1-2. (a) So hine phendo trine apostolenđe te ćeren hem sar on reagujinđe? (b) Sostar ka vaćera ko akava članko?

PALI Pasha ko 32. berš ki nevi era, o apostolija, o Petar, o Jakov hem o Jovan dikhlje jekh but šuži vizija. Odija vizija mothovđa lenđe savi moć hem slava o Isus ka ovel le ko po Kraljevstvo. Ki Biblija pisini: „Oleso muj sjajinđa sar o kham, a olese šeja ulje blistava sar i svetlost“ (Mat. 17:1-4). Tegani, o apostolija šunđe e Devle sar phenđa: „Akava tano mo manglo Ćhavo, kova tano pali mi volja. Ole šunen!“ (Mat. 17:5). Odoleja so ćerđe ko po životi, on mothovđe so šunđe e Isuse. Amen mangaja te ćera odova so on ćerđe.

² Ko okova članko sikljiljam so ako mangaja te šuna e Isuseso glaso disave buća na valjani te ćera. Ko akava članko, ka dikha duj buća kola valjani te ćera.

3. Premalo Matej 7:13, 14, so valjani te ćera?

³ Čitin Matej 7:13, 14. Ando akala stihija dikhaja so o Isus phenđa so isi duj različita udara kola legarena ko duj različita drumija, ko „buvlo“ drumo hem ko „tesno“ drumo. Nane trito drumo. Odolese, amen kokri valjani te odlučina ko kova drumo ka đa. Odija tani but važno odluka sose odolestar zavisini da li ka živina zauvek.

4. Savo tano o „buvlo“ drumo?

 ⁴ Valjani te ićera ki godi so odola duj drumija tane but različita. O „buvlo“ drumo tano popularno odolese soj tano lokho te đal pe oleja. Nažalost, but manuša đana ko odova drumo hem ćerena odova so avera ćerena. On na haljona so odova tano e Bengeso drumo hem so ov legari ko meribe (1. Kor. 6:9, 10; 1. Jov. 5:19).

5. So disave ćerđe te šaj te arakhen o „tesno“ drumo?

⁵ O Isus phenđa so aver drumo tano o „tesno“ drumo hem so hari manuša ka arakhen odova drumo. Sose? Ko aver stih o Isus phenđa pe učenikonenđe so ka pojavinen pe o hovavne prorokija (Mat. 7:15). Avdije isi but religije hem svako olendar phenela so sikavi o ćaćipe. Sebepi odova, but manuša tane zbunime hem na đanena ko so te verujinen, čak ni na rodena o drumo kova legari ko životi. Ama, odova drumo šaj te arakhi pe. O Isus phenđa: „Ako ka ićeren tumen ko me sikljoviba, ćaće hijen me učenikija, hem ka penđaren o ćaćipe hem o ćaćipe ka oslobodini tumen“ (Jov. 8:31, 32). Šukar tano so više na ćereja odova so avera ćerena hem so mangeja te đane o ćaćipe. Tu proučinđan e Devleso Lafi te šaj te sikljove so o Devel rodela tutar hem ićereja tut ko odova so o Isus sikavđa. Isto ađahar, sikljiljan so o Jehova rodela amendar te odbacina o hovavne sikljoviba hem te ćhinava o praznikija. Ked mangljan te ćere odova so o Jehova rodela tutar dikhljan so odova nane lokho (Mat. 10:34-36). Isto ađahar, šaj na hine tuće lokho te ćere disave promene ko to životi. Ama, ćerđan odova sebepi so mangeja te Dade hem mangeja te ćere le bahtalo. Šaj samo te zamisline kobor tano bahtalo sebepi so ćerđan sa odova (Posl. 27:11).

6. Premalo Psalam 119:9, 10, 45, hem 133, so šaj te pomožini amen te aćhova ko tesno drumo?

⁶ So šaj te pomožini amen te aćhova ko tesno drumo? Razmislin akalestar: Šaj but putija dikhljan so ko drumo isi zaštitno ograda. Oj tani odothe te na khuven pe o vorda, te na peren o vorda ando drumo hem arakhi okole kova vozini hem olese vorda. Nijekh vozači na ka phenel sose tani i ograda odothe. Ov đanela so oj arakhi oleso životi. Isto ađahar, e Jehovase načelija tane sar odija ograda. On arakhena amen hem pomožinena amen te aćhova ko tesno drumo. (Čitin Psalam 119:9, 10, 45, 133.)

