1. So šaj te pomožini amenđe te sikljova te uživina te proučina o proročanstvija?

 JEKH terno ćhavo kova vićini pe Ben, phenela: „Me but volinava te proučinav o proročanstvija.“ Da li hem tu mislineja ađahar? Ili mislineja soj tano but pharo te haljoven pe o proročanstvija ja čak šaj mislineja soj tano dosadno te proučinen pe. Ama, ako haljoveja sose o Jehova dinđa te pisinen pe o proročanstvija ki Biblija, tu ka počmine te mange len.

2. Sostar ka vaćera ko akava članko?

² Ko akava članko, ka razmotrina sose valjani te proučina e biblijake proročanstvija hem sar šaj te ćera odova. Palo odova, ka razmotrina duj proročanstvija andi Danilosi knjiga hem ka dikha sar šaj akana te pomožinen amen.

3. So valjani te ćera ako mangaja te haljova e biblijake proročanstvija?

³ Ako mangaja te haljova e biblijake proročanstvija, amen valjani te roda pomoć. Na primer, zamislin so valjani te đa ko disavo nepoznato than, ama to amal kova putujini tuvaja but šukar đanela odova than. Ov đanela kaj tačno hijen hem kuri legari svako drumo. Sigurno hijan but bahtalo so ov manglja te avel tuvaja. O Jehova tano sar asavko amal. Ov but šukar đanela so ađićeri amen ki budućnost. Odolese, ako mangaja te haljova e biblijake proročanstvija amen valjani ponizno te molina e Jehova te pomožini amen (Dan. 2:28; 2. Petr. 1:19, 20).

4. Sose o Jehova dinđa o proročanstvija te oven pisime ko oleso Lafi? (Jeremija 29:11; dikh i slika.)

⁴ Sar jekh šukar roditelj, o Jehova mangela olese ćhave te ovel len šuži budućnost. (Čitin Jeremija 29:11.) Avdije,  o roditeljija našti te phenen pe ćhavenđe so ađićeri len ki budućnost, ama o Jehova šaj te phenel amenđe. Ov ko po Lafi dinđa te pisinen pe o proročanstvija te šaj te đana o važna događaja angleder te oven (Is. 46:10). Odolese, e biblijake proročanstvija tane sar jekh poklon ando amaro nebesko Dad. Ama, sar šaj te ova sigurna so e biblijake proročanstvija ćaće ka ispuninen pe?

5. So šaj o terne te sikljon ando Maks?

⁵ Ki škola, amare terne tane okružime okolencar kola hari ili hić na poštujinena i Biblija. Podijekh puti, sebepi odova so on phenena ili ćerena šaj te pojavinen pe sumnje ko terne Svedokija. Odova desinđa pe e phralese kova vićini pe Maks. Ov phenela: „Ked hijum le tinejdžer počminđum te sumnjinav da li me roditeljengi religija tani pravo hem da li i Biblija ćaće avela ando Devel.“ So ćerđe olese roditeljija? Ov phenela: „On aćhilje smirime iako na hine lenđe lokho hem hine but zabrinuta.“ On andi Biblija odgovorinđe ko Maksese pućiba. Ama, hem ov ćerđa diso. Ov pana phenela: „Me kokri proučinđum e biblijake proročanstvija hem vaćerđum odova so sikljiljum avere ternencar.“ So ulo sebepi odova? O Maks ko krajo phenela: „Palo sa odova, hijum le uverimo so i Biblija avela ando Devel.“

6. So valjani te ćere ako isi tut sumnje hem sose?

⁶ Ako sar o Maks počmineja te sumnjine so ki Biblija nane o ćaćipe, ma osetin krivica sebepi odova. Ama, mora te ćere diso. Sose? I sumnja tani sar rđa. Ako na obratinaja pažnja, oj šaj hari pohari te uništini diso soj tano but vredno. Te šaj te cide bilo savi „rđa“ kotar ti vera, valjani te puće tut: „Da li verujinava ko odova so i Biblija vaćeri andi budućnost?“ Ako isi tut disave sumnje, tegani valjani te proučine e biblijake proročanstvija kola već ispuninđe pe. Ama, sar šaj te ćere odova?

