1. Sar e Jehovaso narodo hine organizujimo ko prvo veko?

 KED o Jehova dela disavo zadatko pe narodose, ov mangela odova te ćerel pe ko jekh organizovano način (1. Kor. 14:33). Na primer, olesi volja tani te propovedini pe i šukar vest ko celo sveto (Mat. 24:14). Ov ćhivđa e Isuse te predvodini ko odova zadatko. O Isus dela sa pestar i šukar vest te propovedini pe ko jekh organizovano način. Ko prvo veko, ko skupštine hine naimenujime starešine kola dinđe smernice hem predvodinđe (Dela 14:23). Ko Jerusalim hine o vodeće telo, kuri hine o apostolija hem o starešine, kola anđe disave odluke kola sa o skupštine valjanđe te poštujinen (Dela 15:2; 16:4). Odolese so o phralja hem o phenja dobinđe smernice, „o skupštine zorjaćerđe pi vera hem barilje ando dive ko dive“ (Dela 16:5).

2. Prekalo kaste o Jehova kotar 1919. berš vodini pe narodo hem dela duhovno hrana?

² O Jehova hem avdije organizujini pe narodo. Kotar 1919. berš, o Isus prekali jekh tikni grupa ando manuša organizujini o propovedibe hem dela duhovno hrana pe učenikonđe a (Luka 12:42). O Jehova ćaće blagoslovini odova so ćerena (Is. 60:22; 65:13, 14).

3-4. (a) Vaćer jekh primer sose tano šukar te ova organizujime. (b) Sostar ka vaćera ko akava članko?

³ Ako ne bi ovaja organizujime, amen ne bi šaj te ispunina o zadatko kova o Isus dinđa amen (Mat. 28:19, 20). Na primer, ako o phralja ne bi organizujinena te ćeren pe o  skupštinska terenija, tegani svako bi propovedini kaj god mangela. Disave terenija bi ćerena pe nekobor putija, a ko avera niked ne bi đaja. Da li perela tuće ki godi ko kola pana načinija pomožini amenđe odova so hijam organizujime?

⁴ Ked hine ki phuv, o Isus organizujinđa pe učenikon. Odova ćerela hem avdije. Ko akava članko ka razmotrina o primer kova o Isus mothovđa hem sar amari organizacija sledini le. Isto ađahar, ka dikha sar šaj te mothova so isi amen poverenje ki Jehovasi organizacija.

AMARI ORGANIZACIJA SLEDINI E ISUSESO PRIMER

5. Kova tano jekh način sar sledinaja e Isuseso primer? (Jovan 8:28)

⁵ O Isus ando po Dad sikljilo so te ćerel hem so te phenel. E Jehovasi organizacija sledini e Isuseso primer ađahar so koristini e Devleso Lafi te pomožini amen te haljova soj tano ispravno, a soj tano neispravno hem te del amen smernice aso amaro životi. (Čitin Jovan 8:28; 2. Tim. 3:16, 17.) Amen redovno dobinaja savet te čitina hem te primenina e Devleso Lafi. Sar šaj te pomožini amen odova savet?

6. Sar pomožini amen odova so proučinaja e Devleso Lafi?

⁶ Ked proučinaja e Devleso Lafi ađahar so koristinaja amare publikacije odova šaj but te pomožini amen. Sar? Na primer, šaj te uporedina odova so pisini ki Biblija odoleja so phenena o smernice kola dobinaja andi amari organizacija. Ked haljovaja so odola smernice temeljinena pe ki Biblija, amaro poverenje ki Jehovasi organizacija šaj te ovel pana pobaro (Rimlj. 12:2).

7. Sostar o Isus propovedinđa hem sar e Jehovasi organizacija sledini oleso primer?

⁷ O Isus propovedinđa „i šukar vest ando Devleso Kraljevstvo“ (Luka 4:43, 44). Isto ađahar, zapovedinđa hem pe učenikonđe te ćeren odova (Luka 9:1, 2; 10:8, 9). Avdije, sare kola tane ki Jehovasi organizacija propovedinena i šukar vest bizo obzir kaj živinena ja kobor bare odgovornostija isi len.

