33. ČLANKO PROUČIBASE
O Jehova brinini pe ando po narodo
E Jehovase jaćha tane upro okola so darana olestar (PS. 33:18)
ĐILI 4 „O Jehova tano mo pastiri“
SOSTAR KA VAĆERA *
1. Sose o Isus molinđa pe Dade te brinini pe ando olese učenikija?
KI RAT angleder te merel, o Isus molinđa pe Dade te brinini pe ando olese učenikija (Jov. 17:15, 20). Naravno, o Jehova uvek brininđa pe ando po narodo, ama o Isus đanđa so o Satana but ka protivini pe e Devlese slugenđe hem so ka valjani lenđe e Jehovasi pomoć te šaj te pobedinen e Benge.
2. Premalo Psalam 33:18-20, sose na valjani te dara ked isi amen problemija?
2 O manuša ko akava sveto, ko kova vladini o Satana, ćerena bare problemija e Isusese učenikonenđe. Odova so on ćerena šaj but te obeshrabrini amen hem sebepi odova šaj te ovel amenđe pharo te aćhova verna e Jehovase. Ama, sar so ka dikha ko akava članko, nane amen sostar te dara. E Jehovase jaćha tane upro amende. Odova značini so ov dikhela amare problemija hem mangela te pomožini amenđe. Hajde te dikha duj primerija andi Biblija kola mothovena amenđe sar o Jehova brinini pe ando pe sluge. (Čitin Psalam 33:18-20.)
KED OSETINAJA AMEN SO HIJAM KOKRI
3. Ked šaj te osetina amen so hijam kokri?
3 Ki skupština isi amen but phralja hem phenja, ama ipak šaj te osetina amen so hijam kokri. Sose? Na primer, o terne šaj te osetinen pe soj tane kokri ked valjani te propovedinen ki škola ja ked selinena pe ki aver skupština. A disave amendar tane tužna ili obeshrabrime hem mislinena so kokri valjani te borinen pe odoleja. Šaj daraja te vaćera averencar ando amare osećanja odolese so mislinaja so avera na ka haljon amen. A podijekh puti, čak pućaja amen da li isi neko ko ćaće brinini pe amendar. Kova god razlog te ovel amen te osetina amen so hijam kokri, odova šaj but te uznemirini amen hem te mislina so niko našti te pomožini amenđe. O Jehova na mangela te osetina amen ađahar. Sose šaj te ova sigurna ko odova?
4. Sose o Ilija phenđa: „Samo me aćhiljum“?
4 Te dikha o primer ando verno prorok o Ilija. Ov 40 dive našlja andi Jezavelja sose oj dinđa sovel so ka mudari le (1. Kralj. 19:1-9). Ked hine kokri ki pećina, ov phenđa e Jehovase: „Samo me aćhiljum [ando sa o prorokija]“ (1. Kralj. 19:10). Ama, ki odija phuv hine pana prorokija. Na primer, o Avdija garavđa 100 prorokonen ki pećina, odolese so i Jezavelja manglja te mudari len (1. Kralj. 18:7, 13). Tegani, sose o Ilija osetinđa pe soj tano kokri? Da li mislinđa so akala 100 prorokija kolen o Avdija garavđa mulje? Da li hine razočarimo so niko na počminđa te služini e Jehovase palo odova so ki gora Karmil o Jehova mothovđa soj tano ćaćutno Devel? Da li mislinđa so niko na haljola ki savi opasnost tano ov hem so niko na brinini pe olestar? Ki Biblija na pisini tačno sar o Ilija osetinđa pe. Ama, amen hijam sigurna so o Jehova haljilo sar o Ilija osetinđa pe hem so đanđa sar te pomožini le.
Ked osetinaja amen so hijam kokri, so šaj te sikljova odolestar sar o Jehova pomožinđa e Ilijase? (Dikh o 5. hem o 6. odlomko)