7. So pomožinđa e Danilose te proučini o proročanstvija? (Danilo 12:10; dikh i slika.)

⁷ O Danilo mothovđa šukar primer sar te proučina o proročanstvija. Đi proučinđa, ov hine le ispravno motivi, manglja te đanel o ćaćipe. O Danilo hine ponizno manuš. Ov đanđa so o Jehova ka pomožini lese te haljol o proročanstvija ako aćhola paše oleja hem ako šunela le (Dan. 2:27, 28; čitin Danilo 12:10). Ov mothovđa soj tano ponizno ađahar so osloninđa pe upro Jehova (Dan. 2:18). Isto ađahar, temeljno proučinđa o proročanstvija hem aso odova koristinđa o spisija kola hine ko oleso vreme (Jer. 25:11, 12; Dan. 9:2). Sar šaj te oponašine e Danilo?

8. Sose disave manuša proučinena e biblijake proročanstvija, ama so valjani amen te ćera?

⁸ Razmislin ando te motivija. Da li proučineja o proročanstvija odolese so isi tut bari želja te đane o ćaćipe? Ako tano ađahar, tegani o Jehova ka pomožini tuće (Jov. 4:23, 24; 14:16, 17). Ama, disave manuša proučinena o proročanstvija ando  aver razlog. On mangena te dokažinen so i Biblija na avela ando Devel. Odolese, on mislinena so šaj kokri te odlučinen soj tano šukar, a soj tano lošno. Ama, amen valjani te proučina kotar ispravno motivi. Te šaj te haljova o proročanstvija, valjani amenđe jekh važno osobina.

9. Koja osobina valjani amenđe te šaj te haljova o proročanstvija? Objasnin.

⁹ Ov ponizno. O Jehova dela po lafi so ka pomožini e ponizno manušen (Jak. 4:6). Odolese, valjani te molina le te pomožini amen te haljova o proročanstvija. Ako hijam ponizna, amen ka prihvatina so o Jehova prekalo verno hem razborito robo dela amen hrana ko pravo vreme (Luka 12:42). O Jehova tano Devel ando redo, odolese tano logično so ov koristini samo jekh izvor te pomožini amenđe te haljova o ćaćipe ando oleso Lafi (1. Kor. 14:33; Ef. 4:4-6).

10. So sikljoveja andi Ester?

¹⁰ Temeljno proučin. Počmin ađahar so ka birine jekh proročanstvo kova tut zanimini. Odova ćerđa i Ester. Oj manglja te đanel pobuter ando proročanstvija kola prorekninđe so ka avel o Mesija. Oj phenela: „Ked hine man 15 berš počminđum te rodav dokazija so akala proročanstvija hine pisime angleder te avel o Isus.“ Odova so sikljilji đi čitinđa kotar svitkija ando Mrtvo more, uverinđa la so e biblijake proročanstvija tane tačna. I Ester pana phenela: „Disave olendar hine pisime angleder so o Hrist alo ki phuv, odolese o proročanstvija kola tane odothe sigurno tane kotar Devel.“ Oj priznajini: „Te šaj te haljovav len morandiljum nekobor putija te čitinav len.“ Ama, oj tani bahtali so ćerđa odova. Palo odova so temeljno proučinđa nekobor biblijake proročanstvija, oj phenđa: „Šaj hine jasno te dikhav so odova so pisini ki Biblija tano tačno.“

11. Sose tano šukar te uverina amen so odova so pisini ki Biblija tano tačno?

¹¹ Ked dikhaja sar disave proročanstvija ando Devleso Lafi već ispuninđe pe, odova barjaćeri amaro pouzdanje upro Jehova hem pana pobuter verujinaja so ov vodini amen prekalo smernice kola dobinaja. Isto ađahar, o proročanstvija zorjaćerena amari nada asi budućnost, bizo obzir save pharipa isi amen. Akana ka dikha duj proročanstvija andi Danilosi knjiga kola ispuninena pe ko amaro vreme. Ako haljovaja len, amen šaj te ana šukar odluke.