8. Koja čast isi amen?

⁸ Amenđe tani mothovdi čast te vaćera e manušenđe ando Devleso Kraljevstvo. Ama, našti sare te ćeren odova. Na primer, ked o Isus hine ki phuv, ov na mukhlja e demonen te vaćeren olestar (Luka 4:41). Ako neko avdije mangela te propovedini e Jehovase svedokoncar, ov valjani te ispunini disave uslovija. Amen mothovaja so ceninaja odija čast ađahar so koristinaja svako prilika te propovedina. Sar o Isus, hem amen mangaja te da sa amendar te propovedina e manušenđe hem te sikava len ando ćaćipe (Mat. 13:3, 23; 1. Kor. 3:6).

9. So amari organizacija ćerđa te šaj o manuša te đanen e Devleso anav?

⁹ O Isus vaćerđa e manušenđe ando Devleso anav. Ov ki molitva e Jehovase phenđa: „Me vaćerđum lenđe to anav“ (Jov. 17:26). Avdije, amari organizacija sledini e Isuseso primer ađahar so ćerela sa so šaj te pomožini e manušenđe te đanen e Devleso anav. Dokaz aso odova tano o prevod Novi svet. Ko odova prevod tano irimo e Devleso anav ko sa o thana ko kola hine ki izvorno ćhib. Akava prevod tano dostupno celo ili samo disave delovija ko prekalo 270 ćhibja. Ko dodatko A4 hem A5 šaj te arakhe pobuter ando odova sar tano e Devleso anav irimo ki  Biblija. A ko dodatko C, ki Biblija aso proučavanje, isi dokazija so e Devleso anav valjani te pojavini pe 237 putija.

10. So sikljoveja andi jekh romni koja živini ko Mjanmar?

¹⁰ Sar o Isus, hem amen mangaja te pomožina e manušenđe te đanen e Devleso anav. Jekh romni kotar Mjanmar hine la 67 berš ked šunđa so o Devel isi le anav. Tegani, oj počminđa te rovel hem phenđa: „Prvo puti šunava so o Devel vićini pe Jehova [. . .] Tumen sikavđen man odova soj tano najvažno ko životi.“ Sar so mothovi akava iskustvo, ked o manuša šunena so o Devel isi le anav odova šaj te menini olengo životi.

MOTHOVEN CENJENJE ASI JEHOVASI ORGANIZACIJA HEM PONODRI

11. Sar šaj o starešine te mothoven so ceninena e Jehovasi organizacija? (Dikh i slika.)

¹¹ Sar o starešine mothovena so ceninena e Jehovasi organizacija? Ked dobinena disave smernice, on valjani pažljivo te čitinen len hem palo odova te trudinen pe te primeninen len. Na primer, on na dobinena smernice samo sar te ićeren disave tačke ko sastankija hem sar te molinen pe asi skupština, već hem sar te brininen pe ando Hristese bakre. Ked o starešine primeninena o smernice, on pomožinena e phralenđe hem e phenjenđe te osetinen pe sigurno hem te haljon so o Jehova brinini pe olendar.

12. (a) Sose valjani te sarađujina okolencar kola predvodinena? (Jevrejima 13:7, 17) (b) Sose valjani te razmislina ando šukar osobine kola isi len o starešine?

¹² Ked dobinaja disave smernice ando starešine, amen valjani spremno te primenina len. Ađahar pomožinaja e starešinenđe polokho te ćeren po zadatko. I Biblija ohrabrini amen te ova poslušna hem podložna okolenđe kola predvodinena. (Čitin Jevrejima 13:7, 17.) Ama, disavo puti odova nane lokho. Sose? Odolese so odola manuša nane savršena. Ako dikhaja olenge negativna osobine ja mane, ađahar samo ka pomožina amare dušmanenđe. Sose phenaja odova? Amare dušmanija mangena te ćhiven amen te sumnjina ko odova so o Devel vodini amen prekali organizacija. Odolese, ako isi amen negativno mišljenje ando starešine, šaj te počmina te ovel amen negativno mišljenje hem andi organizacija hem te našala amaro poverenje. So valjani te ćera te šaj te haljova kola tane amare dušmanija hem te cida amen olendar?

MA NAŠAL TO POVERENJE SEBEPI AVERA

13. Sar e Devlese dušmanija pokušinena te ćeren olesi organizacija te izgledini lošno?

¹³ E Devlese dušmanija mangena o šukar buća kola isi ki Jehovasi organizacija te dićhon sar lošna. Na primer, andi Biblija sikljiljam so o Jehova očekujini olese sluge te oven čista ko fizičko, moralno hem duhovno pogled. Ov phenela so okola kola ćerena odova soj tano lošno hem na kajinena pe, na valjani te oven deo andi skupština (1. Kor. 5:11-13; 6:9, 10). Amen ićeraja amen ki odija zapovest. Odolese, amare dušmanija phenena so na mangaja e manušen, so osudinaja len hem so na prihvatinaja okolen kola tane averćhane amendar.