7. Sar o terne valjani te dikhen ko tesno drumo?

⁷ Ako hijan terno, da li podijekh puti mislineja so sebepi o Jehova našti te ćere sa odova so mangeja? O Beng mangela baš ađahar te misline. Ov mangela te dikhe so avera manuša ćerena ko buvlo drumo hem sar uživinena. Ked razmislineja ando odova so ćerena o terne ki škola ja ked ko internet dikheja sar avera uživinena ko životi, šaj avela tuće ki godi so tu na uživineja sar sa avera terne. O Beng mangela te misline so sebepi o Jehova našti te ćere odova so mangeja. * Ama, ma  bistri so o Beng na mangela o manuša kola đana ko buvlo drumo te đanen so ađićeri len. Ki aver strana, o Jehova mangela te đane kobor šukar životi ađićeri tut ako aćhoveja ko tesno drumo (Ps. 37:29; Is. 35:5, 6; 65:21-23).

8. So šaj o terne te sikljon ando Olaf?

⁸ Te dikha so šaj te sikljova ando amaro phral o Olaf. * Olese amala ki škola počminđe te pheren lesi godi so valjani te sovel nekasa. Ked phenđa lenđe soj tano e Jehovaso svedoko hem so mangela te ićeri pe ko odova so pisini ko Devleso Lafi, disave ćhaja kotar oleso razred pokušinđe te nagovorinen le te sovel olencar. Ama, o Olaf ićerđa pe ko odova so sikljilo ando Devleso Lafi. Amaro phral na hine le samo odova problemi. Ov phenela: „Me profesorija ki škola phenđe maje so mora te upisinav man ko fakulteti sose o manuša  pana pobuter ka poštujinen man. Isto ađahar, phenđe so ako na ćerava odova na ka šaj te arakhav buti hem na ka ovav bahtalo.“ So pomožinđa amare phralese te borini pe odoleja? Ov phenela: „Trudinđum man te ovav pana popaše e phralencar hem e phenjencar ki skupština. On ulje maje sar mi porodica. Isto ađahar, pana pobuter proučinđum e Devleso Lafi. So pobuter proučinđum, pana pobuter uverinđum man so akava tano o ćaćipe. Sebepi odova šaj hine verno te služinav e Jehovase.“

9. So rodela pe okolendar kola mangena te aćhon ko tesno drumo?

⁹ O Beng mangela te dikhel sar više na đaja ko drumo kova legari ko životi. Ov mangela te ćere odova so ćerena o manuša kola tane ko buvlo drumo kova „legari ko uništenje“ (Mat. 7:13). Ama, amen ka aćhova ko tesno drumo ako šunaja e Isuse hem ako ko odova drumo dikhaja sar zaštita. Akana ka dikha pana diso so o Isus phenđa so valjani te ćera.

10. Premalo Matej 5:23, 24, so o Isus phenđa so valjani te ćera?

¹⁰ Čitin Matej 5:23, 24. Akate o Isus vaćerđa ando jekh događaj kova hine but važno aso jekh Jevrejin. Zamislin nekas sar tano ko hram hem samo so na dinđa i žrtva e sveštenikose. Ama, ko odova trenutko, ov setini pe so oleso phral isi le diso protiv oleste. Ov mukhela pi žrtva hem đala te rodel le. Sose? So šaj te ovel považno ando odova te del pe žrtva e Jehovase? O Isus phenđa: „Đa hem prvo pomirin tut te phraleja.“

11. So ćerđa o Jakov te šaj te ovel ko mir pe phraleja?

¹¹ Ando Jakov šaj but te sikljova so šaj te ćera te ovel amen mir amare phraleja. O Jakov već 20 berš hine ki tuđo phuv ked o Jehova prekalo jekh anđeo phenđa lese so valjani te irini pe ćhere (Post. 31:11, 13, 38). Ama, hine jekh baro problemi. Oleso phureder phral, o Isav, angleder odobor hine holjamo upro leste so manglja te mudari le (Post. 27:41). O Jakov but darandilo hem brininđa pe so oleso phral tano pana holjamo upro leste (Post. 32:7). So ćerđa o Jakov te šaj te ovel ko mir pe phraleja? Sar prvo, ov ando vilo molinđa pe e Jehovase te pomožini lese. Palo odova, ov bićhalđa baro poklon e Isavese (Post. 32:9-15). Ked reslje pe, ov mothovđa lese baro poštovanje ađahar so pelo lese ko koćja na jekhvar, na duvar već efta putija. Sebepi so hine ponizno hem so mothovđa lese poštovanje, o Jakov šaj hine te ovel ko mir oleja (Post. 33:3, 4).

12. So sikljovaja ando Jakov?

¹² Ando Jakov šaj pana diso te sikljova. Ov najangleder pripreminđa po vilo hem razmislinđa sar te vaćeri pe phraleja. Molinđa e Jehova te pomožini lese. Na samo so molinđa pe te ovel mir maškaro olende, već hem ćerđa diso. Ked reslja pe phrale, o Jakov na vaćerđa oleja koj tano u pravu, a ko na. O Jakov manglja te pomirini pe pekle phraleja. Sar šaj hem amen te ova sar o Jakov?

