Angleder haljiljam so isi duj važna pućiba ko kola valjani te odgovorini pe: da li o Jehova isi le pravo te ovel o Vrhovno Vladari, avere lafencar da li oleso način sar vladini tano najšukar? hem da li o manuša ka aćhon verna e Jehovase iako isi len kušnje? Ama, ando odova članko haljiljam so odola duj pućiba na valjani te posmatrina posebno. On tane u stvari samo deo ando diso but považno – te posvetini pe e Jehovaso baro anav.

Sose akana odobor naglasinaja so i najvažno buti tani te posvetini pe e Jehovaso anav? Akana ka razmotrina trin razlogija.

Sar prvo, o Satana napadinđa e Jehovaso anav ko edensko vrt. Odoleja so o Satana pućlja e Eva, u stvari phenđa so o Jehova nane velikodušno Devel hem so o smernice kola dinđa len nane šukar. Ov vaćerđa sa suprotno kotar odova so o Jehova phenđa. U stvari, phenđa so o Devel hovavi hem klevetinđa e Jehovaso anav. Ov ulo „Beng“ so značini „klevetnik“ (Jov. 8:44). I Eva verujinđa ko Satanase hovajba hem hine neposlušno e Devlese, odoleja mothovđa so na mangela ov te ovel olako vladari (Post. 3:1-6). Kotar odova dive, o Satana klevetini e Jehovaso anav hem vaćeri hovajba olestar. Okola kola verujinena ko odola hovajba, verovatno ka oven neposlušna e Jehovase. E Devlese narodose odova so klevetini pe e Jehovaso sveto anav tani najbari nepravda. Odova tano o glavno razlog sose isi odobor patnja hem lošnipe ko sveto.

Sar dujto, te šaj te ovel šukar aso sa so stvorinđa, pogotovo e manušenđe hem e anđelenđe, o Jehova ka opravdini po anav ađahar so ka cidel i lađ pe anavestar. Odova tano but važno e Jehovase. Odolese phenela: „Ka posvetinav mo baro anav“ (Jezek. 36:23). O Isus mothovđa aso so tano najvažno e Jehovase verna sluge te molinen pe ked phenđa: „Nek svetini pe to anav“ (Mat. 6:9). Ki Biblija dosta putija istaknini pe kobor tano važno te slavini pe e Jehovaso anav. Aće disave primerija. „Den e Jehovase čast koja oleso anav zaslužini“ (1. Let. 16:29; Ps. 96:8). „Đilaja hvalinen oleso slavno anav!“ (Ps. 66:2). „Zauvek ka slavinav to anav“ (Ps. 86:12). Jekh ando trin situacije ked o Jehova kotar nebo direktno vaćerđa hine ked o Isus ko hram, ko Jerusalim, phenđa: „Mo Dad, proslavin to anav.“ O Jehova odgovorinđa lese: „Proslavinđum le hem palem ka proslavinav le“ (Jov. 12:28). a

Sar trito, e Jehovasi namera tani oleso sveto anav te ovel slavimo zauvek. Razmislin ando odova so ka ovel pali završno  kušnja koja ka ovel pali Hiljadaberšengi vladavina. So tegani o anđelija hem o manuša ka mislinen ando Jehovaso anav? Ko odova vreme, više na ka ovel potreba o manuša te dokažinen pi vernost. Ka oven savršena hem potpuno ispitime. On ka dobinen o večno životi. Isto ađahar, na ka ovel potreba te dokažini pe da li o Jehova isi le pravo te vladini. Tegani, sare kola tane ko nebo hem ki phuv ka oven ko jekhipe hem ka prihvatinen o Jehova te ovel olengo vladari. Ama, so ka ovel e Jehovase anaveja tegani?

Ko odova vreme sare ka đanen i istina ando Jehova hem oleso anav ka ovel potpuno posvetimo. Ama, e Jehovaso anav i dalje ka ovel i najvažno buti e Devlese slugenđe ko nebo hem ki phuv. Sose? Odolese so on ka dikhen sar o Jehova ka nastavini te ćerel but šuže buća. Razmislin ando akava: Odolese so o Isus ponizno ka irini i vlast pe Dadese, o Jehova ka ovel „sa sarinenđe“ (1. Kor. 15:28). Palo odova, o manuša ki phuv ka uživinen ki „slavno sloboda e Devlese ćhavengi“ (Rimlj. 8:21). O Jehova ka ispunini pi namera olese ćhave ko nebo hem ki phuv te oven sar jekh ujedinjeno porodica (Ef. 1:10).

Sar sa akala buća ka utičinen upri e Jehovasi porodica ko nebo hem ki phuv? Sigurno pana ka ovel amen bari želja te hvalina e Jehovaso anav. O psalmista David pisinđa: „Nek ovel hvalimo o Jehova... Nek ovel hvalimo oleso slavno anav ki celo večnost“ (Ps. 72:18, 19). Ki celo večnost, amen hem ponodri ka arakha disave neve hem but šukar razlogija te ćera odova.

Ko anav Jehova tano uključimo sa soj tano povezimo amare Devleja. Oleso anav setinćeri amen ko oleso baro mangipe (1. Jov. 4:8). Amen uvek ka setina amen so o Jehova mothovđa baro mangipe ked stvorinđa amen hem ked obezbedinđa i otkupnina. Uvek ka pamtina so o Jehova vladini pravedno hem pherdo mangipaja. Ama, ka nastavina te osetina e Jehovaso mangipe. Ki celo večnost, ka ova podstaknime te ova popaše amare Dadeja hem đilaja te slavina oleso baro anav (Ps. 73:28).