14. Ko bešela palo hovajba kola vaćerena pe andi Jehovasi organizacija?

¹⁴ Trudin tut te haljove ko napadini amari organizacija. O Satana, o Beng bešela palo sa o hovajba kola vaćerena pe  andi Jehovasi organizacija. Ki Biblija pisini soj tano ov „o dad ando hovajbe“ (Jov. 8:44; Post. 3:1-5). Odolese, šaj te očekujina so ov ka koristini pe manušen te vaćeren hovajba andi Jehovasi organizacija. Odova ćerđa hem ko prvo veko.

15. So ćerđe o religiozna vođe e Isusese hem olese učenikonđe?

¹⁵ Iako e Devleso Ćhavo, o Isus, hine savršeno hem ćerđa but čudija, o Satana prekalo disave manuša širinđa bare hovajba olestar. Na primer, o religiozna vođe phenđe e manušenđe so o Isus ikali e demonen ando manuša sose pomožini le o „vladari ando demonija“ (Mar. 3:22). Ked hine le pharipa, o religiozna vođe phenđe so ov na poštujini e Devle hem ćhivđe e manušen te mislinen so o Isus zaslužini te merel (Mat. 27:20). Kasnije, đi e Isusese učenikija propovedinđe i šukar vest, okola kola protivinđe pe lenđe ćhivđe e „manušen ando avera narodija“ te progoninen len (Dela 14:2, 19). Ki Stražarsko kula kotar 1. decembar 1998. berš objasnini pe o stih ando Dela 14:2 hem uduri pisini: „Okola kola podržinđe e Satana, na prihvatinđe i poruka koja o hrišćanija propovedinđe. Isto ađahar, vaćerđe but lošna buća olendar te bi ćhivena e manušen te mrzinen len hem te na šunen len.“

16. So na valjani te bistra ako šunaja disave hovajba andi amari organizacija?

¹⁶ O Satana niked na ćhinavđa te vaćeri hovajba. Ki Biblija pisini so ov avdije „hovavi celo sveto“ (Otkr. 12:9). Ako šuneja negativna buća andi amari organizacija ja ando phralja kola predvodinena, ma bistri so e Devlese dušmanija ćerđe e Isusese hem olese učenikonđe. Avdije,  e Devleso narodo tano progonimo baš ađahar sar so i Biblija prorekninđa (Mat. 5:11, 12). Odolese, ako haljovaja kastar avena o hovajba, amen na ka verujina ko odova hem ka da sa amendar te zaštitina amen. Sar šaj te ćera odova?

17. So valjani te ćera te na pera ki zamka te verujina ko hovavne priče? (2. Timoteju 1:13; dikh o okvir „ So te ćera ked šunaja hovavne priče?“)

¹⁷ Ma verujin ko hovavne priče. O apostol Pavle dinđa amen jasna smernice so valjani te ćera ako šunaja disave hovavne priče. Ov phenđa e Timotejese te zapovedini disavenđe te na bavinen pe izmišljena bućencar hem te odbacinen len (1. Tim. 1:3, 4; 4:7). Na primer, i beba šaj te lel disavi melali buti ando pod hem te ćhivel ko muj. Ama, jekh zrelo manuš niked na ka ćerel odova sose đanela kobor tano odova opasno. Isto ađahar, ni amen na ka verujina ko hovavne priče sose đanaja kastar avena. Amen ićeraja amen ko ispravno sikljovibe andi Biblija. (Čitin 2. Timoteju 1:13.)

18. Sar šaj te mothova so ceninaja e Jehovasi organizacija?

¹⁸ Ko akava članko razmotrinđam samo trin načinija ko kola e Jehovasi organizacija oponašini e Isuse. Đi proučineja i Biblija, zapazin sar amari organizacija oponašini e Isuse. Pomožin averenđe te ovel len pana pobaro poverenje ki Jehovasi organizacija. Isto ađahar, hem ponodri mothov so isi tut poverenje ađahar so verno ka služine e Jehovase hem ka aćhove paše uzi organizacija koja ov koristini te ispunini pi volja (Ps. 37:28). Hajde sare te mothova so hijam zahvalna asi čast koja isi amen te ova deo ando Devleso narodo.