1. Sose o Isus uporedinđa pe učenikonen e bakrencar?

O ISUS koristinđa o primer ando pastiri hem ando olese bakre, te šaj te objasnini amenđe kobor tano ov paše pe učenikonencar (Jov. 10:14). Odova primer tano šukar sose o bakre đanena pe pastire hem šunena le. Jekh manuš kokri uverinđa pe ko odova. Ov phenela: „Mangljam te slikina disave bakre. Odolese vićinđam len te aven koro amende. Ama, on na alje sebepi so na penđarđe amaro glaso. Palo odova, alo jekh ćhavo, kova hine olengo pastiri hem samo so vićinđa len, on odmah alje.“

2-3. (a) Sar e Isusese sledbenikija mothovena so šunena oleso glaso? (b) Sostar ka vaćera ko akava hem ko aver članko?

² Akale manušeso iskustvo setinćeri amen ko odova so o Isus phenđa kotar pe sledbenikija. Ov phenđa: „On ka šunen mo glaso“ (Jov. 10:16). Ama, o Isus tano ko nebo. Tegani, sar šaj te phena so amen šunaja oleso glaso? Amen šunaja oleso glaso ked ićeraja amen ko odova so ov sikavđa (Mat. 7:24, 25).

³ Ko akava hem ko aver članko ka dikha disave e Isusese sikljoviba. Sar so ka dikha, o Isus phenđa so disave buća na valjani te ćera. Isto ađahar, ov phenđa kola buća valjani te ćera. Najangleder, ka dikha kola duj buća na valjani te ćera.

4. Premalo Luka 12:29, aso so šaj te brinina amen?

⁴ Čitin Luka 12:29. O Isus podstakninđa pe učenikonen te na brininen pe but ando materijalna buća. Amen đanaja so e Isusese savetija tane mudra hem so uvek tane amare šukaripase. Iako mangaja te ićera amen ko odova so o Isus sikavđa, podijekh puti odova nane amenđe lokho. Sose?

5. Sose but manuša brininena pe?

 ⁵ Disave manuša but brininena pe ando odova so ka han, so ka uraven ja kaj ka živinen. Avera šaj živinena ko phuvja kaj tano baro ćororipe hem kaj tano but pharo te arakhen buti. Odolese, olenđe šaj te ovel but pharo te zaradinen dovoljno pare pe porodicaće. Ja šaj okova so anela pare ko ćher mulo hem i porodica akana nane la sostar te živini. Ko period andi pandemija kotar koronavirus but manuša aćhilje bizi buti (Prop. 9:11). Ako hem tu doživinđan diso slično, sar šaj te mothove so ićereja tut ko odova so o Isus phenđa te na brinine tut?

6. So o apostol Petar jekh puti doživinđa?

⁶ Jekh puti, o Petar hem avera apostolija hine ko čamco ko Galilejsko more. Ama, kotar jekhvar počminđa jekh bari oluja hem tegani on dikhlje e Isuse sar phirela upro pani. O Petar phenđa: „Gospode, ako tu hijan, phen maje te phirav upro pani hem te avav đi tute.“ O Isus vićinđa le te avel hem o Petar ikljilo ando čamco, phirđa upro pani hem đelo premalo leste. „Ama, ked dikhlja kobor tani i bavlal bari,  darandilo hem počminđa te batini hem odolese ko sa o glaso phenđa: ’Gospode spasin man!‘“ O Isus dinđa le po vas hem spasinđa le. Ma bistri so o Petar phirđa upro pani sa đi dikhlja ko Isus. Ama, ked o Petar cidinđa pe jaćha kotar Isus hem ked počminđa te dikhel kobor tani i oluja zorali, ov darandilo hem počminđa te batini (Mat. 14:24-31).

7. So šaj te sikljova ando apostol Petar?

⁷ Amen avdije šaj but te sikljova ando apostol Petar. Ked o Petar ikljilo ando čamco hem ked počminđa te phirel upro pani, ov na mislinđa so ka daral andi oluja hem so ka batini. Ov manglja te phirel upro pani sa đi na avela đi o Isus. Ama, umesto te dikhel ko Isus, ov dikhlja ko odova kobor tani i oluja zorali hem darandilo. Amen avdije našti te phira upro pani. Ama, sar so e Petarese valjanđa vera te šaj te phirel upro pani hem amenđe valjani vera te šaj te istrajina ko amare problemija. Ako bistraja upro Jehova hem upro olese obećanja, amari vera ka slaboni hem amare problemija sigate ka ućharen amen. Odolese, kobor god bare problemija te ovel amen, valjani te razmislina ando Jehova hem ando odova so ov šaj te pomožini amen. Sar šaj te ćera odova?

