Đi hine ko nebo, o Isus barjaćerđa but šuže osobine sebepi kola šaj hine te ovel but šukar saradniko. Sebepi odola osobine, ov hine but šukar primer avere manušenđe. So šaj te sikljova olestar? Ando Isus šaj te sikljova trin buća kola šaj te pomožinen amen te ova šukar saradnikija. Akala buća ka pomožinen amen te ova pana pobuter ko jekhipe amare phralencar.

O šukar saradniko tano ponizno hem na mangela te mothovi soj tano pošukar averendar. O Isus ando po Dad sikljilo te ovel ponizno. Iako jedino o Jehova zaslužini te ovel vićimo Stvoritelj, ov mangela hem avera te đanen kobor bari buti oleso Ćhavo ćerđa. O Jehova phenđa: „Te ćera e manuše premali amari slika“ (Post. 1:26). Ked o Jehova phenđa akala lafija, o Isus dikhlja kobor tano oleso Dad ponizno (Ps. 18:35).

Ked hine ki phuv, o Isus mothovđa soj tano ponizno sar po Dad. Ked avera hvalinđe le aso odova so ćerđa, ov sa i hvala dinđa pe Dadese (Mar. 10:17, 18; Jov. 7:15, 16). O Isus dinđa sa pestar te ovel ko mir pe učenikoncar hem na dikhlja len sar robija, već sar pe amala (Jov. 15:15). Čak thovđa olenge pre te šaj te sikavi len hem on te oven ponizna (Jov. 13:5, 12-14). Isto  ađahar, hem amen valjani te cenina amare saradnikonen, a na samo te dikha amenđe te ovel šukar. But buća šaj te uspina te ćera, ako ceninaja jekh jekhe hem ako na mangaja uvek neko amen te hvalini (Rimlj. 12:10).

Jekh ponizno manuš haljola so „o planija uspinena ked isi but savetnikija“ (Posl. 15:22). Kobor god te ova sposobna ja iskusna, amen na valjani te bistra so na đanaja sa. Čak hem o Isus phenđa so isi buća kola na đanela (Mat. 24:36). Ov manglja te đanel so olese učenikija mislinena (Mat. 16:13-16). Odolese, olenđe hine but šukar oleja! Isto ađahar, ako hijam ponizna, ako na bistraja so na đanaja sa hem ako averen pućaja sar diso te ćera, tegani ka ovel amen mir maškaro amende hem but buća ka uspina te ćera.

But tano važno o starešine te oven sar o Isus ked sarađujinena avere starešinencar. On na valjani te bistren so o sveti duh šaj te delujini ko svako starešina. Ako ko olenge sastankija, o starešine dena sa pestar svako olendar te osetini pe slobodno te phenel so mislini, tegani ka anen odluke kola ka oven aso sarinengo šukaripe.

Đi ćerela buti averencar, jekh šukar saradniko nane zorale šereso. Ov na mangela uvek te ovel palo oleso. But putija, o Isus dikhlja kobor tano oleso Dad razumno. Na primer, iako o manuša zaslužinđe te meren, o Jehova bićhalđa e Isuse te spasini len (Jov. 3:16).

O Isus hine razumno manuš. Jekhvar, ov pomožinđa jekha Feničanka, iako hine bićhaldo te pomožini e Izraelcenđe (Mat. 15:22-28). Isto ađahar, ov ando pe učenikija na rodinđa diso so on našti te ćeren. Na primer, iako o Petar odrekninđa pe olestar, ov spremno oprostinđa lese. Kasnije, čak dinđa le disave bare odgovornostija (Luka 22:32; Jov. 21:17; Dela 2:14; 8:14-17; 10:44, 45). E Isuseso primer mothovi so amari razumnost valjani te ovel penđardi sa e manušenđe (Fil. 4:5).

O manuš kova tano razumno ka ovel spremno te prilagodini pe averenđe. O Isus hine odobor šukar premalo avera so olese dušmanija phenđe soj tano „amal ando poreznikija hem grešnikija“ (Mat. 11:19). Da li hem amen sar o Isus šaj šukar  te sarađujina e manušencar kola tane averćhane amendar? Amaro phral o Luis hine pokrajinsko nadgledniko hem ćerđa buti ko Betel. Sebepi odova, ov hine le prilika te sarađujini bute phralencar. Ov phenela: „Ked ćereja buti e manušencar kola tane nesavršena sar tute, odova tano sar ked mangeja te ćere jekh zido ando bara kola nane ista. Sebepi so sa o bara tane averćhane, valjani but te trudine tut te šaj o zido te ovel pravo. Te šaj i buti te završini pe hem te ovel mir maškaro amende, morandiljum but te ćerav upro mande.“ Savo šužo stav!

Sar šaj te mothova so hijam razumna đi sarađujinaja amare phralencar hem phenjencar? Ked hijam ki služba olencar na valjani te bistra so sare isi amen averćhane odgovornostija premalo amare ćherutne hem nane amen sare ista berša. Odolese, šukar bi ovela te prilagodina amen sarinenđe te šaj sare te ova bahtale ki služba.

Jekh šukar saradniko tano spremno „te ulavi averencar“ odova so đanela (1. Tim. 6:18). Đi ćerđa buti pe Dadeja, o Isus dikhlja so o Jehova ništa na garavi olestar. Ked o Jehova „ćerđa o nebo“, o Isus „hine odothe“ hem šaj hine te sikljol olestar but buća (Posl. 8:27). Ked hine ki phuv, o Isus vaćerđa pe učenikonenđe „sa so šunđa kotar po Dad“ (Jov. 15:15). Amen šaj te oponašina e Jehovaso primer ađahar so ka mothova averenđe odova so đanaja te ćera. O šukar saradniko na ka garavi ando pe saradnikija odova so đanela te ćerel ja diso so šaj te pomožini lenđe, samo te bi mothovi soj tano pošukar olendar. Umesto odova, ov ka ovel bahtalo te mothovi lenđe odova so đanela.

Isto ađahar, amare lafencar šaj te ohrabrina amare saradnikonen. Sar osetineja tut ked neko dikhela kobor trudineja tut hem pohvalini tut? But putija, o Isus pohvalinđa pe učenikonen aso šukar buća kola ćerđe (Uporedin e stihonencar ando Matej 25:19-23; Luka 10:17-20). Ov čak phenđa lenđe so on „ka ćeren pana pobare buća“ olestar (Jov. 14:12). I rat angleder te merel, o Isus pohvalinđa pe verno apostolen ađahar so phenđa lenđe: „Tumen aćhiljen mancar ko me kušnje“ (Luka 22:28). Šaj samo te zamisline kobor olese lafija ohrabrinđe len hem podstakninđe len diso te ćeren! Ako hem amen pohvalinaja amare saradnikonen, tegani on ka oven pobahtale hem ka den sa pestar ki buti.

Jekh amaro phral, kova vićini pe Kajod, phenela: „O šukar saradniko na valjani te ovel savršeno, ama ov ćerela averen te oven bahtale hem sebepi oleso averenđe nane pharo te ćeren buti oleja.“ Da li hem tu hijan asavko saradniko? Sose na pućeja dijekhe phrale ja phenja savo saradniko tu hijan? Ako on uživinena te ćeren buti tuvaja, sar so e Isusese učenikija uživinđe oleja, tegani šaj te phene odova so o apostol Pavle phenđa: „Amen hijam tumare saradnikija te šaj te oven bahtale“ (2. Kor. 1:24).