12. So predstavinena o stopala kola tane ando „sastron mešimo kovle glinaja“? (Danilo 2:41-43)

¹² Čitin Danilo 2:41-43. Ko suno kova o Danilo tumačinđa e kraljese, e Navuhodonosorese, o stopala ando kip kova o kralj dikhlja hine ćerde ando „sastron mešimo kovle glinaja“. Ked akava proročanstvo uporedinaja averencar kola tane ki knjiga Danilo hem Otkrivenje, amen haljovaja so o stopala predstavinena i angloameričko  svetsko sila koja tani avdije i najbari svetsko sila. Andi akija svetsko sila o Danilo phenđa so „odova kraljevstvo ko isto vreme ka ovel hem zoralo hem slabo.“ Sose ka ovel hem slabo? Odolese so o obična manuša, kola tane predstavime kovle glinaja, ćhinavena le te koristini pi sposobnost te vladini sastronale snagaja. b

13. Kola važna buća sikljovaja kotar akava proročanstvo?

¹³ Amen šaj te sikljova nekobor buća kotar odova so o Danilo phenđa ando kip. Posebno kotar stopala ando odova kip. Sar prvo, i angloameričko svetsko sila ko nekobor načinija mothovđa soj tani zorali. Na primer, oj hine la ključno uloga ki pobeda ko Prvo hem Dujto svetsko rat. Ama, akija svetsko sila hine slabo hem nastavinđa te slaboni odolese so o građanija borinena pe jekh protiv jekheste hem protiv o vlastija. Sar dujto, akija sila ka ovel poslednjo sila koja ka vladini angleder so e Devleso Kraljevstvo ka uništini sa o manušikane vladavine. Čak iako avera narodija disavo puti šaj ka protivinen pe laće, on na ka zameninen la. Amen đanaja odova odolese so „o bar“, kova predstavini e Devleso Kraljevstvo, ka uništini o stopala, o deo ando kip kova predstavini i angloameričko svetsko sila (Dan. 2:34, 35, 44, 45).

14. Sar odova so haljoveja o proročanstvo ando stopala kotar sastron hem glina pomožini tut te ane šukar odluke?

¹⁴ Da li hijan uverimo so e Daniloso proročanstvo kova vaćeri ando stopala kotar sastron hem glina tano ćaće? Ako ja, tegani ov ka utičini ko odova save odluke akana aneja. Na ka đal to vreme ko odova te oven tut but materijalna buća ko sveto kova pana hari ka ovel uništimo (Luka 12:16-21; 1. Jov. 2:15-17). Ako haljoveja akava proročanstvo, odova ka pomožini tut te dikhe kobor tano važno te propovedine hem te ćere učenikonen (Mat. 6:33; 28:18-20). Akana ked kratko razmotrinđam akava proročanstvo, puć tut: „Da li me odluke mothovena so hijum uverimo so e Devleso Kraljevsto pana hari ka uništini sa o manušikane vladavine?“

15. Kas avdije predstavini o „kralj ando sever“ hem o „kralj ando jug“? (Danilo 11:40)

¹⁵ Čitin Danilo 11:40. Ko 11. poglavlje ki knjiga Danilo vaćeri pe ando duj kraljija ja politička sile kola takmičinena pe jekh protiv aver. Ked uporedinaja akava proročanstvo averencar kotar Biblija, amen haljovaja so avdije o „kralj ando sever“ tane i Rusija hem olake saveznikija, a o „kralj ando jug“ tano i angloameričko svetsko sila. c

