Da li pažljivo čitinđan akale beršese izdanja andi Stražarsko kula? Ako ja, tegani dikh da li šaj te odgovorine ko akala pućiba:

Ki Jakovljeva 5:11 pisini so o Jehova tano „but samilosno hem milosrdno.“ Ko so uverinena amen odola lafija?

Sebepi soj tano milosrdno, o Jehova tano spremno te oprostini amare greške. O lafija andi Jakovljeva 5:11 uverinena amen so ov mangela te pomožini amen. Šukar tano te ova sar oleste (w21.01, str. 21).

Sose o Jehova disavenđe dinđa te oven poglavarija?

Ov ćerđa odova sebepi so mangela amen hem te šaj ki Jehovasi porodica te ovel mir hem red. Ađahar ki svako porodica đanela pe ko valjani te anel o konačna odluke hem ko valjani te pobrinini pe te ćerel pe odova soj tano odlučimo (w21.02, str. 3).

Sose o hrišćanija valjani te oven oprezna đi koristinena o aplikacije prekalo kola bićhalena hem dobinena poruke?

Ked koristinaja asavke aplikacije, valjani te pazina ko ka oven amare amala. Ki but bari grupa tano pharo te birine te amalen (1. Tim. 5:13). Isto ađahar, ko bare grupe o negativna buća sigate širinena pe, a disave čak biknena, ćinena ja reklamirinena disave buća (w21.03, str. 31).

Sose o Devel mukhlja o Isus te patini hem te merel?

Sar prvo, o Isus hine ćhivdo ko stubo te šaj te oslobodini e Jevrejen ando prokletstvo (Gal. 3:10, 13). Sar dujto, o Jehova sikavđa e Isuse sar te ispunini pi budućo uloga ked ka služini sar Prvosvešteniko. Sar trito, odoleja so aćhilo verno đi o meribe, o Isus mothovđa so o manuša šaj te aćhon verna e Jehovase iako tane ko bare problemija (Jov 1:9-11; w21.04, str. 16-17).

So šaj te ćere ako tano pharo te arakhe e manušen ćhere?

Šaj te arakhe pobuter manušen ako đaja ko vreme ked on tane ćhere. Isto ađahar, šaj te menjine o than kuri propovedineja. Ja šaj te ćere diso aver, sar soj tano te pisine lenđe lil (w21.05, str. 15-16).

So značinena e Pavlese lafija: „Me muljum premalo Zakon?“ (Gal. 2:19)

E Mojsijeso zakon mothovđa so o manuša tane grešna hem legarđa e Izraelcen đi o Hrist (Gal. 3:19, 24). O Zakon pomožinđa e Pavlese te prihvatini e Isuse hem te verujini upro leste. Ađahar, ov mulo „premalo Zakon“ ja hine oslobodimo ando Zakon (w21.06, str. 31).

Ko kola buća tano o Jehova istrajno?

Oleso anav meljaćeri pe, o manuša odbacinena le hem na mangena ov te ovel olengo vladari, disave olese ćhave pobuninđe pe protiv oleste, o Beng stalno vaćeri hovajba olestar, olese sluge patinena, olese amala merena, o lošna manuša dukhavena avere manušen, o manuša nemoralno živinena hem uništinena odova so ov ćerđa (w21.07, str. 9-12).

So kotar o Josif sikljovaja ando strpljenje?

E Josife olese phralja but povredinđe. Hari kasnije, ov hine optužimo aso diso so na ćerđa hem sebepi odova beršencar hine ko phanlipe ko Egipat (w21.08, str. 12).

Ando kova aver tresibe vaćeri pe ko Agej 2:6, 20-22?

Iako avdije isi but manuša kola na mangena te prihvatinen i šukar vest, disave manuša mangena. Pana hari, o manuša pana jekh puti ka oven tresime, ađahar so ka oven uništime (w21.09, str. 15-19).

Sose na valjani te ćhinava te ćera odova soj tano šukar?

Ked o Jehova dikhela kobor trudinaja amen, ov tano bahtalo. Ako na ćhinavaja te ćera odova soj tano šukar, ka ovel amen večno životi (w21.10, str. 25-26).

Sar šaj o 19. poglavlje andi Levitska te pomožini amen te ićera amen ko savet: „Oven sveta ko sa so ćerena“? (1. Petr. 1:15)

Akala lafija verovatno tane lende andi Levitska 19:2. O 19. poglavlje andi Levitska pomožini amen te haljova sar te ićera amen ko odova so pisini ki 1. Petrova 1:15 (w21.12, str. 3-4).