5. Sar o Jehova pomožinđa e Ilijase te haljol so nane kokri?
5 O Jehova pomožinđa e Ilijase ko but načinija. Podstakninđa le te phenel lese sar osetini pe hem odolese duvar pućlja le: „So ćereja othe?“ (1. Kralj. 19:9, 13). Svako puti, o Jehova pažljivo šunđa le hem odgovorinđa ko olese molitve, ađahar so mothovđa lese soj tano uzo leste hem so isi le bari moć. Isto ađahar, o Jehova uverinđa le so isi pana manuša kola služinena lese ko Izrael (1. Kralj. 19:11, 12, 18). Palo odova, e Ilijase sigurno hine but polokho. Odolese, o Jehova dinđa le nekobor zadatkija. Na primer, phenđa lese te pomazini e Azailo te ovel kralj ki Sirija, o Juj te ovel kralj ko Izrael, a o Jelisej te ovel prorok (1. Kralj. 19:15, 16). Odoleja so dinđa le akala zadatkija hem jekhe amale, e Jeliseje, o Jehova pomožinđa lese te razmislini ando šukar buća. Ama, sar šaj o Jehova amenđe te pomožini ked osetinaja amen so hijam kokri?
6. Aso so šaj te moline tut ked osetineja tut so hijan kokri? (Psalam 62:8)
6 O Jehova podstaknini tut te moline tut olese, sose dikhela save problemija isi tut hem uverini tut so uvek ka šunel tut (1. Sol. 5:17). Ov uživini te šunel pe slugen sar molinena pe (Posl. 15:8). Aso so šaj te moline tut ked osetineja tut so hijan kokri? Sar o Ilija, hem tu šaj te phene lese so brinini tut. (Čitin Psalam 62:8.) Molin tut e Jehovase te pomožini tut te đane so te ćere ked osetineja tut so hijan kokri ili ked hijan tužno. Na primer, ako daraja te vaćere te amalencar ki škola ando odova ko so verujineja, tegani molin tut e Jehovase te del tut hrabrost te vaćere olencar. Čak šaj te rode lestar mudrost te šaj ko šukar način te vaćere te amalencar (Luka 21:14, 15). Ako hijan uznemirimo ili obeshrabrimo, rode e Jehovastar te pomožini tut te vaćere dijekhe zrelo phraleja ili phenjaja. Šaj te moline e Jehova te pomožini okolese kova ka šunel tut te haljol tut. Odolese, vaćer e Jehovase sar osetineja tut, dikh sar ka odgovorini ki ti molitva, prihvatin olesi pomoć hem ka dikhe so na hijan kokri.
Da li šaj te ćere diso pana pobuter ki služba hem te sarađujine averencar? (Dikh o 7. odlomko)
7. So sikljovaja ando Maurisio?
7 O Jehova sarinenđe dela zadatkija kola ćerena amen te ova bahtale. Ov sigurno so o Jehova dikhela hem cenini sa so ćereja ki skupština hem ki služba (Ps. 110:3). Sar šaj odola zadatkija te pomožinen tut te na osetine tut so hijan kokri? Te dikha o primer ando amaro terno phral kova vićini pe Maurisio. * Hari palo odova so krstinđa pe, oleso šukar amal hari pohari mukhlja o ćaćipe. Ov phenela: „Ked dikhljum so mo amal aćhavđa o ćaćipe, pućljum man da li me ka ićerav man ko mo lafi kova dinđum e Jehovase hem da li ka aćhovav deo andi olesi porodica. Osetinđum man so hijum kokri hem so niko na haljola sar osetinava man.“ So pomožinđa akale phralese? Ov phenela: „Đeljum pana pobuter ki služba. Odova pomožinđa man te na mislinav samo upro mande hem te na razmislinav negativno. Ked đeljum ki služba, na osetinđum man so hijum kokri hem hijum le but bahtalo.“ Iako disavo puti našti te đa e phralencar hem e phenjencar ki služba lično, amen ipak šaj te svedočina prekalo telefoni ili te pisina lila hem ađahar šaj te zorjaćera jekh jekhe. So pana pomožinđa akale phralese? Ov phenela: „Isto ađahar, ćerđum pana pobuter buća ki skupština. Dinđum sa mandar šukar te spreminav hem te ićerav me učenička zadatkija. Odolese so sa akava ćerđum, osetinđum so o Jehova hem avera ceninena man.“
KED HIJAM OBESHRABRIME
8. Sar amare problemija šaj te utičinen upro amende?
8 Ko akala poslednja dive šaj te oven amen bare pharipa (2. Tim. 3:1). Ama, amen niked našti te đana ked ka oven amen problemija hem save problemija šaj te oven amen. Na primer, šaj iznenada te aćhova bizo pare, ja šaj o doktori te phenel amenđe so isi amen disavo pharo nabormipe ja šaj te merel amendar neko kas but mangaja. Ko asavke situacije šaj te osetina amen so ućharđe amen o problemija, pogotovo ako on avena jekh palo jekh ili nekobor kotar jekhvar. Ama, ma bistri so o Jehova đanela save problemija isi amen hem šaj te del amen snaga te istrajina ko bilo kova problemi.