16. Kola pharipa doživinena okola upro kola vladini o „kralj ando sever“?

¹⁶ E Devleso narodo upro kova vladini o „kralj ando sever“ doživini direktno progonstvo olestar. Disave Svedokija tane marde hem ćhivde ko phanlipe. Ama, umesto te daravi len, o progonstvo kotar „kralj ando sever“ zorjaćeri olengi vera ko Jehova hem ko oleso Lafi. Sose? Odolese so amare phralja đanena so odova ispunini o proročanstvo andi knjiga Danilo (Dan. 11:41). d Isto ađahar, odova  zorjaćeri olengi nada hem olengi odlučnost te aćhon verna e Jehovase.

17. Đi vladini o „kralj ando jug“, kola pharipa hine le e Devleso narodo angleder, a kola pharipa isi le avdije?

¹⁷ Angleder, hem o „kralj ando jug“ progoninđa e Devlese narodo. Na primer, ki prvo polovina ando 20. veko, but phralja hine ćhivde ko phanlipe, a disave ćhave hine fordime andi škola sebepi so aćhilje neutralna. Ko zadnja nekobor berš, i vera ando Jehovaso narodo kova živini odothe kuri vladini o kralj ando jug, hine ispitimi ko disave avera načinija. Na primer, đi trajinena o izborija aso glasanje, jekh hrišćanin šaj te avel ko iskušenje te podržini disavi političko stranka ja disave kandidate. Odova hrišćanin šaj na ka đal ko glasanje, ama ki pi godi hem ko po vilo šaj te ovel ki nekasi strana. Odolese, te šaj te aćhova neutralna, valjani te pazina na samo ko odova so ćeraja već hem so mislinaja hem so osetinaja (Jov. 15:18, 19; 18:36).

18. Sar reagujinaja ked dikhaja so akala duj kraljija borinena pe? (Dikh i slika)

 ¹⁸ Okola kola na verujinena ko biblijake proročanstvija šaj but te brininen pe ked dikhena so „o kralj ando jug“ borini pe e „kraljeja ando sever“ (Dan. 11:40). Akala kraljija isi len odobor baro oružje so šaj te uništinen celo sveto. Ama, o Jehova na ka mukhel te desini pe odova (Is. 45:18). Odolese, umesto te brinina amen asi budućnost, i mržnja koja isi maškar o „kralj ando jug“ hem o „kralj ando sever“ valjani te zorjaćeri amari vera. Odova mothovi amenđe so o kraj ando akava sveto tano but paše.

19. So valjani te đana ando biblijake proročanstvija?

¹⁹ Amen na đanaja sar disave biblijake proročanstvija ka ispuninen pe. Čak ni o prorok Danilo na haljilo o značenje ando sa odova so pisinđa (Dan. 12:8, 9). Ama, odova so na đanaja sar tačno ka ispuninen pe o proročanstvija na značini so na ka ispuninen pe. Šaj te ova sigurna so o Jehova ka pomožini amen te haljova odova so valjani te đana ko pravo vreme, sar so ćerđa ko purano vreme (Am. 3:7).

20. Kola proročanstvija pana hari ka dikha sar ispuninena pe hem so valjani hem ponodri te ćera?

²⁰ O narodija ka proglasinen „mir hem sigurnost“ (1. Sol. 5:3). Palo odova, o politička sile ka napadinen i hovavni religija hem ka uništinen la (Otkr. 17:16, 17). On ka napadinen e Devlese narodo (Jezek. 38:18, 19). Akala događaja ka legaren đi odova te počmini o maribe, o Armagedon (Otkr. 16:14, 16). Šaj te ova sigurna so sa akava ka ovel pana hari. Đi na avela odova vreme, hajde sare te mothova so hijam zahvalna amare nebesko Dadese ađahar so ka obratina pažnja ko proročanstvija hem ađahar so ka pomožina averenđe te ćeren odova.