8. So šaj te pomožini amen te na brinina amen but?

⁸ Amare šukaripase tano te na brinina amen but, već te ovel amen poverenje ko Jehova. Ma bistri so amaro Dad, o Jehova, dinđa po lafi so ka brinini pe amendar ako ćhivaja le ko prvo than (Mat. 6:32, 33). O Jehova mothovđa so ićeri pe ko poklo lafi (Pon. zak. 8:4, 15, 16; Ps. 37:25). Ako ov brinini pe kotar ćiriklja hem kotar luluđa, tegani nane amen nijekh razlog but te brinina amen odolestar so ka ha ja so ka urava (Mat. 6:26-30; Fil. 4:6, 7). Sar so o mangipe podstaknini e roditeljen te brininen pe kotar pe ćhave, isto ađahar o mangipe podstaknini amare Dade te del amen odova so valjani amenđe. Šaj te ova sigurna so o Jehova uvek ka brinini pe amendar.

9. So sikljiljan ando akava iskustvo?

⁹ Te dikha jekh iskustvo kova mothovi sar o Jehova brinini pe ando amare materijalna potrebe. Jekh bračno par kova tano ki punovremeno služba hine len disave purane vorda. On vozinđe jekh sati đi o jekh izbegličko kamp te len disave phenjen hem te vozinen len ko sastanak. O phral phenđa: „Palo sastanak, vićinđam e phenjen te aven amende te ha maro. Ama, tegani haljiljam so nane amen so te ćhiva anglo lende.“ So on ćerđe? O phral phenđa: „Ked aljam ćhere, anglo udara hine duj pherde kese. Amen na đanđam ko mukhlja len odothe. O Jehova ćaće brininđa pe amendar.“ Disavo vreme palo odova olenge vorda ruminđe pe. O vorda valjanđe lenđe sebepi i služba, ama on na hine len sova te popravinen len. O phral legarđa o vorda ko majstori hem đi o vorda hine odothe jekh manuš alo hem pućlja: „Kase tane akala vorda?“ O phral phenđa soj tane olese hem soj tane rumime. O manuš phenđa: „Odova nane važno. Mi romni mangela baš asavke vorda hem baš odija boja. Kobor rodeja?“ O phral bikinđa pe vorda hem hine le dovoljno te ćinel avera vorda. Odova phral ko krajo phenđa: „Našti te objasninav kobor bahtale hijam le odova dive. Amen đanđam so sa odova  na ulo slučajno. Odova hine e Jehovaso vas.“

10. Sar o lafija ando Psalam 37:5 pomožinena amen te na brinina amen odobor?

¹⁰ Ked šunaja amare pastire hem ked na brininaja amen odobor ando materijalna buća, šaj te ova sigurna so o Jehova ka brinini pe amendar (Čitin Psalam 37:5; 1. Petr. 5:7). Setin tut sostar vaćerđam ko  5. odlomko. O Jehova šaj brininđa pe amendar prekalo poglavari ja prekalo neko aver ki porodica ko hine le buti. Ama, so ako o poglavari ki porodica više našti te ćerel buti? Ja so ako aćhiljam bizi buti? Tegani šaj te ova sigurna so o Jehova ka arakhi aver način te brinini pe amendar. Akana hajde te dikha, so phenela amaro šukar pastiri, koja tani pana jekh buti koja na valjani te ćera.

11. Premalo Matej 7:1, 2, so o Isus phenđa amenđe te na ćera hem sose odova šaj te ovel pharo?

¹¹ Čitin Matej 7:1, 2. O Isus đanđa so o manuša tane nesavršena hem so but putija ka dikhen averenge mane. Odolese, ov phenđa: „Ma sudinen.“ Šaj trudinaja amen te na sudina amare phralenđe hem phenjenđe. Ama, sare amen hijam nesavršena. Tegani, so valjani te ćera ako podijekh puti kritikujinaja averen? Šun e Isuse hem ma sudin averenđe.

12-13. Sar šaj e Jehovaso primer te pomožini amen te na sudina averenđe?

¹² Šukar tano te razmislina odolestar sar o Jehova postupini e manušencar. Ov uvek dikhela odova soj tano šukar koro amende. Razmislin sar o Jehova postupinđa e Davideja ked ov ćerđa but bare greške. Na primer, ov ćerđa preljuba e Vitsavejaja hem mudarđa olake rome (2. Sam. 11:2-4, 14, 15, 24). Sebepi odova, o David, olesi porodica hem olese romnja but patinđe (2. Sam. 12:10, 11). Jekh aver puti o David phenđa te đenen olese vojska, iako o Jehova na phenđa lese te ćerel odova. Odoleja mothovđa so nane le poverenje ko Jehova. Ov šaj ćerđa odova sebepi so hine ponosno ko odova kobor bari vojska isi le ja sebepi so mislinđa so i bari vojska šaj te zaštitini le. Ama, so ulo sebepi odova? Oko 70 000 Izraelcija tegani mulje (2. Sam. 24:1-4, 10-15).