9. Kola pharipa hine le o Jov?
9 Razmislin ando odova sar o Jehova pomožinđa pe slugase, e Jovese. Aso kratko vreme, o Jov doživinđa but bare pharipa. Jekhe divese, ov našalđa sa so hine le. Našalđa po barvalipe, pe stoka, olese sluge hine mudarde, čak sa olese ćhave mulje (Jov 1:13-19). Palo odova, đi pana patinđa palo pe ćhave, ov but naborsalo (Jov 2:7). Odobor lošno osetinđa pe so phenđa: „Gadonđa pe maje mo životi! Na mangava više te živinav“ (Jov 7:16).
O Jehova phenđa e Jovese sar brinini pe aso sa odova so stvorinđa te šaj te uverini le so mangela le hem so ka brinini pe hem olestar (Dikh o 10. odlomko)
10. Sar o Jehova pomožinđa e Jovese te istrajini? (Dikh i slika ki naslovno strana)
10 O Jehova brininđa pe ando po sluga o Jov. Odolese so manglja le, ov pomožinđa lese te ovel istrajno hem te aćhol lese verno. Đi vaćerđa oleja, setinćerđa le kobor tano mudro hem so brinini pe ando odova so stvorinđa. Ov vaćerđa lese ando disave životinje (Jov 38:1, 2; 39:9, 13, 19, 27; 40:15; 41:1, 2). Isto ađahar, o Jehova prekalo jekh terno manuš kova vićinđa pe Elijuj ohrabrinđa hem utešinđa e Jove. O Elijuj uverinđa e Jove so o Jehova uvek nagradini pe verno slugen odolese soj tane istrajna. Ama, o Jehova prekalo Elijuj dinđa e Jovese hem disave savetija. O Elijuj pomožinđa e Jovese ađahar so setinćerđa le kobor amen hijam tikne ked uporedinaja amen e Jehovaja kova tano Stvoritelj hem kova ćerđa o nebo hem i phuv (Jov 37:14). Isto ađahar, o Jehova phenđa e Jovese so valjani te molini pe aso odola trin manuša kola grešinđe (Jov 42:8-10). Sar o Jehova amenđe avdije pomožini te istrajina ked isi amen pharipa?
11. Sar i Biblija šaj te pomožini amenđe ked isi amen disave pharipa?
11 Avdije, o Jehova na vaćeri amencar sar e Joveja, ama vaćeri amencar prekalo poklo Lafi, i Biblija (Rimlj. 15:4). Ov utešini amen hem dela amen nada asi budućnost. Te dikha samo nekobor stihija kola šaj te ohrabrinen amen ked isi amen pharipa. Ko poklo Lafi, o Jehova uverini amen so ništa „našti te ulavi amen“ ando oleso mangipe (Rimlj. 8:38, 39). Isto ađahar, uverini amen soj „tano paše uzo sa okola so rodena le“ (Ps. 145:18). O Jehova phenela amenđe so ako ka oslonina amen upro leste, šaj te istrajina ko bilo kova pharipe hem čak te aćhova bahtale (1. Kor. 10:13; Jak. 1:2, 12). E Devleso Lafi phenela amenđe soj tane amare pharipa samo privremena ked uporedinaja len odoleja kobor bare blagoslovija ka oven amen ki budućnost (2. Kor. ). O Jehova obećini amenđe so ka uništini e Benge, kastar avena sa o problemija hem sa okolen kola đana palo leste ( 4:16-18Ps. 37:10). Da li đaneja disave stihija kola šaj te utešinen tut ked ka oven tut pharipa?
12. So o Jehova phenela amenđe te ćera ako mangaja te pomožini amenđe oleso Lafi?
12 O Jehova phenela amenđe so valjani redovno te čitina oleso Lafi hem hor te razmislina odolestar so čitinđam. Ako ićeraja amen ko odova so sikljovaja, amari vera ka ovel pana pobari hem ka ova pana popaše e Devleja. Sebepi odova, ka ovel amen snaga te istrajina ko amare pharipa. Isto ađahar, o Jehova phenela so ka del po sveti duh okolenđe kola osloninena pe upro oleso Lafi. O sveti duh šaj te del amen „but bari snaga“ te šaj te istrajina ko bare pharipa (2. Kor. 4:7-10).