13-14. So valjani te ćere ako povredinđan nekas?

¹³ Ako mangaja te aćhova ko drumo kova legari ko životi, amen valjani te da  sa amendar te ova ko mir amare phralencar hem phenjencar (Rimlj. 12:18). So valjani te ćere ako povredinđan te phrale ja te phenja? Sar o Jakov, ando vilo molin tut e Jehovase te pomožini tuće te pomirine tut te phraleja.

¹⁴ Isto ađahar, valjani te beša hem te razmislina save amen hijam. Šaj te puće kokri tut: „Da li hijum spremno te phenav so pogrešinđum, te izvininav man hem te pomirinav man odola osobaja? Sar o Jehova hem o Isus ka osetinen pe ako dava sa mandar te ovav ko mir me phraleja ja me phenjaja?“ O odgovor ko akala pućiba šaj te podstaknini amen te šuna e Isuse, te đa te vaćera amare phraleja ja phenjaja hem te pomirina amen. Ked ka ćera odova, ka mothova so mangaja te ova sar o Jakov.

15. Sar odova so ićeraja amen ko načelo ando Efešanima 4:2, 3 pomožini amen te pomirina amen amare phraleja?

¹⁵ Zamislin so bi ovela ked bi o Jakov ovela ponosno hem ked bi raspravini pe pekle phraleja koj tano u pravu. Odova na bi đala ko šukar. Ked amen valjani te vaćera amare phraleja, valjani te ova ponizna. (Čitin Efešanima 4:2, 3.) Ko Poslovice 18:19 pisini: „Te smirine e phrale kova tano uvredimo tano popharo nego te osvojine i diz hem disave svađe tane sar o phanle udara ki tvrđava.“ Ked hijam ponizna hem ked hijam spremna te izvinina amen, odova šaj te pomožini amen te phrava o udara andi „tvrđava.“

16. Sostar valjani te razmislina hem sose?

¹⁶ Angleder te đa te vaćera valjani šukar te razmislina so ka phena hem sar ka phena odova. Ked mislinaja so hijam spremna, valjani te đa hem te vaćera amare phraleja ja phenjaja hem te da sa amendar te pomirina amen. Tegani, on šaj te phenen diso so šaj te povredini amen. Odolese, šaj lokho te holjana hem te opravdina kokri amen. Ama, da li odova ka pomožini amen te ovel mir maškaro amende? Verovatno na. Odolese, ma bistri soj tano najvažno te pomirine tut te phraleja, a na te mothove koj tano u pravu (1. Kor. 6:7).

17. So šaj te sikljove ando Gilbert?

 ¹⁷ Amaro phral o Gilbert but trudinđa pe te ćerel ko odova te ovel ko mir averencar. Ov phenela: „Hine man bare problemija me ćhajaja. Skoro duj berš trudinđum man te vaćerav olaja šukaripaja.“ So o Gilbert pana ćerđa? Ov pana phenela: „Svako puti, angleder te vaćerav olaja, molinđum man e Jehovase hem phenđum kokri maje so na valjani te holjanav ako ka phenel diso so ka uvredini man. Valjanđum te ovav spremno te oprostinav. Haljiljum so nane važno koj tano u pravu, već so valjani te dav sa mandar te pomirinav man olaja.“ So ulo ko krajo? O Gilbert phenela: „Avdije, isi man mir ko vilo sose đanava so sarinencar hijum šukar.“

18-19. So valjani te ćera ako povredinđam nekas hem sose valjani te ćera odova?

¹⁸ Tegani, so valjani te ćere ako povredinđan te phrale ja phenja? Đa hem pomirin tut te phraleja ja te phenjaja sar so phenđa o Isus. Ando vilo vaćer e Jehovaja hem ov sigurno so oleso sveti duh ka pomožini tuće te ćere te ovel mir maškaro tumende. Ako ka ćere odova, ka ove bahtalo hem ka mothove so šuneja e Isuse (Mat. 5:9).

¹⁹ Amen hijam but zahvalna e Jehovase so prekalo Isus Hrist ov sikavi amen so te ćera (Ef. 5:23). Mangaja te šuna e Isuse, sar o Petar, o Jakov hem o Jovan (Mat. 17:5). Odova šaj te ćera ako daja sa amendar te pomirina amen amare phraleja hem ako aćhovaja ko tesno drumo kova legari ko životi. Sebepi odova, ka ova bahtale hem ka ovel amen bare blagoslovija.