Jehova birinđa te ovel kralj palo David (1. Kralj. 1:24-27, 38, 39).

Jekh aver manuš kova aćhilo verno e Davidese hine o Itaj andi diz Gat. O Itaj hem olese 600 ratnikija podržinđe e Davide ked oleso ćhavo o Avesalom pobuninđa pe protiv oleste hem irinđa e manušen protiv oleste. Odolese so na hine Izraelco, o David phenđa e Itajese so na valjani te borini pe olese. Ama, o Itaj phenđa: „Dava sovel anglo Jehova, anglo đivdo Devel, hem anglo tute, mo gospodar hem kralj! Kuri god ka ovel o kralj, mo gospodar, bilo te ćerel pe ando životi ili ando meribe, odothe ka ovel hem to sluga!“ (2. Sam. 15:6, 18-21).

Iako o Hereteja, o Feleteja hem o manuša andi diz Gat na hine Izraelcija, on poštujinđe e Jehova sar e ćaćutne Devle hem e Davide sar e Jehovase pomazaniko. Šaj samo te zamislina kobor o David hine zahvalno so ki olesi strana hine odola verna manuša!