13. Sar i duhovna hrana koja dela amen o verno hem razborito robo pomožini amen te istrajina ked isi amen kušnje?
13 O Jehova prekalo verno hem razborito robo dela amen but člankija, videa hem đilja kola šaj te pomožinen amenđe amari vera te ovel zorali hem te aćhova lese verna (Mat. 24:45). Amen valjani te koristina sa so dela amen e Jehovasi organizacija. Jekh amari phen andi Amerika, akana sigende phenđa kobor tani zahvalno asi duhovno hrana. Oj phenela: „Služinava e Jehovase već 40 berš hem ko sa odola berša hine man but bare problemija kuri morandiljum te mothovav so hijum verno e Jehovase.“ Olake papo gazinđa jekh mato vozači, olako dad hem olaki daj hine but naborme hem palo odova mulje, a oj duj putija hine la rak. So pomožinđa akala phenjaće te istrajini? Oj phenela: „O Jehova uvek brininđa pe mandar. I duhovna hrana koja dela prekalo verno hem razborito robo pomožinđa man te istrajinav. Sebepi odova, hem me šaj te phenav odova so o Jov phenđa: ’Sa đi na merava, na ka ćhinavav te ovav besprekorno!‘“ (Jov 27:5).
Sar šaj te pomožine averenđe ki skupština? (Dikh o 14. odlomko)
14. Sar o Jehova prekalo amare phralja hem phenja pomožini amen ked isi amen pharipa? (1. Solunjanima 4:9)
14 O Jehova sikavi pe slugen sar te mangen hem te utešinen jekh jekhe ked isi len pharipa. (2. Kor. 1:3, 4; čitin 1. Solunjanima 4:9.) Sar o Elijuj, hem amare phralja hem phenja mangena te pomožinen amen te aćhova verna ked isi amen problemija (Dela 14:22). Te dikha o primer andi amari phen i Dajana. O phralja hem o phenja andi olaki skupština but ohrabrinđe la hem pomožinđe la ked olako rom hine but nabormo. Oj phenela: „Hine but pharo, ama baš tegani osetinđam sar e Jehovaso vas pomožini amenđe. O phralja hem o phenja vićinđe amen ko telefoni, alje koro amende, hem dolinđe amen ki angalja. Sa odova pomožinđa maje te istrajinav. Odolese so na vozinava vorda, o phralja hem o phenja uvek vozinđe man ko sastanko hem ked valjanđum te đav ki služba.“ Ćaće hijam bahtale sose isi amen phralja hem phenja kola but mangena amen!
AMEN HIJAM ZAHVALNA E JEHOVASE SO BRININI PE AMENDAR
15. Sose hijam sigurna so šaj te istrajina ko kušnje?
15 Sare ka oven amen problemija. Ama, sar so dikhljam, na valjani kokri te borina amen olencar. Sar jekh dad kova mangela pe ćhaven, o Jehova uvek brinini pe amendar. Ov tano uzo amende, šunela amare molitve hem mangela te pomožini amenđe (Is. 43:2). Sigurna hijam so šaj te istrajina, odolese so o Jehova dela amen sa so valjani amenđe. Ov phenela so šaj te molina amen olese, dinđa amen po Lafi, i duhovno hrana hem e phralen hem phenjen kola ka pomožinen amen ked odova valjani.
16. So valjani te ćera ako mangaja o Jehova hem ponodri te brinini pe amendar?
16 But hijam zahvalna amare nebesko Dadese so brinini pe amendar. Ki Biblija pisini: „Amaro vilo radujini pe sebepi oleso“ (Ps. 33:21). Ked koristinaja odova so o Jehova dela amen prekali pi organizacija, amen mothovaja so hijam zahvalna so brinini pe amendar. Isto ađahar, ako mangaja hem ponodri te brinini pe amendar, valjani diso te ćera. Avere lafencar, ako šunaja e Jehova hem ćeraja odova soj tano šukar anglo lese jaćha, ov hem ponodri ka brinini pe amendar (1. Petr. 3:12).
ĐILI 30 Mo Dad, amal hem Devel