¹³ Ked bi tu živineja ko Izrael ko odova vreme, so bi mislineja ando David? Da li bi osudineja le? Da li bi pheneja so na zaslužini o Jehova te oprostini lese? O Jehova na mislinđa ađahar. Ov na bisterđa so o David celo po životi hine lese verno hem so kajinđa pe celone vileja aso lošna buća kola ćerđa. Sebepi odova, o Jehova oprostinđa lese. Ov đanđa so o David mangela le celone vileja hem so manglja te ćerel odova soj tano ispravno. But hijam zahvalna sose amaro Devel rodela odova soj tano šukar koro amende (1. Kralj. 9:4; 1. Let. 29:10, 17).

14. So šaj te pomožini amen te na kritikujina averen?

¹⁴ O Jehova na rodela amendar te ova savršena. Isto ađahar, ni amen na valjani te roda averendar te oven savršena, već valjani te dikha odova soj tano šukar koro lende. But putija tano polokho te dikha averenge mane hem te kritikujina len. Ama, o manuš kova mangela te ovel sar o Jehova šaj šukar te sarađujini averencar iako dikhela olenge mane. O dijamant kova nane obradimo nane odobor šužo. Ama, o mudro manuš đanela kobor tano  vredno hem kobor šužo šaj te ovel. Sar o Jehova hem o Isus, ni amen na valjani te dikha averenge mane, već valjani te dikha olenge šukar osobine.

15. So šaj pana te pomožini amen te na kritikujina averen?

¹⁵ So šaj pana te pomožini amen te na kritikujina averen? Ćhiv tut ko olengo than. Jekhvar, ked hine ko hram, o Isus dikhlja sar jekh udovica ćhivela duj tikne novčićija ki kasica. Ov na pućlja pe: „Sose na ćhivđa pobuter?“ Umesto te dikhel ko odova kobor oj dinđa, o Isus razmislinđa sose oj odova dinđa hem sar živini. Ov pohvalinđa la sose oj dinđa sa so hine la (Luka 21:1-4).

16. So sikljovaja andi phen i Veronika?

¹⁶ O iskustvo andi amari phen i Veronika, mothovi kobor tano važno te razmislina averendar. Ki olaki skupština hine jekh phen koja kokri barjaćeri pe ćhave. I Veronika phenela: „Mislinđum so on na avena redovno ko sastankija hem so na đana redovno ki služba. Sebepi odova, hine man negativno mišljenje olendar. Ama, palo disavo vreme đeljum odola phenjaja ki služba. Oj vaćerđa maje kola pharipa isi la sose olako ćhavo isi le autizam. Oj ćaće dinđa sa pestar te brinini pe kotar po ćhavo hem te aćhol paše e Jehovaja. Podijekh puti sebepi po ćhavo, oj morandilji  te đal ko sastankija ki aver skupština.“ I Veronika ko krajo phenđa: „Na đanđum kobor tano olaće pharo. Akana pana pobuter ceninava la hem poštujinava la sose odobor trudini pe te služini e Jehovase.“

17. Premali Jakovljeva 2:8, so valjani te ćera hem sar šaj odova te ćera?

¹⁷ So valjani te ćera ako dikhaja so but putija kritikujinaja amare phralen hem phenjen? Na valjani te bistra so amen valjani te manga jekh jekhe. (Čitin Jakovljeva 2:8.) Odolese, valjani te molina amen e Jehovase te pomožini amen te na kritikujina averen. Šukar tano te odvojina amaro vreme te šaj pana pošukar te penđara e phrale ja e phenja kas kritikujinaja. Šaj te vićina len ki služba ja te ha maro zajedno. Ked daja sa amendar pošukar te penđara len, ka mothova so mangaja te ova sar o Jehova hem o Isus kola uvek rodena odova soj tano šukar koro amende. Ađahar, ka mothova so šunaja o glaso ando amaro šukar pastiri kova phenela amenđe ma sudinen.

18. Sar šaj te mothova so šunaja o glaso ando šukar pastiri?

¹⁸ Sar so jekh bakro šunela o glaso ando po pastiri, isto ađahar hem okola soj tane e Isusese učenikija šunena oleso glaso. Ako daja sa amendar te na brinina amen odobor ando materijalna buća hem te na sudina averenđe, o Jehova hem o Isus but ka blagoslovinen amen. Bilo amari nada te ovel večno te živina ko nebo ja ki phuv, mangaja te da sa amendar te šuna o glaso ando amaro šukar pastiri (Luka 12:32; Jov. 10:11, 14, 16). Ko aver članko, ka dikha kola duj buća e Isusese učenikija valjani te ćeren.